Boasi Luldeq yaol sheeqzaeq vae
4
Boasi milmae heeqmyel e oheiq vae keellael, kaol tyuqvae zhol deelhhei, tyuqfu Boasi gee gol e yultaeq, zaeqdye halngeiq suq duhoq e laqtaq za e paeqyaeq tyuqvae deel laeq. Boasi gee: "Eil, aqsseq aeqnil, saeqvae du'lal kaol qiqlaq bael zholgae hhei." Yoqhhaeq du'li kaol zholgae hhei vae. 2 Boasi milmae heeqmyel e onglci'ae zhol e zhangqlaoq qyel hhaeq gul laeq, kaol yoqhhaeteel'ae gee biq: "Saeqvae zholgae hhei gil." Kaol yoqhhaeteel zholgae hhei vae. 3 Yoqhhaeq suq duhoq e laqtaq za e paeqyaeq'ae gee biq: "Moqya milcaeq ae'lye hoqlal e Naq'oqmiq, aedeeteel e qiqzonglyaeq e algo Yiqlilmiqlel e aeqhael tyu qiq koq, yaeqmeel ongqzaeq maoqlye hhae; 4 Ngael xilmael noq'ae haelmillyekaol eiq geegaeq maoqlye nyuq lil. Nol saeqvae haelzholhael kaol aedeeteel e minqcuq e zhangqlaoqhael e yiqsiboq ae'lye, aeqhael tyu qiq koq vulga hhei. Laefuq hha suq duhoq e qiq hhaeq laoq nol'ae, aeqnaol suq duhoq e qiq hhaeq laoq ngael lil. Nol suq duhoq maoqlaol suq duhoq, maeq suq duhoq kaollaoq geedu hhei, ngaeq'ae bi loq laeq." Yultaeq gee: "Ngael suq duhoq hhaeq." 5 Boasi gee: "Nol Naq'oqmiq aqlaq ae'lye aeqhael tyu qiq koq vulga hhei fu, nol eiq sil e cholyaeq e haeqmiq, Moqya milcaeq e yaeqmiyaeq Luldeq yaol hhae sheeqzaeq hhae, kaol sil e cholyaeq e cholmil mael zaeqdye halngeiq xilmael taq'ae bi zadeel maoqhhae." 6 Aeqhael suq duhoq e laqtaq za e paeqyaeq gee: "Tyulnye kaollaoq ngael maeq hhae suq duhoq yaevae, aeqgael ngaeq e ssuqhaoq'ae halzahael zonglbeeq byel laeqngeel yae. Ngael suq duhoq maoq mael nol suq duhoq aeqmeel, ngael maeq hhae suq duhoq yaevae."7 Yilkaefu, Yiqsellyel vae cholyaeqhael aeqchee'lael'ee suq duhoq kaol heilpael fu, xitaeq paqno mael heiga hheikaol yultaeq'ae heilmoq hhei biq maoqhhae. Xilmael laoq Yiqsellyel cholyaeqhael zoqzenl e loqho'ae. 8 Suq duhoq e laqtaq za e paeqyaeq qiq hhaeq Boasi'ae gee biq: "Nol vul aeqkaovae." Tyulnye laol, paqno mael heiga hhei biq. 9 Boasi zhangqlaoqhael kaol gilzuqmyel cholyaeqhael'ae gee biq: "Yaeqnao noteel gilzuqmyel bael mol e cholyaeqhael'ae. Yiqlilmiqlel, Ji'lianq kaol Maqlunq e halzahael, ngael Naq'oqmiq e aqlaq ae'lye vulpol hoq aeqwae. 10 Ngael eiq Maqlunq haeqmiq, Moqya milcaeq e yaeqmiyaeq Luldeq yaol sheeqtoq hheikaol haeqmiq mul hhaeq, sil e cholyaeq e cholmil mael, yoqhhaeq e zaeqdye halngeiq taq'ae bi zadeel maoqhhae, tyulkaol, yoqhhaeq e cholmil mael aeqyoq e qiqzonglyaeq kaol pusiq vae lye maq gabu yilkiq vae. Yaeqnao noteel gilzuqmyel bael mol e cholyaeqhael'ae." 11 Milmae heeqmyel e oheiq vae zhol deelhhei e cholyaeqhael kaol zhangqlaoqhael gee: "Ngaeteel gilzuqmyel bael mol e cholyaeqhael lil. Yeheqhuaq notoq'ae bi do'lal e haeqmiyaeq xitaeq, Lajyeq kaol Lilyal niq nulhhaeq Yiqsellyel toq'ae ssuqhaoq caqzaq tullaeq laoqmyel ngeel biq lye nyuqlil. Yiqfaqta qiqzonglyaeq ae'lye yohaha lal biq, Boqlilhenq e cholyaeqhael noq e cholmil mael aeqsul eiq loq biq lye nyuqlil. 12 Tamaq lye Yoqdal'ae bo hhei biq e yaqyo Faqlelsi toq laoqmyel, Yeheqhuaq eiq yaeqmiyaeq xitaeq ae'lye noq'ae houldail biq hhei biq lye nyuqlil."
Dalweil toq e qiqzonglyaeq
13 Boasi Luldeq yaol sheeqtoq hheikaol haeqmiq mul hhae, yoqhhaeq nyegael qiqgael ssuqza laol. Yeheqhuaq fupol biq, kaol Luldeq'ae yaeqguqpi li biq vae, kaol yaqyo qiq hhaeq bo hhei. 14 Cholhae aeqmaehael Naq'oqmiq'ae gee biq: "Yeheqhuaq'ae laoq maeqdaeqhhaeq'ae lye gee biq maoqhhae! Yeheqhuaq yaeqnao noq'ae zaeqdye halngeiq suq duhoq e laqtaq za e paeqyaeq qiqzael eiq maeq bi qye'li'ae. Yaeqguq xitaeq e cholmil mael aeqgael Yiqsellyel cholyaeqhael aeqsul eiq loq biq lye nyuqlil. 15 Yoqhhaeq noq e neemae mael bi bae hoqlael, nol yaeqmoqmoq lael fu keellye cu laeq'ae. Yaeqguq xitaeq noq'ae zhee gaeq biq e keeqmae lye bo hhei hhae; keeqmae xitaeq zhol laol, yaqyo siq hhaeq taq'ae hhael meeq." 16 Naq'oqmiq yaeqguq yaol sheeq pol hhei, kaol haelmeeqlye sheeq biq, bael zhaofu biq. 17 Dongqpyeq'ae zhol e cholhae aeqmaehael yaeqguq'ae cholmil bael mil biq, gee: "Naq'oqmiq'ae yuqpaeq zhol vae." Kaol cholmil mael Oqbeildeq lye gul biq hhae; Oqbeildeq laoq Yexi e aeqdae'ae, Yexi laoq Dalweil e aeqdae'ae.
18 Sa'oqboqhael laoq Faqlelsi toq e yuqpaeqhael'ae: Faqlelsi e yaqyo laoq Xisi'lunq'ae. 19 Xisi'lunq e yaqyo laoq Lanq'ae, Lanq e yaqyo laoq Yalmiqnaqdaq'ae. 20 Yalmiqnaqdaq e yaqyo laoq Naqshunl'ae, Naqshunl e yaqyo laoq Saqmenq'ae. 21 Saqmenq e yaqyo laoq Boasi'ae, Boasi e yaqyo laoq Oqbeildeq'ae. 22 Oqbeildeq e yaqyo laoq Yexi'ae, Yexi e yaqyo laoq Dalweil'ae.