Yoshuyal Jil
Momil Yoshuyal'ae neehongq gee hulm biq
1
Yeheqhuaq e yaqhacheqzaq e cholyaeq Moxi sil hhei aeqnaol, Yeheqhuaq laoq Moxi'ae aeqchee'lael'ee balmul biq e Nenl e yaqyo Yoshuyal'ae gee biq: 2 "Ngaeq e yaqhacheqzaq e cholyaeq Moxi sil vae. Yaeqmeel nol tullael, cholyaeqhael nyegael Yoqdanl Lolbaeq xilmael'ae guq yil gil, kaol ngael Yiqsellyel cholyaeq'ae biq biq maoqlye e milcaeq'ae yil maoqhhae. 3 Noteel e aeqkeel paeqhhael mael hael nuq keel e milcaeqhael, ngaeq lye ngael Moxi'ae biq laqngeel lye gee gol biq e saeziq mael laoqmyel noteel'ae biq hhei biq aeqwae. 4 Diqsheelleeldye kaol Liqba'nenl xi milcaeq ae'lye mael lolbaeq baeqmae lye gul e Yolfa'ladiq Lolbaeq vae keellye, kaol Hel cholyaeq e halza milcaeq, kaol Eeldeel Deelmae neelmae leeqdo boq vae keellye, gilzuqmyel noteel e halza e mildongq miljyel geiq maoqlye hhae. 5 Noq e qiqyil e naohaeq'ae, aeqdilmyel cholyaeq qiq hhaeq eiq noq e yiqsi'ae maeq haoqtul deel ongl'ae; ngael haelmillye Moxi nyegael baelzhol laol, noq nyegael eiq tyulnye baelzhol lil; ngael aeqdilmyel noq'ae lye maeq deelsae yil, noq yaol beiq eiq maeq beiqdeelsaeq yil. 6 Nol neemaeha'lye qiqgiq maqguzaq myel ngeel maoqhhae, nol milcaeq tyulmael cholyaeq xihael'ae hhamul gayil e zaeqdye halngeiq bi geiq maoqlye kaol'ae, zaeqdye halngeiq tyulmael laoq, ngael yoqhhaeteel e aeqpyuq aeqdae'ae, yoqhhaeteel'ae biq laqngeel lye faqsilkei gol biq e milcaeq mael ngeelvae. 7 Nol neemaeha'lye, teel eiq maqguzaq myel, kaol ngaeq e yaqhacheqzaq e cholyaeq Moxi noq'ae moqheil hael heil biq e gilzuqmyel lilfaq mael laoqmyel zongl yil kaol haelmeeqlye zongl gaeyil, kaol laqsseq laeqbaelboq'ae bilyoq haq yoq yil laol hhaeq vae, xilnye laol, nol haeqvae yil haoq aeqchee eiq shunl wae. 8 Lilfaq e suqhhaq xilmael noq e myeqbongq ae'lye maeq hhae taelyil'ae, mqkiq mqnao myel duqlye nyuq maoqhhae, xilnye laol, nol suqhhaq xilmael taq'ae hal cu deelhhei e saeziqhael laoqmyel zongl yil kaol haelmeeqlye zongl gaeyil maoqhhae; xilnye laol, noq e gaelmae mael tongl, kaol aeqchee silqinq mael taq vae eiq shunl wae. 9 Ngael noq'ae moqheilheil gol laq maeqngeel maeq? Nol neemaeha'lye qiqgiq maqguzaq myel ngeel maoqhhae, kaol maq gu kael, maeq zongl gaeyil ongl yaevae lye haeq kei, nol haeqvae yil kaol'eiq Yeheqhuaq noq e Momil noq nyegael qiqgael baelzhol kaol'ae."Yoqdanl Lolbaeq vae guq yil maoqlye paeqgaelsael
10 Tyulkaol, Yoshuyal cholyaeqhael e zhiqmoq yoheeqhael'ae moqheilheil biq, gee: 11 "Noteel haqhhael diqkaeq hhei myel vae deeldyu byel hhei, kaol cholyaeqhael'ae moqheilheil biq maoqhhae, gee: 'Zaeqzael paeqgaelsael meeq deelhhei maoqhhae, xi suq nao'ae noteel Yoqdanl Lolbaeq xilmael vae guq yil, kaol noteel e Momil Yeheqhuaq noteel'ae biq laqngeel lye gee gol e zaeqdye halngeiq geiq e milcaeq vae do'li maoqlye kaol'ae.'"
12 Yoshuyal laoq Liuqbenq cholyaeq, Jadeq cholyaeq kaol Maqnaqxi zhipail e qiq pa cholyaeq'ae gee biq: 13 "Noteel laoq Yeheqhuaq e yaqhacheqzaq e cholyaeq Moxi noteel'ae moqheil hael heil biq e saeziq mael nyuqtongq deelhhei maoqhhae, gee: 'Noteel e Momil Yeheqhuaq noteel'ae neemae saelza'lye bi zhol laeq'ae, kaol noteel'ae milcaeq xilmael biq laqngeel lye hhae.' 14 Noteel e haeqmiqhael, yaeqguqhael kaol jyeqyaeqhael, gilzuqmyel Yoqdanl Lolbaeq e neeldu aelheiq boq'ae, Moxi lye noteel'ae biq hhei biq e milcaeq vae bi zholdeelsaeq. Ngeelfeiq, noteel onglci'ae haelzhol e zhee onglzaeq e aqha yobohael, gilzuqmyel daqzhangldiq moqgoq baq hhei, kaol noteel e algo aeqnilhael e laefuq'ae guq yil, kaol noteel yoqhhaeteel'ae baelzongl biq maoqhhae. 15 Yeheqhuaq lye noteel e algo aeqnilhael vae noteel'ae laoqmyel saelza'lye bi zhol, kaol noteel e Momil Yeheqhuaq yoqhhaeteel'ae biq laqngeel lye gee gol e zaeqdye halngeiq geiq e milcaeq mael hhamul fu keellye, noteel laoq noteel hhamul e milcaeq vae caiq hha hoqyi hhae, kaol hhamul gayil e zaeqdye halngeiq geiqzaq, zaeqdye halngeiq tyulmael laoq, Yeheqhuaq e yaqhacheqzaq e cholyaeq Moxi lye, noteel'ae biq hhei biq e Yoqdanl Lolbaeq e neeldu aelheiq boq, neelmae du'lal boq e milcaeq mael ngeelvae."
16 Yoqhhaeteel Yoshuyal'ae geehoq biq: "Nol ngaeteel'ae moqheil hael heil laeq mael, ngaeteel zongl yil hhaeq; nol ngaeteel'ae yil lye gee laeq milcaeq vae, ngaeteel yil hhaeq. 17 Ngaeteel aeqchee silqinq mael taq vae eiq haelmillye Moxi gee mael naelhaeq laol, nol gee mael eiq haelmillye naelhaeq laeqngeel. Noq e Momil Yeheqhuaq Moxi'ae qiqgael baelzhol biq laoqmyel, noq nyegael eiq qiqgael baelzhol biq lye nyuq dyul oqyil. 18 Aeqsul noq e minllinl mael laoqmyel maeq zongl, kaol nol yoqhhaeq'ae moqheil hael heil biq e saeziqhael maeq naelhaeq laol, zonglsil biq maoqhhae. Nol neemaeha'lye qiqgiq maqguzaq myel laol hhaeq vae!"