Momil e haeqpael haelcul mael cutul hhei vae
40
Yeheqhuaq Moxi'ae moqheilheil biq, gee: 2 "Zen'yu cuyiq'ae, nol Momil'ae molli e Momil e haeqpael haelcul mael cutul hhei maoqhhae, 3 Kaol gailminl bongqke mael onglci'ae baqdeel hhei, kaol geqchiq haeqpael maellye bongqke mael cheelchiq hhei. 4 Kaol zaelheel heelda e zaelzhee mael baq do'li, zaelzhee taq'ae moqgoqhael heil da hhei. Denjal mael baq do'li, kaol aeqdael doqhoq keeqdoq hhei. 5 Kaol pulsheel xiangtanq mael gailminl bongqke e yiqsi'ae baqdeel hhei, kaol Momil e haeqpael haelcul e oheiq'ae eechiq haeqpael mael pyeqcheeq da hhei. 6 Pebyel Zaelheel jiltanq mael Momil'ae molli e Momil e haeqpael haelcul oheiq vae baqdeel hhei. 7 Aeqkeel aqlaq ciq fu mul e penq mael Momil'ae molli e haeqpael haelcul kaol jiltanq e kaeqlaeq vae baqdeel hhei, penq mael'ae eelcuq kuq do hhei. 8 Dyekaeq e dongqpyeq dongqjyel vae laoq cheellongl haeqpael yol zongltul hhei, kaol dyekaeq e oheiq'ae cheelchiq e haeqpael mael pyeqcheeq da hhei. 9 Nol gaoyouq maellye Momil e haeqpael haelcul, kaol onglci'ae halzahael'ae soda hhei maoqhhae, kaol Momil e haeqpael haelcul kaol moqgoqhael gilzuqmyel zonglqyel du hheikaol senljyeq wae lye geiq laol, gilzuqmyel senljyeq wae lye peqlal vae. 10 Pebyel Zaelheel jiltanq, kaol jiltanq mael'ae mul e gilzuqmyel moqgoqhael'ae yol soda hhei maoqhhae, kaol jiltanq mael zonglqyel du hheikaol senljyeq wae lye bi geiq laol, jiltanq mael laoq hhael senljyeq jyeqli wae lye peqlal vae. 11 Aeqkeel aqlaq ciq fu mul e penq kaol penq e diqpanq mael'ae yol soda hhei biq, kaol penq mael zonglqyel du hheikaol senljyeq wae lye bi geiq. 12 Nol Yallunq kaol yoqhhaeq e yaqyohael yaol Momil'ae molli e haeqpael haelcul e oheiq vae sheeqlaeq, kaol eelcuq maellye aeqhhaol bi ciq maoqhhae. 13 Yallunq'ae senljyeq aelhongq dumda hhei biq, yoqhhaeq'ae gaoyouq xyecheeq da hhei biq, kaol yoqhhaeq yaol zonglqyel du hheikaol senljyeq wae lye bi geiq, kaol ngaeq'ae fuqsil e jilsi bi geiq. 14 Kaol yoqhhaeq e yaqyohael yaol sheeqlaeq, kaol yoqhhaeteel'ae onglci'ae dum e poljye bi dumda hhei. 15 Nol yoqhhaeteel e aeqdae'ae gaoyouq haelmillye xyecheeq da hhei biq laol, yoqhhaeteel vae eiq tyulnye xyecheeq da hhei biq, kaol yoqhhaeteel yaol ngaeq'ae fuqsil e jilsi bi peqlal. Yoqhhaeteel'ae gaoyouq xyecheeq da hhei biq laol, hae qiqyil e houldailhael vae eiq haeqfu keellye jilsi e mulhhael hhamul wae." 16 Moxi xilnye zongl vae; Yeheqhuaq Moxi'ae haelmillye moqheilheil biq laol, yoqhhaeq tyulnye zongl vae.17 Aeqnaol qiq hoq e zen'yu cuyiq'ae, Momil e haeqpael haelcul mael cutul hhei vae. 18 Moxi lye Momil e haeqpael haelcul mael cutul hhei, kaol duqhongqhongq e diqzol mael zonglda hhei, kaol tyelpyuq zonglda hhei, hunqtiaoq mael shiq du hhei, heeldiq mael zongltul hhei. 19 Yoqhhaeq Momil e haeqpael haelcul holtaq'ae cheelkaeq haeqpael mael eekaeq da hhei, kaol cheelkaeq haeqpael nildu e aqtaq taqli e cheelkaeq haeqpael mael holtaq'ae eekaeq da hhei, xilmael laoq, Yeheqhuaq yoqhhaeq'ae moqheilheil biq laoqmyel hhae. 20 Yoqhhaeq gailminl cuda hhei e haqlo hoba mael bongqke mael'ae heil do hhei, kaol haeqdul mael bongqke niqboq'ae shiq du hhei, kaol bongqke piqkaeq mael bongqke holtaq'ae zonglkaeq hhei. 21 Kaol bongqke mael Momil e haeqpael haelcul vae baq do'li, kaol eekaeq e geqchiq haeqpael mael'ae pyeqcheeq da hhei, kaol gailminl bongqke mael'ae eechiq hhei, xilmael laoq, Yeheqhuaq Moxi'ae moqheil hael heil biq laoqmyel hhae. 22 Yoqhhaeq lye zaelheel baqda e zaelzhee mael Momil'ae molli e haeqpael haelcul onglci'ae, Momil e haeqpael haelcul e beqbian boq vae, geqchiq haeqpael e nildu vae baqdeel hhei. 23 Kaol aqba mael zaelheel baqda e zaelzhee taq'ae baqda hhei, kaol Yeheqhuaq e yiqsi'ae baqdeel hhei, xilmael laoq, Yeheqhuaq Moxi'ae moqheil hael heil biq laoqmyel hhae. 24 Kaol yoqhhaeq lye denjal mael Momil'ae molli e haeqpael haelcul onglci'ae, Momil e haeqpael haelcul e nanqbian boq'ae, zaelheel baqda e zaelzhee e yulboq vae baqdeel hhei, 25 Kaol Yeheqhuaq e yiqsi'ae aeqdael doqhoq keeqdoq hhei, xilmael laoq, Yeheqhuaq Moxi'ae moqheil hael heil biq laoqmyel hhae. 26 Yoqhhaeq pulsheel jiltanq mael Momil'ae molli e haeqpael haelcul onglci'ae, geqchiq haeqpael e yiqsi vae baqdeel hhei, 27 Xiangtanq holtaq'ae laoq, zhee nulsael lael aeqmyel e xiang mael pe hhei, xilmael laoq, Yeheqhuaq Moxi'ae moqheil hael heil biq laoqmyel hhae. 28 Yoqhhaeq Momil e haeqpael haelcul e oheiq'ae cheelchiq e haeqpael mael yol pyeqcheeq da hhei. 29 Kaol Momil'ae molli e Momil e haeqpael haelcul e oheiq vae Pebyel Zaelheel jiltanq mael baqdeel hhei, kaol Pebyel Zaelheel kaol Zaelsiq Zaelheel mael jiltanq mael'ae heelda hhei, xilmael laoq, Yeheqhuaq Moxi'ae moqheil hael heil biq laoqmyel hhae. 30 Kaol yoqhhaeq aeqkeel aqlaq ciq fu mul e penq mael Momil'ae molli e haeqpael haelcul kaol jiltanq e kaeqlaeq vae baqdeel hhei, kaol penq mael'ae eelcuq kuq do hhei, xilnye laol, aeqkeel aqlaq hhae ciq wae. 31 Moxi, Yallunq kaol Yallunq e yaqyohael laoq penq xilmael lye aeqkeel aqlaq ciq gil hhae. 32 Yoqhhaeteel Momil'ae molli e haeqpael haelcul vae do'li, paelsilmyel jiltanq vae deel niqli fu ciq gil hhae, xilmael laoq, Yeheqhuaq Moxi'ae moqheil hael heil biq laoqmyel hhae. 33 Yoqhhaeq Momil e haeqpael haelcul kaol jiltanq e dongqpyeq dongqjyel e dyekaeq'ae cheellongl haeqpael mael tongqtul hhei, kaol dyekaeq e oheiq vae cheelchiq e haeqpael mael pyeqcheeq hhei. Xilnye laol, Moxi mulhhael mul byel vae.
Mqdul kaol rongqyaol
Minq9:15-23
34 Tyuqfu, mqdul lye Momil'ae molli e haeqpael haelcul mael congqkaeq hhei, kaol Yeheqhuaq e rongqyaol mael Momil e haeqpael haelcul vae bong'lye za hhae. 35 Moxi Momil'ae molli e haeqpael haelcul vae maq hha do'li biq'ae, mqdul mael holtaq'ae za deelhhei, Yeheqhuaq e rongqyaol mael Momil e haeqpael haelcul'ae bong'lye za kaol'ae. 36 Haeqfu qiqzael mqdul mael Momil e haeqpael haelcul ae'lye mqmae'ae da'li fu, Yiqsellyel cholyaeqhael laoq deelsae hheikaol deel hhae; 37 Mqdul mael maeq da'li kaollaoq, yoqhhaeteel maeq deelsae kaol maeq deel'ae, kaol mqdul mael da'li fu keellye doq deelhhei hhae. 38 Yoqhhaeteel hael deel gaelmae vae, Yiqsellyel toq e qiqhaoq qiqjyel e ma'ne yiqsi'ae, mqnao'ae laoq, Yeheqhuaq e mqdul mael Momil e haeqpael haelcul holtaq'ae za, mqkiq'ae laoq, aeqzaeq doq mael mqdul onglci'ae za hhae.