Jilsi'ae senljyeq fulchiq aelhongq guq biq
Chu28:1-14
39
Yoqhhaeteel lye honglsael byuqkeel, ziqseq byuqkeel, nyelna'na byuqkeel xihael lye senlsoq vae mulhhael mul fu, dum e zhigaqlye aelhongq guq du hhei; yoqhhaeteel Yallunq'ae senljyeq aelhongq guq hhei biq mael laoq, Yeheqhuaq Moxi'ae moqheil hael heil biq laoqmyel hhae.2 Yiqfuqdeq mael laoq pulsheel laoqmyel byuqkeel, honglsael byuqkeel, ziqseq byuqkeel, nyelna'na byuqkeel, kaol keeldaelnil e ziq e keelpongq xihael lye zongl hhei hhae. 3 Yoqhhaeteel lye pulsheel mael baeqhei'lye diq du hhei, kaol keeldaelnil e pulsheel pulca no du hhei, kaol honglsael byuqkeel, ziqseq byuqkeel, nyelna'na byuqkeel mael nyegael qiqgael hhaq keq hhei, xilmael laoq, alyi guq e laqkiq e aqlaq mael lye hhaq du hhei hhae. 4 Yoqhhaeteel yiqfuqdeq mael'ae baqtaq mael heeheeq e haeqpael niq ca mael, yiqfuqdeq e niqboq'ae guqcaq da hhei. 5 Yiqfuqdeq e zhee meeq e oqlongl mael laoq, yiqfuqdeq mael zongl laoqmyel qiqsheel zongl hhae, kaol pulsheel laoqmyel byuqkeel, honglsael byuqkeel, ziqseq byuqkeel, nyelna'na byuqkeel, kaol xu du hhei e keeldaelnil e ziq e keelpongq xihael lye guq hhei, kaol yiqfuqdeq nyegael qiqgael zonglmaoq hhei mael laoq, Yeheqhuaq Moxi'ae moqheilheil biq laoqmyel hhae. 6 Yoqhhaeteel nyelcullye maqnaoq niq siq zongl du hhei, kaol pulsheel duqhongq vae deiqkoq do hhei, zhang keq laoqmyel Yiqsellyel yaqyohael e cholmil mael keq da hhei. 7 Yoqhhaeq lye baoqshiq xi niq mal yiqfuqdeq e baqtaq e baqtaq mael heeheeq e haeqpael niq mal'ae zonglda hhei, kaol Yiqsellyel cholyaeqhael'ae nyuqdeel biq e haqlo geiq, xilmael laoq, Yeheqhuaq Moxi'ae moqheil hael heil biq laoqmyel hhae.
8 Leelpaq mael laoq alyi guq e laqkiq e aqlaq mael lye guq hhei hhae, yiqfuqdeq zongl mael laoqmyel qiqsheel'ae, pulsheel laoqmyel byuqkeel, honglsael byuqkeel, ziqseq byuqkeel, nyelna'na byuqkeel, kaol xu du hhei e keeldaelnil e ziq e keelpongq xihael lye guq du hhei hhae. 9 Leelpaq mael laoq hae boq eiq qiqsheel maolzae'lye hhae, yoqhhaeteel lye leelpaq mael niq lo zongl hhei, xi niq lo hae qiqboq eiq, maolduboq qiq tol'ae, heeqduboq qiq tol'ae. 10 Yoqhhaeteel lye leelpaq taq'ae baoqshiq sil paiq deiqkoq da hhei: Dilyiq paiq'ae laoq nyelcullye baoqshiq, sheel'yeqlye e yil, nyelcullye yil'ae; 11 Dil'el paiq'ae laoq nyuljyeqlye baoqshiq, honglsael baoqshiq, jin'gangshiq; 12 Dilsan paiq'ae laoq ziqseq maqnaoq, bachi'lye maqnaoq, kaol ziqseq e shuiqjin; 13 Dilsil paiq'ae laoq shuiqcangyil, nyelcullye maqnaoq, nyuljyeqlye yil. Xihael laoq gilzuqmyel pulsheel e duqhongq'ae deiqkoq do hhei hhae. 14 Baoqshiq xihael taq'ae zhang keq laoqmyel Yiqsellyel e yaqyo e qyelniq hhaeq e cholmilhael za hhae, hae qiq siq vae eiq aeqyoyoq e cholmil za, kaol qyelniq zhipail'ae dailbiaoq hhae. 15 Yoqhhaeteel leelpaq mael'ae qiqgiq maq keq e pulsheel maellye pulca diq hhei, pulca mael laoq capyeqpyeq du hhei e alca laoqmyel hhae. 16 Yoqhhaeteel lye pulsheel duqhongq niq mal kaol pulsheel naeq'ongq niq mal yol zongldu hhei hhae, kaol naeq'ongq xi niq mal leelpaq e niqboq e myeqzaeq'ae zongl da hhei. 17 Yoqhhaeteel lye capyeqpyeq du hhei e pulsheel e pulca tyu niq mal leelpaq niqboq e myeqzaeq e nyeqnaeq mael'ae kaltoq hhei. 18 Pulca e baeqjyelboq niqboq laoq duqhongq niq mal'ae kaqdo hhei, kaol yiqfuqdeq yiqsi e baqtaq e baqtaq mael heeheeq e haeqpael mael'ae zonglda hhei. 19 Yoqhhaeteel lye pulsheel e nyeqnaeq niq mal zongl hhei, kaol leelpaq e niqboq'ae, yiqfuqdeq e aq'oqboq e niqboq myeqzaeq'ae zonglda hhei. 20 Pulsheel e nyeqnaeq niq mal yol zongl hhei, kaol yiqfuqdeq yiqsi e baqtaq e baqtaq heeheeq e haeqpael niqboq e aq'oqboq'ae, guqcaq hhei e tyuqvae niqli aeqmyel vae, zhee meeq e oqlongl aqtaqboq'ae zonglda hhei. 21 Yoqhhaeteel honglsael e alca maellye leelpaq e nyeqnaeq kaol yiqfuqdeq e nyeqnaeq mael kaltoq hhei, kaol leelpaq mael yiqfuqdeq e zhee meeq e oqlongl mael'ae kaltoq hhei, xilnye laol, maeq gaepyel yilkiq wae, xilmael laoq Yeheqhuaq Moxi'ae moqheil hael heil biq laoqmyel hhae.
22 Yiqfuqdeq e nildu'ae dum poljye mael laoq haeqpael hhaq e alyi guq kiq laqkiq e aqlaq mael lye zongl hhei hhae, yanqseq mael laoq gilzuqmyel honglsael'ae. 23 Poljye mael e aqtaqboq onglci'ae laoq longl'ee gonglbyu qiq mal taeq du hhei, longl'ee e myeqzaeq laoq daqzhangldiq fu dum e aelhongq e myeqzaeq laoqmyel hhaq du hhei, aeqgael gazi hhei maeqhe lye kaol'ae. 24 Yoqhhaeteel poljye e hongqdongq hongqjyel vae laoq honglsael byuqkeel, ziqseq byuqkeel, nyelna'na byuqkeel kaol xu du hhei e keeldaelnil e ziq e keelpongq xihael lye maelzong aelsiq zonglda hhei. 25 Qiqgiq maq keq e pulsheel maellye shillyul yol xyedu hhei, kaol shillyul mael maelzong aelsiq e kaeqlaeq'ae guq cheeq hhei, kaol poljye hongqdongq hongqjyel e maelzong aelsiq kaeqlaeq'ae: 26 Shillyul qiq mal, maelzong aelsiq qiq siq, shillyul qiq mal, maelzong aelsiq qiq siq lye, poljye e hongqdongq hongqjyel'ae haeqvae eiq zonglda hhei, kaol mulhhael mul fu mul, xilmael laoq Yeheqhuaq Moxi'ae moqheil hael heil biq laoqmyel hhae.
27 Yoqhhaeteel lye hhaq e loqho maellye Yallunq, kaol yoqhhaeq e yaqyohael'ae onglci'ae dum e keeldaelnil e ziq e haeqpael poljye guq hhei biq, 28 Kaol keeldaelnil e ziq e haeqpael e vuqto, kaol keeldaelnil e ziq e haeqpael e zhigaqlye e vuqcongq, kaol xu du hhei e keeldaelnil e ziq e haeqpael e haeqchiq guq hhei biq, 29 Kaol honglsael byuqkeel, ziqseq byuqkeel, nyelna'na byuqkeel kaol xu du hhei e keeldaelnil e ziq e keelpongq xihael lye, alyi guq e laqkiq aqlaq maellye oqlongl yol zongldu hhei, xilmael laoq, Yeheqhuaq Moxi'ae moqheil hael heil biq laoqmyel hhae. 30 Yoqhhaeteel qiqgiq maq keq e pulsheel maellye jilsi e senljyeq vuqcongq taq e paiqpai qiq mal zongl hhei, kaol zhang keq mael laoqmyel, aqtaqboq'ae laoq "senljyeq wae lye Yeheqhuaq'ae biq biq" lye keq da hhei hhae, 31 Kaol honglsael e haeqpael paelca maellye paiqpai mael vuqcongq mael'ae yol kaltoq da hhei, xilmael laoq Yeheqhuaq Moxi'ae moqheil hael heil biq laoqmyel hhae.
Momil'ae molli e haeqpael haelcul mael cu du hhei vae
32 Momil'ae molli e Momil e haeqpael haelcul e gilzuqmyel mulhhael hael xilnye zonglbyel vae. Yeheqhuaq Moxi'ae moqheil hael heil biq hael, Yiqsellyel cholyaeqhael gilzuqmyel tyulnye zongl vae. 33 Yoqhhaeteel lye Momil e haeqpael haelcul mael Moxi tyuqvae ee keelli. Ee'li e Momil e haeqpael haelcul kaol mulyo e moqgoqhael laoq sa'oqboqhael'ae: Lal'oq, tyelpyuq, hunqtiaoq, heeldiq kaol duqhongqhongq e diqzol, 34 Kaol deiqnyel hhei e aqciq ciqpaeq e saeqgeel e eekaeq mael, eelsulm e saeqgeel e eekaeq mael, kaol eechiq e geqchiq haeqpael mael, 35 Kaol gailminl bongqke, bongqke e haeqdul, bongqke piqkaeq, 36 Kaol zaelheel baqda e zaelzhee, zaelheel baqda e zaelzhee taq e gilzuqmyel moqgoqhael kaol zaelheel heel e aqbahael, 37 Kaol qiqgiq maq keq e pulsheel denjal, baqdol deelhhei e aeqdael doqhoq, kaol denjal'ae mul e gilzuqmyel moqgoqhael, kaol aeqdael doqhoq keeqdoq e zhoqcae cil, 38 Kaol pulsheel jiltanq, gaoyouq, zhee nulsael lael aeqmyel e xiang mael, kaol Momil e haeqpael haelcul e oheiq'ae eechiq e haeqpael, 39 Kaol geeqsheel jiltanq, jiltanq e daelkael, jiltanq e haeqdul kaol jiltanq mael'ae mul e gilzuqmyel moqgoqhael, aeqkeel aqlaq ciq fu mul e penq kaol penq e diqpanq, 40 Kaol dyekaeq e cheellongl haeqpael, heeldiq, duqhongqhongq e diqzol kaol dyekaeq e oheiq vae cheelchiq e haeqpael, alca, taeqcuq, Momil e haeqpael haelcul, 41 Kaol senlsoq vae fuqsil fu dum e zhigaqlye aelhongq, jilsi Yallunq e senljyeq aelhongq kaol yoqhhaeq e yaqyohael jilsi zaeqhhael zaeq fu dum e aelhongq mael'ae. 42 Gilzuqmyel mulhhael xihael laoq, Yiqsellyel cholyaeqhael laoq Yeheqhuaq Moxi'ae moqheil hael heil biq laoqmyel zongl vae. 43 Moxi yoqhhaeteel zongl e mulhhael xihael'ae mol hhei biq laol, fu hhei, Yeheqhuaq moqheil haelmillye heil laol yoqhhaeteel haelmillye zongl hhae, kaol Moxi yoqhhaeteel'ae geeqlongq biq biq.