Anxiqriq e tiaoqlil
35
Moxi lye Yiqsellyel huilzhongl cholyaeqhael yaol gul laeq, kaol yoqhhaeteel'ae gee biq: "Xilmael laoq Yeheqhuaq noteel'ae zongl yil lye moqheilheil e silqinq'ae: 2 Koq nao'ae mulhhael mul maoqhhae, dilqiq tian laoq Yeheqhuaq gae'lye qiqgiq eiq maeq zongl myel hhaeqnaeqnaeq gae hhei e senljyeq e anxiqriq lye bi za maoqhhae. Aeqsul xi qiq nao'ae mulhhael mul laol, zonglsil biq maoqhhae. 3 Anxiqriq xi qiq nao'ae, noteel haelzhol myel vae aeqzaeq maeq hhae bodoq'ae."Momil'ae molli e haeqpael haelcul gae'lye fenglxianl moqgoqhael
4 Moxi Yiqsellyel huilzhongl cholyaeqhael'ae gee biq: "Xilmael laoq Yeheqhuaq moqheil hael heil e saeziq'ae, gee: 5 Noteel laoq noteel onglci ae'lye liqvuq heil hheikaol Yeheqhuaq'ae heel biq maoqhhae; heil sheqhhaq hael laoq, Yeheqhuaq'ae heil biq maoqlye e liqvuq mael heil laeq, xihael laoq, pulsheel, pulziq, geeqsheel, 6 Kaol honglsael byuqkeel, ziqseq byuqkeel, nyelna'na byuqkeel, keeldaelnil e ziq e keelpongq, aqciq caeqhum, 7 Kaol nyelcullye deiqnyel hhei e aqciq ciqpaeq saeqgeel, kaol eelsulm e saeqgeel, zaoljaq aelbol, 8 Kaol aeqdael doqhoq keeqdoq e zhoqcae cil, kaol gaoyouq zongl e xiang'liaol, kaol xiang zongl e xiang'liaol, 9 Kaol nyelcullye maqnaoq kaol baoqshiq'ae, nyelcullye haqlo kaol baoqshiq mael laoq yiqfuqdeq kaol leelpaq mael'ae deiqkoq do hhei."
Momil'ae molli e haeqpael haelcul vae mul e moqgoqhael
10 "Noteel onglci'ae aeqsul neemae onglci'ae geel laol gilzuqmyel lael maoqhhae, kaol Yeheqhuaq moqheilheil hael gilzuqmyel zongldu hhei, 11 Zongl maoq e xihael laoq, Momil e haeqpael haelcul, Momil e haeqpael haelcul e cheelkaeq haeqpael mael, Momil e haeqpael haelcul e eekaeq mael, lal'oq, tyelpyuq, hunqtiaoq, heeldiq kaol duqhongqhongq e diqzol, 12 Bongqke, bongqke mael baq e haeqdul, bongqke piqkaeq kaol eechiq e geqchiq haeqpael, 13 Zaelheel baqda e zaelzhee, zaelheel baqda e zaelzhee mael baq e haeqdul, kaol zaelheel baqda e zaelzhee taq'ae mul e halza moqgoqhael, kaol zaelheel heel e aqba, 14 Denjal, denjal mael'ae mul e moqgoq, kaol aeqdael doqhoq kaol aeqdael doqhoq keeqdoq e zhoqcae cil, 15 Xiangtanq, xiangtanq e haeqdul, gaoyouq kaol zhee nulsael lael aeqmyel e xiang mael, kaol Momil e haeqpael haelcul e oheiq vae eechiq e haeqpael, 16 Pebyel Zaelheel jiltanq, jiltanq e geeqsheel daelkael, jiltanq e haeqdul kaol jiltanq mael'ae mul e halza moqgoq, aeqkeel aqlaq ciq fu mul e penq kaol penq e diqpanq, 17 Kaol dyekaeq vae cheellongl haeqpael, heeldiq, duqhongqhongq e diqzol kaol dyekaeq e oheiq vae cheelchiq e haeqpael, 18 Kaol Momil e haeqpael haelcul e taeqcuq, dyekaeq e taeqcuq kaol alca, 19 Kaol senlsoq vae fuqsil fu dum e zhigaqlye aelhongq, Yallunq jilsi e senljyeq aelhongq, kaol yoqhhaeq e yaqyohael jilsi zaeqhhael zaeq fu dum e aelhongq mael'ae."
Cholyaeqhael liqvuq fenglxianl mael
20 Yiqsellyel huilzhongl cholyaeqhael laoq Moxi e yiqsi ae'lye duyil. 21 Aeqsul neemae onglci'ae ganqdongl, kaol heil sheqhhaq hael laoq, gilzuqmyel Yeheqhuaq'ae liqvuq heil laeq mael laoq, Momil'ae molli e haeqpael haelcul kaol hal mulyo e moqgoq zongldu hhei, kaol senljyeq aelhongq guq du hhei maoqlye hhae. 22 Heildu sheqhhaq e cholyaeqhael laoq, haeqmiyaeq haqyoyaeq laoqlye gilzuqmyel lael, kaol haetaeq eiq pulsheel moqgoq heil laeq, heil laeq hael laoq, byeqzhen, naeq'ongq, gailzangkei lael e nyulbaeq, kaol kongqlongl'ae doq e pulca, pulsheel moqgoq xihael laoq Ssu'ni Zaelheel geiq, kaol Yeheqhuaq'ae heil laeq biq. 23 Halza e honglsael byuqkeel, ziqseq byuqkeel, nyelna'na byuqkeel, keeldaelnil e ziq e keelpongq, aqciq caeqhum, deiqnyel hhei e aqciq ciqpaeq e saeqgeel, kaol eelsulm e saeqgeel, gilzuqmyel heil laeq vae; 24 Aeqsul liqvuq geiq maoqlye e pulziq kaol geeqsheel mael heildu sheqhhaq e cholyaeqhael laoq, gilzuqmyel liqvuqhael heil laeq kaol Yeheqhuaq'ae heel biq; aeqchee'lael'ee moqgoq zongldu e zaoljaq aelbol za hael eiq gilzuqmyel heil laeq vae. 25 Aeqsul neemae onglci'ae geel kaol aeqyoyoq e aqlaq maellye palhhaqhhaq kiq e cholhae aeqmaehael, caeqkeel'o du hhei e honglsael byuqkeel, ziqseq byuqkeel, nyelna'na byuqkeel, kaol keeldaelnil e ziq e keelpongqhael eiq gilzuqmyel heil laeq. 26 Aeqsul geel kaol neemae onglci'ae ganqdongl biq e cholhae aeqmaehael laoq, gilzuqmyel aqciq e caeqhum maellye caeqkeel'o lal gil. 27 Zhiqmoqhael lye nyelcullye maqnaoq, baoqshiq kaol yiqfuqdeq kaol leelpaq mael'ae deiqkoq do hael, gilzuqmyel heil laeq vae, 28 Kaol yoqhhaeteel laoq, xiang kaol gaoyouq zongl e xiang'liaol, aeqdael doqhoq keeqdoq fu mul e xiang'liaol kaol zhoqcae cil heil laeq vae. 29 Yiqsellyel cholyaeq, haeqmiyaeq haoq haqyoyaeq haoq, aeqsul neemae onglci'ae ganqdongl biq laol, Yeheqhuaq'ae heil biq e Heilsheqhhaq Zaelheel mael heil laeq vae, xilnye zongl mael laoq, Yeheqhuaq Moxi ae'lye cholyaeqhael'ae mulhhael mul maoq hhae lye moqheilheil biq e mael mul maoqlye hhae.
Momil'ae molli e haeqpael haelcul cu e laqkiqhael
30 Moxi Yiqsellyel cholyaeqhael'ae gee biq: "Naelhaeq, Yoqdal zhipail onglci e Hul'eq e yuqpaeq, Wu'lil e yaqyo Biqsa'lyel, Yeheqhuaq yoqhhaeq e cholmil mael geedu hheikaol saelpodu hhei wae, 31 Momil e yohael mael yoqhhaeq'ae bong'lye yol bi za, kaol yoqhhaeq'ae bi geel, bi kyul, zhishiq bi za, kaol maeq qiqsheel e mulhhael eiq mul kiq. 32 Aeqchee'lael'ee yanglziq nyuq du kiq, kaol pulsheel, pulziq, geeqsheel maellye maeq qiqsheel e moqgoq zongldu hhei ongl. 33 Aeqchee'lael'ee onglci'ae deiqkoq do e baoqshiq keq du hhei kiq, aelbol keq kiq, kaol maeq qiqsheel e mulhhael yol mul kiq. 34 Yeheqhuaq yoqhhaeq'ae, kaol Danl zhipail onglci e Yalxisaqmoq e yaqyo Yalheqlilyalboq'ae, cholyaeq vae geemyeq kiq e neemae mael yol biq hhei biq. 35 Yeheqhuaq lye yoqhhaeteel e neemae'ae geel mael bong'lye bi za, kaol aeqchee qiqsheel mulhhael eiq zongl kiq'ae, aeqchee'lael'ee taqdu e mulhhael haoq, aeqchee'lael'ee yanglziq nyuq du ongl mulhhael haoq, honglsael byuqkeel, ziqseq byuqkeel, nyelna'na byuqkeel, kaol keeldaelnil e ziq e keelpongq xihael lye guq e mulhhael haoq, haeqpael hhaq e mulhhael haoq, yoqhhaeteel gilzuqmyel zongl kiq'ae, kaol aeqchee'lael'ee yanglziq eiq nyuq du hhei ongl hhae.