Gailminl cuda hhei e haqlo hoba mael zongldu hoq hhei
Shen 10:1-5
34
Yeheqhuaq Moxi'ae gee biq: "Nol haqlo hoba niq mal taq du hhei, laefuq mael laoqmyel ngeel maoqhhae; ngael laoq noq lye beiqxul e haqlo hoba tyulmael taq'ae laefuq cuda hhei e zil mael, haqlo hoba xilmael'ae cuda hhei maoq. 2 Naeshoq mqshoq, nol paeqgaelsael meeq hhei maoqhhae, kaol Xi'nail Geeqzhoq vae da'li, kaol geeqzhoq vuqduq tyuqvae ngaeq e yiqsi'ae haoqtul deelhhei. 3 Qiq hhaeq eiq noq nyegael maeq hhae bal da'li'ae, geeqzhoq qiq zhoq myel cholyaeq zhol e haeq bi mol lael, geeqzhoq aeqkeel'ae aqciq aeqnuqhael eiq haelsaeq maq hha gazaq'ae." 4 Kaol Moxi lye laefuq laoqmyel haqlo hoba niq mal taq du hhei. Yoqhhaeq mqshoq naqlye tullael, kaol Yeheqhuaq yoqhhaeq'ae moqheilheil biq laoqmyel Xi'nail Geeqzhoq vae da'li, kaol aqlaq mael'ae laoq haqlo hoba niq mal heil hhei hhae. 5 Yeheqhuaq mqdul onglci'ae lye loq gayi, kaol Moxi nyegael tyuqvae qiqgael haoqtul deelhhei, kaol aeqyoq e cholmil Yeheqhuaq mael yotyel ha'lye geedu hhei. 6 Yeheqhuaq yoqhhaeq e yiqsi ae'lye deelpol duyil, kaol yotyel ha'lye geedu hhei, gee:"Yeheqhuaq, Yeheqhuaq laoq hhaoqsaeqsaeq mael,
kaol enhuil za e Momil'ae,
hhaoqli hhaoqzaeqlye laoq faqhoq maeq kei'ae,
kaol neemae maeqpaelmyel gaeq mael,
kaol zaqgiq maqgiq mael duqgongqgongqlye za hhae,
7 Hae qiq cheq e cholyaeqhael vae eiq
neemae maeqpaelmyel gaeq mael taeq deelhhei biq'ae,
kaol hhae bi chenqfaq e golsiq, zonglzhil mael kaol golsiq siqmae mael maeq bi pi'ae,
golsiq za hael'ae laoq aeqdilmyel golsiq maqza'ae lye maeq hhae gee'ae,
aeqdilmyel cholyaeq e golsiq mael'ae chenqfaq maoqlye hhae,
aeqdae ae'lye mael yaqyo'ae, sul cheq yuq cheq'ae keellye chenqfaq maoqlye hhae."
8 Moxi nae'naemyel milcaeq vae vuqduqtongq gae hheikaol heel hhae, 9 Gee: "Hhaoqsongl o, ngael noq e ma'ne yiqsi ae'lye endianq hhamul kaollaoq, Hhaoqsongl ngaeteel onglci'ae qiqgael bael deel laeq lye geezaeq lil. Xiteel laoq guaeq'ei guqhenq e cholyaeq'ae lye feiq, nol ngaeteel e hhae bi chenqfaq e golsiq kaol golsiq siqmae mael shelmianq laeq lye geezaeq lil, kaol ngaeteel yaol noq e cholyaeq bi geiq laq."
Geemeeq deelhhei mael zail qiq pu gee
Chu 23:14-19; Shen 7:1-5; 16:1-17
10 Yeheqhuaq gee: "Naelhaeq, ngael geemeeq deelhhei maoq, noq e cholyaeqhael e yiqsi'ae maeqdaeqhhaeq e silqinq zongldu hhei maoqlye lil, silqinq xilmael laoq, halza milcaeq, halza e goqja vae maeq zongl gol yil. Noq e dongqpyeq e haelzhol minqcuqhael laoq Yeheqhuaq haelzongl e silqinq mael mol maoqlye hhae, ngael noq ae'lye haelzongl mael laoq gu lal aeqmyel e silqinq kaol'ae.
11 "Ngael yaeqnao noq'ae moqheil hael heil biq mael, nol haelmeeqlye zongl gaeyil maoqhhae. Naelhaeq, ngael noq e yiqsi ae'lye Yalmoqlil cholyaeq, Ja'nanq cholyaeq, Hel cholyaeq, Biqlilxiq cholyaeq, Xiveil cholyaeq kaol Yebulsi cholyaeq yaol lyeqdu maoq. 12 Nol aeqyae'lye kei maoqhhae, nol hal yil maoqlye e tyuqvae milcaeq vae zhol e cholyaeqhael nyegael maeq hhae geemeeq deelhhei'ae, aeqgael yoqhhaeteel laoq noteel onglci e hhaekeiq peqlal maeqhe. 13 Nol yoqhhaeteel e jiltanq mael cheqga biq, kaol yoqhhaeteel e zongltul deelhhei kaol heel gil mael diqxul biq, yoqhhaeteel e Yalshella mael de'qye biq maoqhhae. 14 Baeqjyelboq e momilhael'ae maeq hhae heel'ae, Yeheqhuaq laoq heiqcilnael e Momil'ae, yoqhhaeq e cholmil mael laoq heiqcilnael e qiq hhaeq lye kaol'ae. 15 Nol tyuqvae milcaeq e cholyaeqhael nyegael maeq hhae geemeeq deelhhei'ae, yoqhhaeteel laoq aeqyoyoq e momilhael nyegael neemaeba gil kaol'ae; kaol yoqhhaeteel momilhael'ae heel biq fu, cholyaeq noq'ae bael lael lye gul laeq laol, nol yoqhhaeq e zaelheel mael zaeq kiq'ae. 16 Nol noq e yaqyohael'ae yoqhhaeteel e yaeqmiq yaol haeqmiq sheeq biq kaollaoq, yoqhhaeteel e yaeqmiq laoq aeqyoyoq e momilhael'ae heel gil laol, noq e yaqyohael eiq yoqhhaeteel lye bi cheeqmu hheikaol yoqhhaeteel e momilhael'ae bael heel yil kiq'ae.
17 "Aeqyoyoq gae'lye momilhael e yanglziq mael maq hha xyedu zaq'ae.
18 "Nol ngael noq'ae moqheil hael heil biq laoqmyel Paofenq Maqzoq Zaeqnao zaeq maoqhhae, Yalbiq'yu'ae geemeeq deelhhei e naohaeq'ae paofenq maqzoq e aqba siq nao zaeq maoqhhae, nol laoq Yalbiq'yu tyu qiq siq'ae Aijiq ae'lye duyil kaol'ae.
19 "Fuqbo hael laoq gilzuqmyel ngaeq hhae; aeqnuq haoq aqciq haoq, gilzuqmyel fuqbo e aeqpyul e jyeqyaeqhael gilzuqmyel zonglqyel du hhei maoqhhae. 20 Fuqbo e mao'lyu vuqtu mael aeqyol yolyaeq maellye suq duhoq. Mao'lyu mael maeq suq duhoq kaollaoq, mao'lyu e kongqlongl mael tyelco biq. Fuqbo yaqyohael gilzuqmyel suq duhoq hhei maoqhhae. Aqlaq alngeiqmyel ngaeq'ae qiq hhaeq eiq maeq hhael mol lael'ae.
21 "Koq nao nol mulhhael mul maoqhhae, dilqiq tian laoq hhaeqnaeqnaeq, zaelsiq kaezaeq paelsilmyel heillezaq fu eiq hhaeqnaeqnaeq maoqhhae. 22 Meqziq zhoq mao lael laol yeqzaeq fu, Qi'qi Zaeqnao zaeq maoqhhae, qiq hoq e aeqnaol naolli fu Heil'eeqhoq Zaeqnao zaeq maoqhhae. 23 Noq e haelzhol e haqyoyaeqhael qiq hoq suq pu, Yiqsellyel e Momil Hhaoqsongl Yeheqhuaq'ae molli maoqhhae. 24 Ngael noq e yiqsi ae'lye haelnaeqmyel goqja hael lyeqdu maoq, kaol noq e mildongq miljyel mael bi hhael heeq duyil. Nol qiq hoq suq pu da'li, kaol noq e Momil Yeheqhuaq'ae molli fu, noq e milcaeq mael mul maoqlye chifuzaeq e cholyaeq qiq hhaeq eiq maeq zhol'ae.
25 "Ngaeq'ae heel laeq e jyeqyaeq e siq mael, kaol paofenq zoq e zaeqzael mael qiqgael maeq hhae heelda hhei'ae. Yuq'yeqjyeq e heel e jyeqyaeqhael mqshoq'ae maeq hhae taeq keel'ae. 26 Milcaeq ae'lye hhael meeq e zhoq mao lael e zaelsiqhael, noq e Momil Yeheqhuaq e heelhaol vae heil li biq. Aqciq ciqmae e aeqchil maellye yoqhhaeq e ciqyaeq mael maq hha caqzaq'ae."
27 Yeheqhuaq Moxi'ae moqheilheil biq: "Nol saeziq xihael cuda hhei maoqhhae, ngael saeziq xihael lye nol kaol Yiqsellyel cholyaeqhael nyegael geemeeq deelhhei maoqlye kaollil." 28 Moxi laoq Yeheqhuaq e tyuqvae zaeqzael maeq zaeq, eelcuq maeq dol myel, mqkiq mqnao myel yuqqyel nao zhol aeqwae. Yoqhhaeq lye geemeeq deelhhei e saeziq, tyu gailminl qyel mael, haqlo hoba mael'ae cuda hhei vae.
Moxi Xi'nail Geeqzhoq vae lye gaeyi
29 Moxi Xi'nail Geeqzhoq vae lye gaeyi fu, aqlaq mael'ae gailminl cuda hhei e haqlo hoba niq siq heil hhei hhae. Moxi geeqzhoq vae lye gaeyi fu, Moxi laoq aeqyoyoq e maduq e saeqgeel mael, Yeheqhuaq nyegael saeziq gee'naeq gol gae'lye, zheelniqlye hhae lye maeq loq biq'ae. 30 Yallunq kaol Yiqsellyel cholyaeqhael Moxi yaol mol hhei biq, fu hhei, yoqhhaeq e maduq e saeqgeel mael zheelniqlye hhae, kaol yoqhhaeteel gu biq kaol yoqhhaeq'ae maeq deel niqli peq biq'ae. 31 Moxi yoqhhaeteel yaol gul laeq, Yallunq, kaol huilzhongl e yoheeqhael yoqhhaeq tyuqvae hoq keellael vae, kaol Moxi yoqhhaeteel nyegael saeziq gee'naeq biq. 32 Aeqnaol, Yiqsellyel cholyaeqhael gilzuqmyel deelniq laeq, kaol yoqhhaeq lye Yeheqhuaq Xi'nail Geeqzhoq vae lye, yoqhhaeq'ae haelgee biq e saeziqhael gilzuqmyel yoqhhaeteel'ae moqheilheil biq. 33 Moxi yoqhhaeteel nyegael saeziq gee byel hhei'laol, paelsheel maellye maduq mael eechiq hhei vae. 34 Ngeelfeiq, Moxi Yeheqhuaq e yiqsi'ae do'li kaol yoqhhaeq nyegael saeziq geechoq fu ae'lye mael duhoq yi fu keellye, paelsheel maeq heilkaeq'ae. Moxi duyi laol yoqhhaeq'ae moqheilheil biq hael, Yiqsellyel cholyaeqhael'ae geegaeq biq maoqlye hhae. 35 Yiqsellyel cholyaeq Moxi e maduq, kaol yoqhhaeq e maduq e saeqgeel mael zheelniqlye mol hhei gil biq. Moxi maduq mael'ae paelsheel maellye heilkaeq hhei, yoqhhaeq do'li kaol Yeheqhuaq nyegael saeziq geechoq fu caiq heilgae hhei wae siq.