Gongyil kaol neemae qiqboq vae eiq maeqpol mael
23
Maeqngeel maeqngeelmyel maeq hhae geegaeq duyil'ae; cholba nyegael saeqsael maeq dye myel e zoqzenl maeq hhae kei'ae. 2 Cholyaeqhael nyegael maeqmeeqmyel maeq hhae zongl'ae; zhiqmoqkae e silqinq taq'ae neemae qiqboq vae eiq maeqpol hhaeq'ae, cholyaeqhael maeqmeeqmyel haelgee mael maeq hhae bael gee'ae, kaol saeqsael maeq dye myel e zoqzenl maeq hhae kei'ae; 3 Zhiqmoqkae e silqinq taq'ae saeqyaeq boq vae eiq maeq hhae polzaeq'ae.4 Nol noq e diqrenq e gaelmae deelbael biq e aeqnuq, paelsilmyel mao'lyu mael deelpuq hhei kaollaoq, aeqdilmyel cheel hoqyi kaol yoqhhaeq'ae cheelmoq hoq hhei biq. 5 Nol noq'ae neemasu zaq e cholyaeq e mao'lyu mael chengdyeqlye aeq'yel lye yaqtyeq deel biq mol hhei kaollaoq, maeq hhae deelsae'ae, aeqdilmyel yoqhhaeq nyegael mao'lyu e chengdyeqlye aeq'yel mael bal baqga biq maoqhhae.
6 "Saeqyaeqhael e zhiqmoqkae e silqinq mael taq'ae zaqgiq maqgiq hhaeq'ae. 7 Jaq e zenljul maellye zhiqmoqkae e silqinq mael haeq bael zongl. Qiqgiq maeq zonglba yo e cholyaeq kaol gongyil e cholyaeq yaol maq hha xyeq'ae, ngael laoq aeqdilmyel cholba laoq gongyil e cholyaeq'ae lye maeq kei kaollil. 8 Ochoq lye baqheel hhei laeq mael maeq daeqzaeq hhaeq'ae, ochoq lye baqheel hhei maellye ma'ne mol congl e cholyaeq eiq mabyeq peqyil kiq'ae, kaol gongyil e cholyaeq e zoqzenl e saeziq mael hoq mael maq hoq'ae lye gee'ae.
9 "Baelzhol lael e cholyaeq'ae maeq hhae zonglkyuq biq'ae, noteel laoq Aijiq milcaeq vae baelzhol gol, kaol baelzhol lael e cholyaeq e neemae haelmillye hhae lye loq kaol'ae."
Anxiqnianq kaol anxiqriq
10 "Nol koq hoq laoq aeqhael mulzaeq, kaol aeqhael ae'lye du'lal hael heil'eeqzaeq maoqhhae. 11 Ngeelfeiq, dilqiq nianq laoq nol aeqhael mael hhaeqnaeq bi naeq maoqhhae, aeqhael maeq qeiq maeq kae laol, noq e cholyaeqhael onglci e saeqyaeqhael'ae zaeq e hhae bi za wae; kaol yoqhhaeteel lye maeq zaeq byel myel zadeel hael laoq, haeldye vae zhol e byeljyeqhael hhae zaeq'ae. Noq e siqbaq aeqhael kaol zhoqcae aeqhael mael vae eiq xilnye zongl maoqhhae. 12 Koq nao laoq nol mulhhael mul maoqhhae, dilqiq tian laoq hhaeqnaeqnaeq, kaol aeqnuq, mao'lyuhael vae eiq hhaeqnaeq bi naeq hhei, kaol noq e yaqhacheqzaq e haeqmiyaeq e yaqyo kaol baelzhol lael e cholyaeqhael'ae aqha bi bo hoqlael.
13 "Ngael noteel'ae haelgee biq saeziqhael laoq, noteel haelmeeqlye zongl gaeyil maoqhhae. Baeqjyelboq e momil e cholmil mael laoq maeq hhae gee'ae, myeqbongq maellye ochoq'ae maeq hhae geegaeq biq'ae."
Zaeqnao suq sheel
Chu 34:18-26; Shen 16:1-17
14 "Qiq hoq suq pu, nol ngaeq'ae zaeqnao zaeq lael laeq maoqhhae. 15 Nol Paofenq Maqzoq Zaeqnao zaeq maoqhhae, kaol ngael noq'ae moqheilheil biq laoqmyel, Yalbiq'yu onglci'ae geemeeq deelhhei naohaeq vae paofenq maqzoq e aqba siq nao zaeq maoqhhae, nol laoq baehae xi qiq siq'ae Aijiq ae'lye deelsae kaol'ae. Aeqsul eiq aqlaq alngeiqmyel ngaeq'ae maeq hhae mol lael'ae. 16 Nol Zaelsiq Yeqzaeq Zaeqnao zaeq maoqhhae, kaol haeldye vae hael kae hhei hael, kaol duqhee'lye mul du hhei e zhoq mao lael e zaelsiq mael heil'eeq hoq maoqhhae. Nol qiq hoq aeqnaol naolli'ae haeldye ae'lye hhaeqdyuldyul lye heil'eeqzaeq fu, Heil'eeqhoq Zaeqnao zaeq maoqhhae. 17 Haelzhol e haqyoyaeqhael laoq qiq hoq suq pu Hhaoqsongl Yeheqhuaq'ae heel lael kaol mol lael maoqhhae. 18 "Nol ngaeq e zaelheel heel e jyeqyaeq e siq kaol paofenq zoq e zaeqzael mael qiqgael maeq hhae heelda'ae, ngaeq e zaeqnao onglci'ae heel e jyeqyaeq e cil mael mqshoq'ae keellye maeq hhae taeq keel'ae. 19 Haeldye vae hhaelmeeq meeqli e zhoq mao lael e zaelsiq mael noq e Momil Yeheqhuaq e heelhaol onglci'ae heil keelli maoqhhae. "Aqciq ciqmae e aeqchil maellye yoqhhaeq e ciqyaeq mael maq hha caqzaq'ae."
Biq laqngeel lye gee mael kaol geetae mael
20 "Fu hhei, ngael mqmae yosongl yaol noq e laefuqboq'ae moqheilheil du hhei maoq, kaol noq'ae gaelmae vae bi ocongq, kaol noq yaol ngaeq lye paeqgaelsael meeq deelhhei myel milcaeq vae sheeq keelli. 21 Noteel yoqhhaeq e yiqsi'ae aeqyae'lye kei maoqhhae, kaol yoqhhaeq e saeziq mael naelhaeq maoqhhae. Yoqhhaeq gee mael maeq naelhaeq yil lye maeq hhae zongl'ae, maeqngeel laol, yoqhhaeq noteel lye zonglzhil mael maeq yuanqliangl laeq'ae, yoqhhaeq laoq ngaeq e cholmil maellye lael kaol'ae.
22 Nol aeqdilmyel yoqhhaeq e saeziq mael naelhaeq, ngael haelgee laoqmyel zongl yil kaollaoq, ngael laoq noq e chouqrenq yaol chouqrenq'ae lye za biq maoq, noq e diqrenq yaol diqrenq'ae lye za biq maoq.
23 "Ngaeq e mqmae yosongl laoq noq e laefuqboq'ae deel, kaol noq yaol Yalmoqlil cholyaeq, Hel cholyaeq, Biqlilxiq cholyaeq, Ja'nanq cholyaeq, Xiveil cholyaeq, kaol Yebulsi cholyaeq tyuqvae bi sheeq keelli maoq, kaol ngael yoqhhaeteel yaol aeqdilmyel zonglmye maoqlye lil. 24 Nol yoqhhaeteel e momilhael'ae vuqduq maeq hhae tongq biq kaol maeq hhae fuqsil biq'ae, yoqhhaeteel e beideelhhei mael maeq hhae bael zongl'ae, ngeelfeiq, momilhael gilzuqmyel cheqga byel maoqhhae, kaol yoqhhaeteel e zongltul deelhhei kaol heel gil mael diqxul byel maoqhhae. 25 Noteel laoq noteel e Momil Yeheqhuaq'ae fuqsil biq maoqhhae, yoqhhaeq noq e zaelsiq kaol eelcuq mael'ae geeqlongq biq biq'ae, noq e onglci ae'lye naelgol mael eiq beiqgae laeqngeel lye hhae. 26 Nol zhol myel'ae yaeqguq gaeyil biq e maeq zhol, yaeqguq maeq bo kiq eiq maeq zhol'ae. Ngael noq e aeqyil mael bong'lye bi zhol bong laeqngeel. 27 Nol hael keelyil e milcaeq laoq, ngael tyuqvae e cholyaeqhael yaol noq e yiqsi ae'lye bi gu li maoq, kaol aeqchee zongl maoqlye maeq loq myel bi zongl li maoq, xilnye laol, noq e gilzuqmyel diqrenqhael zipol hheikaol kisae maoqlye hhae. 28 Ngael laoq baeqdul mael noq e laefuqboq'ae moqheilheil du hhei maoq, kaol Xiveil cholyaeq, Ja'nanq cholyaeq, kaol Hel cholyaeqhael yaol noq e yiqsi ae'lye lyeqdu maoq. 29 Ngael qiq hoq kaeqlaeq ae'lye yoqhhaeteel yaol noq e yiqsi ae'lye maeq lyeqdu hhei'laol, aeqgael milcaeq mael cholgulcillye peqyil hhei, kaol byelcongq e byeljyeq naeqlael laol noq'ae hail lal maeqhe. 30 Ngael aeqyae aeqyae'lye yoqhhaeteel yaol noq e yiqsi ae'lye lyeqdu maoq, kaol noq e cholyaeq naeq beq lal, kaol milcaeq tyulmael hhamul gayil e zaeqdye halngeiq geiq fu keellye xilnye zongl maoq. 31 Ngael noq e haeldongq haeljyel mael geemeeq deelhhei maoq, Hongqhaiq ae'lye mael Fei'lilshil Eeldeel Deelmae keellye, kaol diqsheelleeldye ae'lye mael lolbaeq baeqmae tyu qiq mal'aea keellye. Ngael tyuqvae milcaeq vae zhol e cholyaeqhael yaol noq e aqlaq'ae eemoq maoq, kaol nol laoq yoqhhaeteel yaol noq e yiqsi ae'lye lyeqdu hhei. 32 Yoqhhaeteel kaol yoqhhaeteel e momil nyegael maeq hhae geemeeq deelhhei'ae. 33 Yoqhhaeteel noq e milcaeq vae maeq hhae baelzhol'ae, aeqgael yoqhhaeteel lye noq yaol ngaeq'ae bi zonglzhil lael maeqhe. Nol yoqhhaeteel e momilhael'ae fuqsil biq kaollaoq, nol haelzongl mael noq e hhaekeiq peqlal wae."