Geemeeq deelhhei gae'lye yuldu hhei e siq
24
Yeheqhuaq Moxi'ae gee biq: "Nol, Yallunq, Naqdaq, Yalbiqhul kaol Yiqsellyel zhangqlaoqhael onglci e siqqyel hhaeq gilzuqmyel Yeheqhuaq saeqvae da'lal maoqhhae, kaol gaelmaolsae'lye vuqduqtongq maoqhhae. 2 Moxi qiq hhaeq maoqlaol Yeheqhuaq'ae maeq hhae niqli'ae, baeqjyelboqhael laoq maeq hhae niqli'ae; cholyaeqhael eiq yoqhhaeq nyegael qiqgael maeq hhae da'lal'ae."3 Moxi geeqzhoq ae'lye gaeyi, kaol cholyaeqhael'ae Yeheqhuaq e gilzuqmyel minllinl mael, kaol faqdianq mael cholyaeqhael'ae geedu gil biq. Cholyaeqhael hhaellaelmyel geehoq biq: "Ngaeteel Yeheqhuaq moqheil hael heil e saeziqhael laoqmyel zongl yil hhaeq." 4 Moxi lye Yeheqhuaq minllinl e saeziqhael gilzuqmyel cuga hhei vae.
Yoqhhaeq mqshoq tullael laol, geeqzhoq e aeqkeel vae jiltanq qiq mal zongl hhei, kaol Yiqsellyel qyelniq zhipail gae'lye, haqlo sseeldongq qyelniq mael baqtul hhei. 5 Yoqhhaeq Yiqsellyel e yaqyoyaeq yaol moqheilheil du hhei, kaol Pebyel Zaelheel bi heel yil'ae, aeqnuq yol bi xyeq hheikaol Neesaelhhae Zaelheel geiq, kaol Yeheqhuaq'ae heel biq. 6 Moxi lye siq qiq pa mael ciqpenq mael'ae kuq do hhei, baeqjyelboq qiq pa laoq jiltanq taq'ae beiqxeiq da hhei. 7 Aeqnaol, yoqhhaeq geemeeq deelhhei e saeziq cuda hhei e suqhhaq mael heil laeq, kaol cholyaeqhael'ae duq gaeq gil biq hhae. Yoqhhaeteel gee: "Ngaeteel Yeheqhuaq moqheilheil e saeziqhael laoqmyel zongl yil hhaeq, kaol naelhaeq hhaeq." 8 Moxi laoq siq mael cholyaeqhael e aeqhhaol'ae beiqxeiq da hhei gil biq hhae, gee: "Fu hhei! Xilmael laoq geemeeq deelhhei gae'lye yuldu hhei e siq'ae, gee deelhhei e xilmael laoq, Yeheqhuaq lye gilzuqmyel minllinl xihael lye noteel nyegael geemeeq deelhhei e zenljul mael ngeelvae."
9 Moxi, Yallunq, Naqdaq, Yalbiqhul, kaol Yiqsellyel e zhangqlaoqhael onglci e siqqyel hhaeq gilzuqmyel da'li, 10 Kaol Yiqsellyel e Momil yaol mol hhei vae. Yoqhhaeq e aeqkeel holhhaq vae laoq honglsael e baoqshiq gaelmae pu du hhei laoqmyel hhae, kaol mqmae laoqmyel geelxu'lye hhae. 11 Yoqhhaeq aqlaq mael Yiqsellyel yoheeq e aeqhhaol'ae maeq tyuq da hhei'ae. Yoqhhaeteel Momil'ae chifu, zaeq eiq zaeq dol eiq dol gil'ae.
Moxi Xi'nail Geeqzhoq vae zhol
12 Yeheqhuaq Moxi'ae gee biq: "Nol geeqzhoq vae da'lal kaol ngaeq e saeqvae lael, tyuqvae lye ngael ngaeq lye cu hhei e lilfaq kaol gailminl cuda hhei e haqlo hoba mael noq'ae biq laqngeel, xilnye laol, nol yoqhhaeteel'ae hhae geemyeq biq wae." 13 Moxi kaol yoqhhaeq'ae aeqchee'lael'ee balmul biq e Yoshuyal tullael; kaol Moxi laoq Momil e geeqzhoq'ae da'li vae. 14 Moxi zhangqlaoqhael'ae gee biq: "Noteel laoq ngaeteel saeqvae hoq keellael fu keellye, ngaeteel'ae saeqvae doq deelhhei laeq. Fu hhei, Yallunq kaol Hul'eq noteel nyegael qiqgael zhol'ae. Aeqsul zhiqmoqkae maoqlye laol, yoqhhaeteel'ae saelpo yil."
15 Moxi geeqzhoq'ae da'li, mqdul lye geeqzhoq mael congqkaeq hhei. 16 Yeheqhuaq e rongqyaol mael Xi'nail Geeqzhoq vae zhol deelhhei, mqdul lye geeqzhoq mael'ae koq nao congqkaeq aeqwae, dilqiq tian yoqhhaeq mqdul onglci ae'lye Moxi'ae gul biq hhae. 17 Yeheqhuaq e rongqyaol mael Yiqsellyel cholyaeq e ma'ne yiqsi'ae, aeqchee eiq meqdo zaq kiq e aeqzaeq doq laoqmyel geeqzhoq vuqduq vae zhol hhae. 18 Moxi mqdul onglci'ae do'li, kaol geeqzhoq vae da'li. Moxi geeqzhoq vae mqkiq mqnao myel yuqqyel nao zhol aeqwae.