Senlsoq gae'lye fenglxianl mael
25
Yeheqhuaq Moxi'ae moqheilheil biq, gee: 2 "Nol Yiqsellyel cholyaeqhael vae ngaeq'ae liqvuq heil laeq laeq lye moqheilheil biq. Yoqhhaeteel ngaeq'ae heil sheqhhaq e liqvuq mael laoq, noteel gilzuqmyel daeqzaeq aeqmeel. 3 Yoqhhaeteel ae'lye daeqzaeq maoq e liqvuq hael laoq, pulsheel, pulziq, geeqsheel, 4 Kaol honglsael byuqkeel, ziqseq byuqkeel, nyelna'na byuqkeel, keeldaelnil e ziq e keelpongq, aqciq caeqhum, 5 Nyelcullye deiqnyel hhei e aqciq ciqpaeq e saeqgeel, eelsulm e saeqgeel, kaol zaoljaq aelbol, 6 Kaol aeqdael doqhoq keeqdoq e zhoqcae cil, gaoyouq zongl e xiang'liaol, kaol xiang zongl e xiang'liaol, 7 Kaol yiqfuqdeq kaol leelpaq mael'ae deiqkoq do hhei e nyelcullye maqnaoq kaol baoqshiq mael'ae. 8 Yoqhhaeteel ngaeq'ae senlsoq cu laq maoqlye hhae, kaol ngaeq yaol yoqhhaeteel onglci'ae bi zhol laeq. 9 Momil e haeqpael haelcul kaol onglci e halza e moqgoqhael e yanglziq mael, noteel ngael noq'ae tyuqmyeq biq laoqmyel zongl yil maoqhhae."Yoqguil haelmillye zongl lye gee mael
10 "Yoqhhaeteel zaoljaq aelbol maellye bongqke qiq mal zongldu hhei maoqhhae, maolduboq laoq qiqhael qiqqyel (110) gongfen, heeqduboq koqqyel koq gongfen, gaoboq koqqyel koq gongfen, 11 Nol bongqke onglci nildu'ae qiqgiq maq keq e pulsheel bao da hhei, myeqzaeq yuqboq myel pulsheel e huabian zonglda hhei maoqhhae. 12 Pulsheel nyeqnaeq yuq mael xyedu hhei, kaol bongqke aeqkeel yuq mael taq'ae zonglda hhei maoqhhae; xiboq'ae nyeqnaeq niq mal, yulboq'ae nyeqnaeq niq mal zonglda hhei. 13 Zaoljaq aelbol maellye haeqdul niq mal zongl hhei, kaol pulsheel bao da hhei. 14 Kaol haeqdul mael bongqke dongqpyeq e nyeqnaeq mael'ae shiq do hhei, xilnye laol, bongqke mael baq sael wae. 15 Haeqdul xilmael laoq nyeqnaeq onglci'ae bi zadeel maoqhhae, maeq hhae eedu hhei'ae. 16 Ngael noq'ae heil laqngeel lye e gailminl cuda hhei e haqlo hoba mael, bongqke mael'ae heil do hhei. 17 Kaol qiqgiq maq keq e pulsheel maellye bongqke piqkaeq qiq mal zongldu hhei, maolduboq qiqhael qiqqyel (110) gongfen, heeqduboq koqqyel koq gongfen'ae. 18 Nol pulsheel maellye ji'lulboq niq mal diq du hhei maoqhhae, kaol yoqhhaeteel yaol bongqke piqkaeq e niqboq ae'lye diq du hhei. 19 Xiboq ae'lye ji'lulboq qiq mal diq du hhei, yulboq ae'lye ji'lulboq qiq mal diq du hhei; kaol bongqke piqkaeq e niqboq ae'lye ji'lulboq niq mal diq du hhei. 20 Ji'lulboq niq mal e aeldongl mael aqtaqboq'ae diqpye da hhei, kaol aeldongl maellye bongqke piqkaeq mael congqkaeq hhei, kaol xi qiq mal e maduq mael yul qiq mal maduq boq'ae polyil aeqmyel ngeel maoqhhae; ji'lulboq e maduq mael laoq bongqke e piqkaeq vae polyil aeqmyel ngeel maoqhhae. 21 Bongqke piqkaeq mael bongqke holtaqboq'ae baqkaeq hhei, ngaeq lye noq'ae biq hhei biq e gailminl cuda hhei e haqlo hoba mael, bongqke onglci'ae heil do hhei. 22 Ngael tyuqvae lye noq nyegael mol maoq, kaol gailminl cuda hhei e haqlo hoba heil do e bongqke e piqkaeq holtaq'ae, kaol ji'lulboq niq mal onglci ae'lye, ngael Yiqsellyel cholyaeqhael'ae moqheil hael heil biq maoqlye mael noq'ae geegaeq laeqngeel."
Zaelheel baqda e zaelzhee
23 "Nol zaoljaq aelbol maellye zaelheel baqda e zaelzhee qiq mal zongldu hhei maoqhhae, kaol maolduboq heiqqyel heiq gongfen, heeqduboq yuqqyel yuq gongfen, gaoboq koqqyel koq gongfen. 24 Kaol zaelheel baqda e zaelzhee mael'ae qiqgiq maq keq e pulsheel bao da hhei, myeqzaeq yuq boq'ae pulsheel huabian zonglda hhei. 25 Zaelheel baqda e zaelzhee myeqzaeq yuq boq'ae, laqho qiq ho heeheeq dyul myeqzaeq zonglda hhei, myeqzaeq e dongqpyeq vae pulsheel huabian zonglda hhei. 26 Zaelheel baqda e zaelzhee mael'ae pulsheel nyeqnaeq yuq mael zongldu hhei maoqhhae, nyeqnaeq mael laoq zaelzhee aeqkeel yuq mael e aqtaq taqli vae zonglda hhei. 27 Nyeqnaeq mael laoq myeqzaeq'ae niqyil aeqmyel ngeel maoqhhae, haeqdul mael nyeqnaeq onglci'ae shiq do hhei'laol zaelheel baqda e zaelzhee mael baq sael wae. 28 Zaoljaq aelbol maellye haeqdul niq kongq zongldu hhei, kaol pulsheel bao da hhei, kaol zaelheel baqda e zaelzhee mael baq maoqlye hhae. 29 Qiqgiq maq keq e pulsheel maellye zaelheel baqda e zaelzhee taq e panqpan, panqpan panyaeq kaol Zilheel e onglhhael kaol beiziq zongldu hhei maoqhhae. 30 Kaol zaelheel heel e aqba mael zaelzhee taq'ae baqdeel hhei, kaol duqlye ngaeq e yiqsi'ae bi za."
Denjal
31 "Nol qiqgiq maq keq e pulsheel maellye denjal qiq mal diq du hhei maoqhhae. Denjal e diqpanq, aelkongq, beiziq, yicuq alpaq, alyi yipaq, gilzuqmyel denjal nyegael qiqgael diqcaq hhei maoqhhae. 32 Denjal e niqboq'ae allaq koq mael bi cuq maoqhhae: Xiboq'ae suq mael, yulboq'ae suq mael. 33 Xiboq e allaq mael'ae beiziq suq mael za, geilci alyi laoqmyel hhae, kaol yicuq alpaq, alyi yipaq za maoqhhae; Yulboq e allaq mael'ae beiziq suq mael za, geilci alyi laoqmyel hhae, kaol yicuq alpaq, alyi yipaq za maoqhhae. Denjal ae'lye cuq du'lal e allaq koq mael laoq gilzuqmyel xilnye ngeel maoqhhae. 34 Denjal mael'ae beiziq yuq mael za maoqhhae, geilci alyi laoqmyel hhae, kaol yicuq alpaq, alyi yipaq za maoqhhae. 35 Denjal e dilyiq duil allaq holhhaq'ae laoq yicuq alpaq za maoqhhae, denjal e dil'el duil allaq holhhaq'ae laoq yicuq alpaq za maoqhhae, denjal e dilsan duil allaq holhhaq vae eiq yicuq alpaq za maoqhhae; denjal ae'lye cuq du'lal e allaq koq mael gilzuqmyel xilnye ngeel maoqhhae. 36 Yicuq alpaq kaol allaq gilzuqmyel denjal mael nyegael qiqgael zongl maoq hhei maoqhhae, xihael gilzuqmyel pulsheel qiq de maellye diq du hhei maoqhhae. 37 Denjal e aeqdael doqhoq siq mal zongldu hhei maoqhhae, kaol aeqdael doqhoq mael keeqdoq hhei, kaol laefuqboq'ae keeqmol hhei. 38 Qiqgiq maq keq e pulsheel maellye denxin no e jyeqdael kaol denjal e panqpan zongldu hhei maoqhhae. 39 Denjal kaol gilzuqmyel moqgoq xihael zongldu mael laoq, qiqgiq maq keq e pulsheel yil ta'lianqdeq mul maoqhhae. 40 Nol aeqyae'lye kei maoqhhae, noq'ae geeqzhoq vae lye tyuqmyeq biq e yanglziq laoqmyel zongl yil maoqhhae."