Momil e haeqpael haelcul
26
Nol geqchiq haeqpael qyel mael lye Momil e haeqpael haelcul cu maoqhhae. Geqchiq haeqpael xihael laoq xu du hhei e keeldaelnil e ziq e keelpongq, honglsael byuqkeel, ziqseq byuqkeel, kaol nyelna'na byuqkeel xihael lye hhaq du hhei, kaol alyi guq e laqkiq e aqlaq mael lye ji'lulboq guq da hhei. 2 Geqchiq haeqpael hae qiq mal eiq maolduboq shi'el miq'ae, geqchiq haeqpael hae qiq mal eiq heeqduboq liangq miq ngeel maoqhhae, kaol gilzuqmyel geqchiq haeqpaelhael e maol nul mael laoq qiqsheel ngeel maoqhhae. 3 Geqchiq haeqpael xi ngaeq mael laoq qiqmal qiqmal'ae zonglmaoq hhei maoqhhae; tyu ngaeq mael eiq qiqmal qiqmal'ae zonglmaoq hhei maoqhhae. 4 Zonglmaoq hhei e xi yil zuq e geqchiq haeqpael e aeqnaol naolli e qiq mal'ae honglsael e chilshiq naeq'ongq guq da hhei maoqhhae; zonglmaoq hhei e baeqjyelboq e yil zuq e geqchiq haeqpael e aeqnaol naolli e qiq mal vae eiq tyulnye zonglda hhei maoqhhae. 5 Geqchiq haeqpael xilmael taq'ae chilshiq naeq'ongq ngaeqqyel mael guq da hhei maoqhhae, zonglmaoq hhei e baeqjyelboq e yil zuq e geqchiq haeqpael e aeqnaol naolli e qiq mal vae eiq chilshiq naeq'ongq ngaeqqyel mael guq da hhei, kaol xiboq e chilshiq naeq'ongq kaol yulboq e chilshiq naeq'ongq mael dolza'lye ngeel maoqhhae. 6 Pulsheel lal'oq ngaeqqyel mael zongl hhei maoqhhae, kaol lal'oq maellye geqchiq haeqpael mael qiqgael shilmaoq hhei'laol, Momil e haeqpael haelcul qiq mal peqlal.7 "Nol aqciq caeqhum maellye geqchiq haeqpael qyelqiq mal hhaq du hhei, kaol Momil e haeqpael haelcul mael'ae cheelkaeq haeqpael mul. 8 Geqchiq haeqpael hae qiq mal eiq maolduboq shiqsan miq'ae, geqchiq haeqpael hae qiq mal eiq heeqduboq liangq miq ngeel maoqhhae; kaol geqchiq haeqpael qyelqiq mal e maol nul mael gilzuqmyel qiqsheel ngeel maoqhhae. 9 Geqchiq haeqpael ngaeq mael qiqgael zonglmaoq hhei maoqhhae, geqchiq haeqpael koq mael eiq zonglmaoq hhei maoqhhae, dilluq fuq geqchiq haeqpael mael cheelkaeq haeqpael laefuqboq'ae zheqlu da hhei maoqhhae. 10 Zonglmaoq hhei e xi yil zuq e geqchiq haeqpael e aeqnaol naolli e qiq mal'ae chilshiq naeq'ongq ngaeqqyel mael guq da hhei maoqhhae, zonglmaoq hhei e baeqjyelboq e yil zuq e geqchiq haeqpael e aeqnaol naolli e qiq mal vae eiq chilshiq naeq'ongq ngaeqqyel mael guq da hhei. 11 Geeqsheel lal'oq ngaeqqyel mael zongl maoqhhae, kaol lal'oq mael laoq chilshiq naeq'ongq onglci'ae shiq do hhei, kaol cheelkaeq haeqpael mael qiq mal bi peqlal. 12 Cheelkaeq haeqpael e geqchiq haeqpael mael naeq du'lal mael pyeqgae hhei, naeq du'lal e tyu qiq pa laoq Momil e haeqpael haelcul e aeqnaolboq'ae pyeqgae hhei. 13 Cheelkaeq haeqpael e geqchiq haeqpael niqboq e naeq du'lal mael laoq, xiboq'ae ngaeqqyel gongfen, yulboq'ae ngaeqqyel gongfen, kaol Momil e haeqpael haelcul e niqboq'ae pyeqgae hhei, kaol Momil e haeqpael haelcul mael eekaeq hhei. 14 Cheelkaeq haeqpael holtaq'ae nyelcullye deiqnyel hhei e ciqpaeq e saeqgeel eekaeq da hhei, kaol eelsulm e saeqgeel mael holtaq boq'ae zail eekaeq da hheikaol nildu e yilcenq geiq.
15 "Nol zaoljaq aelbol maellye Momil e haeqpael haelcul mael tongqtul e tyelpyuq zongl hhei maoqhhae, 16 Tyelpyuq hae qiq mal eiq maolduboq sil miq, heeqduboq koqqyel koq gongfen'ae, 17 Kaol tyelpyuq hae qiq mal eiq myeqnu qiqgael za, kaol qiqmal qiqmal'ae kaqdo hhei. Nol Momil e haeqpael haelcul e tyelpyuqhael gilzuqmyel xilnye zongl maoqhhae. 18 Nol Momil e haeqpael haelcul e tyelpyuq zongl maoqhhae: Nanqfang boq'ae tyelpyuq niqqyel mal zongl maoqhhae, xiboq laoq nanqfang boq'ae polyil boq ngeelvae. 19 Tyelpyuq xi niqqyel mael e holhhaq'ae, duqhongqhongq e pulziq diqzol yuqqyel mael zongldu hhei maoqhhae: Duqhongq e niq mal laoq tyelpyuq xilmael e myeqnu niq mal'ae kaqdo hhei, baeqjyelboq e duqhongq niq mal laoq tyelpyuq tyu niq mal e myeqnu niq mal'ae kaqdo hhei. 20 Momil e haeqpael haelcul e baeqjyelboq e qiq boq vae eiq tyelpyuq niqqyel mal zongl maoqhhae, xiboq laoq beqbian boq ngeelvae, 21 Kaol duqhongqhongq e pulziq diqzol yuqqyel mael zongldu hhei, tyelpyuq xi qiq mal holhhaqboq'ae duqhongq niq mal za'ae, tyelpyuq tyulmael holhhaq vae eiq duqhongq niq mal za'ae. 22 Momil e haeqpael haelcul e aeqnaolboq'ae tyelpyuq koq mael zongl maoqhhae, xiboq laoq neelgae aelheiq boq ngeelvae. 23 Momil e haeqpael haelcul e aeqnaolboq e geqlo vae tyelpyuq niq mal zongl hhei maoqhhae. 24 Aq'oqboq e tyelpyuq mael laoq qiq zul'ae, aqtaqboq laoq qiqgael zonglmaoq deelhhei, kaol aqtaq taqli e dilyiq gol nyeqnaeq'ae keelli maoqhhae; tyelpyuq niq mal myel xilnye ngeel maoqhhae, kaol geqlo niq gael zongldu hhei. 25 Kaol gilzuqmyel tyelpyuq heiq mal kaol duqhongqhongq e pulziq diqzol qyelkoq mael'ae, tyelpyuq xi niq mal holhhaq vae duqhongq niq mal za'ae, tyu qiq mal holhhaq vae eiq duqhongq niq mal za'ae.
26 "Nol zaoljaq aelbol maellye hunqtiaoq zongl hhei: Kaol Momil e haeqpael haelcul xiboq'ae hunqtiaoq ngaeq mael zongl hhei, 27 Momil e haeqpael haelcul yulboq e tyelpyuq mael'ae hunqtiaoq ngaeq mael zongl hhei, kaol Momil e haeqpael haelcul aeqnaolboq e tyelpyuq vae hunqtiaoq ngaeq mael zongl hhei, aeqnaolboq e xiboq laoq neelgae aelheiq boq ngeelvae. 28 Tyelpyuq ongllongl onglci e hunqtiaoq mael, xiboq ae'lye mael yulboq'ae shiq du keel hhei maoqhhae. 29 Tyelpyuq mael'ae laoq pulsheel bao da hhei maoqhhae, kaol tyelpyuq taq e pulsheel nyeqnaeq zongldu hheikaol hunqtiaoq mael taoltyeq maoqhhae; hunqtiaoq mael vae eiq pulsheel bao da hhei. 30 Geeqzhoq ae'lye noq'ae tyuqmyeq biq e yanglziq laoqmyel, Momil e haeqpael haelcul mael zongltul hhei maoqhhae.
31 Nol honglsael byuqkeel, ziqseq byuqkeel, nyelna'na byuqkeel, kaol xu du hhei e keeldaelnil e ziq e keelpongq xihael lye geqchiq haeqpael hhaq du hhei, kaol alyi guq e laqkiq e aqlaq mael lye ji'lulboq guq da hhei. 32 Geqchiq haeqpael mael laoq pulsheel bao da hhei e zaoljaq aelbol e sseeldongq yuq mael'ae pyeqcheeq da hhei, sseeldongq mael laoq pulsheel lal'oq za'ae, kaol duqhongqhongq e pulziq diqzol yuq mael'ae kaqdo hhei. 33 Geqchiq haeqpael mael lal'oq taq'ae pyeqcheeq gae hhei, kaol gailminl bongqke mael geqchiq haeqpael onglci'ae baq do'li maoqhhae; geqchiq haeqpael maellye senlsoq kaol zhilsenlsoq mael geqtael maoqhhae. 34 Bongqke e piqkaeq mael zhilsenlsoq vae baq deelhhei e gailminl bongqke mael'ae baqkaeq da hhei maoqhhae, 35 Zaelheel baqda e zaelzhee mael laoq geqchiq haeqpael e nildu vae baqdeel hhei, zaelheel baqda e zaelzhee mael laoq beqfang boq'ae za, denjal mael laoq Momil e haeqpael haelcul e nanqbian boq'ae za, denjal mael zaelheel baqda e zaelzhee yiqsi yulboq'ae za hhae.
36 Nol honglsael byuqkeel, ziqseq byuqkeel, nyelna'na byuqkeel, kaol xu du hhei e keeldaelnil e ziq e keelpongq xihael lye, alyi guq e laqkiq e aqlaq mael lye Momil e haeqpael haelcul gae'lye oheiq'ae cheelchiq e haeqpael hhaq du hhei maoqhhae. 37 Kaol zaoljaq aelbol maellye cheelchiq e haeqpael mael'ae sseeldongq ngaeq mael zongl hhei, kaol pulsheel bao da hhei maoqhhae. Sseeldongq mael'ae pulsheel e lal'oq cuq'ae, sseeldongq mael gae'lye duqhongqhongq e geeqsheel diqzol ngaeq mael xyedu hhei."