36
Biqsa'lyel kaol Yalheqlilyalboq, kaol gilzuqmyel neemae onglci'ae geel mael za e cholyaeq'ae, Yeheqhuaq lye geel mael kaol kyul mael biq hhei biq, kaol senlsoq vae maeq qiqsheel e mulhhael mul kiq mael biq hhei biq, kaol yoqhhaeteel gilzuqmyel Yeheqhuaq moqheil hael heil laoqmyel zongl yil vae.Cholyaeqhael e fenglxianl mael
2 Moxi lye Biqsa'lyel, Yalheqlilyalboq, kaol neemae onglci'ae Yeheqhuaq lye biq biq e geel mael za, ganqdongl mael eiq za, mulhhael eiq mul lael nae e cholyaeq tyuhael yaol gul laeq. 3 Cholyaeq xihael laoq Moxi zaellye Yiqsellyel cholyaeqhael lye senlsoq cu fu mulyo gae'lye fenglxianl hhei e liqvuq mael heil hhei vae. Haeqfu qiq shoq eiq cholyaeqhael maqqyemyel Heilsheqhhaq Zaelheel mael heil laeq wae siq. 4 Senlsoq vae mulhhael mul kiq e onglzaeq e cholyaeqhael laoq, gilzuqmyel aeqyoyoq laefuq mul e mulhhael ae'lye deelsae hheikaol lael gil vae, 5 Yoqhhaeteel Moxi'ae gee biq: "Cholyaeqhael lye heil laeq e liqvuq zhee naeq hhae, kaol Yeheqhuaq noq'ae laoqhaol cu fu haeldyul mul maoqhhae lye moqheilheil biq dyul maeqcil wae." 6 Moxi moqheilheil gae hhei, kaol yoqhhaeteel haqhhael diqkaeq hhei myel onglci'ae geegaeq gil'ae: "Haeqmiyaeq haoq haqyoyaeq haoq, senljyeq laoqhaol e liqvuq gae'lye aeqdilmyel qiqgiq eiq maeq heil kael vae." Xilnye laol, cholyaeqhael liqvuq maeq heil laeq myel caiq zhol deelhhei wae siq, 7 Yoqhhaeteel'ae halza e moqgoqhael laoq cu du byel fu mulloq dyul maeqcilmyel naeq du'lal wae siq.
Momil e haeqpael haelcul mael cu
8 Mulhhael mul e cholyaeqhael onglci'ae, aeqsul neemae onglci'ae geel mael za e cholyaeqhael laoq, geqchiq haeqpael qyel mael lye Momil e haeqpael haelcul cu, geqchiq haeqpael mael laoq xu du hhei e keeldaelnil e ziq e keelpongq, honglsael byuqkeel, ziqseq byuqkeel kaol nyelna'na byuqkeel xihael lye hhaq du hhei vae, kaol alyi guq e laqkiq e aqlaq mael lye ji'lulboq guq da hhei. 9 Geqchiq haeqpael hae qiq mal eiq maolduboq shiq'el miq'ae, geqchiq haeqpael hae qiq mal eiq heeqduboq liangq miq'ae, geqchiq haeqpaelhael gilzuqmyel maol nul qiqsheel'ae. 10 Yoqhhaeq lye geqchiq haeqpael xil ngaeq mael laoq qiqmal qiqmal'ae zonglmaoq hhei; tyu ngaeq mael eiq qiqmal qiqmal'ae zonglmaoq hhei. 11 Yoqhhaeq lye zonglmaoq hhei e xi yil zuq e geqchiq haeqpael e aeqnaol naolli e qiq mal'ae honglsael e chilshiq naeq'ongq guq da hhei; zonglmaoq hhei e baeqjyelboq e yil zuq e geqchiq haeqpael e aeqnaol naolli e qiq mal vae eiq tyulnye zonglda hhei. 12 Yoqhhaeq lye geqchiq haeqpael xilmael taq'ae chilshiq naeq'ongq ngaeqqyel mael guq da hhei, zonglmaoq hhei e baeqjyelboq e yil zuq e geqchiq haeqpael e aeqnaol naolli e qiq mal vae eiq chilshiq naeq'ongq ngaeqqyel mael guq da hhei, kaol xiboq e chilshiq naeq'ongq kaol yulboq e chilshiq naeq'ongq mael dolza'lye hhae. 13 Yoqhhaeq lye pulsheel lal'oq ngaeqqyel mael zongl hhei, kaol lal'oq maellye geqchiq haeqpael mael qiqgael shilmaoq hhei, kaol Momil e haeqpael haelcul qiq mal peqlal.
14 Yoqhhaeq lye aqciq caeqhum maellye geqchiq haeqpael qyelqiq mal hhaq du hhei, kaol Momil e haeqpael haelcul mael taq e cheelkaeq haeqpael mul. 15 Geqchiq haeqpael hae qiq mal eiq maolduboq shiqsan miq'ae, kaol geqchiq haeqpael hae qiq mal eiq heeqduboq laoq liangq miq'ae; qyelqiq mal geqchiq haeqpael e maol nul mael gilzuqmyel qiqsheel'ae. 16 Yoqhhaeq lye geqchiq haeqpael ngaeq mael qiqgael zonglmaoq hhei, geqchiq haeqpael koq mael eiq qiqgael zonglmaoq hhei, 17 Yoqhhaeq lye zonglmaoq hhei e xi yil zuq e geqchiq haeqpael e aeqnaol naolli e qiq mal'ae chilshiq naeq'ongq ngaeqqyel mael guq da hhei, zonglmaoq hhei e baeqjyelboq e yil zuq e geqchiq haeqpael e aeqnaol naolli e qiq mal vae eiq chilshiq naeq'ongq ngaeqqyel mael guq da hhei. 18 Yoqhhaeq lye geeqsheel lal'oq ngaeqqyel mael zongl hhei, kaol cheelkaeq haeqpael mael qiq mal bi peqlal. 19 Yoqhhaeq lye cheelkaeq haeqpael holtaq'ae nyelcullye deiqnyel hhei e ciqpaeq e saeqgeel eekaeq da hhei, kaol eelsulm e saeqgeel mael holtaqboq'ae zail eekaeq da hheikaol nildu e yilcenq geiq.
20 Yoqhhaeq zaoljaq aelbol maellye Momil e haeqpael haelcul mael tongqtul e tyelpyuq zongl hhei, 21 Tyelpyuq hae qiq mal eiq maolduboq sil miq, heeqduboq koqqyel koq gongfen'ae, 22 Tyelpyuq hae qiq mal eiq myeqnu niq mal za, kaol tyelpyuq qiq mal mael qiq mal'ae kaqdo hhei. Momil e haeqpael haelcul e tyelpyuqhael gilzuqmyel xilnye zongl hhei vae. 23 Yoqhhaeq lye Momil e haeqpael haelcul e tyelpyuq zongl hhei: Nanqbian boq'ae tyelpyuq niqqyel mal zongl hhei, xiboq laoq, nanqfang boq'ae polyil boq ngeelvae. 24 Tyelpyuq xi niqqyel mal e holhhaq'ae, duqhongqhongq e pulziq diqzol yuqqyel mael zongldu hhei: Duqhongq niq mal laoq tyelpyuq xilmael e myeqnu niq mal'ae kaqdo hhei, baeqjyelboq e duqhongq niq mal laoq tyelpyuq tyu niq mal e myeqnu niq mal'ae kaqdo hhei. 25 Yoqhhaeq Momil e haeqpael haelcul e baeqjyelboq e qiq boq vae eiq tyelpyuq niqqyel mael zongl hhei, xiboq laoq beqfang boq ngeelvae, 26 Kaol duqhongqhongq e pulziq diqzol yuqqyel mael zongldu hhei, tyelpyuq xi qiq mal e holhhaqboq'ae duqhongq niq mal za'ae, tyelpyuq tyulmael holhhaq vae eiq duqhongq niq mal za'ae. 27 Yoqhhaeq Momil e haeqpael haelcul e aeqnaolboq'ae tyelpyuq koq mal zongl hhei, xiboq laoq neelgae aelheiq boq ngeelvae. 28 Momil e haeqpael haelcul e aeqnaolboq e geqlo vae tyelpyuq niq mal zongl hhei. 29 Aq'oqboq e tyelpyuq mael laoq qiq zul'ae, aqtaqboq laoq qiqgael zonglmaoq deelhhei, kaol aqtaq taqli e dilyiq gol nyeqnaeq'ae keelli; tyelpyuq niq mal myel xilnye hhae, kaol geqlo niq gael zongldu hhei. 30 Gilzuqmyel tyelpyuq heiq mal kaol duqhongqhongq e pulziq diqzol qyelkoq mael'ae, tyelpyuq hae qiq mal e holhhaqboq vae eiq duqhongq niq mal za'ae.
31 Yoqhhaeq zaoljaq aelbol maellye hunqtiaoq zongl hhei: Momil e haeqpael haelcul xiboq'ae hunqtiaoq ngaeq mael zongl hhei, 32 Momil e haeqpael haelcul yulboq'ae hunqtiaoq ngaeq mael zongl hhei, kaol Momil e haeqpael haelcul aeqnaolboq e tyelpyuq vae hunqtiaoq ngaeq mael zongl hhei, xiboq laoq neelgae aelheiq boq e tyelpyuq mael ngeelvae. 33 Yoqhhaeq lye tyelpyuq e ongllongl onglci e hunqtiaoq mael zongl hhei, kaol xiboq ae'lye mael yulboq'ae shiq du keel hhei. 34 Yoqhhaeq lye tyelpyuq mael'ae pulsheel bao da hhei, kaol tyelpyuq taq e pulsheel nyeqnaeq zongldu hheikaol hunqtiaoq mael taoltyeq hhei; hunqtiaoq mael vae eiq pulsheel bao da hhei.
35 Yoqhhaeq laoq honglsael byuqkeel, ziqseq byuqkeel, nyelna'na byuqkeel, kaol xu du hhei e keeldaelnil e ziq e keelpongq xihael lye geqchiq haeqpael hhaq du hhei, kaol alyi guq e laqkiq e aqlaq mael lye ji'lulboq guq da hhei. 36 Yoqhhaeq zaoljaq aelbol maellye geqchiq haeqpael mael'ae heeldiq yuq mael yol zongldu hhei, kaol pulsheel bao da hhei, heeldiq mael'ae pulsheel lal'oq za'ae, kaol heeldiq mael gae'lye duqhongqhongq e pulziq e diqzol yuq mael xyedu hhei. 37 Yoqhhaeq laoq honglsael byuqkeel, ziqseq byuqkeel, nyelna'na byuqkeel, kaol xu du hhei e keeldaelnil e ziq e keelpongq, kaol alyi guq e laqkiq e aqlaq mael lye Momil e haeqpael haelcul mael'ae oheiq'ae cheelchiq e haeqpael hhaq du hhei, 38 Cheelchiq haeqpael mael'ae heeldiq ngaeq mael kaol heeldiq e lal'oq zongldu hhei biq, kaol heeldiq e vuqduq mael'ae kaol heeldiq e nyeqnaeq mael'ae pulsheel bao da hhei. Keeldiq mael'ae duqhongqhongq e geeqsheel diqzol ngaeq mael za'ae.