Chuanglshil Jil
Momil lye mqmae milcaeq zonglbeibei du hhei vae
1
Momil lye mqmae milcaeq zhoq zonglbeibei du hhei fu xilnye hhae: 2 Laefuq fuqli fu, milcaeq laoq aeqchee laoqmyel dul'ae lye maeq fu du'lal ongl'ae, milcaeq taq vae eiq qiqgiq maqza'ae; hhalnaqmyel e eelcuq taq'ae laoq nahongqlye hhae; Momil e yohael mael eelcuq taq'ae yilyil laellael myel ocongq deelhhei'ae. 3 Momil gee: "Aeqcael bi za maoq!" Tyulkaol, aeqcael za'lal vae. 4 Momil aeqcael mael'ae fu hhei'laol neezae'lael biq'ae, tyulkaol, Momil lye aeqcael kaol nahongq mael zongltael hhei vae. 5 Momil aeqcael mael'ae mqnao lye gul biq hhae, nahongq mael'ae mqkiq lye gul biq hhae. Mqkiq za, mqshoq za vae, xilmael laoq mqdongq milbeibei e laefuq fuqli qiq nao'ae.6 Momil gee: "Eelcuq kaol eelcuq e onglci'ae mqdongq mqjyel bi za maoq, eelcuq kaol eelcuq mael bi zongltael maoq." 7 Tyulkaol, Momil lye mqdongq mqjyel zongldu hhei vae, mqdongq mqjyel maellye mqdongq mqjyel e holhhaq e eelcuq, kaol mqdongq mqjyel e holtaq e eelcuq mael zongltael hhei vae. Kaol xilnye peqlal vae. 8 Momil mqdongq mqjyel mael'ae mqmae lye gul biq hhae. Mqkiq za, mqshoq za vae, xilmael laoq dil'el tian'ae.
9 Momil gee: "Mqmae holhhaq e eelcuq mael qiqgael bi yul'eeq deelhhei maoq, kaol milgee mael bi mol du'lal!" Kaol xilnye peqlal vae. 10 Momil milgee mael'ae milcaeq lye gul biq hhae, eelcuq qiqgael yul'eeq deelhhei mael'ae eeldeel deelmae lye gul biq hhae. Momil fu hhei'laol neezae'lael biq'ae. 11 Momil gee: "Milcaeq taq'ae aelbol kaol haelsaeq bi dyeq du'lal maoq: Ael'yuq siq e oqbye oqnyulhael kaol aelsiq onglci'ae alnea zoq e aelbolhael, hae qiqsheel laol hae qiqsheel milcaeq ae'lye bi dyeq du'lal maoq." Kaol xilnye peqlal vae. 12 Milcaeq taq'ae gilzuqmyel aelbolhael kaol haelsaeqhael dyeq du'lal vae: Ael'yuq siq e oqbye oqnyulhael hae qiqsheel laol hae qiqsheel dyeq du'lal vae; aelsiq siq e aelbolhael eiq hae qiqsheel laol hae qiqsheel dyeq du'lal vae, kaol aelsiq onglci'ae alne zoq. Momil fu hhei'laol neezae'lael biq'ae. 13 Mqkiq za, mqshoq za vae, xilmael laoq dilsan tian'ae.
14 Momil gee: "Mqmae e mqdongq mqjyel vae, aeqcael bi du'lal kiq e qiqsheel bi za maoq, xilnye laol, mqnao kaol mqkiq laoq maeq qiqsheel vae. Yoqhhaeteel yaol jilhaol bi geiq maoq, kaol aeqchee baehae keellael vae lye bi loq maoq, naohaeq kaol hoqlaq bi loq maoq. 15 Yoqhhaeteel mqmae e mqdongq mqjyel vae aeqcael cuq du kiq e qiqsheel geiq maoqlye hhae, kaol milcaeq taq'ae bi cuqmol." Kaol xilnye peqlal vae. 16 Momil lye aeqcael cuq du kiq e haeqheemyel niq mal zongldu hhei vae. Hhael heeq mael laoq mqnao'ae guanqliq, hhael nil mael laoq mqkiq'ae guanqliq. Momil lye aeqgeelhael eiq zongldu hhei vae. 17-18 Momil lye yoqhhaeteel yaol mqdongq mqjyel'ae heildeel beq hhei, kaol milcaeq vae bi cuqmol, mqnao kaol mqkiq'ae bi guanqliq, aeqcael kaol nahongq mael bi zongltael du hhei. Momil fu hhei'laol neezae'lael biq'ae. 19 Mqkiq za, mqnao za vae, xilmael laoq dilsil tian'ae.
20 Momil gee: "Ngael eelcuq vae yodyeq dyeq e bi du beq lal maoq; milcaeq holtaq kaol mqmae e mqdongq mqjyel vae haeqzil bi beel maoq." 21 Tyulkaol, Momil lye ngaeqdyel dyelmaeb zonglbeibei du hhei vae, kaol eelcuq onglci'ae gilzuqmyel dongni yilkiq e yodyeqhael hae qiqsheel laol hae qiqsheel zonglbeibei du hhei vae, gilzuqmyel aeldongl cuq e haeqzilhael hae qiqsheel laol hae qiqsheel eiq zonglbeibei du hhei vae. Momil fu hhei'laol neezae'lael biq'ae. 22 Momil yoqhhaeteel'ae geeqlongq biq biq, gee: "Haelnaeqmyel bo du beq hheikaol zheeqbeqlal maoqhhae, kaol eeldeel deelmae e eelcuq vae haeqvae eiq zhol maoqhhae; haeqzil eiq milcaeq taq'ae haelnaeqmyel zheeqbeqlal maoqhhae." 23 Mqkiq za, mqnao za vae, xilmael laoq dilvuq tian'ae.
24 Momil gee: "Milcaeq taq'ae yodyeqhael hae qiqsheel laol hae qiqsheel bi du'lal maoq: Laoqhaol jyeqyaeqhael, milcaeq vae congni e yodyeqhael kaol milcaeq taq e byeldongl jyeqyaeqhael, hae qiqsheel laol hae qiqsheel bi du'lal maoq." Kaol xilnye peqlal vae. 25 Tyulkaol, Momil lye milcaeq e byeldongl jyeqyaeqhael hae qiqsheel laol hae qiqsheel zongldu hhei vae, laoqhaol jyeqyaeqhael hae qiqsheel laol hae qiqsheel zongldu hhei vae, milcaeq vae gilzuqmyel congni e yodyeqhael eiq hae qiqsheel laol hae qiqsheel zongldu hhei vae. Momil fu hhei'laol neezae'lael biq'ae.
Momil lye cholyaeq zongldu hhei
26 Momil gee: "Ngaeteel laoq ngaeteel nyedullye dullaelmyel, kaol ngaeteel qiqsheel laoqmyel e cholyaeq zongldu hhei maoq, kaol yoqhhaeteel'ae eeldeel deelmae e ngaeqdyelhael, mqmae e haeqzilhael, laoqhaol jyeqyaeqhael, halza milcaeqhael kaol milcaeq taq'ae gilzuqmyel congni e yodyeqhael'ae bi guanqliq maoq." 27 Tyulkaol, Momil lye aeqyoq nyedullye dullaelmyel cholyaeq zonglbeibei du hhei vae, Momil nyedullye yoqhhaeq yaol zonglbeibei du hhei vae; Momil lye zonglbeibei du hhei e cholyaeq laoq haeqmiyaeq zoq haqyoyaeq eiq zoq hhae. 28 Momil yoqhhaeteel'ae geeqlongq biq biq, yoqhhaeteel'ae gee biq: "Haelnaeqmyel bo du beq hheikaol zheeqbeqlal maoqhhae, noteel haeqvae milcaeq vae eiq zhol bong hhei, kaol milcaeq mael noteel e aqlaq e holhhaq vae bi za maoqhhae; eeldeel deelmae vae zhol e ngaeqdyelhael, mqmae e haeqzilhael, kaol haelzhol e dongni yilkiq e yodyeqhael'ae guanqliq maoqhhae."
29 Momil gee: "Naelhaeq gil! Ngael halza milcaeq holtaq e ael'yuq hael siq e oqbye oqnyul, kaol alne zoq e aelsiq siq e aelbolhael, gilzuqmyel noteel'ae biq laqngeel, kaol noteel zaeqzael geiqzaq gil; 30 Milcaeq e gilzuqmyel byeldongl jyeqyaeqhael, mqmae e gilzuqmyel haeqzilhael, kaol milcaeq taq e gilzuqmyel congni e yodyeqhael, ngaeq lye yoqhhaeteel'ae haelsaeq oqbye mael zaeq lye biq hhei biq wae." Kaol xilnye peqlal vae.
31 Momil laoq aeqyoq lye hael zongldu hhei hael'ae fu hhei'laol neezae zhee lael biq'ae. Mqkiq za, mqnao za vae, xilmael laoq dilluq tian'ae.