Chu Aijiq Jil
Yiqsellyel cholyaeqhael Aijiq vae lye zheeqbeqlal
1
Yiqsellyel e yaqyohael aeqyoyoq toq e cholyaeqhael sheeq hheikaol Yaqgel nyegael hhaellaelmyel Aijiq vae keellael. Yoqhhaeteel e cholmil mael sa'oqboqhael'ae: 2 Liuqbenq, Ximianq, Lilveil, Yoqdal, 3 Yiqsalja, Xibullunq, Bianlyaqminq, 4 Danl, Naqfuqta'lil, Jadeq, Yalshel. 5 Yaqgel ae'lye du'lal biq hael laoq, gilzuqmyel siqqyel hhaeq'ae. Tyuqfu, Yoqsel laoq Aijiq vae zhol wae. 6 Yoqsel kaol yoqhhaeq e haelzhol e algo aeqnilhael, kaol tyu qiq cheq e cholyaeqhael gilzuqmyel sil vae. 7 Yiqsellyel cholyaeqhael laoq haelnaeqmyel bo du beq hhei, kaol zheeqbeqlal, zhee henq lael, kaol tyuqvae milcaeq vae yoqhhaeteel e cholyaeq yaeqsholmyel wae.Faqlaoq Yiqsellyel cholyaeqhael'ae zonglkyuq biq
8 Yoqsel yaol maeq loq e zongmae yosheq qiq hhaeq zongmae geiq da'li vae, kaol Aijiq'ae guanqliq hhae. 9 Yoqhhaeq aeqyoyoq e cholyaeqhael'ae gee biq: "Fu gil, Yiqsellyel cholyaeqhael aedeeteel taq'ae hhael naeq, kaol aedeeteel taq'ae yol onglzaeq hhae. 10 Lael gil, aedeeteel geel e loqho maellye yoqhhaeteel'ae zongl gil biq maoq, aeqgael yoqhhaeteel naeq beq lal laol diqgae tullaeq kaollaoq, yoqhhaeteel aedeeteel e diqrenqhael boq'ae polyil, kaol aedeeteel'ae diq lael, kaol saeqvae milcaeq ae'lye deelsae hhei maeqhe." 11 Tyulkaol, Aijiq cholyaeq lye mulhhael fu'qyezaq e cholyaeq yaol yoqhhaeteel vae bi guanq yil, kaol duqhee'lye aeqhael bi mul maellye yoqhhaeteel'ae zonglkyuq biq lye moqheilheil biq. Kaol yoqhhaeteel Faqlaoq'ae moqgoq baqdozaq e milmae heeqmyel niq gael cu hhei biq, xi niq gael laoq Biqdong kaol Lanqsail ngeelvae. 12 Ngeelfeiq, yoqhhaeteel'ae nyeq'ei zonglkyuq biq laol, yoqhhaeteel nyeq'ei hhael naeqlael, zheeqbeqlal, kaol Aijiq cholyaeqhael Yiqsellyel cholyaeqhael gae'lye zoqgiq gil biq hhae.
13 Aijiq cholyaeqhael Yiqsellyel cholyaeqhael'ae nyeq'ei ta nyeq'ei maq mul maeq hhaeq myel mulhhael bi mul hhae, 14 Kaol yoqhhaeteel'ae duqhee'lye mulhhael mul gae'lye ssuqhaoq maq caqza gayil ongl myel bi ngeel hhae; milbye nyel haoq, nalgaq xye haoq, haeldye vae maeq qiqsheel e mul gil e mulhhael haoq, gilzuqmyel mulhhael taq'ae Aijiq cholyaeqhael yoqhhaeteel'ae nyeq'ei ta nyeq'ei hhael zonglkyuq biq.
15 Aijiq zongmae laoq Xiboqlaiq cholyaeq Shifuqla kaol Puq'a lye gul biq e yaeqguq ciqdazaq e cholyaeq niq nulhhaeq'ae gee biq: 16 "Noteel Xiboqlaiq cholhae aeqmaehael'ae yaeqguq bael ciqda biq, yoqhhaeteel bo du hhei fu fu'loq hhei maoqhhae, yaqyoyaeq kaollaoq yoqhhaeq yaol xyeq hhei; yaeqmiyaeq kaollaoq yoqhhaeq yaol bi dyeqdeel." 17 Ngeelfeiq, yaeqguq ciqdazaq e cholyaeq laoq Momil'ae zun eiq zunjinl gu eiq gu'ae, kaol Aijiq zongmae yoqhhaeteel'ae moqheilheil biq laoqmyel maeq zongl'ae, yaqyoyaeq yaol bi dyeqdeel wae siq. 18 Aijiq zongmae lye yaeqguq ciqdazaq e cholyaeq yaol gul laeq, kaol yoqhhaeteel'ae gee biq: "Noteel aeqcheekaol xilnye silqinq zongl gil lilmaeq? Aeqcheekaol yaqyoyaeq yaol bi dyeqdeel lilmaeq?" 19 Yaeqguq ciqdazaq e cholyaeq Faqlaoq'ae gee biq: "Xiboqlaiq cholhae aeqmaehael kaol Aijiq cholhae aeqmaehael maeq qiqsheel kaol'ae; Xiboqlaiq cholhae aeqmaehael aqha zhee bo hhae, yaeqguq ciqdazaq e cholyaeq maeq keellael siq fu ae'lye, yoqhhaeteel yaeqguq bo du hhei vae." 20 Momil yaeqguq ciqdazaq e cholyaeqhael'ae meeq biq; kaol Yiqsellyel cholyaeqhael naeq beq lal, kaol zhee henq tullaeq. 21 Yaeqguq ciqdazaq e cholyaeq Momil'ae zun eiq zunjinl gu eiq gu biq hhae, tyulkaol, Momil yoqhhaeteel'ae yaeqguq bi bo kiq kaol ssuqhaoq haelmeeqlye bi caqzaq tullaeq vae. 22 Faqlaoq yoqhhaeq e cholyaeqhael'ae moqheilheil biq: "Xiboqlaiq cholyaeq lye bo hhei e yaqyoyaeqhael yaol Niqloq Lolbaeq vae beiqpuq yil; haelzhol e yaeqmiyaeqhael laoq bi dyeqdeel maoqhhae."