Moxi dyeqlal vae
2
Lilveil toq e cholyaeq qiq hhaeq lye Lilveil yaeqmiyaeq qiq hhaeq yaol sheeqtoqzaeq hhei. 2 Haeqmiyaeq tyutaeq yaeqguqpi li biq, kaol yaqyo qiq hhaeq bo hhei, yaeqguq qiq hhaeq fusael lael aeqmyel she lye mol hhei biq, kaol yoqhhaeq yaol baehae sul siq sheeqhhaq aeqwae, 3 Aeqnaol, maeq sheeqhhaq ongl biq vae, kaol zaekeel maellye zheq du hhei e guqlanq qiq mal heil laeq, beqyoq kaol aelbol beelziq mael soda hhei; kaol yaeqguq yaol onglci'ae sheeq do hhei, zaekeel e guqlanq mael Niqloq Lolbaeq e loljyel e mol'ongq onglci'ae baqdeel hhei. 4 Yaeqguq e aelbae yoqhhaeq'ae haelmillye puqli biq maeq lye loq maoqlyekaol gaelmaolsae'lye haoqtul deelhhei hhae.5 Faqlaoq e yaeqmiq Niqloq Lolbaeq e loljyel vae keellael kaol aeqhhaol ciq hhae; yoqhhaeq e yaqhacheqzaq e haeqmiyaeqhael loljyel vae deel gil'ae. Yoqhhaeq mol'ongq onglci e guqlanq mael mol hhei biq, kaol yaqhacheqzaq e haeqmiyaeq qiq hhaeq'ae guqlanq mael baq laq lye moqheilheil biq. 6 Kaol yoqhhaeq guqlanq mael diqpong hhei'laol, yaeqguq tyutaeq yaol mol hhei biq. Fu hhei, aelli liyaeq nyul vae, kaol yoqhhaeq laoq yoqhhaeq'ae hhaoqsaeqsaeq biq, gee: "Xi qiq hhaeq laoq Xiboqlaiq cholyaeq e yaeqguq'ae." 7 Yaeqguq e aelbae Faqlaoq e yaeqmiq'ae gee biq: "Ngael Xiboqlaiq cholhae aeqmae qiq hhaeq gul yil hhaeq, kaol yoqhhaeq'ae aeqchil bi dol e aeqmae bi geiq, kaol noq gae'lye yaeqguq xitaeq'ae aeqchil bi dol hhaeq maeq?" 8 Faqlaoq e yaeqmiq yoqhhaeq'ae gee biq: "Yil aeqmeel!" Kaol yaeqmiyaeq tyutaeq lye yaeqguq e aeqmae yaol gul laeq. 9 Faqlaoq e yaeqmiq yoqhhaeq'ae gee biq: "Nol yaeqguq xitaeq yaol sheeqyil, kaol ngaeq gae'lye yaeqguq xitaeq'ae aeqchil bi dol hhei, ngael noq'ae hhaeqpyuq heil laeqngeel." Kaol cholhae aeqmae tyutaeq yaeqguq yaol sheeq pol hheikaol yoqhhaeq'ae aeqchil bi dol hhae. 10 Yaeqguq heeqda lal vae, cholhae aeqmae lye yoqhhaeq yaol Faqlaoq e yaeqmiq e tyuqvae sheeqli, kaol yaeqguq tyutaeq yoqhhaeq e yaqyo geiq vae. Yoqhhaeq lye yaeqguq e cholmil mael Moxi lye mil hhei biq hhae, gee: "Ngaeq lye yoqhhaeq yaol eelcuq ae'lye ee da hhei kaollil."
Moxi Miqdianl vae kisae yil vae
11 Qiqtongq gol hhei'laol, Moxi heeq lael vae, kaol yoqhhaeq aeqyoyoq e minqcuq e cholyaeqhael tyuqvae yil, kaol yoqhhaeteel duqhee'lye mulhhael mul mael mol hhei biq. Yoqhhaeq Aijiq cholyaeq qiq hhaeq laoq yoqhhaeq e minqcuq e Xiboqlaiq cholyaeq qiq hhaeq'ae tyel biq mol hhei biq. 12 Yoqhhaeq laqsseq laeqbaelboq'ae chifu, cholyaeq maeq zhol she lye mol hhei biq laol, Aijiq cholyaeq tyutaeq yaol diq sil biq, kaol milqyel onglci vae givuq biq'ae. 13 Aeqnaol qiq nao yoqhhaeq duyil, Xiboqlaiq cholyaeq niq nulhhaeq diqgae mol hhei biq, kaol duqlaq e qiq hhaeq'ae gee biq: "Nol aeqcheekaol aeqyoyoq e minqcuq e cholyaeq'ae diq biq lilmaeq?" 14 Tyutaeq gee biq: "Aeqsul lye noq yaol ngaeteel e yoheeq kaol shenqpanl e zhiqmoq bi geiq laq kaol guanq gil laeq lilmaeq? Nol Aijiq tyutaeq yaol xyeq laoqmyel ngaeq yaol xyeq maoqlye laeq?" Moxi gu li biq, kaol neemae onglci'ae nyuq: "Silqinq xilmael aeqdilmyel cholyaeq lye loqzaeq aeqwae!" 15 Faqlaoq silqinq xilmael gaeq hhei biq laol, Moxi yaol haelmillye hha xyeq congl maeq lye zongl hhae. Tyulkaol, Moxi Faqlaoq'ae hoqhhaqzaq maoqlyekaol Miqdianl milcaeq vae kisae keelyil kaol zholgae hhei vae, kaol eelduq dongqpyeq'ae zhol deelhhei.
16 Miqdianl milcaeq e jilsi'ae yaeqmiq siq hhaeq zhol'ae; yoqhhaeteel eelcuq kuq lael, kaol hoqloq mael kuq bong hhei vae, kaol yoqhhaeteel e aeqdae e aqciqhael'ae bi dol maoqlye hhae. 17 Aqciq hoqzaq cholyaeq qiq miq lael, kaol yoqhhaeteel yaol lyeqsae biq; ngeelfeiq, Moxi tullael kaol yoqhhaeteel'ae jiul biq hhae, kaol eelcuq kuqda hheikaol yoqhhaeteel e aqciqhael'ae bi dol. 18 Yoqhhaeteel laoq aeqdae Liuq'eq tyuqvae hoq keelli. Aeqdae yoqhhaeteel'ae gee biq: "Yaeqnao noteel aeqcheekaol nae'naemyel hoqlal gil lilmaeq?" 19 Yoqhhaeteel gee: "Aijiq cholyaeq qiq hhaeq lye ngaeteel yaol aqciq hoqzaq e cholyaeq e aqlaq ae'lye jiul du hhei laq dyul maeqcil, yoqhhaeq eiq ngaeteel'ae eelcuq bael kuqda hhei laq kaol aqciqhael'ae bi dol hhae." 20 Yoqhhaeq yaeqmiqhael'ae gee biq: "Tyutaeq haeqvae zhol hhaemaeq? Noteel aeqcheekaol yoqhhaeq yaol tyuqvae bi zholdeelsaeq lilmaeq? Yoqhhaeq'ae aelhoq zaeq lael lye gul yil biq!" 21 Moxi tyutoq'ae bael zholdeelsaeq nae'ae; tyutaeq lye yoqhhaeq e yaeqmiq Xipo'la yaol Moxi'ae haeqmiq bi mul hhae. 22 Xipo'la yaqyo qiq hhaeq bo hhei, kaol Moxi lye yoqhhaeq e cholmil mael Geqshunl lye mil hhei biq hhae, yoqhhaeq xilnye gee kaol'ae: "Ngael ochoq e milcaeq vae baelzhol lael e cholyaeq geiq lil."
23 Zhee mee'nae hoq gol hhei'laol, Aijiq zongmae sil vae. Yiqsellyel cholyaeqhael duqhee'lye mulhhael mul gae'lye gyuq bonggaebyel kaol nyuqsaeq lael aeqmyel geezaeq gil'ae, yoqhhaeteel duqhee'lye mulhhael mul gae'lye nyuqsaeq lael aeqmyel geezaeq e yotyel mael Momil tyuqvae gaeq keelli. 24 Momil yoqhhaeteel gyuq mael gaeq vae, kaol yoqhhaeq Yalboqlahanl, Yiqsaq, Yaqgel nyegael geemeeq deelhhei mael nyuq tullaeq biq. 25 Momil Yiqsellyel cholyaeqhael'ae fupol biq, kaol yoqhhaeteel shelkuq mael eiq loq'ae.