Momil lye Moxi yaol gul du hhei
3
Moxi yoqhhaeq e ssuqpaeq Miqdianl milcaeq e jilsi Yeltelloq e aqciqhael hoqzaq hhae, yoqhhaeq lye aqciqhael yaol diqsheelleeldye tyuboq'ae lyeq li, kaol Momil e geeqzhoq vae keellael, geeqzhoq tyulmael laoq Heqlyel Geeqzhoq ngeelvae. 2 Yeheqhuaq e mqmae yosongl aelgong aelbol e aeqzaeq doq miqhulm onglci'ae lye Moxi'ae bi mol hhei. Moxi chifu hhei, aelgong aelbol mael aeqzaeq doq onglci'ae pe hhae, ngeelfeiq, maq pezaq hhei'ae. 3 Moxi gee: "Ngael tyuqvae yil maoq, kaol haeqheemyel yilxiangl mael fu yil maoq, aelgong aelbol xilmael aeqcheekaol maq pezaq oqlolyaeq?" 4 Yeheqhuaq laoq Moxi tyuqvae chifu yil maoqlye zongl mol hhei biq, kaol Momil aelgong aelbol onglci ae'lye yoqhhaeq'ae gul biq, gee: "Moxi, Moxi!" Yoqhhaeq gee: "Ngael naelhaeq deelhhei lil." 5 Momil gee: "Saeqvae haeq niqlael. Noq e aeqkeel e paqno mael heiga hhei, nol haoqtul deelhhei e milcaeq laoq senljyeq milcaeq kaol'ae." 6 Yoqhhaeq yol gee: "Ngael laoq nodae e Momil lil, Yalboqlahanl e Momil lil, Yiqsaq e Momil lil, Yaqgel e Momil lil." Moxi maduq mael hokaeq hhei, Momil'ae mol hhei mael gu biq kaol'ae.7 Yeheqhuaq gee: "Ngael aeqdilmyel ngaeq e Yiqsellyel cholyaeqhael Aijiq vae zonglkyuq gil biq mael mol aeqwae, ngael yoqhhaeteel mulhhael fu'qyezaqhael lye zonglkyuq biq kaol nyuqsaeq lael aeqmyel nyul e yotyel mael eiq gaeq wae; ngael yoqhhaeteel'ae zhee kyuq biq'ae lye loq lil. 8 Ngael gaeyi mael laoq, yoqhhaeteel yaol Aijiq cholyaeqhael e aqlaq ae'lye jiul duhoq yi maoqlye lil, kaol yoqhhaeteel yaol tyuqvae milcaeq ae'lye sheeq da laq, kaol meeq e zhee heeq e milmeeq, aeqchil kaol baq'eel du e milcaeq vae sheeqyil biq maoq, milcaeq xilmael laoq, Ja'nanq cholyaeq, Hel cholyaeq, Yalmoqlil cholyaeq, Biqlilxiq cholyaeq, Xiveil cholyaeq kaol Yebulsi cholyaeq e milcaeq mael ngeelvae. 9 Yaeqmeel, naelhaeq, Yiqsellyel cholyaeq e nyuqsaeq lael aeqmyel nyul e yotyel mael ngaeq'ae saeqvae gaeq keellael vae, ngael Aijiq cholyaeqhael yoqhhaeteel'ae haelmillye zonglkyuq gil biq'ae lye mael eiq mol aeqwae. 10 Yaeqmeel nol yil, ngael noq yaol Faqlaoq tyuqvae moqheilheil du hhei maoq, kaol ngaeq e Yiqsellyel cholyaeqhael yaol Aijiq ae'lye sheeq duyi."
11 Moxi Momil'ae gee biq: "Ngael aeqsul kaollaeq, Faqlaoq'ae dyel'eiq hhae mol yil, kaol Yiqsellyel cholyaeqhael yaol Aijiq ae'lye sheeq duyi ongl laeq?" 12 Momil gee: "Ngael aeqdilmyel noq nyegael qiqgael baelzhol lil. Noq lye Yiqsellyel cholyaeqhael yaol Aijiq ae'lye sheeq duyi fu, noteel geeqzhoq xi qiq zhoq ae'lye Momil'ae fuqsil maoqlye hhae; xilmael laoq ngael noq yaol moqheilheil duyil e zenljul ngeelvae."
13 Moxi Momil'ae gee biq: "Naelhaeq, ngael Yiqsellyel cholyaeq e tyuqvae keelyil, kaol yoqhhaeteel'ae gee biq: 'Noteel e aeqpyuq aeqdae e Momil lye ngaeq yaol noteel saeqvae moqheilheil du hhei laq hhae.' Kaol yoqhhaeteel ngaeq'ae 'yoqhhaeq e cholmil mael aeqchee lye gul biq hhaeq maeq' lye naelhaeq laeq kaollaoq, ngael yoqhhaeteel'ae haelmillye gee biq laeq?" 14 Momil Moxi'ae gee biq: "Ngael laoq haeqfu eiq zhol e tyutaeq lil"; yol gee: "Nol Yiqsellyel cholyaeqhael'ae xilnye gee biq maoqhhae: 'Haeqfu eiq zhol e tyutaeq lye ngaeq yaol noteel saeqvae moqheilheil duyi laq hhae.'" 15 Momil Moxi'ae yol gee biq: "Nol Yiqsellyel cholyaeqhael'ae xilnye gee biq maoqhhae: 'Noteel e aeqpyuq aeqdae e Momil Yeheqhuaq lye ngaeq yaol noteel saeqvae moqheilheil duyi laq hhae, Momil xitaeq laoq, Yalboqlahanl e Momil, Yiqsaq e Momil kaol Yaqgel e Momil ngeelvae.' Xilmael laoq ngaeq e cholmil'ae, haeqfu keellye zadeel hhae; kaol hae qiqyil cholyaeq eiq ngaeq'ae xilnye gul laeq hhae. 16 Nol Yiqsellyel e zhangqlaoqhael yaol gul'eeq laeq, kaol yoqhhaeteel'ae gee biq: 'Noteel e aeqpyuq aeqdae e Momil Yeheqhuaq aeqyoyoq yaol ngaeq'ae bi mol hhei laeq'ae, Momil xitaeq laoq, Yalboqlahanl e Momil, Yiqsaq e Momil kaol Yaqgel e Momil ngeelvae, yoqhhaeq gee: "Ngael aeqdilmyel noteel'ae fupol biq aeqwae, noteel'ae Aijiq vae saeq puqli biq mael'ae fupol aeqwae." 17 Ngael eiq gee gol: "Ngael noteel yaol Aijiq e saeq e onglci ae'lye sheeq duyi maoq, kaol Ja'nanq cholyaeq, Hel cholyaeq, Yalmoqlil cholyaeq, Biqlilxiq cholyaeq, Xiveil cholyaeq, kaol Yebulsi cholyaeq e milcaeq'ae yil, keelyil maoqlye e milcaeq laoq aeqchil kaol baq'eel du e milcaeq ngeelvae.'" 18 Yoqhhaeteel aeqdilmyel noq e saeziq mael naelhaeq maoqlye hhae; nol kaol Yiqsellyel e zhangqlaoqhael Aijiq zongmae tyuqvae keelli maoqhhae, kaol yoqhhaeq'ae gee biq: 'Xiboqlaiq cholyaeq e Momil Yeheqhuaq ngaeteel yaol deelpuq hhei vae, kaol yaeqmeel noq'ae ngaeteel yaol suq nao gaelmae deel kaol diqsheelleeldye vae bi yil laq lye geezaeq lil, kaol ngaeteel e Momil Yeheqhuaq'ae zaelheel heel biq maoq.' 19 Ngael loq lil, zhee onglzaeq e aqlaq maellye maeqngeel kaollaoq, Aijiq zongmae noteel yaol aeqdilmyel maeq bi deel laeq'ae. 20 Tyulkaol, ngael ngaeq e aqlaq mael tyuqdu hhei, kaol ngael Aijiq'ae haelzongl maoqlye e shenqjiq mael zongl, kaol milcaeq xilmael'ae diq biq, aeqnaol, yoqhhaeq noteel yaol caiq bi deel laeq wae siq. 21 Ngael Aijiq cholyaeq yaol noteel'ae bi fu'qiq'ongl maoq, kaol noteel deelsae fu, aqlaq alngeiqmyel maeq deelsae kael wae. 22 Cholhae aeqmae hae qiq hhaeq eiq yoqhhaeq e dongqpyeq'ae zhol e cholyaeq'ae, kaol yoqhhaetoq'ae baelzhol lael e haeqmiyaeq'ae pulsheel moqgoq, pulziq moqgoq kaol aelhongq saelzaeq biq, kaol noteel e yaeqmiq yaqyohael'ae bi dum bi doq. Xilnye laol, noteel lye Aijiq cholyaeq e moqgoqhael diqkoqzaeq biq vae.