Momil lye Moxi'ae shenqjiq zongl e laqtaq biq hhei biq
4
Moxi Momil'ae geehoq biq: "Naelhaeq, yoqhhaeteel laoq ngaeq'ae maeq xiangxinl ngeelvae, ngaeq e saeziq mael eiq maeq naelhaeq nae'ae; yoqhhaeteel xilnye gee maoqlye kaol'ae: 'Yeheqhuaq noq'ae maeq bi mol yo'ae.'" 2 Yeheqhuaq Moxi'ae gee biq: "Noq e aqlaq'ae baq hhei mael aeqchee maeq?" Yoqhhaeq gee: "Zaeqngeeq'ae." 3 Yeheqhuaq gee: "Zaeqngeeq mael milcaeq vae beiq deelhhei!" Yoqhhaeq milcaeq vae zhoq beiq deelhhei laol, zaeqngeeq mael oqhol qiq yaeq peqlal; kaol Moxi oqhol mael'ae kitaelzaeq kaol kisae vae. 4 Yeheqhuaq Moxi'ae gee biq: "Aqlaq mael tyuqdu hhei, kaol oqhol e dongqmiq mael eetyeq biq, kaol Moxi aqlaq mael tyuqdu hhei, kaol oqhol mael eetyeq biq vae, kaol oqhol mael Moxi e laqho vae lye zaeqngeeq peqhoqlal vae. 5 Xilnye zongl mael laoq, yoqhhaeteel'ae yoqhhaeteel e aeqpyuq aeqdae e Momil, Yalboqlahanl e Momil, Yiqsaq e Momil, Yaqgel e Momil Yeheqhuaq noq'ae bi mol hhei gol vae lye bi xiangxinl maoqlye lil."6 Yeheqhuaq yoqhhaeq'ae yol gee biq: "Aqlaq mael neeto oheiq'ae tyuqdo hhei." Kaol yoqhhaeq aqlaq mael neeto oheiq vae tyuqdo hhei vae, aqlaq mael tyuqdu hhei'laol, fu hhei, aqlaq mael'ae maqfeng nael li biq, kaol haeqnyel laoqmyel pul hhae. 7 Yeheqhuaq gee: "Aqlaq mael neeto oheiq'ae tyuq dohoq hhei." Kaol yoqhhaeq aqlaq mael neeto oheiq'ae yol tyuq dohoq hhei; yoqhhaeq aqlaq mael neeto oheiq ae'lye tyuq duhoq hhei'laol, fu hhei, aqlaq mael laefuq laoqmyel peqhoqlal vae, kaol aeqhhaol taq e baeqjyelboq e saeqzil laoqmyel qiqsheel wae. 8 Yoqhhaeteel noq'ae maeq xiangxinl laeq, kaol dilyiq gol shenqjiq e zenljul mael eiq maq jyeqshel nae kaollaoq, yoqhhaeteel laoq dil'el gol shenqjiq e zenljul mael'ae jyeqshel nae wae. 9 Yoqhhaeteel shenqjiq xi niq mal'ae maeq xiangxinl, kaol noq e saeziq mael eiq maeq naelhaeq nae kaollaoq, nol Niqloq Lolbaeq ae'lye eelcuq teel baq laq, kaol milgee vae xye deelhhei. Noq lye Niqloq Lolbaeq ae'lye baq laq e eelcuq mael milgee taq'ae siq peqlal'ae."
10 Moxi Yeheqhuaq'ae gee biq: "Hhaoqsongl o, noq'ae geezaeq lil, ngael laoq myeqbongq maq dyeq e cholyaeq lil, yilkaefu eiq xilnye lil, nol yaqhacheqzaq e cholyaeq'ae saeziq gee laeq aeqnaol eiq xilnye lil, ngael laoq myeqbongq myeqhael maq dyeq e cholyaeq kaollil." 11 Yeheqhuaq yoqhhaeq'ae gee biq: "Aeqsul lye cholyaeq e myeqbongq mael zongldu hhei hhaemaeq? Aeqsul lye cholyaeq e myeqbongq mael yaqba bi ba yil, naeqboq bi boq yil, ma'ne bi mol congl, mabyeq bi byeq yil hhaemaeq? Yeheqhuaq ngaeq lye maeqngeel maeq? 12 Yaeqmeel yil oq, ngael noq'ae myeqbongqdyeq mael biq hhei laqngeel, kaol nol haelgee maoq e saeziq mael geemyeq hhei laeqngeel." 13 Moxi gee: "Hhaoqsongl o, noq'ae geezaeq lil, nol aeqsul e aqlaq ae'lye zongl maoqlye laol, aeqsul yaol moqheilheil duyil." 14 Yeheqhuaq Moxi'ae faqhoqkei biq, gee: "Noq'ae Lilveil cholyaeq Yallunq lye gul biq e algo qiq hhaeq zhol maeqngeel maeq? Ngael laoq yoqhhaeq myeqbongqdyeq'ae lye loq lil. Fu hhei, yoqhhaeq duyi kaol noq'ae sheeqcaq yi vae. Yoqhhaeq noq yaol zhoq mol hhei'laol, neemae onglci'ae hhaol biq hhae. 15 Nol yoqhhaeq'ae saeziq gee biq, kaol gee maoq e saeziq mael yoqhhaeq'ae geegaeq hhei biq; ngael noq'ae myeqbongqdyeq mael biq laqngeel, yoqhhaeq vae eiq myeqbongqdyeq mael biq biq maoq; kaol noteel'ae zongl maoq e silqinq mael geemyeq gil laeqngeel. 16 Yoqhhaeq noq gae'lye cholyaeqhael'ae saeziq bael gee biq maoqlye hhae; yoqhhaeq noq e myeqbongq geiq maoqlye hhae, nol yoqhhaeq e Momil laoqmyel ngeel maoqhhae. 17 Noq e aqlaq'ae zaeqngeeq xilmael baq hhei maoqhhae, kaol zaeqngeeq maellye shenqjiq zongldu hhei."
Moxi Aijiq vae hoqyil vae
18 Tyulkaol, Moxi yoqhhaeq e ssuqpaeq Yeltelloq tyuqvae hoq keelli, kaol yoqhhaeq'ae gee biq: "Nol ngaeq yaol Aijiq vae ngaeq e minqcuq e cholyaeqhael tyuqvae bi hoqyil laq, kaol yoqhhaeteel dyeq'ae siq maeq lye bi fu yil laeq." Yeltelloq Moxi'ae gee biq: "Nol neesaelhhae'lye yil aeqmeel." 19 Yeheqhuaq Miqdianl vae lye Moxi'ae gee biq: "Nol Aijiq vae hoqyil maoqhhae, noq e aeqyil mael'ae hail maoqlye e cholyaeq tyuhael sil byel vae kaol'ae." 20 Moxi laoq haeqmiq kaol yaqyo niq nulhhaeq yaol sheeq hheikaol, yoqhhaeteel yaol mao'lyu mael'ae bi ziq da'li, kaol Aijiq milcaeq vae hoqyil vae. Moxi e aqlaq'ae laoq Momil e zaeqngeeq mael baq hhei hhae.
21 Yeheqhuaq Moxi'ae gee biq: "Nol Aijiq vae hoq keelyil fu, nyuqtongq deelhhei maoqhhae, ngaeq lye noq e aqlaq'ae heilmoq hhei biq e gilzuqmyel maeqdaeqhhaeq e silqinq mael Faqlaoq e yiqsi'ae zongldu hhei. Ngeelfeiq, ngael yoqhhaeq e neemae mael haelmillye ha goq laol haelmillye bi ha maoq, kaol yoqhhaeq aeqdilmyel Yiqsellyel cholyaeqhael yaol maeq bi deel nae'ae. 22 Nol Faqlaoq'ae gee biq maoqhhae: 'Yeheqhuaq xilnye gee hhae: Yiqsellyel laoq ngaeq e yaqyo'ae, ngaeq e fuqbo yaqyo'ae. 23 Ngael noq'ae gee gol biq: Ngaeq e yaqyo yaol bi deel, kaol ngaeq'ae hhae fuqsil wae. Nol yoqhhaeq yaol maeq bi deel nae wae siq. Fu hhei, ngael noq e fuqbo yaqyo yaol xyeq maoq.'"
24 Gaelmae vae haq myel ae'lye Yeheqhuaq Moxi yaol deelpuq hhei biq, kaol yoqhhaeq yaol xyeq goq biq. 25 Xipo'la laoq miqdiqdiq e haqlo qiq siq heil hhei, kaol yoqhhaeq lye yaqyo e ael'yuq e saeqgeel mael teel yeqgae hhei, kaol Moxi e aeqkeel taq'ae o maoq hhei biq, gee: "Siq xilmael gae'lye nol laoq ngaeq e qiqdae boyaeq e yaeqguq laoqmyel wae." 26 Xilnye laol, Yeheqhuaq yoqhhaeq'ae caiq maq xyeq biq wae siq. Tyuqfu, Xipo'la gee: "Yeqgae gui'liq gae'lye, nol laoq ngaeq e siq e yaqyo alsheq wae."
27 Yeheqhuaq Yallunq'ae gee biq: "Nol diqsheelleeldye vae yil kaol Moxi'ae sheeqcaq yil biq." Kaol yoqhhaeq yil vae, Momil e geeqzhoq vae lye Moxi yaol deelpuq hhei biq, kaol yoqhhaeq'ae myeqchilnuq biq. 28 Moxi lye Yeheqhuaq yoqhhaeq'ae bi gee maoqlye e saeziqhael, kaol yoqhhaeq'ae shenqjiq zongl lye moqheilheil biq hael, gilzuqmyel Yallunq'ae geegaeq hhei biq vae. 29 Moxi kaol Yallunq Yiqsellyel cholyaeq e zhangqlaoqhael yaol gul'eeq yil vae. 30 Yallunq laoq Yeheqhuaq lye Moxi'ae haelgee biq e saeziqhael gilzuqmyel cholyaeqhael'ae qiq pu geegaeq hhei gil biq'ae, kaol cholyaeqhael e yiqsi ae'lye shenqjiq tyuhael yol zongldu hhei. 31 Kaol cholyaeqhael xiangxinl vae. Yoqhhaeteel laoq Yeheqhuaq Yiqsellyel cholyaeqhael'ae fupol biq, kaol yoqhhaeteel shelkuq mael eiq mol vae lye gaeq hhei biq, kaol vuqduqtongq gae deelhhei kaol heel gil'ae.