Moxi kaol Yallunq Aijiq e Faqlaoq'ae mol li
5
Aeqnaol, Moxi kaol Yallunq yil kaol Faqlaoq'ae gee biq: "Yeheqhuaq Yiqsellyel e Momil xilnye gee: 'Ngaeq e cholyaeqhael yaol bi deel, yoqhhaeteel'ae ngaeq gae'lye diqsheelleeldye vae zaeqnao bi gol yil.'" 2 Faqlaoq gee: "Yeheqhuaq laoq aeqsul'ae maeq, ngael yoqhhaeq e saeziq mael'ae naelhaeq, kaol Yiqsellyel cholyaeqhael yaol bi yil laeq? Ngael Yeheqhuaq'ae maeq siqcongl yae, kaol Yiqsellyel cholyaeqhael yaol maeq bi deel yil." 3 Yoqhhaeteel gee: "Xiboqlaiq cholyaeq e Momil Yeheqhuaq ngaeteel yaol deelpuq hhei vae. Ngaeteel yaol suq nao e gaelmae deel kaol diqsheelleeldye vae bi yil laq, kaol Yeheqhuaq ngaeteel e Momil'ae zaelheel bi heel yil laeq lye noq'ae geezaeq lil, aeqgael yoqhhaeq laoq doqlal kiq e naelgol, paelsilmyel maejyel maellye ngaeteel'ae xyeq lal maeqhe." 4 Aijiq zongmae yoqhhaeteel'ae gee biq: "Moxi, Yallunq! Noteel aeqcheekaol cholyaeqhael'ae mulhhael maeq bi mul gil lilmaeq? Yil gil, noteel e duqhee'lye mul maoq e aeqhael mael mul yil gil!" 5 Yoqhhaeq yol gee: "Fu hhei, yaeqmeel saeqvae milcaeq e Yiqsellyel cholyaeqhael xuldyulmyel naeqlael, noteel yoqhhaeteel'ae duqhee'lye mul maoq e aeqhael maeq bi mul myel bi pyeqdeel vae!"6 Tyuqfu qiq nao, Faqlaoq cholyaeqhael e mulhhael fu'qyezaq e cholyaeqhael'ae kaol aeqhael mulyaeq e yoheeq'ae moqheilheil biq, gee: 7 "Noteel haelzael'ae laoqmyel Yiqsellyel cholyaeqhael'ae nalgaq xye e haelsaeq haeq heil gil biq, yoqhhaeteel'ae aeqyoyoq haelsaeq o yil gil maoqhhae lye gee biq. 8 Yoqhhaeteel haelzael'ae nalgaq haeldyul zongl laol, noteel yoqhhaeteel'ae tyuldyul sael biq, kaol teel eiq maeq hhae saoq'ae, yoqhhaeteel laoq qiqgiq maq mulzaeqnaol'ae, kaol 'ngaeteel yaol ngaeteel e Momil'ae zaelheel bi heel yil laeq' lye gul gae'lael aeqmyel geezaeq kaol'ae. 9 Noteel hhael cheng e mulhhael mael cholyaeq xihael'ae baqda hhei biq, kaol yoqhhaeteel'ae mulhhael bi mul lye'lye laol, zaqgiqgiq e saeziq mael'ae maeq naelhaeq yil wae."
10 Cholyaeqhael e mulhhael fu'qyezaq e cholyaeqhael kaol aeqhael mulyaeq e yoheeq duyi, kaol Yiqsellyel cholyaeqhael'ae gee biq: "Faqlaoq xilnye gee: 'Ngael noteel'ae haelsaeq maeq heil vae, 11 Noteel aeqyoyoq haeqvae haelsaeq saelpopuq hhei ongl laol, haeqvae o yil gil! Ngeelfeiq, noteel e mulhhael mael teel eiq maeq hhae saoq'ae.'" 12 Tyulkaol, Yiqsellyel cholyaeqhael Aijiq milcaeq'ae haeqvae lael'ee myel yil byel vae, kaol gongqbeeq o hheikaol haelsaeq geiqzaq gil hhae. 13 Mulhhael fu'qyezaq e cholyaeqhael yoqhhaeteel'ae waekei lye lyeq biq, gee: "Noteel haeqfu qiq nao eiq laefuq haelsaeq za fu mul laoqmyel, qiq nao e mulhhael mael mul byel maoqhhae." 14 Faqlaoq e mulhhael fu'qyezaq e cholyaeq laoq yoqhhaeteel lye moqheilheil du hhei e Yiqsellyel cholyaeq e aeqhael mulyaeq e yoheeq'ae diq biq hhae, gee: "Noteel aeqcheekaol milnao kaol yaeqnao laoq laefuq xyedu hhei e nalgaq dyul maq xyedu hhei lilmaeq?"
15 Yiqsellyel cholyaeq e aeqhael mulyaeq e yoheeq Faqlaoq'ae nyuqsaeq lael aeqmyel geezaeq lael biq, gee: "Aeqcheekaol xilnye noq e yaqhacheqzaq e cholyaeqhael'ae zongl biq lilmaeq? 16 Mulhhael fu'qyezaq e cholyaeq laoq noq e yaqhacheqzaq e cholyaeq'ae haelsaeq maeq heil biq'ae, kaol ngaeteel'ae gee laeq: 'Nalgaq xye gil o!' Fu hhei, noq e yaqhacheqzaq e cholyaeq'ae bi diq mael laoq, noq e cholyaeqhael ba hhae." 17 Ngeelfeiq, Faqlaoq gee: "Qiqgiq maeq mulzaeqnaol, noteel laoq aeqdilmyel qiqgiq maeq mulzaeqnaol'ae! Tyulkaol, noteel laoq 'ngaeteel yaol Yeheqhuaq'ae bi heel yil laeq oq' lye gee hhae. 18 Yaeqmeel, mulhhael mul yil gil oq! Haelsaeq laoq noteel'ae maeq heil yil, ngeelfeiq, nalgaq mael gee deelhhei dyul heildu hhei maoqhhae." 19 Yiqsellyel cholyaeq e aeqhael mulyaeq e yoheeq laoq "noteel haeqfu qiq nao nalgaq xye e mulhhael mael, teel eiq maeq hhae saoq'ae" lye gee e gaeq hhei biq, kaol yoqhhaeteel beeqzaeq yaevae lye loq li biq. 20 Yoqhhaeteel Faqlaoq tyuqvae lye deelsae hheikaol duyi fu, Moxi kaol Yallunq tyuqvae haoqtul deelhhei myel yoqhhaeteel'ae doq deelhhei e deelpuq hhei biq, 21 Kaol yoqhhaeteel'ae gee biq: "Yeheqhuaq noteel'ae chifu, kaol shenqpanl biq lye nyuqlil, noteel lye ngaeteel yaol Faqlaoq kaol yoqhhaeq e zhiqmoqhael yiqsi ae'lye miqyil bi ba yil laq vae, kaol maejyel mael yoqhhaeteel e aqlaq'ae heilmoq hhei biq kaol ngaeteel'ae bi xyeq lal laq." 22 Moxi Yeheqhuaq e tyuqvae hoq keelli, gee: "Hhaoqsongl o, nol aeqcheekaol cholyaeq xihael'ae zonglkyuq biq lilmaeq? Aeqcheekaol ngaeq'ae moqheilheil laeq lilmaeq? 23 Ngael Faqlaoq tyuqvae li aeqnaol, noq e cholmil maellye saeziq gee hhei aeqnaol laoq, yoqhhaeq laoq cholyaeq xihael'ae zonglkyuq biq, ngeelfeiq, nol laoq noq e cholyaeqhael'ae teel eiq maeq jiul gil biq'ae."