Yaqgel sil hhei'laol yoqhhaeq e yaqyohael lye baqduqm biq vae
50
Yoqsel yoqhhaeq e aeqdae saeq'ol qye'li vae lye mol hhei biq, kaol vuqduqtongq gae hheikaol nyul tullaeq, kaol yoqhhaeq'ae myeqchilnuq biq'ae. 2 Yoqsel laoq aeqyoq e yaqhacheqzaq e cholyaeqhael onglci e cholnael zonglmeeq e cholyaeqhael'ae aeqyoyoq e aeqdae yaol maeq bi buq gayil myel zonglgee hhei lye moqheilheil biq, tyulkaol, cholnael zonglmeeq e cholyaeqhael lye Yiqsellyel'ae xiang'liaol xye da hhei biq, kaol haeqpael maellye leeltyeq biq vae. 3 Cholsil maeq bi buq gayil lye zongl mael laoq yuqqyel nao mul maoqhhae, tyulkaol, yoqhhaeteel bong'lye yuqqyel nao zongl do aeqwae. Aijiq cholyaeqhael yoqhhaeq gae'lye nyuqsaeq biq kaol siqqyel nao nyul gil biq vae.4 Yoqhhaeq gae'lye nyuqsaeq biq kaol nyul e naohaeq gol hhei'laol, Yoqsel Faqlaoq toq e cholyaeqhael'ae gee biq: "Ngael noteel e ma'ne yiqsi ae'lye endianq hhamul kaollaoq, noteel Faqlaoq'ae bael geegaeq gil biq: 5 'Ngaedae laefuq ngaeq'ae bi faqsilkei gol laq hhae, gee: "Naelhaeq, ngael sil lael oqyaevae; nol ngaeq yaol Ja'nanq milcaeq vae ngaeq lye ngaeq'ae duq deelzaeq hhei e fuq'ongl vae baqduqm hhei laeq." Kaol nol yaeqmeel ngaeq'ae bi hoqli laq, ngaedae yaol bi baqduqm li laeq, baqduqm hhei aeqnaol'ae ngael aeqdilmyel hoqlal hhaeq.'" 6 Faqlaoq gee: "Nol da'li aeqmeel, nodae noq'ae bi faqsilkei laeq laoqmyel, yoqhhaeq yaol baqduqm biq." 7 Tyulkaol, Yoqsel da'li laol yoqhhaeq e aeqdae yaol baqduqm li vae. Yoqhhaeq nyegael da'li e cholyaeqhael laoq, Faqlaoq toq e haelzhol e yaqhacheqzaq e cholyaeqhael, Faqlaoq toq e zhangqlaoqhael, kaol Aijiq milcaeq vae haelzhol e zhangqlaoqhael'ae, 8 Kaol Yoqsel toq e qiqhaoq qiqjyel, kaol yoqhhaeq e algohael, aeqnil kaol yoqhhaeq e aeqdae toq e cholyaeqhael'ae; yoqhhaeteel e yaeqguqhael kaol aqciq aeqnuqhael Geshan milcaeq vae bi zholdeelsaeq hhae. 9 Daqzhangldiq e maqche, kaol aeqmaoq ziq hhei e dangbinkei e cholyaeqhael eiq yoqhhaeq nyegael qiqgael bal da'li gil, cholyaeq naeq li aeqkaol junduil laoqmyel peqlal vae. 10 Yoqhhaeteel Yoqdanl Lolbaeq e neeldu aelheiq boq e Yaldaq diq'onglluldye vae keellael, kaol tyuqvae yotyel haeqheemyel nyul gil'ae. Yoqsel laoq yoqhhaeq e aeqdae gae'lye nyuqsaeq biq kaol siq nao nyul vae. 11 Ja'nanq milcaeq vae zhol e cholyaeqhael Yaldaq diq'onglluldye vae nyul gil mol hhei biq, kaol gee: "Xilmael laoq Aijiq cholyaeqhael zhee kyuq gae'lael aeqmyel nyul gil hhae." Tyulkaol, Yoqdanl Lolbaeq e neeldu aelheiq boq e tyuqvae laoq Yalboq Mailxi lye gul hhae. 12 Yaqgel e yaqyohael laoq aeqdae yoqhhaeteel'ae moqheilheil biq laoqmyel zongl yil gil vae, 13 Yaqgel yaol Ja'nanq milcaeq vae baq hoqli, Mailbiqla e haeldye gonglbyu vae baqduqm biq. Milcaeq tyulmael laoq Manllil e laefuqboq vae, Yalboqlahanl lye Hel cholyaeq Yiqfuqlunq ae'lye vulga hhei e cholsil baqduqm e milcaeq'ae. 14 Yoqsel yoqhhaeq e aeqdae yaol baqduqm hhei aeqnaol laoq, yoqhhaeq e algohael kaol aeqnil, kaol yoqhhaeq e aeqdae'ae bal baqduqm lael biq e yoqhhaeq nyegael qiqgael bael lael hael gilzuqmyel Aijiq vae hoqyil gil vae.
Yoqsel laoq algohael kaol aeqnil'ae haeq nyuqsaeq lye gee gil biq
15 Yoqsel e algohael aeqdae sil hhei mol hhei biq laol, gee: "Yoqsel aedeeteel'ae neemasu biq wae siq, kaol aedeeteel laefuq yoqhhaeq'ae maeqmeeqmyel zongl biq laoqmyel mael zonglhoq lael maeqhe." 16 Yoqhhaeteel lye cholyaeq yaol moqheilheil du hheikaol Yoqsel e tyuqvae bi yil, gee: "Nodae maeq sil laefuq moqheilheil, gee: 17 'Noteel Yoqsel'ae xilnye gee biq: Laefuq noq e algohael noq'ae duqlaq myel zongl biq, nol yoqhhaeteel e zonglzhil mael kaol golsiq mael yuanqliangl biq. Yaeqmeel nol nodae e Momil e yaqhacheqzaq e cholyaeqhael lye zonglzhil mael, yuanqliangl laeq lye geezaeq lil.'" Yoqsel saeziq xihael gaeq hhei biq laol nyul'ae. 18 Yoqhhaeq e algohael aeqyoq'ae mol lael gil'ae, yoqhhaeq e yiqsiboq'ae vuqduqtongq deelhhei kaol, gee: "Naelhaeq, ngaeteel laoq noq e hhaeq'ongq ongqzaeq e cholyaeq lil." 19 Yoqsel yoqhhaeteel'ae gee biq: "Noteel maq gu gil kael, ngael haelmillyekaol Momil vuqtu mael geiq laeq? 20 Laefuq noteel laoq ngaeq yaol zonglsil maoqlye zongl laeq, ngeelfeiq, Momil e yilsi laoq meeq biq lye hhae, kaol yoqhhaeq haelnaeq naeqmaemyel cholyaeqhael e aeqyil mael jiul maoqlye hhae, kaol yaeqnao noteel mol laoqmyel ngeelvae. 21 Yaeqmeel noteel maq gu gil kael, ngael noteel kaol noteel e yaeqguqhael yaol zonglcu laeqngeel." Yoqsel haelmeeqlye saeziq maellye aeqyoq e algohael kaol aeqnil'ae haeq nyuqsaeq lye gee biq.
Yoqsel sil hhei vae
22 Yoqsel kaol yoqhhaeq e aeqdae toq e cholyaeqhael gilzuqmyel Aijiq vae zhol hhae. Yoqsel qiqhael qiqqyel (110) hoq dyeq vae. 23 Yoqsel Yiqfaqlianq e dilsan dail e houldail mol vae; xilnye maeqcilmyel, Maqnaqxi e yaqyo Maqjiq e yaqyohael, yoqhhaeq e houldail wae lye sheeqcuzaeq vae. 24 Yoqsel yoqhhaeq e algohael kaol aeqnil'ae gee biq: "Ngael sil lael oqyaevae, ngeelfeiq, Momil noteel'ae aeqdilmyel fupol laeq'ae, noteel yaol sheeq hheikaol saeqvae milcaeq ae'lye yoqhhaeq Yalboqlahanl, Yiqsaq, Yaqgel kaol yoqhhaeteel e houldailhael'ae biq laqngeel lye faqsilkei gol biq e milcaeq vae da'li gil." 25 Yoqsel laoq Yiqsellyel cholyaeqhael'ae faqsil bi kei gil'ae, gee: "Momil noteel'ae aeqdilmyel fupol laeq'ae, noteel ngaeq e saeq'yuq mael saeqvae lye Ja'nanq milcaeq vae heil da'li maoqhhae." 26 Yoqsel qiqhael qiqqyel (110) hoq dyeq hhei'laol sil vae. Cholyaeqhael lye yoqhhaeq e aeqhhaol mael zonglgee hhei, naeciq xyecheeq da hheikaol haeqpael maellye leeltyeq hhei, kaol aelbol mael'ae baq do biq vae, kaol Aijiq'ae qiu deelhhei hhae.