Yaqgel sil maoqlye e laefuq'ae gee e saeziq
49
Yaqgel lye yoqhhaeq e yaqyohael gul laeq, gee: "Noteel saeqvae zhol'eeq deelhhei lael gil, ngael noteel'ae aeqgael puqlael maoqlye e silqinq mael geegaeq gil laeqngeel.2 Yaqgel e yaqyohael o, zhol'eeq deelhhei kaol naelhaeq gil;
noteel e aeqdae Yiqsellyel e saeziq mael naelhaeq maoqhhae.
3 Liuqbenq o, nol laoq ngaeq e fuqbo yaqyo'ae,
ngael aqha zhee bo fu nol dyeqlal vae,
nol laoq noq e aeqnilhael taq'ae laqtaq kaol onglzaeq mael hhal za'ae;
4 Ngeelfeiq, nol yaeqmiyaeq mulgoq mael,
eellyeq lyeqmae lyeq gaeyi fu maeq duqtyeq ongl laoqmyel hhae,
noq lye nodae e mae'nil yaol ssuqza biq vae,
kaol ngaeq'ae maduq maqza myel zonglpeq laq'ae,
tyulkaol, nol fuqbo yaqyo e laqtaq maqza vae.
5 Ximianq kaol Lilveil laoq algo aeqnil'ae;
yoqhhaeteel e maejyel mael cholyaeq xyeq e moqgoq'ae.
6 Yoqhhaeteel faqhoq guaeq'ei kei fu cholyaeq xyeq gol hhae,
qiqgiq maeq guanq myel aeqnuq e saeqguq mael de'qye hhei vae.
Tyulkaol, ngaeq e yohael yoqhhaeteel boq'ae haeq bael pol lye nyuqlil,
ngaeq e neemae mael yoqhhaeteel nyuq laoqmyel haeq bael nyuq lye nyuqlil.
7 Yoqhhaeteel e faqhoq guaeq'ei kei mael'ae doqchiq hhae bi gee hhae,
faqhoq guaeq'ei kei tyulmael zhee heeq kaol'ae;
yoqhhaeteel e neema zhee su biq mael'ae doqchiq hhae bi gee hhae,
faqhoq guaeq'ei kei tyulmael zhee henq kaol'ae!
Ngael yoqhhaeteel yaol Yaqgel toq'ae lyeqci deel yil maoq,
kaol yoqhhaeteel yaol Yiqsellyel toq'ae bi zholsanq deel yil maoq.
8 Yoqdal o, noq e algo aeqnilhael noq'ae laqma deiqqei laeq'ae;
noq e aqlaq mael diqrenq e kongqlongl mael'ae niqtyeq biq;
noq e aeqdae e yaqyohael noq'ae vuqduqtongq laeq'ae.
9 Yoqdal, ngaeq e yaqyo o,
nol laoq heeqda lal e zhee onglzaeq e shiziq laoqmyel;
yoqhhaeq byeljyeq koq sil hhei'laol zaeq vae, kaol hoqli vae,
yoqhhaeq zhol deelhhei kaol ssuqza deelhhei mael shiziq laoqmyel dul'ae,
shiziq aeqmae laoqmyel, aeqsul yoqhhaeq'ae hae'naeq peq laeq?
10 Laqtaq dailbiaoq e zaeqngeeq mael haeqfu eiq Yoqdal e aqlaq vae za,
yoqhhaeq e houldailhael hae qiqyil eiq zongmae du'lal,
gilzuqmyel goqja yoqhhaeq'ae liqvuq baqmoq biq maoqlye hhae,
haelzhol minqcuq yoqhhaeq e saeziq mael naelhaeq maoqlye hhae.
11 Yoqdal aeqyoq e mao'lyu mael siqbaq aelbol'ae kaltoq deelhhei,
mao'lyu lyuyaeq tyu qiq yaeq hhael meeq e siqbaq aelbol'ae kaltoq deelhhei,
siqbaq zilbaeq zhee naeq, yoqhhaeq onglci'ae aelhongq ciq kaol'eiq hhaeq'ae,
nyelcul'lye siqbaq eelcael zhee naeq, onglci'ae poljye ciq kaol'eiq hhaeq'ae.
12 Yoqhhaeq zilbaeq haelnaeqmyel dol kaol ma'ne nyelcullye hhae,
yoqhhaeq aeqchil haelnaeqmyel dol kaol myeqsheq bachi'lye hhae.
13 Xibullunq laoq eeldeel deeljyel'ae zholgae hhei'ae,
aeqgael yoqhhaeq hoq e hhaeqnaeq naeqhhael peqlal maoqlye hhae,
yoqhhaeq e miljyel mael Xidunl vae maoldu keel'ae.
14 Yiqsalja laoq beiqsa'lye mao'lyu laoqmyel hhae,
yoqhhaeq laoq toq hhei e moqgoq onglci'ae ssuqza deelhhei hhae;
15 Yoqhhaeq zholsael milcaeq qiqgael mol hhei biq fu,
tyuqvae milcaeq laoq milmeeq she lye fu hhei'laol,
yoqhhaeq baqtaq byuq'oq hheikaol haelnaeqmyel baq hhae,
ochoq e yaqhacheqzaq e cholyaeq maq geiq maeq hhaeq'ae.
16 Danl eiq aeqyoq e qiqzonglyaeq e cholyaeqhael'ae bal gaiqjiq biq maoqlye hhae,
kaol Yiqsellyel zhipail onglci e yiq gol zhipail geiq maoqlye hhae.
17 Danl laoq gaelmae e koq lalkiq e oqhol laoqmyel hhae,
yoqhhaeq laoq gaelmae e duq zoq e oqhol laoqmyel hhae,
yoqhhaeq lye diqrenq e aeqmaoq e zaqneq mael koq nael biq,
kaol aeqmaoq ziq e cholyaeq aeqmaoq taq ae'lye jyegae hhei.
18 Yeheqhuaq o, ngael noq e jiul'en mael doqdeelzaeq hhei lil.
19 Diqkoqzaeq e cholyaeq Jadeq'ae diqkoqzaeq lael biq,
ngeelfeiq, yoqhhaeq lye yoqhhaeteel yaol lyeqsae biq.
20 Yalshel e haeldye ae'lye du'lal e zaeqzael laoq meeq eiq meeq naeq eiq naeq,
yoqhhaeq zongmae'ae zaeqmyel lael aeqmyel zaeqzael heil biq maoqlye hhae.
21 Naqfuqta'lil laoq ki'nyelhhae e haeqqye aeqmae laoqmyel,
yoqhhaeq laoq naelhaeqsael lael aeqmyel yotyel gul du kiq'ae.
22 Yoqsel laoq aelsiq siq du'lal kiq e siqbaq aelbol laoqmyel,
eelbi dongqpyeq vae dyeq du'lal,
yoqhhaeq e allaq mael congqciq nildu vae maoldu yil.
23 Kamaq be e laqkiq lye yoqhhaeq'ae kamaq be biq,
kaol yoqhhaeq'ae zonglnael zonglkyuq biq.
24 Ngeelfeiq, Yiqsellyel e aqciq hoqzaq cholyaeq,
Yiqsellyel e haqlo loongl, Yaqgel e zhee onglzaeq e tyutaeq e aqlaq gae'lye,
Yoqsel e aqlaq mael zhee dyeq'ae,
kaol laqzuq maeq zuq myel kamaq heiltyeq ongl'ae.
25 Noq e aeqdae e Momil noq'ae baelzongl laeq,
Mqmae taq'ae hhael'onglzaeq zaeqli qiq hhaeq laoq noq'ae geeqlongq biq biq,
mqmae ae'lye yelgae e vuq'yel kaol hhalnaqmyel ae'lye yuldu e eelbi,
kaol haelnaeqmyel houldail kaol haelnaeqmyel jyeqyaeq,
xihael gilzuqmyel noq'ae biq biq maoqlye hhae.
26 Nodae e geeqlongq mael geeqzhoqhael taq'ae hhael gao hhael naeq'ae,
geeqlongq xihael gilzuqmyel Yoqsel'ae yo'li biq,
kaol yoqhhaeq e algo aeqnil onglci'ae zongmae bi geiq maoqlye hhae.
27 Bianlyaqminq laoq jyeqyaeq ee'nu e haeqheil laoqmyel,
mqshoq laoq aeqyoq lye deiqtyeq laeq mael zaeq,
maeq zaeq byel hael laoq mqkiq'ae byelzaeq hhae."
28 Sataqboq'ae cuga deelhhei mael laoq, Yiqsellyel e qyelniq zhipail, kaol yoqhhaeteel e aeqdae yoqhhaeteel'ae geeqlongq biq biq e saeziqhael'ae. Yoqhhaeq laoq haetaeq'ae hae qiqsheel e geeqlongq zae laol hae qiqsheel e geeqlongq biq gil biq hhae.
Yaqgel sil maoq e laefuq'ae moqheilheil deelsaeq mael
29 Yaqgel yoqhhaeteel'ae moqheilheil gil biq, yoqhhaeteel'ae gee biq: "Ngael haeldyul maeqngeel laol ngaeq e aeqpyuq aeqdaehael tyuqvae hha da'li oqyaevae, noteel ngaeq yaol Hel cholyaeq Yiqfuqlunq e haeldye e gonglbyu vae baqduqm li laeq, kaol ngael ngaeq e aeqpyuq aeqdaehael nyegael qiqgael zhol maoq. 30 Gonglbyu xilmael laoq Ja'nanq milcaeq vae, Manllil dongqpyeq e Mailbiqla haeldye vae za hhae. Milcaeq tyulmael laoq Yalboqlahanl lye Hel cholyaeq Yiqfuqlunq ae'lye vulga hhei e cholsil baqduqm e milcaeq'ae. 31 Yoqhhaeteel tyuqvae lye Yalboqlahanl kaol yoqhhaeq e haeqmiq Saqla yaol baqduqm biq vae, Yiqsaq kaol yoqhhaeq e haeqmiq Lilbaiqja eiq tyuqvae baqduqm biq vae, ngaeq lye Lilyal yaol eiq tyuqvae baqduqm biq wae. 32 Haeldye tyu qiq koq kaol haeldye e gonglbyu tyulmael laoq, Yalboqlahanl Hel cholyaeq ae'lye vul hhei hhae." 33 14Yaqgel laoq yoqhhaeq e yaqyohael'ae saeziq gee byel hhei'laol, aeqkeel niqboq myel ssuqhhal taq'ae baqda hoq hhei, kaol saeq'ol qye'li hhei vae, yoqhhaeq e aeqpyuq aeqdaehael tyuqvae hoqli vae.