Yaqgel Yoqsel e yaqyohael'ae geeqlongq biq gil biq
48
Qiq nao laoq, cholyaeq qiq hhaeq Yoqsel'ae gee yi biq: ''Nodae nael biq hhae.'' Kaol Yoqsel aeqyoq e yaqyo niq nulhhaeq Maqnaqxi kaol Yiqfaqlianq yaol sheeq hheikaol yil vae. 2 Cholyaeq Yaqgel'ae geegaeq biq, gee: "Noq e yaqyo Yoqsel noq e saeqvae lael vae." Yiqsellyel maeq tullael ongl maeqzaeqmyel ssuqhhal ae'lye dong tullaeq. 3 Yaqgel Yoqsel'ae gee biq: "Hhael'onglzaeq zaeqli Momil Ja'nanq milcaeq e Lulsi vae, ngaeq'ae bi mol laeq vae, kaol ngaeq'ae geeqlongq biq laq, 4 Kaol ngaeq'ae gee laeq: 'Ngael noq'ae houldail bi naeqlael kaol haelnaeqmyel minqcuq bi peqlal maoq; ngael saeqvae milcaeq mael nol kaol noq e houldailhael'ae biq biq maoq, kaol yoqhhaeteel haeqfu eiq hhamul gayil'ae.' 5 Ngael Aijiq vae maeq lael laefuq, noq'ae Aijiq milcaeq ae'lye du'lal biq e Yiqfaqlianq kaol Maqnaqxi yaqyo xi niq nulhhaeq, yaeqmeel yoqhhaeteel laoq ngaeq hhae, Liuqbenq kaol Ximianq ngaeq e laoqmyel hhae. 6 Yiqfaqlianq kaol Maqnaqxi e aeqnaol'ae dyeqlal e yaqyohael noq e ngeelvae; ngeelfeiq, yoqhhaeteel e zaeqdye halngeiq mael laoq yoqhhaeteel e algo niq nulhhaeq ae'lye lael hhae. 7 Ngael xilnye zongl mael laoq, ngael Badanl Yallanq milcaeq ae'lye hoqlal fu, Yiqfaqta li e gaelmae teel kaeq e Ja'nanq milcaeq vae, Lajyeq ngaeq e yiqsiboq'ae sil vae, kaol ngaeq lye yoqhhaeq yaol Yiqfaqta e gaelmae dongqpyeq vae baqduqm biq lil; Yiqfaqta laoq Boqlilhenq ngeelvae.''8 Yiqsellyel Yoqsel e yaqyo yaol mol hhei biq, kaol naelhaeq: "Yoqhhaeteel laoq aeqsul maeq?" 9 Yoqsel aeqdae'ae geehoq biq: "Yoqhhaeteel laoq ngaeq e yaqyohael'ae, Momil saeqvae lye ngaeq'ae biq hhei laq hhae.'' Yiqsellyel gee: "Yoqhhaeteel yaol ngaeq'ae saeqvae sheeqyi, ngael yoqhhaeteel'ae geeqlongq biq biq maoq." 10 Yiqsellyel cholmoqmoq li aeqkaol ma'ne mael yillil eeqleeq myel peqyil biq'ae, kaol maeq fu loq ongl biq'ae. Yoqsel lye yoqhhaeteel yaol yoqhhaeq e yiqsi'ae sheeqli biq, kaol yoqhhaeq yoqhhaeteel'ae baqcongq biq kaol myeqchilnuq biq'ae. 11 Yiqsellyel Yoqsel'ae gee biq: "Ngael noq yaol hhae mol siq lye maeq nyuq keelyil, yaeqmeel Momil lye ngaeq yaol noq e yaqyohael eiq bi mol laeq." 12 Yoqsel lye yoqhhaeq e yaqyo niq nulhhaeq yaol Yiqsellyel aeqpaeq kaeqlaeq ae'lye cheelpol hhei, kaol milcaeq vae vuqduq bi tongq gae deelhhei. 13 Yoqsel yoqhhae niq nulhhaeq yaol Yiqsellyel yiqsiboq'ae sheeqli biq, aeqyoq e laqsseqboq e Yiqfaqlianq yaol Yiqsellyel e laeqbaelboq'ae bi zhol hhae, aeqyoq e laeqbaelboq e Maqnaqxi yaol Yiqsellyel e laqsseqboq'ae bi zhol hhae. 14 Ngeelfeiq, Yiqsellyel aqlaq niqboq myel baqyaq hhei, laqsseq mael laoq hhael nil e qiq hhaeq Yiqfaqlianq e vuqduq'ae baqcheeq da hhei biq, laeqbael mael laoq hhael heeq e qiq hhaeq Maqnaqxi e vuqduq'ae baqcheeq da hhei biq. 15 Yoqhhaeq Yoqsel'ae geeqlongq biq biq, gee:
"Ngaebol Yalboqlahanl kaol ngaedae Yiqsaq nyegael guanxil zhee meeq e Momil,
ngaeq'ae yaeqmeel keellye qiqyil myel zonglcu laeq e Momil,
16 Ngaeq yaol saeqlael onglci ae'lye jiul laeq e mqmae yosongl tyutaeq,
yaqyo xi niq nulhhaeq'ae geeqlongq biq biq lye nyuqlil.
Ngael kaol ngaebol Yalboqlahanl kaol ngaedae Yiqsaq e cholmil mael,
yaeqguq xi niq nulhhaeq ae'lye za gayil biq lye nyuqlil;
yoqhhaeteel laoq halza milcaeq vae houldail haelnaeqmyel naeqlael biq lye nyuqlil."
17 Yoqsel yoqhhaeq e aeqdae laoq laqsseq mael Yiqfaqlianq e vuqduq taq'ae baqcheeq da hhei mol hhei biq, kaol neemae mael'ae maeq hhaol biq'ae, tyulnye laol, yoqhhaeq e aeqdae e aqlaq mael Yiqfaqlianq e vuqduq ae'lye Maqnaqxi e vuqduq'ae baq pol da hhei biq. 18 Yoqsel yoqhhaeq e aeqdae'ae gee biq: ''Aeqdae o, xilnye maeqngeel'ae, xitaeq laoq fuqbo yaqyo'ae, noq e laqsseq mael yoqhhaeq e vuqduq taq'ae baqcheeq da hhei biq maoqhhae.'' 19 Yoqhhaeq e aeqdae laoq maeq naelhaeq biq, gee: "Ngael loq lil, ngaeq e yaqyo o, ngael loq lil, yoqhhaeq eiq minqcuq qiq mal peqlal'ae, henq eiq henq da'lal hhae; ngeelfeiq, yoqhhaeq e aeqnil yoqhhaeq taq'ae hhael henq lael, yoqhhaeq e aeqnil e houldailhael haelnaeqmyel goqja peqlal maoqlye hhae." 20 Tyuqfu qiq nao, Yiqsellyel yoqhhaeteel'ae geeqlongq biq biq, gee:
"Yiqsellyel cholyaeqhael noteel e cholmil maellye ochoq'ae geeqlongq biq biq,
gee: 'Momil lye noq yaol Yiqfaqlianq kaol Maqnaqxi laoqmyel geeqlongq meeq biq lye nyuqlil.'"
Tyulkaol, Yiqsellyel lye Yiqfaqlianq yaol Maqnaqxi holtaq'ae bi zhol hhae.
21 Yiqsellyel Yoqsel'ae yol gee biq: "Naelhaeq, ngael sil lael oqyaevae, ngeelfeiq, Momil noteel nyegael qiqgael baelzhol'ae, noteel yaol noteel e aeqpyuq aeqdae e milcaeq vae sheeq hoqli laeq'ae. 22 Yaeqmeel ngael laoq laefuq maejyel kaol kamaq maellye, Yalmoqlil cholyaeq ae'lye diq yinqzaeq laeq e Shiljianl milcaeq mael noq'ae biq laqngeel, tyulkaol, noq e milcaeq mael laoq algohael kaol aeqnil taq'ae hhael naeq'ae.''