Yaqgel toq qiqhaoq qiqjyelmyel Geshan milcaeq vae zholgae hhei gil vae
47
1-2 Yoqsel aeqyoq e algohael kaol aeqnil onglci'ae lye ngaeq hhaeq saelpodu hhei, kaol Faqlaoq zael'ae sheeqli biq, kaol Faqlaoq'ae gee biq: "Ngaeq e aeqdae, ngaeq e algohael kaol aeqnil, yoqhhaeteel e aeqnuq aqciqhael lyeq hhei, halzahael heil hheikaol, Ja'nanq ae'lye lael gil vae, yaeqmeel Geshan milcaeq vae zhol hhae." Yoqhhaeq gee byel hhei'laol algohael kaol aeqnil tyu ngaeq hhaeq yaol Faqlaoq'ae tyuq fu hhei biq. 3 Faqlaoq Yoqsel e algohael kaol aeqnil'ae naelhaeq biq: "Noteel aeqchee mulzaeq gil lilmaeq?" Yoqhhaeteel Faqlaoq'ae geehoq biq: "Yaqhacheqzaq e cholyaeqhael laoq, ngaeteel e aeqpyuq aeqdae laoqmyel aqciq hoqzaq e cholyaeq lil." 4 Yoqhhaeteel Faqlaoq'ae gee biq: "Ja'nanq milcaeq vae hoqlaq teel eiq maeqmeeq, qiqgiq zaeq teel eiq maqza, noq e yaqhacheqzaq e cholyaeqhael e aqciqhael haelsaeq zaeq eiq maqza, tyulkaol, ngaeteel saeqvae milcaeq vae baelzhol lael maoqlye lil, yaeqmeel ngaeteel'ae Geshan milcaeq vae bi zhol laeq lye geezaeq lil." 5 Faqlaoq Yoqsel'ae gee biq: "Noq e aeqdae, noq e algohael kaol aeqnil noq e saeqvae keellael vae, 6 Aijiq milcaeq laoq gilzuqmyel noq e yiqsi'ae za hhae, tyulkaol, nol nodae, noq e algohael kaol aeqnil yaol saeqvae hhaelmeeq meeqli e milcaeq vae bi zhol, kaol yoqhhaeteel yaol Geshan milcaeq vae bi zhol gil aeqmeel. Nol yoqhhaeteel onglci'ae onglzaeq e cholyaeq zhol'ae lye loq kaollaoq, yoqhhaeteel yaol moqheilheil du hheikaol ngaeq e jyeqyaeqhael'ae bi fu'qye yil."7 Yoqsel lye yoqhhaeq e aeqdae Yaqgel yaol Faqlaoq yiqsiboq'ae sheeqli biq, kaol Yaqgel Faqlaoq'ae geeqlongq biq biq. 8 Faqlaoq Yaqgel'ae naelhaeq biq: "Nol hae'nae hoq zoq wae maeq?" 9 Yaqgel Faqlaoq'ae geehoq biq: "Ngael haeqvae lael'ee myel qiqhael suqqyel (130) hoq baelzhol wae. Ngael haeldyulmyel maq dyeq oqyilsiq, kaol ngaeq'ae aeqyil maeqmeeq laeq'ae, ngaeq e aeqpyuq aeqdae ngaeq taq'ae aeqyil hhael maol'ae." 10 Yaqgel Faqlaoq'ae geeqlongq yol biq biq, kaol Faqlaoq zaellye deelsae hhei vae. 11 Yoqsel laoq Faqlaoq minllinl laoqmyel yoqhhaeq e aeqdae, yoqhhaeq e algohael kaol aeqnil yaol Aijiq e hhaelmeeq meeqli e Geshan milcaeq e Lanqsail vae bi zholgae hhei gil vae, kaol yoqhhaeteel e zaeqdye halngeiq bi geiq. 12 Yoqsel laoq aeqyoq e aeqdae, algohael, aeqnil kaol yaeqguqhael, gilzuqmyel cholyaeqhael'ae zaelsiq heil biq kaol cu biq'ae.
Hoqlaq maeqmeeq qiqgiq zaeq eiq maqza
13 Tyuqfu, hoqlaq teel eiq maeqmeeq qiqgiq zaeq teel eiq maqza, halza milcaeq vae zaelsiq qiqgael eiq maqza, tyulkaol, Aijiq milcaeq kaol Ja'nanq milcaeq e cholyaeqhael gilzuqmyel myeqkyuqkyuq gil biq vae. 14 Yoqsel laoq Aijiq cholyaeqhael kaol Ja'nanq cholyaeqhael zaelsiq vul lal gil e gilzuqmyel pulziqhael heil'eeq hheikaol, Faqlaoq e pulziq baqdeelzaeq e laoqhaol vae baq do'li vae. 15 Aijiq milcaeq kaol Ja'nanq milcaeq e pulziqhael gilzuqmyel mul byel hhei'laol, Aijiq cholyaeqhael Yoqsel tyuqvae keellael, gee: "Pulziqhael mul byel wae. Ngaeteel'ae zaelsiq biq laq lye geezaeq lil, ngaeteel aeqcheekaol noq e yiqsiboq'ae myeqsil deelhhei laeq?" 16 Yoqsel geehoq biq: "Pulziq mul byel hhei kaollaoq, noteel e jyeqyaeqhael ngaeq'ae lyeq laeq laeq laol, ngael noteel'ae zaelsiqhael heil laeqngeel, noteel jyeqyaeq maellye zaelsiq paelzaeq lael gil." 17 Tyulkaol, yoqhhaeteel jyeqyaeqhael Yoqsel tyuqvae lyeq li, kaol Yoqsel lye zaelsiqhael yoqhhaeteel'ae heilmoq hhei biq, kaol yoqhhaeteel e aeqmaoqhael, aqciqhael, aeqnuqhael kaol mao'lyuhael nyegael heilpael vae. Tyuqfu qiq hoq, Yoqsel yoqhhaeteel'ae zaelsiq heilmoq biq, kaol yoqhhaeteel e jyeqyaeqhael paelzaeq laeq vae. 18 Dil'el nianq, yoqhhaeteel Yoqsel e tyuqvae keellael, kaol yoqhhaeq'ae gee biq: "Ngaeteel ngaeq e hhaoqsongl'ae qiqgiq maeq geehhaq yil, ngaeteel e pulziqhael mul byel gil aeqwae, kaol jyeqyaeqhael eiq ngaeq e hhaoqsongl wae. Ngaeteel kaol ngaeteel e haeldyehael maoqlaol, noq'ae heilpael biq e qiqgiq maqza vae. 19 Aeqcheekaol ngaeteel yaol noq e yiqsiboq'ae bi sil, kaol ngaeteel e haeldyehael eiq haelpeeq bi peeq yil laeq? Nol zaelsiq maellye ngaeteel kaol ngaeteel e haeldyehael vulzaeq laeq lye geezaeq lil, tyulnye laol, ngaeteel laoq Faqlaoq e hhaeq'ongq ongqzaeq e cholyaeq wae, kaol ngaeteel e haeldyehael eiq Faqlaoq wae. Nol ngaeteel'ae ael'yuq heil hhei laeq, kaol ngaeteel maeq sil myel hha dyeqdeel'ae, haeldyehael eiq haelpeeq maq peeq yil kiq'ae."
20 Aijiq cholyaeqhael hoqlaq maeqmeeq qiqgiq zaeq eiq maqza myel puqli biq, kaol aeqsul eiq aeqyoq e haeldyehael ongqzaeq byel hhei. Tyulkaol, Yoqsel lye Aijiq e gilzuqmyel haeldyehael Faqlaoq'ae bal vul hhei biq, xilnye laol, milcaeq tyuhael gilzuqmyel Faqlaoq wae. 21 Yoqsel lye Aijiq vae gilzuqmyel cholyaeqhael Faqlaoq e hhaeq'ongq ongqzaeq e cholyaeq bi peqyil vae. 22 Faqlaoq jilsihael'ae mulhhael hhaeqpyuq heil biq hhae, kaol jilsihael aeqyoteel e haeldyehael maeq ongqzaeq'ae, tyulkaol, Yoqsel jilsihael e haeldyehael maq vul'ae. 23 Yoqsel cholyaeqhael'ae gee biq: "Naelhaeq gil, ngael yaeqnao noteel kaol noteel e haeldyehael Faqlaoq'ae bal vulga hhei biq. Saeqvae noteel'ae heil biq e ael'yuq za'ae, kaol noteel kaezaeq yil gil. 24 Zaelsiq heillezaq fu, noteel laoq ngaeq mael onglci e qiq mal laoq Faqlaoq'ae heil biq maoqhhae, baeqjyelboq e yuq mael laoq noteel ngeelvae, kaol zaelsiq tyuhael laoq, noteel kaol noteel laoqhaol e cholyaeqhael e zaeqzael kaol ael'yuq'ae." 25 Yoqhhaeteel gee: "Nol ngaeteel'ae bi dyeq gayil laq, kaol ngaeteel'ae ngaeq e hhaoqsongl e ma'ne yiqsi ae'lye endianq bi mul hhei laq lye nyuqlil, ngaeteel Faqlaoq e hhaeq'ongq ongqzaeq e cholyaeq geiq hhaeq.'' 26 Tyulkaol, Yoqsel lye Aijiq cholyaeqhael'ae lilfaq cuga deelhhei gil biq: Cholyaeqhael haeldye ae'lye heilhoqlaeq e zaelsiqhael ngaeq mael onglci e qiq mal laoq Faqlaoq'ae heil biq maoqhhae, ngeelfeiq, jilsihael e haeldyehael laoq Faqlaoq e maeqngeel'ae. Cu deelhhei e xilmael laoq yaeqmeel keellye zongl maoq wae siq.
Yaqgel sil maoq laefuq'ae Yoqsel'ae moqheilheil biq e saeziq mael
27 Yiqsellyel cholyaeqhael Aijiq milcaeq e Geshan vae zhol hhae, yoqhhaeteel tyuqvae yohaha lal vae, kaol cholyaeq eiq haelnaeqmyel zheeqlael vae. 28 Yaqgel Aijiq milcaeq vae qyelsiq hoq zhol vae, yoqhhaeq e qiqyil e cholhoq laoq qiqhael yuqqyel siq (147) hoq'ae. 29 Yiqsellyel sil e naohaeq keellael goqbiq vae, kaol yoqhhaeq e yaqyo Yoqsel yaol gul laeq'ae, yoqhhaeq'ae gee biq: ''Ngael noq e ma'ne yiqsi ae'lye endianq hhamul kaollaoq, noq e aqlaq mael ngaeq e paeqkaeq vae baqdeel hheikaol faqsilkei, neemae maeqpaelmyel gaeq kaol haelmillye gee laol haelmillye zongl maellye ngaeq'ae meeq laeq maoqhhae, ngaeq yaol Aijiq vae haq baqduqm laeq. 30 Ngael sil hhei'laol, nol ngaeq yaol Aijiq ae'lye sheeq duyil laq maoqhhae, kaol ngaeq e aeqpyuq aeqdae e fuq'ongl vae bal baqduqm li laeq." Yoqsel gee: "Ngael nol gee e saeziq mael aeqdilmyel zongl yil hhaeq." 31 Yaqgel gee: "Nol ngaeq'ae faqsilkei laeq maoqhhae." Kaol Yoqsel yoqhhaeq'ae faqsilkei biq vae, tyulkaol, Yiqsellyel ssuqhhal taq'ae Momil'ae meeqyaevae lye gee biq'ae.