Yiqsellyel qiqhaoq qiqjyel myel Aijiq vae gaeyil
46
Yiqsellyel aeqyoq e halzahael heil hhei, kaol deelsae hheikaol Byeqshilba vae deel keelli, kaol yoqhhaeq e aeqdae Yiqsaq e Momil'ae zaelheel heel biq. 2 Mqkiq Momil yilxiangl onglci'ae lye Yiqsellyel'ae gee biq: "Yaqgel, Yaqgel." Yaqgel gee: "Ngael saeqvae zhol lil." 3 Momil gee: "Ngael laoq Momil lil, noq e aeqdae e Momil lil; ngael noq yaol tyuqvae haeqheemyel goqja bi peqlal laqngeel, tyulkaol, maq gu kael, Aijiq'ae gaeyil aeqmeel. 4 Ngael aeqdilmyel noq nyegael qiqgael Aijiq'ae bael gaeyil lil, ngael nol kaol noq e houldailhael saeqvae sheeq da hoq laq maoq, kaol Yoqsel aeqyoq e aqlaq maellye noq yaol ma'ne somi laq kaol baqduqm laeq'ae." 5 Kaol Yaqgel Byeqshilba ae'lye deelsae hheikaol deel vae. Yiqsellyel e yaqyohael laoq, Faqlaoq lye Yaqgel'ae biq biq e maqche mael'ae, yoqhhaeteel e aeqdae Yaqgel, kaol yoqhhaeteel e yaeqguqhael kaol haeqmiqhael'ae bi zhol da'li gil vae. 6 Yoqhhaeteel laoqhaol jyeqyaeqhael, kaol Ja'nanq milcaeq ae'lye hael hhae'lael biq e jadanglhael heil hheikaol Aijiq vae keellael. Xilnye laol, Yaqgel kaol yoqhhaeq e yuqpaeq yuqnyulhael gilzuqmyel qiqgael lael hhae. 7 Yaqgel yoqhhaeq e yaqyohael, yuqpaeqhael, yaeqmiqhael, yuqmaehael kaol yoqhhaeq'ae haelzhol e houldailhael, gilzuqmyel Aijiq vae sheeqyil vae.Yaqgel e houldailhael
8 Aijiq vae gaeyil e Yiqsellyel cholyaeqhael, Yaqgel kaol yoqhhaeq e houldailhael ngeelvae, cholmilhael sa'oqboq'ae cu deelhhei: Yaqgel e fuqbo yaqyo laoq Liuqbenq'ae. 9 Liuqbenq e yaqyohael laoq Ha'nol, Faqlul, Xisi'lunq kaol Jamiq'ae. 10 Ximianq e yaqyohael laoq Yemqlil, Yaqminq, Axaq, Yaqjin, Soqxaq kaol Ja'nanq milcaeq e yaeqmiyaeq lye bo hhei e Saoqloq'ae. 11 Lilveil e yaqyohael laoq Geqshunl, Gexaq kaol Miqla'lil'ae. 12 Yoqdal e yaqyohael laoq Eq, Eqnanq, Shilla, Faqlelsi kaol Xyella, ngeelfeiq, Eq kaol Eqnanq Ja'nanq milcaeq vae lye sil vae. Faqlelsi e yaqyohael laoq Xisi'lunq kaol Hamuqlel'ae. 13 Yiqsalja e yaqyohael laoq Toqla, Puqwaq, Yoboq kaol Sen'lunq'ae. 14 Xibullunq e yaqyohael laoq Xi'lyel, Yiqlunq kaol Yaqlil'ae. 15 Sataqboq e cholyaeq xihael laoq Lilyal lye Badanl Yallanq milcaeq vae Yaqgel'ae bo hhei biq e yaqyohael'ae, xihael dyul maeqcilmyel, Diqnaq lye gul biq e yaeqmiq qiq hhaeq zhol wae siq. Lilyal ae'lye lael e yaqyohael, yuqpaeqhael kaol yuqnyul gilzuqmyel suqqyel suq hhaeq'ae. 16 Jadeq e yaqyohael laoq Xiqfeiyunq, Haji, Su'niq, Yiqsibenq, Yiqlil, Yalloqdiq kaol Yallyellil'ae. 17 Yalshel e yaqyohael laoq Yinnaq, Yilshiwaq, Yilshiweiq kaol Biqlilyal'ae, xihael dyul maeqcilmyel Xi'la lye gul biq e dulmae qiq hhaeq zhol wae siq. Biqlilyal e yaqyohael laoq Xibyeq kaol Maqjyeq'ae. 18 Sataqboq e cholyaeq qyelkoq hhaeq laoq, Xipal lye Yaqgel'ae bo hhei biq e yaqyohael, yuqpaeqhael kaol yuqnyul'ae, Xipal laoq Laban lye yoqhhaeq e yaeqmiq Lilyal'ae yaqhacheqzaq e haeqmiyaeq bi geiq e qiq hhaeq'ae. 19 Yaqgel e haeqmiq Lajyeq lye bo hhei e yaqyohael laoq Yoqsel kaol Bianlyaqminq'ae. 20 Yoqsel Aijiq milcaeq ae'lye du'lal biq e yaqyohael laoq Maqnaqxi kaol Yiqfaqlianq'ae, An lye gul e milmae heeqmyel e Botiqfei'la jilsi e yaeqmiq Yalxi'nal lye Yoqsel'ae bo hhei biq hhae. 21 Bianlyaqminq e yaqyohael laoq Biqla, Biqjyeq, Yalshiqbyeq, Ji'la, Naiqmanl, Yiqxi, Loqshiq, Mqpinq, Hulpinq kaol Yallel'ae. 22 Sataqboq e cholyaeq xihael laoq Lajyeq lye Yaqgel'ae bo hhei biq e yaqyohael, yuqpaeqhael'ae, gilzuqmyel qyel'yuq hhaeq'ae. 23 Danl e yaqyo laoq Hulshen'ae. 24 Naqfuqta'lil e yaqyohael laoq Yaqxo, Guqniq, Yesel kaol Shillengq'ae. 25 Sataqboq e cholyaeq xihael laoq, Pilla lye Yaqgel'ae bo hhei biq e yaqyohael kaol yuqpaeqhael'ae, gilzuqmyel siq hhaeq'ae. Pilla laoq Laban lye yoqhhaeq e yaeqmiq Lajyeq'ae yaqhacheqzaq e haeqmiyaeq bi geiq e qiq hhaeq'ae. 26 Gilzuqmyel Yaqgel e yaeqguqhael, kaol Yaqgel nyegael Aijiq vae qiqgael lael e cholyaeqhael, yoqhhaeq e keeqmaehael maeq bael gee do myel, gilzuqmyel koqqyel koq hhaeq'ae. 27 Sataqboqhael dyul maeqcilmyel, Yoqsel'ae Aijiq milcaeq ae'lye du'lal biq e yaqyo niq nulhhaeq zhol'ae. Yaqgel toq ae'lye Aijiq'ae hael yi e cholyaeqhael, gilzuqmyel siqqyel hhaeq'ae.
Yoqsel laoq Geshan milcaeq vae yoqhhaeq aeqdae vae sheeqcaq li biq
28 Yaqgel lye Yoqdal yaol laefuqmyel Yoqsel tyuqvae bi yil, kaol Yoqsel yaol Geshan milcaeq vae yoqhhaeteel'ae mol yi lye bi gee yil. Yoqhhaeteel Geshan milcaeq vae keellael fu, 29 Yoqsel lye daqzhangldiq e maqche paeqgaelsael meeq deelhhei, Geshan da'li kaol yoqhhaeq e aeqdae Yiqsellyel'ae sheeqcaq li biq hhae. Yoqsel aeqyoq e aeqdae yaol zhoq mol hhei'laol, baqcongq deelhhei kaol zhee nyul tyeqli vae. 30 Yiqsellyel Yoqsel'ae gee biq: "Ngael noq yaol mol aeqwae, nol zhol'ae lye loq laol, ngael sil lael kaol'eiq maezaeqmi'li hhaeq yaevae." 31 Yoqsel yoqhhaeq e algohael, aeqnil kaol yoqhhaeq e aeqdae toq e baeqjyelboq e cholyaeqhael'ae gee biq: "Ngael da'li kaol Faqlaoq'ae geegaeq li biq maoq, kaol yoqhhaeq'ae gee biq: 'Ngaeq e Ja'nanq milcaeq e algohael kaol aeqnil, kaol ngaedae toq e cholyaeqhael, gilzuqmyel ngaeq e saeqvae keellael vae. 32 Cholyaeq xihael gilzuqmyel aqciq hoqzaq e cholyaeq'ae, kaol yoqhhaeteel aqciq hoqzaq hoqzaq myel zonglzhol hhae, kaol yoqhhaeteel aeqyoq e aeqnuqhael aqciqhael lyeq hhei, kaol gilzuqmyel halzahael eiq heil gaeyi vae.' 33 Faqlaoq noteel'ae aeqyoq yaol mol yi lye gee fu, yoqhhaeq 'Noteel laoq aeqchee zonglzaeq lilmaeq' lye naelhaeq lael kaollaoq, 34 Noteel yoqhhaeq'ae xilnye geehoq biq: 'Noq e yaqhacheqzaq e cholyaeqhael laoq yaeqguq guqyaeq fu ae'lye mael yaeqmeel keellye, ngaeteel e aeqpyuq aeqdae laoqmyel aqciq hoqzaq hoqzaq myel zhol lil.' Aijiq cholyaeq laoq aqciq hoqzaq e cholyaeqhael'ae xinq gil biq hhae, tyulnye laol, noteel laoq Geshan milcaeq vae hhae zhol wae."