Yoqsel aeqyoq e algohael kaol aeqnil'ae yoqhhaeq aeqsul lil lye geedu biq vae
45
Yoqsel yoqhhaeq e dongqpyeq'ae haoqtul deelhhei e Aijiq cholyaeqhael e yiqsi ae'lye, ma'eel maeq pityeq ongl biq kaol yoqhhaeteel'ae yotyel haeqheemyel gee biq: "Gilzuqmyel duyil gil." Xilnye laol, Yoqsel yoqhhaeq e algohael kaol aeqnil'ae yoqhhaeq aeqsul lil lye geedu gil biq fu, yoqhhaeq e algohael kaol aeqnil maoqlaol, baeqjyelboq e cholyaeq qiq hhaeq eiq maeq baelzhol'ae. 2 Tyulkaol, yoqhhaeq yotyel haeqheemyel nyul tullaeq. Aijiq cholyaeqhael yoqhhaeq e nyultyel mael gaeq vae, Faqlaoq toq e cholyaeqhael eiq xilmael gaeq hhei biq vae. 3 Yoqsel yoqhhaeq e algohael kaol aeqnil'ae gee biq: "Ngael laoq Yoqsel lil, ngaedae zhol siq maeq?" Yoqhhaeteel Yoqsel e yiqsiboq'ae gu gil biq, kaol saeziq qiq doq eiq maeq geehoq peq biq'ae. 4 Yoqsel yoqhhaeq e algohael kaol aeqnil'ae gee biq: "Noteel ngaeq e yiqsiboq'ae lael." Kaol yoqhhaeteel Yoqsel e yiqsiboq'ae da'li vae. Yoqhhaeq gee: "Ngael laoq noteel lye Aijiq vae ongqzaeq yi laeq e aeqnil Yoqsel lil. 5 Momil lye ngaeq yaol noteel laefuqmyel saeqvae moqheilheil duyi laq mael laoq, cholyaeqhael e aeqyil mael bi dyeqdeel maoqlye kaol'ae. Tyulkaol, noteel yaeqmeel laoq noteel lye ngaeq yaol saeqvae ongqzaeq yi laeq gae'lye, aeqyoyoq'ae haeq holzaeq hoq haeq vuqzaeq hoq gil. 6 Yaeqmeel saeqvae milcaeq vae hoqlaq maeqmeeq qiqgiq zaeq eiq maqza myel niq hoq zoq wae, zaelsiq maeq hhae kaezaeq, qiqgiq zaelsiq eiq maeq hhae heillezaq myel ngaeq hoq za wae siq. 7 Momil lye ngaeq yaol noteel laefuqmyel moqheilheil du hhei laq, kaol saeqvae bi lael laeq mael laoq, haelnaeqmyel jiul maoqlye hhae, kaol noteel e aeqyil mael bi dyeqdeel, kaol noteel e houldailhael milcaeq taq'ae bi zhol gaeyil maoqlye hhae. 8 Tyulnye laol, ngaeq yaol saeqvae bi lael laeq e qiq hhaeq laoq Momil'ae, noteel maeqngeel'ae. Momil lye ngaeq yaol Faqlaoq e aeqdae laoqmyel, yoqhhaetoq e hhaoqsongl bi geiq laq, kaol Aijiq halza milcaeq vae bi guanqliq laeq hhae. 9 Noteel nae'naemyel ngaedae tyuqvae da'li, kaol yoqhhaeq'ae gee biq: 'Noq e yaqyo Yoqsel xilnye gee: Momil lye ngaeq yaol Aijiq milcaeq e hhaoqsongl bi geiq laq hhae; nol nae'naemyel ngaeq e saeqvae gaeyi. 10 Noteel Geshan milcaeq vae zholgae hhei gil, tyuqvae ngaeq nyegael gaelniqniq'ae. Nol, noq e yaeqguqhael, noq e yuqpaeq yuqnyulhael, aqciqhael, aeqnuqhael, kaol noq e halzahael, gilzuqmyel tyuqvae zhol gil. 11 Hoqlaq maeqmeeq qiqgiq zaeq eiq maqza myel ngaeq hoq za wae siq, ngeelfeiq, noteel tyuqvae zhol gil fu, ngael noteel'ae zaelsiq heil gil laeqngeel, tyulnye laol, nol kaol notoq e cholyaeqhael, kaol noq e haelzholhael gilzuqmyel saeq myel'ae maeq leeqdo yil kiq'ae.' 12 Noteel kaol ngae'nil Bianlyaqminq, noteel e ma'ne mael ngaeq yaol mol vae, ngael aeqdilmyel Yoqsel lil, ngael aedeeteel e saeziq maellye saeziq gee lil. 13 Noteel ngael Aijiq vae za e rongqyaol kaol noteel haelmol e silqinqhael, gilzuqmyel ngaedae'ae geegaeq hoqli gil biq, kaol nae'naemyel ngaedae yaol saeqvae sheeqlaeq." 14 Tyulkaol, Yoqsel yoqhhaeq e aeqnil Bianlyaqminq'ae baqcongq yil biq kaol nyul tullaeq; Bianlyaqminq eiq Yoqsel'ae baqcongq deelhhei kaol nyul'ae. 15 Yoqhhaeq aeqyoq e algohael kaol aeqnil'ae myeqchilnuq gil biq, yoqhhaeteel'ae baqcongq deelhhei kaol nyul. Aeqnaol, yoqhhaeq e algohael kaol aeqnil yoqhhaeq nyegael saeziq gee'naeq gil vae.Yoqsel aeqyoq e aeqdae yaol Aijiq vae bi sheeq gaeyi maoqlye hhae
16 Faqlaoq toq e cholyaeqhael Yoqsel e algohael kaol aeqnil lael vae lye gaeq hhei biq, tyulkaol, Faqlaoq kaol yoqhhaeq e zhiqmoqhael kaol yaqhacheqzaq e cholyaeqhael zhee hhaol gil biq'ae. 17 Faqlaoq Yoqsel'ae gee biq: ''Nol noq e algohael kaol aeqnil'ae gee biq: 'Noteel xilnye zongl maoqhhae: Noteel e jyeqyaeqhael'ae moqgoq bong'lye bi toq hhei, kaol Ja'nanq milcaeq vae yil gil, 18 Kaol noteel e aeqdae kaol noq e paeqyaeqhael saeqvae sheeqlaeq; ngael Aijiq milcaeq milmeeq mael noteel'ae biq laqngeel, kaol noteel saeqvae hhael meeq e zaeqzaelhael hhae zaeq'ae.' 19 Nol noq e algohael kaol aeqnil'ae moqheilheil biq, kaol xilnye gee biq: 'Noteel xilnye zongl maoqhhae: Noteel Aijiq milcaeq ae'lye maqche lyeq hoqyil, kaol noteel e yaeqguqhael, haeqmiqhael kaol noteel e aeqdae yaol sheeqlaeq. 20 Aijiq halza milcaeq e hhael meeq mael gilzuqmyel noteel hhae, tyulkaol, noteel e laoqhaol moqgoqhael maq sheqhhaq yae lye haeq zongl gil.'"
21 Kaol Yiqsellyel e yaqyohael xilnye zongl vae. Yoqsel laoq Faqlaoq moqheilheil biq laoqmyel, yoqhhaeteel'ae maqche kaol gaelmae vae zaeq e zaeqzael heil hhei gil biq. 22 13 Yoqhhaeteel'ae aeqsul eiq dumpael e aelhongq qiq ko heil hhei gil biq, ngeelfeiq, Bianlyaqminq'ae laoq dumpael e aelhongq ngaeq ko kaol pulziq suqhael (300) heil hhei biq'ae. 23 Yoqsel aeqyoq e aeqdae'ae heil yil biq hael laoq, mao'lyu lyupaeq qyel yaeq, gilzuqmyel Aijiq vae hhael meeq e moqgoqhael toq hhei hhae; mao'lyu lyumae qyel yaeq, gilzuqmyel yoqhhaeq e aeqdae gaelmae vae mulyo e zaelsiq, aqba kaol baeqjyelboq e zaeqzael toq hhei hhae. 24 Tyulkaol, Yoqsel aeqyoq e algohael kaol aeqnil yaol bi hoqli gil, kaol yoqhhaeteel deelsae vae. Yoqsel yoqhhaeteel'ae gee biq: "Noteel hoqli e gaelmae vae haeq deiqgae gil."
25 Yoqhhaeteel Aijiq ae'lye deelsae hhei, kaol yoqhhaeteel e aeqdae Yaqgel zhol myel e Ja'nanq milcaeq'ae da'li gil vae. 26 Yoqhhaeteel aeqyoteel e aeqdae'ae gee biq: "Yoqsel zhol wae siq, kaol Aijiq halza milcaeq'ae fu'qyezaq e zaiqxiangl geiq hhae." Yaqgel yoqhhaeteel'ae maeq xiangxinl biq kaol qiqgiq'ae lye maqza'ae. 27 Yoqhhaeteel lye Yoqsel gee e saeziqhael gilzuqmyel yoqhhaeteel e aeqdae'ae geegaeq hhei biq. Yoqhhaeteel e aeqdae Yaqgel laoq Yoqsel lye moqheilheil du hhei e maqchehael, yoqhhaeq'ae sheeq lael mol hhei biq, kaol neemae bae lael biq vae. 28 Yiqsellyel gee: "Haeq gee gil oq! Yoqsel ngaeq e yaqyo zhol wae siq; kaol ngael dyeqdeel siq fu, ngael yoqhhaeq yaol mol yil maoq."