Yoqsel aeqyoq e algohael'ae shilfu biq
44
Yoqsel guanqja'ae moqheilheil biq, gee: "Zaelsiqhael cholyaeq xihael e byesu mael'ae heilbong do hhei biq, yoqhhaeteel e mao'lyuhael toq ongl dyul heil hhei biq, aeqyoteel pulziqhael aeqyoteel e byesu mael'ae heil dohoq hhei biq, 2 Ngaeq e pulziq beiziq mael, hhaelnil nilli e tyutaeq e byesu mael'ae heil do hhei biq, yoqhhaeq zaelsiqhael vulzaq e pulziqhael eiq qiqgael heil do hhei biq." Guanqja laoq Yoqsel moqheilheil biq laoqmyel zongl yil vae. 3 Aeqnaol qiq nao e mqshoq mqbae zhoq bae lael laol, cholyaeq tyuhael yaol mao'lyuhael lyeq hhei myel bi hoqli vae. 4 Yoqhhaeteel milmae heeqmyel ae'lye duyil vae, haeldyul maeq deelmaol yil wae siq, Yoqsel guanqja'ae gee biq: "Waekei, cholyaeq tyuhael'ae lyeq yil; lyeqmil yil laol yoqhhaeteel'ae gee biq: 'Ngaeq e hhaoqsongl noteel'ae xuldyulmyel meeq biq, ngeelfeiq, noteel laoq aeqcheekaol yoqhhaeq'ae maeqmeeqmyel zonglhoq biq lilmaeq? 5 Xilmael laoq ngaeq e hhaoqsongl e zilbaeq dol kaol moqpilpil e beiziq mael maeqngeel maeq? Noteel haelzongl mael, aeqdilmyel maq hoq'ae.'"6 Guanqja yoqhhaeteel'ae lyeqmil li laol, Yoqsel gee e saeziq mael yoqhhaeteel'ae gee gil biq hhae. 7 Yoqhhaeteel guanqja'ae gee biq: "Ngaeq e hhaoqsongl aeqcheekaol xilnye saeziq gee gil laeq lilmaeq? Noq e yaqhacheqzaq e cholyaeqhael aeqdilmyel xilnye silqinq maeq zongl yil. 8 Nol fu, ngaeteel laefuq mol e byesu mael'ae zoq e pulziqhael, Ja'nanq milcaeq ae'lye heil laeq kaol noq'ae heil hoqyi vae lye loq'ae, ngaeteel haelmillyekaol noq e hhaoqsongl e laoqhaol ae'lye pulziq paelsilmyel pulsheel haoqzaeq laeq? 9 Noq e yaqhacheqzaq e cholyaeqhael onglci'ae lye aeqsul e byesu mael ae'lye saelpodu hhei kaollaoq, tyutaeq laoq hhae sil hhae, ngaeteel eiq ngaeq e hhaoqsongl e hhaeq'ongq ongqzaeq e cholyaeq geiq hhaeq." 10 Guanqja gee: "Yaeqmeel noteel saeziq gee laoqmyel zongl yil, aeqsul e tyuqvae lye saelpodu hhei'laol, tyutaeq laoq ngaeq e hhaeq'ongq ongqzaeq e cholyaeq geiq maoqhhae, ngeelfeiq, baeqjyelboq e cholyaeqhael laoq gilzuqmyel golsiq maqza vae." 11 Tyulkaol, yoqhhaeteel nae'naemyel aeqyoq e byesu mael milcaeq vae baqga deelhhei'ae, kaol aeqyoq e byesu mael aeqyoq diqpong hhei'ae. 12 Guanqja laoq hhael heeq e qiq hhaeq ae'lye mael hhael nil e qiq hhaeq keellye saelpo hhae, kaol Bianlyaqminq e byesu ae'lye beiziq tyulmael saelpodu hhei vae. 13 Yoqhhaeteel nyuqsaeq biq kaol aeqyoyoq e aelhongq mael eezi hhei, mao'lyuhael'ae toq hhei mael mao'lyu mael'ae baqda hoq hhei biq, kaol milmae heeqmyel vae bael deelpol hoqli gil vae.
14 Yoqdal kaol yoqhhaeq e algo aeqnilhael Yoqsel toq'ae keellael, tyuqfu, Yoqsel tyuqvae zhol wae siq; yoqhhaeteel yoqhhaeq e yiqsiboq'ae oqbaq dil baq deelhhei gil'ae. 15 Yoqsel yoqhhaeteel'ae gee biq: "Noteel aeqcheekaol ngaeq e beiziq mael haoqzaeq lilmaeq? Noteel ngael laoq moqpilpil kiq'ae lye maeq loq gil laeq hhaemaeq?" 16 Yoqdal gee: "Ngaeteel ngaeq e hhaoqsongl'ae aeqchee lye gee siq laeq? Ngaeteel aeqchee gee za siq maeq? Ngaeteel haelmillye zongl kaol aeqyoyoq aqlaq shol lil lye geezaeq laeq? Momil lye noq e yaqhacheqzaq e cholyaeqhael e hhae bi chenqfaq e golsiq mael saelpodu hhei vae. Yaeqmeel, beiziq haoqzaeq tyutaeq dyul maeqcilmyel, ngaeteel eiq gilzuqmyel ngaeq e hhaoqsongl e hhaeq'ongq ongqzaeq e cholyaeq wae." 17 Yoqsel gee: "Ngael aeqdilmyel xilnye silqinq maeq zongl yil. Beiziq mael aeqsul zaellye saelpodu hhei'laol, aeqsul laoq ngaeq e hhaeq'ongq ongqzaeq e cholyaeq geiq maoqhhae, noteel baeqjyelboq e cholyaeqhael laoq, maeqpaeq maeqnaelmyel noteel aeqdae tyuqvae hoqli."
Yoqdal laoq Bianlyaqminq gae'lye Yoqsel'ae geezaeq biq
18 Yoqdal Yoqsel'ae deel niqli, gee: "Ngaeq e hhaoqsongl o, nol laoq Faqlaoq laoqmyel'ae, ngeelfeiq, noq e yaqhacheqzaq e cholyaeq'ae faqhoq guaeq'ei haeq kei laeq, kaol noq e yaqhacheqzaq e cholyaeq'ae noq nyegael saeziq biq geechoq laeq. 19 Ngaeq e hhaoqsongl noq e yaqhacheqzaq e cholyaeqhael'ae naelhaeq gol laq: 'Noteel'ae aeqdae kaol baeqjyelboq e algo aeqnil zhol lil siq maeq?' 20 Ngaeteel ngaeq e hhaoqsongl'ae geehoq biq: 'Ngaeteel'ae aeqdae yaeqmoq kaol hhael nil e aeqnil qiq hhaeq zhol lil siq, ngaedae yaeqmoq fu du'lal biq hhae. Hhael nil e aeqnil e algo sil vae, kaol yoqhhaeq e aeqmae'ae yaeqguq xitaeq qiq hhaeq maoqlaol maeq zhol vae, tyulkaol, yoqhhaeq e aeqdae yoqhhaeq'ae zhee gaeq biq hhae.' 21 Nol laoq noq e yaqhacheqzaq e cholyaeqhael'ae gee laeq: 'Yoqhhaeq yaol ngaeq e saeqvae sheeq gaeyi, ngael aeqdilmyel yoqhhaeq yaol mol maoq yae.' 22 Ngaeteel ngaeq e hhaoqsongl'ae gee biq: 'Yaeqguq tyutaeq laoq yoqhhaeq e aeqdae zaellye maeq hhae deelsae'ae; deelsae hhei kaollaoq, yoqhhaeq e aeqdae sil kiq hhae.' 23 Nol noq e yaqhacheqzaq e cholyaeqhael'ae gee laeq: 'Noteel e hhaelnil nilli e aeqnil laoq noteel nyegael qiqgael maeq gaeyi kaollaoq, noteel laoq ngaeq'ae maeq hhae mol lael vae.' 24 Tyulkaol, ngaeteel noq e yaqhacheqzaq e cholyaeq ngaeteel e aeqdae tyuqvae da'li, kaol ngaeq e hhaoqsongl e saeziq mael yoqhhaeq'ae geegaeq biq. 25 Aeqnaol ngaeteel e aeqdae gee: 'Noteel aedeeteel'ae zaelsiq vul yil laq siq.' 26 Ngaeteel gee: 'Ngaeteel e hhaelnil nilli e aeqnil ngaeteel nyegael maeq bael gaeyil kaollaoq, ngaeteel laoq cholyaeq tyutaeq yaol maeq hhae mol yil vae, tyulkaol, ngaeteel maeq hhae gaeyil'ae, ngaeteel e hhaelnil nilli e aeqnil ngaeteel nyegael qiqgael bael gaeyil kaollaoq, ngaeteel yil hhaeq.' 27 Ngaeq e aeqdae noq e yaqhacheqzaq e cholyaeq ngaeteel'ae gee laeq: 'Noteel laoq ngaeq e haeqmiq Lajyeq ngaeq'ae yaqyo niq nulhhaeq maoqlaol maeq bo hhei laeq'ae lye loq'ae. 28 Qiq hhaeq laoq gabu wae, ngael yaeqmeel keellye yoqhhaeq yaol maeq mol yo yil, kaol ngael laoq yoqhhaeq aeqdilmyel byeljyeq lye ee'nu wae lye nyuq lil. 29 Yaeqmeel noteel xitaeq yaol ngaeq e yiqsiboq ae'lye yol sheeqsae yil, yoqhhaeq'ae maeqmeeqmyel puqli biq kaollaoq, noteel lye ngaeq yaol vuqduq pullye saeq aeqmyel mil'oq vae bi doyil laq.' 30 Ngaedae e aeqyil kaol yaeqguq xitaeq e aeqyil mael qiqgael kaeqmaoq deelhhei laoqmyel hhae. Ngael yaeqmeel ngaedae noq e yaqhacheqzaq e cholyaeq tyuqvae hoq keelli fu, yaeqguq ngaeteel nyegael qiqgael maeq zhol, 31 Kaol yoqhhaeq yaeqguq maeq zhol vae lye mol hhei biq kaollaoq, aeqdilmyel sil kiq'ae; xilnye laol, noq e yaqhacheqzaq e cholyaeqhael ngaeteel e aeqdae yaol vuqduq pullye saeq aeqmyel mil'oq vae bi doyil. 32 Noq e yaqhacheqzaq e cholyaeq ngaedae'ae yaeqguq xitaeq yaol sheeqhoqlaeq hhaeq lye gee gol biq aeqlil, ngael xilnye gee: 'Ngael yaeqguq xitaeq yaol noq'ae maeq sheeqhoqlaeq biq kaollaoq, ngael noq e yiqsiboq'ae qiqyil myel golsiq mael pi hhaeq.' 33-34 Yaeqguq xitaeq ngaeq nyegael maeq bal hoqli kaollaoq, ngael haelmillye ngaedae yaol mol hoqli laeq? Zaihuol mael ngaedae'ae yo'li biq maeqhe. Tyulnye laol, yaeqmeel noq e yaqhacheqzaq e cholyaeq yaol bi zholdeelsaeq laeq, kaol ngaeq e hhaoqsongl e hhaeq'ongq ongqzaeq e cholyaeq bi geiq laq lye geezaeq lil, kaol yaeqguq xitaeq yaol yoqhhaeq e algohael nyegael qiqgael bi hoqli."