Algohael lye Bianlyaqminq yaol Aijiq vae sheeq gaeyil vae
43
Tyuqfu, tyuqvae milcaeq vae hoqlaq teel eiq maeqmeeq, qiqgiq zaeq teel eiq maqza'ae. 2 Yoqhhaeteel Aijiq ae'lye heilhoqlaeq e zaelsiqhael zaeq byel vae. Yoqhhaeteel e aeqdae yoqhhaeteel'ae gee biq: "Noteel aedeeteel'ae zaelsiq vulhoq yil gil laq siq." 3 Yoqdal yoqhhaeq'ae gee biq: "Cholyaeq yultaeq aeqdilmyel ngaeteel'ae hagu laq'ae, gee: 'Noteel e aeqnil noteel nyegael qiqgael maeq bael lael kaollaoq, noteel ngaeq'ae maeq hhae mol yi'ae.' 4 Nol ngaeteel e aeqnil yaol ngaeteel nyegael qiqgael bi yil laq kaollaoq, ngaeteel tyuqvae noq'ae zaelsiq vul yil laqngeel. 5 Cholyaeq yultaeq ngaeteel'ae gee laeq: 'Noteel e aeqnil noteel nyegael qiqgael maeq bael lael kaollaoq, noteel ngaeq'ae maeq hhae mol yi'ae."' Tyulkaol, nol yoqhhaeq yaol maeq bi bal yil kaollaoq, ngaeteel eiq maeq gaeyil vae. 6 Yiqsellyel gee: "Noteel aeqcheekaol ngaeq'ae xilnye zonglkyuq laeq lilmaeq? Aeqcheekaol cholyaeq yultaeq'ae aeqnil qiq hhaeq zhol lil siq lye geegaeq biq lilmaeq?" 7 Yoqhhaeteel geehoq biq: "Cholyaeq yultaeq ngaeteel'ae yulnye xilnye lye naelhaeq gil laeq, gee: 'Noteel e aeqdae dyeq siq maeq? Noteel'ae baeqjyelboq e algo aeqnil zhol siq maeq?' Yoqhhaeq ngaeteel'ae naelhaeq laeq mael ngaeteel geehoq biq wae. Ngaeteel haelmillyekaol yoqhhaeq ngaeteel'ae aeqnil yaol sheeq gaeyil lye gee laeq maeqhe lye loq laeq?" 8 Yoqdal aeqyoq e aeqdae Yiqsellyel'ae gee biq: "Noq e yaqyo tyutaeq ngaeteel nyegael bi bal yil laol, ngaeteel nae'naemyel deel maoq vae. Xilnye laol, aedeeteel laoq maq myeqsil laelkiq wae; nol, ngaeteel kaol aedeeteel e yaeqguqhael gilzuqmyel hha dyeq gayil vae. 9 Ngael aeqdilmyel yoqhhaeq'ae ocongq biq, kaol maeqpaeq maeqnaelmyel yoqhhaeq yaol sheeqhoqlaeq hhaeq, kaol nol ngaeq e aqlaq ae'lye noq e yaqyo yaol saelhoq aeqmeel; ngael yoqhhaeq yaol noq'ae maeq sheeqhoqlaeq biq kaollaoq, ngael qiqyil myel golsiq pi hhaeq. 10 Aedeeteel maeq dan'goq kaollaoq, yaeqmeel laoq niq pu eiq hoqlal hhei vae."11 Yoqhhaeteel e aeqdae Yiqsellyel yoqhhaeteel'ae gee biq: "Tyulnye kaollaoq, xilnye zongl gil: Noteel saeqvae milcaeq ae'lye du'lal e hhaelmeeq meeqli mael, byesu mael'ae heil do hheikaol tyutaeq'ae liqvuq heil yil biq maoqhhae. Heil gaeyil biq maoq e moqgoqhael laoq, ruqxiang, baq'eel, nulsael lael aeqmyel haelsaeq, molyaol, cheeqsiq kaol xinlrenq'ae. 12 Noteel yoqhhaeteel lye laefuq qiq pu noteel e byesuhael'ae heil dohoq hhei e pulziqhael yoqhhaeq'ae heil hoqyil biq, pulziq tyuhael yoqhhaeq lye heil do ba biq maeqhe, kaol noteel yaeqmeel qiq pu zaelsiq vul maoqlye pulziq mael heil lo hhei maoqhhae. 13 Noteel laoq noteel e aeqnil yaol sheeq hheikaol tyutaeq zael'ae yil gil. 14 Hhael'onglzaeq zaeqli Momil tyutaeq noteel'ae hhaoqsaeqsaeq biq lye nyuqlil, Ximianq kaol Bianlyaqminq yaol noteel nyegael qiqgael bi hoqlal. Ngael lye qiq hhaeq laoq, yaeqguq baelyil maoqlye kaollaoq baelyil biq oq." 15 Tyulkaol, yoqhhaeteel moqgoq xihael heil hhei, laefuq qiq pu kaol yaeqmeel qiq pu zaelsiq vul e pulziq mael heil hhei, Bianlyaqminq yaol sheeq hheikaol Aijiq'ae gaeyil gil vae, kaol Yoqsel yiqsiboq'ae keelyil vae.
Yoqsel aeqyoq e algohael kaol aeqnil'ae baqwanq baqdeel hhei biq
16 Yoqsel laoq Bianlyaqminq yoqhhaeteel nyegael qiqgael lael mol hhei biq, kaol guanqja'ae gee biq: "Naoongl keellael fu, cholyaeq xihael ngaeq nyegael aelhoq qiqgael bael zaeq maoqlye hhae. Tyulkaol, nol cholyaeq xihael ngatoq'ae sheeqlaeq, jyeqyaeq xyeq hheikaol baqwanq zonglmeeq deelhhei." 17 Guanqja tyutaeq laoq Yoqsel moqheilheil biq laoqmyel zongl yil vae, kaol cholyaeq xihael yaol Yoqsel toq'ae sheeqyil biq vae. 18 Yoqhhaeteel Yoqsel toq'ae keelli laol, gu tullaeq gil biq'ae, gee: "Aedeeteel yaol saeqvae sheeqlaeq laeq mael laoq, laefuq qiq pu aedeeteel e byesu mael'ae heil dohoq hhei e pulziq gae'lye, yaeqmeel yoqhhaeteel aedeeteel yaol deiqtyeq hheikaol, yoqhhaeq e hhaeq'ongq ongqzaeq e cholyaeq bi geiq, kaol aedeeteel e mao'lyuhael eiq diqkoqzaeq maoqlye hhae." 19 Tyulkaol, yoqhhaeteel oheiq vae Yoqsel e guanqja'ae saeziq geechoq yil biq. 20 Yoqhhaeteel gee: "Hhaoqsongl o, ngaeteel laefuq qiq pu yi mael laoq aeqdilmyel zaelsiq vul yi gil aeqlil. 21 Ngeelfeiq, ngaeteel haq myel vae keelyil fu, byesuhael diqpong hhei'laol, ngaeteel zaelsiq vul e pulziq mael aeqyoyoq e byesu mael'ae gilzuqmyel zoq hhae, yaeqmeel ngaeteel lye pulziq tyuhael heilhoqlaeq wae. 22 Ngaeteel pulziq tyuhael dyul maeqcilmyel, zaelsiq vul maoqlye baeqjyelboq e pulziq heil hhei lil siq. Laefuq qiq pu ngaeteel e byesu mael'ae aeqsul lye pulziq heil dohoq hhei hhae lye ngaeteel maeq loq yae." 23 Guanqja gee: "Maeqbeeq'ae maeqbeeq'ae, maq gu gil kael. Noteel e byesu mael'ae heil do hhei pulziqhael laoq, noteel kaol noteel e aeqdae heel e Momil lye noteel'ae biq biq hhae. Noteel e pulziq mael ngael heil yo wae." Yoqhhaeq gee byel hhei'laol, Ximianq yaol yoqhhaeteel'ae sheeqmoq hoq hhei biq. 24 Guanqja tyutaeq lye yoqhhaeteel yaol Yoqsel toq'ae sheeq do'li biq, eelcuq baq duyi kaol yoqhhaeteel'ae aeqkeel bi ciq, kaol maoqzael mael eiq yoqhhaeteel e mao'lyuhael'ae bi zaeq hhei lye heilmoq hhei biq. 25 Yoqhhaeteel tyuqvae aelhoq zaeq maoqlye hhae lye loq hhei biq, kaol liqvuq mael heildu hhei. Yoqsel laoq naoongl vae hoqlal maoqlye hhae, kaol yoqhhaeteel yoqhhaeq'ae doq deelhhei hhae.
26 Yoqsel laoqhaol vae hoq keellael fu, yoqhhaeteel e heil hhei e liqvuqhael, laoqhaol vae heil do'li, kaol Yoqsel'ae heilmoq hhei biq, kaol yoqhhaeq'ae vuqduqtongq gae hhei biq. 27 Yoqsel yoqhhaeteel'ae meeqlaeqmaeq lye naelhaeq gil biq, kaol yoqhhaeteel'ae naelhaeq biq: "Noteel e aeqdae, noteel gee e yaeqmoq tyutaeq meeq biq maeq? Yoqhhaeq zhol siq maeq?" 28 Yoqhhaeteel geehoq biq: "Noq e yaqhacheqzaq e ngaeteel e aeqdae'ae meeq biq'ae, yoqhhaeq zhol siq." Kaol yoqhhaeteel yoqhhaeq'ae vuqduq yol tongqgae hhei biq. 29 Yoqsel vuqduq baqtul hhei, kaol aeqyoq e qiqmae boyaeq e aeqnil Bianlyaqminq yaol mol hhei biq, kaol yoqhhaeteel'ae naelhaeq biq: "Xitaeq laoq noteel ngaeq'ae gee gol laq e hhaelnil nilli e aeqnil maeq?" Yol gee: "Yaeqguq o, Momil noq'ae geeqlongq biq biq lye nyuqlil." 30 Yoqsel aeqyoq e aeqnil'ae nyuqdu biq mael neemae mael'ae byuq da beq laq biq, kaol nae'naemyel nyul hhael saelpo, kaol aeqyoq e nulyaeq vae do'li kaol qiqte nyul vae. 31 Yoqhhaeq maduq ciq hhei'laol duyi, kaol baelyaelmyel maeq nyuqsaeq yil lye zongl'ae, kaol cholyaeqhael'ae moqheilheil biq: "Aelhoq sheeqdeelzaeq gil oq." 32 Aijiq cholyaeqhael laoq Xiboqlaiq cholyaeqhael nyegael aelhoq qiqgael maeq bael zaeq goq biq hhae, xilmael laoq Aijiq cholyaeqhael xinq biq hhae, tyulkaol, yoqhhaeteel Yoqsel'ae oqlye qiq zhee baqdeel hhei biq, cholyaeq tyuhael'ae baeqjyelboq e qiq zhee baqdeel hhei biq, kaol Aijiq cholyaeqhael'ae qiq zhee baqdeel hhei biq. 33 Yoqsel aeqyoq e algohael kaol aeqnil yaol heeq ae'lye mael nil ae'lye aeqyoq e yiqsiboq'ae bi zholgae hhei gil'ae. Algo aeqnilhael qiqhhaeq qiqhhaeq'ae chifu gil'ae, kaol gaqmaqzuq li gil biq'ae. 34 Yoqsel aeqyoq yiqsiboq e zaeqzaelhael yoqhhaeteel'ae byel hhei gil biq'ae, ngeelfeiq, Bianlyaqminq'ae byel hhei biq mael laoq baeqjyelboqhael taq'ae ngaeq pa hhael naeq hhae. Yoqhhaeteel Yoqsel nyegael qiqgael zaeq dol hhaol gil'ae.