Yaqgel e yaqyohael Aijiq vae zaelsiq vulzaq yil gil
42
Yaqgel laoq Aijiq'ae zaelsiq za'ae lye gaeq hhei biq, kaol yoqhhaeq e yaqyohael'ae gee biq: "Noteel aeqcheekaol saeqvae songl gil oqyilsiq maeq?" 2 Yoqhhaeq yol gee: "Ngael Aijiq vae zaelsiq za'ae lye gaeq lil, noteel nae'naemyel Aijiq vae gaeyil kaol zaelsiq vul yil gil, kaol aedeeteel maeq sil myel hhae dyeq gayil'ae." 3 Tyulkaol, Yoqsel e algo qyel hhaeq Aijiq vae gaeyil kaol zaelsiq vul yil gil vae. 4 Ngeelfeiq, Yaqgel gee: "Bianlyaqminq yil kaollaoq, yoqhhaeq'ae zai'nanl yo'li biq maeqhe." Tyulkaol, Yaqgel laoq Yoqsel e aeqnil Bianlyaqminq yaol aeqyoq e algohael nyegael maeq bi bal yil'ae. 5 Ja'nanq milcaeq vae eiq hoqlaq maeqmeeq qiqgiq zaeq eiq maqza, tyulkaol, Yiqsellyel e yaqyohael eiq zaelsiq vulzaeq lael e cholyaeqhael onglci'ae bal zoq hhae. 6 Tyuqfu Aijiq milcaeq vae guanqliq e zhiqmoq yoheeq qiq hhaeq laoq Yoqsel'ae, zaelsiq ongq gil biq e qiq hhaeq eiq yoqhhaeq ngeelvae. Tyulkaol, Yoqsel e algohael yoqhhaeq e yiqsiboq'ae keellael kaol yoqhhaeq'ae vuqduqtongq gae hhei biq. 7 Yoqsel aeqyoq e algohael yaol mol hhei'laol, yoqhhaeteel yaol fuduzaq hhei vae, ngeelfeiq, yoqhhaeq laoq baelyaelmyel yoqhhaeteel yaol maeq loq yae lye zongl'ae, yoqhhaeteel'ae yotyel ha'lye gee gil biq, kaol yoqhhaeteel'ae naelhaeq biq: "Noteel haeqvae lye lael gil lilmaeq?" Yoqhhaeteel geehoq biq: "Ngaeteel Ja'nanq milcaeq ae'lye zaelsiq vul lal gil aeqlil."8 Yoqsel laoq aeqyoq e algohael'ae fuduzaq ongl'ae, ngeelfeiq, yoqhhaeteel laoq yoqhhaeq yaol maeq fuduzaq ongl biq'ae. 9 Yoqsel laoq laefuq matu niq mal tu lal biq mael nyuq tullaeq biq, kaol yoqhhaeteel'ae gee biq: "Noteel laoq ngaeteel e goqja'ae haeqvaehael ae'lye hhael diq do'laq sael maeqlye haoqchifu yi hhae." 10 Yoqhhaeteel yoqhhaeq'ae gee biq: "Ngaeq e hhaoqsongl o, xilnye maeqngeel'ae, ngaeteel noq e yaqhacheqzaq e cholyaeqhael laoq aeqdilmyel zaelsiq vul lal gil aeqlil. 11 Ngaeteel gilzuqmyel cholyaeq qiq hhaeq e yaqyo lil. Noteel e yaqhacheqzaq e cholyaeqhael zaqgiq maqgiq e cholyaeq lil, noteel e goqja'ae haoqchifu lael e cholyaeq maeqngeel yil!" 12 Yoqsel yoqhhaeteel'ae gee biq: "Maeqngeel'ae, noteel aeqdilmyel haeqvaehael ae'lye hhael diq do'laq sael maeq lye haoqchifu yi hhae." 13 Yoqhhaeteel gee: "Noq e yaqhacheqzaq e cholyaeqhael laoq algo aeqnil qyelniq hhaeq zhol lil, ngaeteel gilzuqmyel Ja'nanq milcaeq e qiqdae boyaeq lil, hhaelnil nilli e qiq hhaeq yaeqmeel ngaeteel e aeqdae nyegael qiqgael zhol hhae, qiq hhaeq laoq maeq zhol vae." 14 Yoqsel yoqhhaeteel'ae gee biq: "Ngael gee e saeziq mael hoq'ae, noteel laoq aeqdilmyel ngaeteel e goqja'ae haoqchifu lael e cholyaeq'ae. 15 Noteel laoq noteel gee mael aeqdilmyel hoq'ae lye zongldu hhei gil: Ngael Faqlaoq'ae tyuq deelhhei kaol faqsilkei lil, noteel e hhaelnil nilli e aeqnil saeqvae maeq keellael kaollaoq, noteel yaol aeqdilmyel saeqvae lye maeq bi deelsae vae. 16 Noteel onglci'ae qiq hhaeq yaol moqheilheil hoqli, kaol noteel e aeqnil yaol sheeqlaeq; baeqjyelboq e cholyaeqhael laoq gilzuqmyel ee'longl maoq, tyulnye laol, noteel gee mael aeqdilmyel ngeel'ae lye hhae loq'ae. Aeqdilmyel maeqngeel kaollaoq, ngael Faqlaoq'ae tyuq deelhhei kaol faqsilkei lil, noteel laoq saeqvae milcaeq'ae haoqchifu lael e cholyaeq'ae. 17 Tyulkaol, Yoqsel lye yoqhhaeteel yaol laoqgaiqkei laoqhaol vae suq nao ee'longl biq vae.
18 Dilsan tian keellael laol, Yoqsel yoqhhaeteel'ae gee biq: "Ngael laoq Momil'ae zun eiq zunjinl gu eiq gu e cholyaeq lil. Noteel xilnye zongl kaollaoq, hha dyeq gayil'ae. 19 Noteel zaqgiq maqgiq e cholyaeq kaollaoq, noteel onglci e algo aeqnil qiq hhaeq yaol laoqgaiqkei laoqhaol vae koqlongl deelsaeq maoq, kaol baeqjyelboq e cholyaeqhael laoq, notoq e oqma myeq e cholyaeqhael'ae zaelsiqhael heil hoqli gil biq aeqmeel. 20 Ngeelfeiq, noteel e hhaelnil nilli e aeqnil yaol ngaeq e saeqvae sheeqlaeq maoqhhae, xilnye laol, noteel gee e saeziq mael aeqdilmyel hhae, kaol noteel aeqdilmyel maeq hhae sil vae." Kaol yoqhhaeteel xilnye zongl vae. 21 Yoqhhaeteel qiqhhaeq qiqhhaeq'ae geegaeq: "Aedeeteel e aeqnil'ae zongl biq mael aeqdilmyel golsiq za'ae. Yoqhhaeq aedeeteel'ae nyuqsaeq lael aeqmyel geezaeq laeq fu, aedeeteel yoqhhaeq e saeq mael mol aeqwae, ngeelfeiq, yoqhhaeq gee mael maeq naelhaeq biq, tyulkaol, kuqnanl xilmael aedeeteel'ae yo'lael hhae." 22 Liuqbenq yoqhhaeteel'ae geehoq biq: "Ngael noteel'ae 'yaeqguq tyutaeq'ae haeq zonglnael biq' lye gee gol biq maeqngeel maeq? Ngeelfeiq, noteel laoq maeq naelhaeq nae, kaol yaeqmeel yoqhhaeq'ae siq bi yul golsiq mael aedeeteel hhae fulzeq hhae." 23 Yoqhhaeteel Yoqsel nyegael saeziq gee'naeq fu, cholyaeq qiq hhaeq saeziq bael geepolduhoq biq'ae, kaol aeqyoteel gee e saeziq mael Yoqsel naelhaeq kiq'ae lye maeq loq'ae. 24 Yoqsel yoqhhaeteel zaellye deelsae hheikaol qiqte nyul vae, kaol yoqhhaeteel e tyuqvae yol hoqli vae, kaol yoqhhaeteel nyegael saeziq geechoq hhae. Aeqnaol yoqhhaeteel onglci ae'lye Ximianq yaol eedu hhei'ae, kaol yoqhhaeteel e yiqsiboq ae'lye yoqhhaeq yaol kaltoq biq vae.
Yaqgel e yaqyohael Ja'nanq milcaeq vae hoqli gil vae
25 Yoqsel yaqhacheqzaq e cholyaeqhael'ae, zaelsiq mael tyuteel e byesuhael'ae xye bong do hhei biq, tyuteel e pulziqhael aeqyoq mael aeqyoq e byesu mael'ae heil dohoq hhei gil biq, kaol tyuteel'ae gaelmae vae zaeq e zaeqzael eiq heilmoq hhei gil biq lye moqheilheil gil biq, kaol yaqhacheqzaq e cholyaeqhael tyulnye zongl vae. 26 Yoqhhaeteel lye zaelsiqhael mao'lyuhael'ae toq da hhei biq'ae, kaol tyuqvae lye deelsae hhei vae. 27 Yoqhhaeteel haq maoqlye vae keellael laol, yoqhhaeteel onglci e qiq hhaeq lye byesu mael diqpong hhei, mao'lyuhael'ae maoqzael bi zaeq maoqlye heil fu, aeqyoq e pulziq mael byesu mael'ae zoq yae siq lye molli biq hhae, 28 Kaol yoqhhaeq e algo aeqnilhael'ae gee biq: "Ngaeq e pulziq mael heil dohoq hhei hhae. Noteel fu, ngaeq e byesu onglci'ae zoq'ae." Tyulkaol, yoqhhaeteel zoqgiq li gil biq'ae, kaol qiqhhaeq qiqhhaeq'ae gu'ni'lye geegaeq: "Momil aeqcheekaol aedeeteel'ae xilnye zongl laeq oqlolyaeq?"
29 Yoqhhaeteel laoq aeqyoteel e aeqdae Yaqgel zhol myel e Ja'nanq milcaeq vae hoq keelli vae, kaol yoqhhaeteel'ae hael puqli biq e silqinq mael gilzuqmyel yoqhhaeq'ae geegaeq hhei biq, gee: 30 "Tyuqvae milcaeq e hhaoqsongl ngaeteel'ae yotyel ha'lye gee gil laeq hhae, ngaeteel yaol tyuqvae milcaeq'ae haeqvaehael ae'lye diq doyil sael maeq lye haoqchifu yil e cholyaeq'ae lye gee gil laeq hhae. 31 Ngaeteel yoqhhaeq'ae gee biq: 'Ngaeteel laoq zaqgiq maqgiq e cholyaeq lil, haoqchifu yi e cholyaeq maeqngeel yil. 32 Ngaeteel laoq algo aeqnil qyelniq hhaeq lil, gilzuqmyel qiqdae boyaeq lil; qiq hhaeq laoq maeq zhol vae, hhaelnil nilli e qiq hhaeq yaeqmeel ngaeteel e aeqdae nyegael Ja'nanq milcaeq vae qiqgael zhol hhae.' 33 Tyuqvae milcaeq e hhaoqsongl ngaeteel'ae gee laeq: 'Noteel algo aeqnilhael onglci e qiq hhaeq ngaeq e saeqvae bi zholdeelsaeq, baeqjyelboqhael laoq zaelsiq heil hheikaol hoqli, kaol notoq e oqma myeq e cholyaeqhael'ae zaelsiq heil hoqyil gil biq. Xilnye kaollaoq, ngael noteel zaqgiqgiq e cholyaeq ngeel maeq maeqngeel maeq lye hhae loq wae. 34 Ngeelfeiq, noteel e hhaelnil nilli e aeqnil yaol ngaeq e saeqvae sheeqlaeq kaollaoq, ngael laoq noteel haoqchifu yi e cholyaeq maeqngeel, kaol zaqgiqgiq e cholyaeq eiq maeqngeel'ae lye loq wae. Xilnye laol, ngael noteel e algo aeqnil yaol noteel'ae sheeqmoq hoq hhei laeqngeel, kaol noteel eiq saeqvae milcaeq vae senyil mulzaq gil aeqmeel.'"
35 Yoqhhaeteel byesu onglci e zaelsiqhael xye du hhei fu, aeqyoteel e dyuqbaq palbye mael aeqyoq e byesu'ae zoq'ae. Yoqhhaeteel kaol aeqyoteel e aeqdae dyuqbaq palbye mael mol hhei'laol, gilzuqmyel gu li gil biq'ae. 36 Yoqhhaeteel e aeqdae Yaqgel yoqhhaeteel'ae gee biq: "Noteel duqlye ngaeq e yaqyo yaol bi baelyil laq: Yoqsel maeq zhol vae, Ximianq eiq maeq zhol vae, noteel lye Bianlyaqminq yaol sheeqzaeq yil, silqinq xihael hae qiq mal eiq ngaeq'ae bi yo'lael laeq'ae." 37 Liuqbenq yoqhhaeq e aeqdae'ae gee biq: "Nol Bianlyaqminq yaol ngaeq'ae sheeqmoq hhei laeq, ngael aeqdilmyel yoqhhaeq yaol noq'ae sheeqhoqlaeq laeqngeel; ngael yoqhhaeq yaol maeq sheeqhoqlaeq kaollaoq, nol ngaeq e yaqyo niq nulhhaeq yaol xyeq aeqmeel." 38 Yaqgel gee: "Yoqhhaeq e algo sil vae, kaol yoqhhaeq qiq hhaeq maoq maeq zhol vae, tyulkaol, ngaeq e yaqyo noteel nyegael qiqgael maq hha yil'ae, noteel zaelsiq vul yil gaelmae vae lye, yoqhhaeq'ae maeqmeeqmyel puqli biq kaollaoq, noteel lye ngaeq yaol vuqduq pullye saeq aeqmyel mil'oq vae bi doyil laq wae."