Faqlaoq'ae matu niq mal tu li biq
41
Niq hoq gol hhei'laol, Faqlaoq'ae matu qiq mal tu li biq. Yoqhhaeq Niqloq Lolbaeq e loljyel'ae haoqtul deelhhei'ae lye tu li biq'ae. 2 Kaol beiqsa'lye aeqnuq nyelmae siq keel Niqloq Lolbaeq ae'lye da'lal, kaol mol'ongq e onglci'ae haelsaeq gazaq hhae. 3 Aeqnaol, Niqloq Lolbaeq ae'lye aeqnuq nyelmae fu'lil fusaeqmyel goheiqlye siq keel da'lal, kaol loljyel'ae baeqjyelboq e aeqnuq nuqmaehael dongqpyeq'ae haoqtul deelhhei. 4 Fu'lil fusaeqmyel goheiqlye aeqnuq nyelmae xihael lye, beiqsa'lye aeqnuq nyelmae tyuhael yaol zaeqdo hhei vae, kaol Faqlaoq nyuq lael vae. 5 Yoqhhaeq yol yuqxul hhei vae, matu yol qiq mal tu li biq. Matu onglci'ae meqziq e aelbol qiq bol'ae beiqtongqlye maldeqlye meqziq aelcael siq cael cuq du'lal. 6 Aeqnaol, meqziq e aelbol tyu qiq bol'ae, neeldu aelheiq boq ae'lye bo laeq e honglqye'lye zaeqxil lye bo ku e sheelpoqlye meqziq aelcael siq cael eiq cuq du'lal. 7 Sheelpoqlye meqziq aelcael xilmael lye, beiqtongqlye maldeqlye meqziq e aelcael tyuhael zaeqdo biq, kaol Faqlaoq nyuq lael vae, matutu ngeelzhol'ae yae lye loq li biq. 8 Mqshoq keellael laol, Faqlaoq neesael maeq hhae biq, kaol cholyaeq yaol moqheilheil du hheikaol Aijiq'ae haelzhol moqpilhael kaol zhee geel e cholyaeqhael gul laeq; kaol Faqlaoq lye aeqyoq e matu mael yoqhhaeteel'ae geegaeq biq. Ngeelfeiq, qiq hhaeq eiq matu e yilsi mael Faqlaoq'ae maeq geedu hhei ongl biq'ae.Yoqsel Faqlaoq e matu e yilsi mael geedu hhei biq
9 Tyuqfu zilbaeq xyezaq e qiq hhaeq Faqlaoq'ae geegaeq biq: "Yaeqnao ngaeq e zonglba mael nyuq tullaeq yae. 10 Qiqzael laoq, Faqlaoq laoq aeqyoq e yaqhacheqzaq e cholyaeqhael'ae faqhoqkei biq, noq lye ngael kaol aelhoq caqzaqhael e yoheeq yaol, Faqlaoq toq'ae songlqyezaq e cholyaeqhael e yoheeq toq e laoqgaiqkei laoqhaol vae koqlongl li laeq. 11 Qiq mil laoq, ngaeq niq nulhhaeq'ae matutu lal gil laeq hhae; ngeelfeiq, ngaeteel e matu mael maeq qiqsheel'ae. 12 Tyuqvae ngaeteel nyegael Xiboqlaiq e yaqyoyaeq qiq hhaeq baelzhol'ae, yoqhhaeq laoq Faqlaoq toq'ae songlqyezaq e cholyaeqhael e yoheeq e yaqhacheqzaq e cholyaeq'ae. Ngaeteel lye ngaeteel e matu mael yoqhhaeq'ae geegaeq biq laol, yoqhhaeq ngaeteel'ae matu yilsi mael bael geedu hhei laq, ngaeteel e matu e yilsi mael maeq qiqsheel'ae. 13 Aeqnaol, hal peqlal e silqinq mael yoqhhaeq ngaeteel'ae geedu laq laoqmyel hhae; ngael laoq laefuq e mulhhael mul hoq, ngeelfeiq, aelhoq caqzaqhael e yoheeq laoq cheeqsil biq vae."
14 Tyulkaol, Faqlaoq laoq cholyaeq yaol moqheilheil du hheikaol Yoqsel yaol bi sheeqlaeq. Yoqhhaeteel nae'naemyel Yoqsel yaol laoqgaiqkei laoqhaol ae'lye sheeq duyi biq. Yoqhhaeq qyelkeel noga hhei, myeqciq cuga hhei, aelhongq dumpael hhei, kaol Faqlaoq e yiqsiboq'ae keelli vae. 15 Faqlaoq Yoqsel'ae gee biq: "Ngaeq'ae matu qiq mal tu lal laq'ae, yilsi mael qiq hhaeq eiq maeq geedu hhei ongl biq'ae. Ngael ochoq gee e saeziq gaeq yo wae, nol matu mael gaeq hhei'laol, yilsi mael geedu hhei ongl'ae." 16 Yoqsel Faqlaoq'ae geehoq biq, gee: "Matu e yilsi mael geedu hhei ongl mael ngael maeqngeel yil, ngeelfeiq, Momil laoq Faqlaoq'ae meeqyo'lael myel geedu laq'ae." 17 Faqlaoq Yoqsel'ae gee biq: "Matu onglci'ae, ngael Niqloq Lolbaeq e loljyel'ae haoqtul deelhhei lil. 18 Beiqsa'lye aeqnuq nyelmae siq keel Niqloq Lolbaeq ae'lye da'lal, kaol mol'ongq onglci'ae haelsaeq gazaq. 19 Aeqnaol lolbaeq ae'lye fu'lil fusaeqmyel goheiqlye aeqnuq nyelmae siq keel da'lal, Aijiq halza milcaeq vae ngael xilnye fu'lil fusaeqmyel aeqnuq maeq mol gol yil. 20 Fu'lil fusaeqmyel goheiqlye aeqnuq nyelmae xihael lye, beiqsa'lye aeqnuq nyelmae siq keel yaol zaeqdo hhei vae. 21 Ngeelfeiq, yoqhhaeteel zaeq hhei aeqnaol'ae, beiqsa'lye aeqnuqhael zaeq gol nyedullye maeq dul'ae, yoqhhaeteel laefuq laoqmyel fu'lil fusaeqmyel kaol'ae. Aeqnaol ngael nyuq lael wae. 22 Matu onglci'ae meqziq aelbol qiq bol taq'ae, beiqtongqlye maldeqlye meqziq aelcael siq cael cuq du'lal. 23 Aeqnaol, neeldu aelheiq boq ae'lye bo laeq e honglqye'lye zaeqxil lye bo ku e sheelpoqlye meqziq aelcael siq cael yol cuq du'lal. 24 Sheelpoqlye meqziq aelcael xihael lye, beiqtongqlye maldeqlye e meqziq aelcaelhael meqdo biq. Ngaeq lye matu mael moqpilhael'ae geegaeq hhei biq, ngeelfeiq, yoqhhaeteel qiq hhaeq eiq matu e yilsi mael maeq geedu hhei ongl biq'ae."
25 Yoqsel Faqlaoq'ae gee biq: "Faqlaoq e matu niq mal e yilsi laoq qiqsheel'ae, Momil lye aeqyoq haelzongl maoqlye e silqinq mael Faqlaoq'ae geegaeq biq wae. 26 Aeqnuq nyelmae beiqsa'lye siq keel e yilsi laoq siq hoq'ae, meqziq aelcael beiqtongqlye maldeqlye siq cael e yilsi eiq siq hoq'ae; matu niq mal e yilsi laoq qiqsheel'ae. 27 Aeqnaol da'lal e fu'lil fusaeqmyel goheiqlye aeqnuq nyelmae siq keel e yilsi laoq siq hoq'ae, neeldu aelheiq boq ae'lye bo laeq e honglqye'lye zaeqxil lye bo ku e sheelpoqlye meqziq aelcael siq cael e yilsi eiq hoqlaq maeqmeeq qiqgiq zaeq eiq maqza e siq hoq'ae. 28 Xihael laoq ngaeq lye Faqlaoq'ae geegaeq biq wae, kaol Momil aeqyoq zongl maoqlye e silqinq mael noq'ae bi loq laeq vae. 29 Naelhaeq, Aijiq halza milcaeq vae, zaelsiq haelnaeqmyel siq hoq hhae heil'eeqzaeq'ae. 30 Aeqnaol e siq hoq'ae, hoqlaq maeqmeeq qiqgiq zaeq eiq maqza; cholyaeqhael Aijiq milcaeq vae zaelsiq haelnaeqmyel heil'eeqzaeq gol yae lye mael eiq yelbael vae; hoqlaq maeqmeeq qiqgiq zaeq eiq maqza xi siq hoq'ae, milcaeq xilmael maq mullal myel peqyil hhei wae. 31 Hoqlaq maeqmeeq qiqgiq zaeq eiq maqza e tyu siq hoq zhee heeq'ae, kaol cholyaeqhael laefuq haelnaeqmyel zaelsiq heil'eeqzaeq gol yae lye maeq nyuq tul hoqlaeq ongl biq'ae. 32 Momil laoq silqinq mael xilnye zongl maoqlye nyuqmeeq wae, kaol nae'naemyel peqlal maoqlye hhae, tyulkaol, Momil lye Faqlaoq'ae matu niq mal bi tu lal hhae. 33 Tyulnye laol, Faqlaoq laoq zhee geel zhee onglzaeq e qiq hhaeq saelpodu hhei, kaol yoqhhaeq yaol Aijiq milcaeq vae guanqliq yil lye moqheilheil du hhei maoqhhae. 34 Faqlaoq o, nol xilnye zongl maoqhhae: Zaelsiq haelnaeqmyel heil'eeqzaeq siq hoq fu, nol Aijiq milcaeq haeqvae eiq zhiqmoqhael yaol moqheilheil du hhei, kaol Aijiq milcaeq vae heil'eeq hoqlaeq e zaelsiqhael ngaeq mael onglci e qiq mal bi heil'eeq laeq. 35 Yoqhhaeteel'ae meeq e hoqlaq'ae heil'eeq deelhhei e zaelsiqhael bi baq'eeq deelhhei, kaol Faqlaoq'ae bi guanqliq, xilnye laol, haeqvae milmae heeqmyel vae eiq zaelsiq za vae. 36 Zaelsiq xihael heil'eeq deelhhei laol aeqgael Aijiq halza milcaeq vae, hoqlaq maeqmeeq qiqgiq zaeq eiq maqza e tyu siq hoq'ae hhae zaeq loq'ae, xilnye laol, saeqvae milcaeq laoq maq myeyil kiq wae."
Yoqsel Aijiq vae zaiqxiangl geiq hhae
37 Faqlaoq kaol aeqyoq e zhiqmoqhael gilzuqmyel silqinq xilmael hhaeq'ae lye gee gil'ae. 38 Tyulkaol, Faqlaoq yoqhhaeq e zhiqmoqhael'ae gee biq: "Momil e yohael mael cholyaeq xitaeq nyegael qiqgael baelzhol'ae. Xilnye cholyaeq aedeeteel saelpopuq hhei ongl siq maeq?" 39 Faqlaoq Yoqsel'ae gee biq: "Momil lye silqinq xilmael noq'ae tyuqmyeq laeq laol, nol laoqmyel zhee geel zhee onglzaeq e qiq hhaeq eiq maeq saelpopuq hhei ongl vae. 40 Nol ngaeq e goqja mael guanqliq hhaeq'ae, kaol ngaeq e cholyaeqhael gilzuqmyel noq e minllinl mael'ae fuqcongq'ae; ngeelfeiq, zongmae duqtyel taq e laqtaq mael noq taq'ae hhael heeq dyul wae." 41 Faqlaoq Yoqsel'ae yol gee biq: "Nol naelhaeq, ngael noq'ae Aijiq halza milcaeq mael bi guanqliq maoqlye lil." 42 Tyulkaol, Faqlaoq yoqhhaeq e aqlaq'ae doq hhei e gailzangkei lael e nyulbaeq mael heilgae hhei, kaol Yoqsel e aqlaq mael'ae doqda hhei biq; keeldaelnil e ziq e aelhongq mael dumda hhei biq, pulsheel mael laoq yoqhhaeq e kongqlongl mael'ae pyeqcheeq da hhei biq'ae, 43 Kaol Yoqsel yaol Faqlaoq e dil'el gol daqzhangldiq e maqche mael'ae bi zhol hhae. Cholyaeqhael yoqhhaeq e daqzhangldiq e maqche e yiqsiboq'ae yotyel haeqheemyel gul: "Zongmae lael vae." Tyulkaol, Faqlaoq Yoqsel'ae Aijiq halza milcaeq vae guanqliq lye moqheilheil biq'ae. 44 Faqlaoq Yoqsel'ae gee biq: "Ngael laoq Faqlaoq lil, ngeelfeiq, Aijiq halza milcaeq vae, nol hhaeq'ae lye maeq gee kaollaoq, aeqsul eiq aeqyoq aeqkeel aqlaq dongni goq feiq maeq hhae dongni'ae." 45 Faqlaoq lye Yoqsel e cholmil mael Saqfa'naqtel Ba'neilyal lye milpael biq vae, An lye gul e milmae heeqmyel e Botiqfei'la jilsi e yaeqmiq Yalxi'nal yaol Yoqsel'ae haeqmiq bi mul hhae. Tyulkaol, Yoqsel Aijiq milcaeq vae zaiqxiangl geiq da'li vae.
46 Yoqsel laoq Aijiq zongmae Faqlaoq e yiqsi'ae zaiqxiangl geiq fu, cholhoq suqqyel hoq zoq vae. Yoqsel Faqlaoq yiqsi ae'lye duyil kaol Aijiq halza milcaeq vae deeldyu byel vae. 47 Zaelsiq haelnaeqmyel heil'eeqzaeq e siq hoq fu, aeqhael ae'lye zaelsiq haelnaeqmyel heilhoqlaeq vae. 48 Yoqsel lye Aijiq vae zaelsiq heil'eeqzaeq e siq hoq e zaelsiqhael heil'eeq deelhhei, kaol milmae heeqmyel vae baq'eeq deelhhei; milmae heeqmyel hae qiqgael dongqpyeq ae'lye heil'eeq laeq e zaelsiqhael, milmae heeqmyel tyu qiqgael vae baq'eeq deelhhei. 49 Yoqsel lye zaelsiq haelnaeqmyel taeq deelhhei vae. Zaelsiq tyuhael laoq eeldeel deelmae e sa'la laoqmyel naeq hhae, kaol maeq suqda ongl'ae. Tyulkaol, yoqhhaeq maq sa vae.
50 Hoqlaq maeqmeeq qiqgiq zaeq eiq maqza myel maeq keellael laefuq, An lye gul e milmae heeqmyel e Botiqfei'la jilsi e yaeqmiq Yalxi'nal lye, Yoqsel'ae yaqyo niq nulhhaeq bo hhei biq vae. 51 Yoqsel gee: "Momil lye ngaeq e saeq mael kaol ngaedae toq yaol bi yelbael laeq vae." Kaol Yoqsel lye aeqyoq e fuqbo yaqyo e cholmil mael Maqnaqxi lye mil hhei biq hhae. 52 Yoqhhaeq gee: "Momil lye ngael saeq puqlael laeq e milcaeq ae'lye ngaeq'ae bi henq tullaeq laeq vae." Kaol yoqhhaeq lye yaqyo dil'el gol'ae Yiqfaqlianq lye mil hhei biq hhae.
Aijiq milcaeq vae maoqlaol zaelsiq maqza'ae
53 Aijiq milcaeq vae zaelsiq haelnaeqmyel heil'eeqzaeq e siq hoq aeqnaol'ae, 54 Yoqsel haelgee laoqmyel, hoqlaq maeqmeeq qiqgiq zaeq eiq maqza myel siq hoq lael vae. Haeqvae milcaeq eiq hoqlaq maeqmeeq qiqgiq zaeq eiq maqza myel peqlal vae, ngeelfeiq, Aijiq halza milcaeq vae zaelsiq za'ae. 55 Aijiq halza milcaeq vae hoqlaq maeqmeeq qiqgiq zaeq eiq maqza fu, cholyaeqhael Faqlaoq'ae zaelsiq saelzaeq gil biq'ae. Faqlaoq gilzuqmyel Aijiq cholyaeqhael'ae gee biq: "Noteel Yoqsel tyuqvae yil gil. Yoqhhaeq noteel'ae aeqchee zongl yil lye moqheilheil laeq laol, aeqchee zongl yil gil." 56 Halza milcaeq vae hoqlaq teel eiq maeqmeeq zaeq eiq teel eiq maqza'ae. Tyuqfu, Aijiq goqja qiq mal myel xilnye hhae. Tyulkaol, Yoqsel zaelsiq baqdeelzaeq e laoqhaol mael diqpong hhei'laol zaelsiqhael Aijiq cholyaeqhael'ae ongq hhei gil biq'ae. 57 Halza milcaeq vae hoqlaq teel eiq maeqmeeq zaeq eiq teel eiq maqza'ae, kaol haeqvae milcaeq e cholyaeqhael eiq Aijiq vae Yoqsel tyuqvae zaelsiq vulzaq li gil'ae.