Zilbaeq xyezaq e qiq hhaeq kaol aelhoq caqzaqhael e yoheeq e matu
40
Aeqnaol, Aijiq zongmae e zilbaeq xyezaq e qiq hhaeq kaol aelhoq caqzaqhael e yoheeq, yoqhhaeteel e hhaoqsongl Aijiq zongmae'ae zonglzhil biq. 2 Tyulkaol, Faqlaoq laoq zilbaeq xyezaq e qiq hhaeq kaol aelhoq caqzaqhael e yoheeq, zhiqmoq xi niq nulhhaeq'ae faqhoqkei biq hhae, 3 Kaol yoqhhaeteel yaol Faqlaoq toq'ae songlqyezaq e cholyaeqhael e yoheeq e laoqgaiqkei laoqhaol vae koqlongl li biq, tyuqvae laoq Yoqsel yaol ee'longl deelhhei e milcaeq ngeelvae. 4 Faqlaoq toq'ae songlqyezaq e cholyaeqhael e yoheeq lye yoqhhaeteel yaol Yoqsel'ae sheeqmoq hhei biq, kaol Yoqsel yoqhhaeteel'ae zhaofu biq'ae. Yoqhhaeteel cholyaeq koqlongl e laoqhaol vae qiqtongq zhol vae. 5 Laoqgaiqkei laoqhaol vae koqlongl deelhhei e xi niq nulhhaeq laoq, Aijiq zongmae e zilbaeq xyezaq e qiq hhaeq kaol aelhoq caqzaqhael e yoheeq ngeelvae, yoqhhaeteel'ae mqkiq qiq mil'ae niq nulhhaeq myel matu qiq hhaeq'ae qiq mal tu li gil biq, ngeelfeiq, yoqhhae niq nulhhaeq e matu yilsi mael maeq qiqsheel'ae. 6 Mqshoq keellael laol, Yoqsel yoqhhaeteel e tyuqvae do'li, yoqhhaeteel nyuqsaeq biq'ae lye mol hhei biq, 7 Kaol yoqhhaeq e hhaoqsongl e cholyaeq koqlongl e laoqhaol vae, yoqhhaeq nyegael qiqgael koqlongl deelhhei e, Faqlaoq e zhiqmoq tyu niq nulhhaeq'ae naelhaeq biq, gee: "Yaeqnao noteel e maduq mael aeqcheekaol xilnye nyuqsaeq gil laeq hhaemaeq?" 8 Yoqhhaeteel yoqhhaeq'ae geehoq biq: "Ngaeteel'ae matu qiq hhaeq'ae qiq mal tu lal laq'ae, ngeelfeiq, matu mael aeqchee yilsi'ae lye qiq hhaeq eiq maeq geedu hhei ongl'ae." Yoqsel yoqhhaeteel'ae gee biq: "Matu e yilsi mael geedu hhei ongl e onglzaeq mael Momil biq hhae, tyulkaol, noteel e matu mael ngaeq'ae geegaeq laeq."Yoqsel zilbaeq xyezaq e qiq hhaeq'ae matu e yilsi mael bael geedu biq
9 Zilbaeq xyezaq e qiq hhaeq aeqyoq e matu mael Yoqsel'ae geegaeq biq, yoqhhaeq gee: "Ngael matu onglci'ae lye ngaeq e yiqsiboq'ae siqbaq aelbol qiq bol mol lil. 10 Siqbaq aelbol mael'ae allaq sul laq laq'ae; allaq mael'ae aelnuq zhoq nuq du'lal laol, alyiyi lal vae, kaol aelsiq siq lael kaol hhoqlal vae. 11 Faqlaoq e beiziq mael ngaeq e aqlaq'ae heil hhei lil, ngael siqbaq aelsiq mael Faqlaoq e beiziq mael'ae niqdo hhei, kaol beiziq mael Faqlaoq'ae baqmoq hhei biq." 12 Yoqsel yoqhhaeq'ae gee biq: "Matu xilmael e yilsi laoq xilnye hhae: Allaq sul laq laoq suq nao'ae gee hhae. 13 Dilsan tian'ae, Faqlaoq noq yaol pyeqduhoq hhei laeq'ae, kaol noq e laefuq e zaeqhhael mael'ae bi zaeq da hoqli laq; nol eiq laefuq laoqmyel Faqlaoq'ae zilbaeq hha xyemoq biq'ae. 14 Ngeelfeiq, nol aeqchee eiq shunl fu laoq, nol ngaeq'ae nyuqdeel laeq lye geezaeq lil, ngaeq'ae hhaoqsaeqsaeq laeq, Faqlaoq e yiqsiboq'ae ngaeq'ae saeziq yomeeq bael gee laeq, ngaeq'ae laoqgaiqkei laoqhaol ae'lye bael jiul duhoq hhei laq. 15 Ngaeq yaol ochoq lye Xiboqlaiq e milcaeq ae'lye saeqvae eezaeq yi laeq hhae, ngael laoqgaiqkei laoqhaol vae hhae ee'longl aeqmyel qiqgiq eiq maeq zonglba yo yil."
Yoqsel aelhoq caqzaqhael e yoheeq'ae matu yilsi mael bael geedu biq
16 Aelhoq caqzaqhael e yoheeq matu yilsi geedu hhei mael meeq she lye kei biq, kaol Yoqsel'ae gee biq: "Ngaeq'ae eiq matu qiq mal tu lal laq'ae, matu onglci'ae ngaeq e vuqduq taq'ae bachi'lye aqba suq keelcuq toq hhei lil. 17 Aqtaq taqli keelcuq onglci'ae, Faqlaoq'ae pe hhei biq maeq qiqsheel e zaeqzael zoq, ngeelfeiq, haeqzilhael ngaeq e vuqduq taq e keelcuq e zaeqzael mael tuzaq lal'ae." 18 Yoqsel geehoq biq: "Matu xilmael e yilsi laoq xilnye hhae: Keelcuq suq mael laoq suq nao vae gee hhae. 19 Dilsan tian'ae, Faqlaoq lye noq e vuqduq mael dega hhei, noq yaol aelbol taq'ae pyeqcheeq da hhei, haeqzilhael noq e aeqhhaol mael'ae tuzaq lal maoqlye hhae."
20 Suq nao keellael laol, Faqlaoq dyeqlal e qiq nao naohaeq ngeelvae, yoqhhaeq laoq yoqhhaeq holhhaq'ae zhiqmoq geiq hael'ae baqwanq baqdeel hhei gil biq, yoqhhaeteel e yiqsi ae'lye, zilbaeq xyezaq e qiq hhaeq, kaol aelhoq caqzaqhael e yoheeq yaol cholyaeq koqlongl e laoqhaol ae'lye pyeqduhoq hhei biq vae, 21 Zilbaeq xyezaq e qiq hhaeq aeqyoq e zaeqhhael mael'ae zaeq da hoqli vae, yoqhhaeq yaol Faqlaoq'ae zilbaeq bi baqmoq, 22 Ngeelfeiq, Faqlaoq lye aelhoq caqzaqhael e yoheeq yaol pyeqcheeq da biq; Yoqsel yoqhhaeteel'ae matu e yilsi mael geedu gil biq laoqmyel peqlal vae. 23 Ngeelfeiq, zilbaeq xyezaq e qiq hhaeq laoq Yoqsel yaol maeq nyuqdeel biq'ae, kaol yoqhhaeq yaol yelbael biq vae.