Yoqsel Botiqfaq toq'ae guanqja geiq hhae
39
Yiqshiqmaqlil cholyaeq lye Yoqsel yaol Aijiq'ae sheeq gaeyil vae. Botiqfaq lye gul biq e Faqlaoq holhhaqboq'ae zhiqmoq geiq e Aijiq cholyaeq qiq hhaeq zhol'ae, yoqhhaeq laoq Faqlaoq toq'ae songlqyezaq e cholyaeqhael e yoheeq'ae, yoqhhaeq lye Yoqsel yaol senyil mulzaeq e Yiqshiqmaqlil cholyaeqhael ae'lye vulga hhei vae. 2 Yeheqhuaq laoq Yoqsel nyegael qiqgael baelzhol'ae, kaol Yoqsel aeqyoq e hhaoqsongl Aijiq cholyaeq toq'ae zhol fu, aeqchee zongl mael eiq zhee shunl biq'ae. 3 Yoqhhaeq e hhaoqsongl laoq Yeheqhuaq Yoqsel nyegael qiqgael baelzhol, kaol yoqhhaeq e aqlaq'ae haelzongl e silqinqhael gilzuqmyel bi shunl she lye mol hhei biq, 4 Kaol Yoqsel laoq hhaoqsongl e ma'ne yiqsi ae'lye endianq hhamul hhei biq, kaol yoqhhaeq e hhaoqsongl'ae fuqsil biq, hhaoqsongl laoq Yoqsel yaol aeqyotoq e laoqhaol haolmoqhael bi guanqliq hhae, aeqyoq halzahael gilzuqmyel Yoqsel e aqlaq mael'ae heilmoq hhei biq vae. 5 Hhaoqsongl laoq Yoqsel yaol yoqhhaetoq'ae laoqhaol haolmoq, kaol yoqhhaeq e halzahael bi guanqliq e aeqnaol laoq, Yeheqhuaq Yoqsel gae'lye Aijiq cholyaeq tyutoq'ae geeqlongq biq biq vae. Tyulkaol, yoqhhaetoq'ae halzahael kaol haeldye vae halzahael Yeheqhuaq e yiqsiboq'ae geeqlongq meeq vae. 6 Botiqfaq aeqyoq e halzahael gilzuqmyel Yoqsel e aqlaq mael'ae heilmoq hhei biq vae, tyulkaol, aeqyoq aelhoq zaeq mael maoqlaol, baeqjyelboq e silqinq laoq qiqgiq maeq caoxin vae.Yoqsel heeqhhaeq maolzaemyel, maduq fusael lael aeqmyel hhae.
Yoqsel yaol hhaoqsongl e haeqmiq gae'lye bi ee'longl vae
7 Aeqnaol qiq nao laoq, Yoqsel e hhaoqsongl e haeqmiq Yoqsel'ae eelsheq eelsheqlye chifu biq, gee: "Ngaeq nyegael bal ssuqza laoq." 8 "Maeq hhaeq'ae", Yoqsel yoqhhaeq e hhaoqsongl e haeqmiq'ae gee biq, "Ngael xilnye maeq zongl hhaeq'ae! Naelhaeq, laoqhaol haolmoqhael ngaeq e hhaoqsongl laoq qiqgiq maeq guanq'ae; yoqhhaeq lye yoqhhaeq haelzongl maoq mael, gilzuqmyel ngaeq e aqlaq'ae heilmoq laeq vae. 9 Notoq vae ngaeq taq'ae laqtaq hhael heeq myel qiq hhaeq eiq maeq zhol'ae, nol laoq yoqhhaeq e haeqmiq'ae, kaol noq yaol maeq sheeqmoq hhei laeq kaolmaoqlaol, yoqhhaeq ngaeq'ae maeq heil hhei laeq myel qiqgiq eiq maqza vae. Ngael haelmillyekaol xilnye zhee duqlaq e silqinq zongl laeq, kaol Momil'ae zonglzhil biq laeq?" 10 Yoqhhaeq naochomyel Yoqsel'ae xilnye gee biq feiq, Yoqsel yoqhhaeq e saeziq mael maeq naelhaeq'ae, yoqhhaeq nyegael maq bael ssuqza nae, kaol yoqhhaeq nyegael eiq qiqgael maeq baelzhol nae'ae. 11 Qiq nao laoq, Yoqsel laoqhaol onglci'ae silqinq mul li, laoqhaol onglci'ae baeqjyelboq e cholyaeqhael qiq hhaeq eiq maeq baelzhol'ae. 12 Hhaoqsongl e haeqmiq lye Yoqsel e poljye mael'ae eetyeq biq, gee: "Ngaeq nyegael bal ssuqza laoq." Yoqsel aeqyoq e poljye mael hhaoqsongl e haeqmiq e aqlaq'ae za deelsaeq vae, kaol nilduboq'ae ki du hhei vae. 13 Hhaoqsongl e haeqmiq laoq Yoqsel aeqyoq e poljye mael, yoqhhaeq e aqlaq'ae zadeelsaeq kaol nildu'ae ki du hhei mol hhei biq, 14 Kaol laoqhaol e cholyaeqhael gilzuqmyel gul laeq, kaol yoqhhaeteel'ae gee biq: "Noteel fu gil, ngatoq'ae sheeqhoqlaeq e Xiboqlaiq cholyaeq aedeeteel'ae maduq maeq bi za myel zongl laeq'ae. Yoqhhaeq ngaeq saeqvae do'lal, kaol ngaeq nyegael ssuqza maoqlye zongl laeq hhae, kaol ngael yotyel haeqheemyel gul lil. 15 Yoqhhaeq ngael yotyel haeqheemyel gul mael zhoq gaeq hhei biq laol, poljye mael ngaeq e dongqpyeq'ae beiqdeelsaeq kaol nildu'ae ki du hhei vae." 16 Cholhae aeqmae laoq Yoqsel e poljye mael, yoqhhaeq e hhaoqsongl laoqhaol vae hoqlal fu keellye, dongqpyeq'ae heildeel hhei, 17 Yoqhhaeq aeqyoq e haqyo'ae saeziq xihael gee biq: "Noq lye sheeqhoqlaeq e yaqhacheqzaq e Xiboqlaiq cholyaeq tyutaeq, saeqvae do'lal kaol ngaeq'ae hae'naeqzaeq lael maoqlye zongl hhae. 18 Ngael yotyel haeqheemyel gul laol, yoqhhaeq lye aeqyoq e poljye mael beiqdeelsaeq, kaol nildu'ae ki du hhei vae."
19 Yoqsel e hhaoqsongl laoq aeqyoq e haeqmiq gee e saeziq, "Noq e yaqhacheqzaq e cholyaeq ngaeq'ae xilnye zongl laeq hhae" lye gaeq hhei biq, kaol hol sil maoqmyel hol biq'ae. 20 Tyulkaol, Yoqsel e hhaoqsongl lye Yoqsel yaol deiqtyeq biq, kaol yoqhhaeq yaol laoqgaiqkei laoqhaol vae koqlongl li biq vae, laoqhaol tyulmael laoq, zongmae e laoqgaiqkei e cholyaeq yaol koqlongl e laoqhaol mael ngeelvae. Yoqsel tyuqvae laoqgaiqkei hhae. 21 Ngeelfeiq, Yeheqhuaq Yoqsel nyegael qiqgael baelzhol'ae, yoqhhaeq'ae neemae maeqpaelmyel gaeq biq, kaol laoqgaiqkei myel vae guanq e yoheeq e ma'ne yiqsi ae'lye endianq bi mul hhei vae. 22 Tyulnye laol, laoqgaiqkei myel vae guanq e yoheeq tyutaeq lye tyuqvae laoqgaiqkei hael gilzuqmyel Yoqsel'ae bi guanqliq hhae; tyuqvae e gilzuqmyel silqinqhael Yoqsel'ae bi guanq hhae. 23 Yeheqhuaq Yoqsel nyegael qiqgael baelzhol'ae, kaol yoqhhaeq haelzonglhael gilzuqmyel shunl biq'ae, tyulkaol, laoqgaiqkei myel vae guanq e yoheeq Yoqsel'ae zongl yil lye moqheilheil biq e silqinq mael, yoqhhaeq zhee fanglxin biq'ae.