Yoqdal kaol Tamaq
38
Tyuqfu, Yoqdal yoqhhaeq e algohael zaellye deelsae hhei vae, Xi'la lye gul biq e Yaldullanq cholyaeq toq'ae baelzhol hhae. 2 Yoqdal tyuqvae lye Ja'nanq cholyaeq Shuyal e yaeqmiq yaol mol hhei biq, kaol yoqhhaeq yaol sheeqzaeq hheikaol qiqgael ssuqza vae. 3 Yoqdal e haeqmiq'ae yaeqguqpi li vae, kaol yaqyo qiq hhaeq bogae hhei'ae, Yoqdal lye yaeqguq e cholmil mael Eq lye mil hhei biq hhae. 4 Yoqhhaeq'ae yaeqguq yol pi'li biq vae, kaol yaqyo qiq hhaeq bogae hhei, yaeqguq e cholmil mael Eqnanq lye mil hhei biq hhae. 5 Yoqhhaeq'ae yaeqguq yol pi'li biq vae, kaol yaqyo qiq hhaeq bogae hhei'ae, yaeqguq e cholmil mael Shilla lye mil hhei biq hhae. Yoqhhaeq Jixi vae lye, Yoqdal'ae Shilla yaol bo hhei biq hhae.6 Yoqdal aeqyoq e fuqbo yaqyo Eq'ae haeqmiq sheeqtoq hhei biq, cholmil mael Tamaq lye gul biq hhae. 7 Yoqdal e fuqbo yaqyo Eq laoq Yeheqhuaq e ma'ne'ae lye fu'li'laol duqlaq e cholyaeq'ae, tyulkaol, Yeheqhuaq lye yoqhhaeq yaol bi sil vae. 8 Tyulkaol, Yoqdal Eqnanq'ae gee biq: "Nol noq e algo e haeqmiq nyegael ssuqza yil, nocu yaol haeqmiq sheeqzaeq maoqhhae, kaol noq e algo'ae houldail bi zhol gaeyil." 9 Eqnanq laoq bogae hhei e yaeqguq aeqyoq e algo e houldail'ae lye loq biq, tyulkaol, yoqhhaeq e aeqcu nyegael haeqfu qiqzael ssuqza feiq, coq'eel mael milcaeq vae pyeq hael hhei, xilnye zongl laol, aeqyoq e algo'ae houldail maeq zhol gaeyil kiq vae. 10 Eqnanq haelzonglhael Yeheqhuaq e ma'ne'ae lye fu'li'laol duqlaq hhae, tyulkaol, Yeheqhuaq lye yoqhhaeq yaol eiq bi sil vae. 11 Yoqdal neemae onglci'ae nyuq: "Aeqgael Shilla eiq aeqyoq e algo niq nulhhaeq laoqmyel sil hhei maeqhe lye gu yae." Tyulkaol, Yoqdal yoqhhaeq e keeqmae Tamaq'ae gee biq: "Nol nodae toq'ae miqchiq geiqzaq hoqli, ngaeq e yaqyo Shilla heeqda lal fu keellye doq deel." Tamaq aeqyoq e aeqdae toq'ae baelzhol hoqli vae.
12 Qiqniq hoq aeqnaol, Yoqdal e haeqmiq, Shuyal e yaeqmiq sil vae. Molsonglsongl e naohaeq gol hhei vae, Yoqdal laoq yoqhhaeq e yelchoq Yaldullanq cholyaeq Xi'la nyegael Tinqnaq vae da'li, yoqhhaeq e aqciqhael'ae caeqhum bal no biq e cholyaeqhael zael'ae keelli. 13 Cholyaeq qiq hhaeq Tamaq'ae geegaeq biq: "Noq e ssuqpaeq Tinqnaq vae da'li kaol aqciq e caeqhum no li vae." 14 Tamaq laoq heeqda lal e Shilla aeqyoq yaol maeq sheeqzaeq lael yae lye loq biq, kaol yoqhhaeq miqchiq geiq e aelhongq mael heiga hhei, maduq mael cheelchiq hheikaol aeqyoq yaol maeq bi fuduzaq lalkiq myel, Tinqnaq e gaelmae da'li e Yi'naqyinl e milmae heeqmyel e oheiq vae zhol deelhhei'ae. 15 Yoqdal yoqhhaeq maduq mael cheelchiq mol hhei biq, kaol yoqhhaeq laoq jilnyuq'ae lye kei biq hhae. 16 Yoqdal laoq yoqhhaeq aeqyoq keeqmae'ae lye maeq loq biq wae siq, kaol yoqhhaeq zael'ae yil, gee: "Lael, ngael noq nyegael ssuqza maoq." Tamaq gee: "Ngael noq nyegael bal ssuqza hhaeq lye kaollaoq, nol ngaeq'ae aeqchee heil laeqngeel maeq?" 17 Yoqdal gee: "Ngaeq e aqciqhael onglci ae'lye aqciq ciqyaeq qiq yaeq niq laqngeel." Tamaq gee: "Nol maq niq keellaeq fu, moqgoq heildeelsaeq maoqhhae." 18 Yoqdal yoqhhaeq'ae naelhaeq biq: "Ngael noq'ae aeqchee moqgoq heildeelsaeq laeq maeq?" Tamaq geehoq biq: "Noq e gailzangkei mael, gailzangkei mael doq e alca, kaol noq e zaeqngeeq mael." Yoqdal yoqhhaeq'ae heilmoq hhei biq vae, kaol yoqhhaeq nyegael ssuqza vae. Tyulkaol, Tamaq'ae Yoqdal ae'lye yaeqguqpi li biq vae. 19 Tamaq tullael kaol deel vae, maduq mael'ae cheelchiq hhei mael heilgae hhei, kaol miqchiq e aelhongq mael dumda hoq hhei vae.
20 Yoqdal yoqhhaeq e yelchoq Yaldullanq cholyaeq yaol aqciq ciqyaeq qiq yaeq bi bal niq yil, haeqmiyaeq tyutaeq zael'ae heildeelsaeq moqgoq mael heilhoqlaeq maoqlye hhae, ngeelfeiq, haeqmiyaeq tyutaeq yaol maeq saelpopuq hhei ongl biq'ae. 21 Xi'la tyuqvae milcaeq e cholyaeq'ae naelhaeq biq: "Yi'naqyinl gaelmae gaeljyel vae zhol e jilnyuq tyutaeq haeqvae zhol hhaemaeq?" Yoqhhaeteel geehoq biq: "Saeqvae jilnyuq maeq zhol'ae." 22 Tyutaeq Yoqdal'ae mol hoqli, gee: "Ngael yoqhhaeq'ae maeq saelpopuq hhei ongl yae, tyuqvae milcaeq cholyaeqhael gilzuqmyel xilnye gee: 'Saeqvae jilnyuq maeq zhol'ae."' 23 Yoqdal gee: "Moqgoq tyuhael yoqhhaeq heilzaeq yil biq oq, aeqgael aedeeteel'ae eel lal gil maeqhe. Ngaeq lye aqciq ciqyaeq mael niqli wae, ngeelfeiq, nol yoqhhaeq yaol maeq saelpopuq hhei'ae."
Tamaq lye haeqmoq bogae hhei
24 Baehae sul siq gol hhei fu, cholyaeq Yoqdal'ae geegaeq biq: "Noq e keeqmae Tamaq jilnyuq geiq hhae, kaol yaeqguqpi hhei wae." Yoqdal gee: "Yoqhhaeq yaol ee duyi kaol pe sil hhei." 25 Cholyaeq lye Tamaq yaol ee duyil fu, Tamaq cholyaeq yaol moqheilheil du hheikaol yoqhhaeq e ssuqpaeq'ae bi gee yil, gee: "Moqgoq xihael aeqsul laol, ngael laoq tyutaeq ae'lye yaeqguqpi hhei aeqlil." Yoqhhaeq yol gee: "Nol fu fa, gailzangkei mael, gailzangkei mael doq e alca kaol zaeqngeeq mael aeqsul hhaemaeq?" 26 Yoqdal moqgoq tyuhael fuduzaq hhei, kaol gee: "Ngael ngaeq e yaqyo Shilla yaol yoqhhaeq'ae maeq bi sheeqzaeq yil aeqkaol, yoqhhaeq ngaeq taq'ae yo'liq hhal za yae." Tyuq ae'lye aeqnaol laoq Yoqdal Tamaq nyegael qiqzael eiq maeq bael ssuqza vae.
27 Tamaq yaeqguq bo hhaeq lael fu, oqma onglci'ae haeqmoq pi hhei ngeelzhol'ae. 28 Yoqhhaeq yaeqguq bo fu, qiq hhaeq laoq aqlaq qiqboq tyuqdu hhei. Yaeqguq ciqdazaq e cholyaeq keelpongq keelnyel qiq ke heil hheikaol yoqhhaeq e aqlaq mael'ae kaltoq da hhei biq, gee: "Xitaeq laoq laefuq dyeqlal e qiq hhaeq'ae." 29 Yoqhhaeq e aqlaq mael tyuq dohoq fu, yoqhhaeq e algo duyi vae. Yaeqguq ciqdazaq e cholyaeq gee: "Nol aeqcheekaol laefuqmyel byuq duyi lilmaeq?" Tyulkaol, yoqhhaeq e cholmil mael Faqlelsi lye gul biq hhae. 30 Aeqnaol, aqlaq mael'ae keelpongq keelnyel qiq ke kaltoq da hhei e qiq hhaeq eiq duyi vae. Tyulkaol, yoqhhaeq e cholmil mael Xyella lye gul biq hhae.