Yoqsel kaol yoqhhaeq e algohael
37
Yaqgel yoqhhaeq e aeqdae baelzhol e Ja'nanq milcaeq vae zhol hhae. 2 Yaqgel toq'ae peqlal e silqinq mael sa'oqboq'ae cu deelhhei hhae: Yoqsel qyelsiq hoq fu, yoqhhaeq aeqyoq e algohael nyegael aqciq qiqgael hoqzaq hhae. Yoqhhaeq laoq cholhoq haeldyul maeq heeq wae siq, duqlye yoqhhaeq e aeqdae e mae'nil Pilla kaol Xipal e yaqyohael nyegael qiqgael zhol hhae. Yoqsel lye aeqyoq e algohael maeqmeeqmyel zongl hael aeqdae'ae geegaeq hhei biq. 3 Yiqsellyel cholmoqmoq fu, Yoqsel du'lal biq'ae, tyulkaol, Yiqsellyel Yoqsel'ae gaeq biq mael baeqjyelboq e yaqyohael taq'ae hhael naeq'ae. Yoqhhaeq lye Yoqsel'ae alyi guq da hhei e poljye qiq ko guq hhei biq. 4 Yoqsel e algohael yoqhhaeteel e aeqdae laoq Yoqsel'ae gaeq biq mael yoqhhaeteel taq'ae hhael naeq she lye mol hhei biq, tyulkaol, Yoqsel'ae neemasu zaq gil biq, kaol yoqhhaeq nyegael haelmeeqlye saeziq maeq gee'naeq biq'ae.Yoqsel e matu
5 Yoqsel'ae matu qiq mal tu li biq, kaol matu tyulmael yoqhhaeq e algohael'ae geegaeq hhei biq, tyulnye laol, yoqhhaeteel yoqhhaeq'ae neema hhal su zaq gil biq'ae. 6 Yoqsel yoqhhaeteel'ae gee biq: "Ngaeq'ae matu xilnye tu lal laq'ae, noteel naelhaeq gil: 7 Aedeeteel haeldye vae meqziq kaltoq gil fu, ngaeq e meqto mael qiqlaqmyel tullael, noteel e meqtohael gilzuqmyel ngaeq e meqto mael'ae deel ongq laeq kaol vuqduqtongq lael biq." 8 Yoqhhaeq e algohael yoqhhaeq'ae gee biq: "Nol aeqdilmyel ngaeteel e zongmae geiq maoqlye lilmaeq? Nol aeqdilmyel ngaeteel yaol noq e aqlaq holhhaqboq'ae bi zhol laeq maoqlye laeq?" Yoqhhaeteel Yoqsel e matu kaol yoqhhaeq e saeziq gae'lye yoqhhaeq'ae neema hhal su zaq biq. 9 Aeqnaol Yoqsel'ae matu yol qiq mal tu li biq, matu xilmael eiq yoqhhaeq e algohael'ae geegaeq hhei biq hhae. Yoqhhaeq gee: "Ngaeq'ae matu yol qiq mal tu lal laq'ae, matu onglci'ae neelmae, baehae kaol aeqgeel qyel qiq mal ngaeq'ae vuqduqtongq lael laeq'ae." 10 Yoqsel laoq matu mael yoqhhaeq e aeqdae kaol algohael'ae geegaeq gil biq vae, yoqhhaeq e aeqdae laoq yoqhhaeq'ae gaezaeq biq, gee: "Nol tu e matu xilmael aeqchee maeq? Ngael kaol noq e aeqmae, kaol noq e algohael kaol aeqnil, aeqdilmyel lael kaol noq'ae vuqduqtongq lael maoqhhae maeq?" 11 Yoqhhaeq e algohael laoq yoqhhaeq'ae heiqcilnael gil biq, ngeelfeiq, yoqhhaeq e aeqdae laoq silqinq xilmael neemae onglci'ae nyuqtongq deelzaeq hhei.
Yoqsel e algohael lye yoqhhaeq yaol Aijiq milcaeq vae ongqzaeq yil biq
12 Yoqsel e algohael Shiljianl vae yoqhhaeteel e aeqdae e aqciqhael hoqzaq yil gil vae. 13 Yiqsellyel Yoqsel'ae gee biq: "Noq e algohael Shiljianl vae aqciq hoqzaq gil maeqngeel maeq? Lael, ngael noq yaol tyuqvae moqheilheil duyil maoq." Yoqsel yoqhhaeq'ae geehoq biq: "Ngael yil hhaeq." 14 Yiqsellyel yoqhhaeq'ae gee biq: "Nol yil kaol noq e algohael zholsael gil biq maeq, aqciqhael haelmeeqlye maeq lye fu yil, kaol hoqlal laol ngaeq'ae geegaeq hoqlael laeq." Tyulkaol, Yiqsellyel yoqhhaeq yaol Xiboqlunq Longlkaeq ae'lye moqheilheil du hhei, kaol yoqhhaeq Shiljianl vae yil vae. 15 Cholyaeq qiq hhaeq Yoqsel haeldye ae'lye deelbael biq mol hhei biq, kaol yoqhhaeq'ae naelhaeq biq: "Nol aeqchee saelpo lilmaeq?" 16 Yoqhhaeq geehoq biq: "Ngael ngaeq e algohael'ae saelpo lil, yoqhhaeteel haeqvae aqciq hoqzaq gil hhaemaeq? Ngaeq'ae geedu laq." 17 Tyutaeq gee: "Yoqhhaeteel deelsae vae, ngael yoqhhaeteel gee e saeziq mael gaeq wae: 'Ngaeteel Dotan'ae yil maoq."' Tyulnye laol, Yoqsel aeqyoq e algohael'ae lyeq yil vae, aeqnaol Dotan vae lye yoqhhaeteel yaol saelpopuq hhei vae.
18 Yoqhhaeteel gaelmaolsae'lye Yoqsel yaol mol hhei biq; yoqhhaeq maeq deelniq keellaeq siq fu, yoqhhaeq yaol haelmillye zonglsil maoqlye geedazaq gil'ae. 19 Yoqhhaeteel hhaellaelmyel gee gil: "Fu hhei, matutu e cholyaeq tyutaeq lael vae. 20 Lael gil, Aedeeteel yoqhhaeq yaol xyeq gil biq maoq, kaol aeq'yel yel'eel taeq e duqhongq qiq mal vae beiqdo gil biq maoq, tyulnye laol, byeljyeq lye zaeq biq vae lye gee gil maoq. Aedeeteel aeqgael yoqhhaeq e matu mael haelmillye peqyil hhei maeq lye fu gil maoq." 21 Liuqbenq gaeq hhei biq laol, Yoqsel yaol yoqhhaeteel aqlaq ae'lye jiul duhoq yi maoqlye hhae. Yoqhhaeq gee: "Aedeeteel yoqhhaeq'ae maeq hhae zonglsil biq'ae." 22 Liuqbenq yoqhhaeteel'ae yol gee biq: "Yoqhhaeq'ae haq xyeq biq, yoqhhaeq yaol saeqvae byelcongq e aeq'yel yel'eel taeq e duqhongq vae beiqdo deelsaeq biq, kaol yoqhhaeq'ae haeq zonglkyuq biq." Liuqbenq laoq yoqhhaeq yaol yoqhhaeteel e aqlaq ae'lye jiul du hhei, kaol yoqhhaeq e aeqdae'ae sheeq hoqli biq maoqlye nyuq hhae. 23 Yoqsel yoqhhaeq e algohael tyuqvae keelli laol, yoqhhaeteel lye yoqhhaeq e alyi guq da hhei e poljye mael ee hei biq. 24 Yoqhhaeteel lye Yoqsel yaol deiqtyeq biq, kaol aeq'yel yel'eel taeq e duqhongq vae beiqdo biq. Duqhongq tyulmael laoq geesa'lye hhae, onglciboq'ae eelcuq maeq deeq'ae.
25 Yoqhhaeteel zholgae hheikaol aelhoq zaeq gil'ae, vuqduq baqtul hhei'laol, Miqdianl milcaeq e Yiqshiqmaqlil cholyaeq qiq miq Ji'lyel ae'lye lael mol hhei biq. Yoqhhaeteel e loltoq mael'ae nulsael lael aeqmyel haelsaeq, ruqxiang kaol molyaol toq hhei myel, Aijiq vae heil gaeyil maoqlye hhae. 26 Yoqdal yoqhhaeq e algo aeqnilhael'ae gee biq: "Aedeeteel lye aedeeteel e aeqnil yaol xyeq hhei, yoqhhaeq e siq mael baqhhaq hhei, xilnye zongl kaol aedeeteel'ae aeqchee meeqyo'lael kiq maeq? 27 Yoqhhaeq laoq aedeeteel e aeqnil'ae, kaol aedeeteel laoq qiqdae boyaeq'ae. Aedeeteel yoqhhaeq yaol Yiqshiqmaqlil cholyaeq'ae ongq biq hhael hhaeq'ae, kaol yoqhhaeq'ae haeq zonglkyuq biq oq." Algo aeqnilhael yoqhhaeq gee mael naelhaeq gil vae. 28 Miqdianl ae'lye lael e senyil mulzaeq e cholyaeqhael tyuqvae deelpol duyil, Yoqsel e algohael lye Yoqsel yaol aeq'yel yel'eel taeq e duqhongq vae lye ee da hoq hhei biq, kaol Yoqsel yaol pulziq niqqyel maellye Yiqshiqmaqlil cholyaeq'ae ongq biq vae. Yiqshiqmaqlil cholyaeq lye Yoqsel yaol Aijiq vae sheeqyil vae.
29 Liuqbenq aeq'yel yel'eel taeq e duqhongq vae hoq keelli, Yoqsel duqhongq vae maeq zhol'ae lye mol hhei biq, zhee nyuqsaeq biq kaol aeqyoq e aelhongq mael eezi hhei vae. 30 Yoqhhaeq aeqyoq e aeqnilhael zael'ae hoq keelli, gee: "Yaeqguq maeq zhol deel aeqvae, ngael haelmillye zongl laeq?" 31 Tyulkaol, yoqhhaeteel lye aqciq ciqpaeq qiq yaeq xyeq hhei'ae, Yoqsel e alyi guq da hhei e poljye mael'ae siq deiqsu hhei; 32 Aeqnaol yoqhhaeteel lye poljye tyulmael yoqhhaeteel e aeqdae'ae heil hoqli biq, gee: "Xilmael laoq ngaeteel lye saelpopuq hhei lil. Nol fu fa, noq e yaqyo poljye mael maeq?" 33 Yoqhhaeq poljye xi qiq ko fuduzaq hhei'ae, kaol gee: "Xilmael laoq aeqdilmyel ngaeq e yaqyo e poljye'ae, Yoqsel yaol laoq zhee henq e byeljyeq lye ee'nu biq kaol zaeq aeqwae." 34 Yaqgel zhee nyuqsaeq biq kaol aeqyoq e aelhongq mael eezi hhei vae, haeqpipaqhhael'ae paelpul paqda hhei, kaol aeqyoq e yaqyo gae'lye hae nae'nao nyuqsaeq vae. 35 Yoqhhaeq e haelzhol yaeqmiq yaqyohael aeqyoq'ae haeq nyuqsaeq lye gee gil biq'ae, ngeelfeiq, yoqhhaeq laoq yoqhhaeteel gee mael maeq naelhaeq nae'ae, gee: "Ngael mil'oq'ae ngaeq e yaqyo'ae mol yil fu keellye, ngael ngaeq e yaqyo gae'lye nyuqsaeq maoq." Kaol Yoqsel e aeqdae laoq yoqhhaeq gae'lye nyul'ae. 36 Miqdianl cholyaeq lye Yoqsel yaol Aijiq milcaeq vae ongqzaeq yil biq vae, Aijiq e Faqlaoq holhhaqboq e zhiqmoq, Botiqfaq'ae ongq biq vae, yoqhhaeq laoq Faqlaoq toq'ae songlqyezaq e cholyaeqhael e yoheeq'ae.