Anxiqriq haelmillye lael hhae lye mael
2
Xilnye laol, Momil lye mqmae, milcaeq kaol halza haelzholhael gilzuqmyel zongldu byel vae. 2 Dilqiq tian, Momil aeqyoq haelzongl maoqlye mael zonglbyel vae; dilqiq tian, Momil aeqyoq haelzongl maoqlye mael gilzuqmyel hhaeqnaeqnaeq gae hhei vae. 3 Tyuqfu qiq nao, Momil aeqyoyoq zonglbeibei maoqlye mael gilzuqmyel zonglbyel vae, kaol hhaeqnaeqnaeq gae hhei vae. Tyulkaol, Momil dilqiq tian'ae geeqlongq biq biq, kaol tyu qiq nao mael zonglqyel du hheikaol senljyeq wae lye geiq hhae.4 Xihael laoq mqdongq milbeibei mael cuga deelhhei mael'ae.
Momil aeqyoq lye zongldu hhei e cholyaeq yaol Yidianl vae bi zhol
Momil Yeheqhuaqa mqmae milcaeq zongldu fu, 5 Momil Yeheqhuaq lye milcaeq vae vuq'yel maeq yelgae hhei wae siq, tyulkaol, haeldye e haelsaeqhael aelbolhael maq dyeq wae siq, haeldye e oqbye oqnyulhael eiq maq dyeq du'lal wae siq, kaol aeqhael mulzaeq e cholyaeq eiq maeq zhol'ae. 6 Ngeelfeiq, zhiqhaoq milcaeq ae'lye byuq da hhae, kaol halza milcaeq vae eiq jyelciqlye hhae. 7 Tyulkaol, Momil Yeheqhuaq lye milcaeq e milxul maellye cholyaeq niqdu hhei, aeqyil e saeq mael yoqhhaeq e naelbyu mael'ae bo do hhei biq, kaol cholyaeq tyutaeq yohael za e choldyeq peqlal vae. Yoqhhaeq e cholmil mael Yaldangb lye gul biq hhae. 8 Momil Yeheqhuaq lye neeldu aelheiq boq e Yidianl vae, kilsaq hhaqlongl hheikaol aelsiq aelbolhael kae deelhhei, kaol aeqyoq lye niqdu hhei e cholyaeq yaol tyuqvae bi zhol hhae. 9 Momil Yeheqhuaq lye gilzuqmyel aelbolhael milcaeq ae'lye bi dyeq du'lal, aelbol tyuhael laoq fusael lael aeqmyel hhae, kaol zaeqzael geiqzaq lal. Kilsaq vae aeqyil aelbol kaol meeqdyul bi loq kiq e aelbol dyeq'ae.
10 Lolbaeq qiq mal Yidianl ae'lye yul duyi, kaol kilsaq tyulmael'ae yulxeiq biq; tyuqvae lye yulpa du hheikaol lolbaeq yuq mael e lolvuq peqlal vae. 11 Lolbaeq dilyiq gol laoq Biqxunl lye gul hhae, kaol pulsheel za e Hafei'la halza milcaeq vae yul'ongq deelhhei hhae. 12 Tyuqvae milcaeq e pulsheel laoq zhee meeq hhae; tyuqvae nulsael lael aeqmyel aelbol beelziq kaol nyelcullye maqnaoq za hhae. 13 Lolbaeq dil'el gol laoq Jixunl lye gul hhae, Guqshiq halza milcaeq vae yul'ongq deelhhei hhae. 14 Lolbaeq dilsan gol laoq Diqgeqliqsi lye gul hhae, Yalsul e neeldu aelheiq boq'ae yulpol duyil hhae. Lolbaeq dilsil gol laoq Yolfa'ladiq'ae. 15 Momil Yeheqhuaq lye cholyaeq tyutaeq yaol Yidianl Kilsaq vae bi zhol hhae, kaol yoqhhaeq yaol tyuqvae bi fu'qyezaq kaol aeqhael bi mulzaeq hhae. 16 Momil Yeheqhuaq cholyaeq tyutaeq'ae moqheilheil biq, gee: "Saeqvae kae deelhhei e gilzuqmyel aelbol taq e aelsiqhael, nol gilzuqmyel zaeq aeqmeel. 17 Ngeelfeiq, meeqdyul bi loq kiq e aelbol taq e aelsiq mael maeq hhae zaeq'ae, nol zaeq kaollaoq, nol aeqdilmyel hhae sil hhae."
18 Momil Yeheqhuaq gee: "Cholyaeq tyutaeq qiq hhaeq myel zhol maeqmeeq'ae, ngael yoqhhaeq'ae zae'li ongl aeqmyel aeqchee'lael'ee baelzongl biq e qiq hhaeq zongldu hhei maoq." 19 Momil Yeheqhuaq lye milcaeq maellye byelcongq e gilzuqmyel byeldongl jyeqyaeqhael, kaol mqmae e gilzuqmyel haeqzilhael zongldu hhei, kaol xihael gilzuqmyel tyutaeq e yiqsiboq'ae sheeqyil biq, tyutaeq yoqhhaeteel'ae haelmillye gul biq hhaemaeq lye fu. Cholyaeq tyutaeq hae qiqsheel mael'ae aeqchee lye gul biq laol, gul biq e tyulmael laoq yoqhhaeq e cholmil ngeelvae. 20 Tyutaeq gilzuqmyel laoqhaol jyeqyaeqhael, kaol gilzuqmyel mqmae e haeqzilhael, kaol gilzuqmyel byelcongq e jyeqyaeqhael'ae cholmilmil biq vae; ngeelfeiq, cholyaeq tyutaeq'ae zae'li ongl aeqmyel aeqchee'lael'ee baelzongl biq e qiq hhaeq maeq deelpuq hhei biq wae siq. 21 Tyulkaol, Momil Yeheqhuaq lye tyutaeq yaol bi yuqxul hhei. Yoqhhaeq yuqxulteeq fu, Momil Yeheqhuaq lye yoqhhaeq e nulhhael saeq'yuq qiq kongq heildu hhei, kaol saeqzil mael bi maoq hoqli vae. 22 Aeqnaol, Momil Yeheqhuaq lye tyutaeq e aeqhhaol ae'lye heildu hhei e nulhhael saeq'yuq maellye, yaeqmiyaeq qiq hhaeq zongldu hhei, tyutaeq e yiqsiboq'ae sheeqyil biq. 23 Tyutaeq gee:
"Yaeqmeel puqlael yaevae,
xitaeq laoq ngaeq e saeq'yuq onglci e saeq'yuq'ae,
saeqzil onglci e saeqzil'ae;
yoqhhaeq'ae haeqmiyaeq lye gul biq maoq,
yoqhhaeq laoq haqyoyaeq e aeqhhaol ae'lye heildu hhei hhae lye kaol'ae."