Cholyaeq e golsiq mael haelmillye lael hhae lye mael
3
Momil Yeheqhuaq lye zongldu hhei e gilzuqmyel byeldongl jyeqyaeqhael onglci'ae, oqhol laoq baeqjyelboq hael taq'ae hhal jiaoqhuaq hhae. Oqhol haeqmiyaeq'ae gee biq: "Momil aeqdilmyel noteel'ae saeqvae kilsaq e aelbolhael taq e aelsiq mael, maeq hhae zaeq'ae lye gee gol gil laeq hhaemaeq?" 2 Haeqmiyaeq oqhol mael'ae gee biq: "Saeqvae kilsaq e aelbol taq e aelsiqhael ngaeteel zaeq hhaeq'ae. 3 Ngeelfeiq, kilsaq onglci'ae aelbol tyu qiq bol e aelsiq mael, Momil gee gol: 'Noteel maeq hhae zaeq'ae, so eiq maq hha so'ae. Noteel zaeq kaollaoq, noteel hhae sil hhae.'" 4 Oqhol haeqmiyaeq'ae gee biq: "Noteel aeqdilmyel maeq sil laelkiq'ae; 5 Momil laoq noteel aelsiq tyulmael zaeq kaollaoq, noteel e ma'ne mael hhal ta'ae, kaol Momil laoqmyel meeqdyul loq laelkiq'ae lye loq kaol'ae." 6 Haeqmiyaeq tyutaeq aelbol tyu qiq bol e aelsiq mael zaeqzael geiqzaq meeq'ae, fu goq lal aeqmyel, mulgoq lal aeqmyel, kaol cholyaeq'ae bi geel laelkiq'ae lye mol hhei biq, tyulkaol, aelsiq mael chega hheikaol zaeq vae. Haeqmiyaeq tyutaeq eiq yoqhhaeq nyegael qiqgael baelzhol e haqyo'ae heilmoq hhei biq, kaol yoqhhaeq eiq zaeq vae. 7 Yoqhhae niq nulhhaeq e ma'ne mael hhal ta lal vae, aeqyoteel nyelguqlye ngeel yae lye loq li biq. Tyulkaol, siqpyu'laq'oq e alpaq maellye aeqyoteel'ae pimae guqduzaq hhei.8 Kiqsulkiqxeiq e zaeqxil bo fu, tyutaeq kaol yoqhhaeq e haeqmiq laoq Momil Yeheqhuaq kilsaq onglci vae deel e yotyel gaeq hhei biq laol, haelpeeq vae Momil Yeheqhuaq yaol hoqhhaqzaq gil'ae. 9 Momil Yeheqhuaq tyutaeq'ae gul biq, kaol yoqhhaeq'ae gee biq: "Nol haeqvae zhol lilmaeq?" 10 Yoqhhaeq geehoq biq: "Ngael kilsaq vae noq e yotyel mael gaeq hhei laeq laol gu laq hhae. Ngaeq'ae nyelguqlye hhae, tyulkaol, hoqhhaq lil." 11 Momil Yeheqhuaq gee: "Noq'ae nyelguqlye hhae lye aeqsul lye geegaeq hhei laeq hhaemaeq? Ngael noq'ae maeq hhae zaeq'ae lye moqheilheil biq e aelbol tyu qiq bol e aelsiq mael, nol zaeq lilmaeq?" 12 Tyutaeq gee: "Noq lye ngaeq'ae biq hhei laq, ngaeq nyegael qiqgael baelzhol e haeqmiyaeq lye aelbol taq e aelsiq mael heil hhei laeq hhae, kaol ngael zaeq aeqwae." 13 Momil Yeheqhuaq haeqmiyaeq'ae gee biq: "Nol aeqcheekaol xilnye silqinq zongl'ae lilmaeq?" Haeqmiyaeq gee: "Oqhol yulmael ngaeq'ae zaqgiqgiq laq, kaol ngael zaeq lil."
Momil golsiq za e cholyaeqhael'ae chenqfaq biq vae
14 Momil Yeheqhuaq oqhol mael'ae gee biq:
"Nol silqinq xilmael zongl gae'lye doqchiq hhae pi ngeelvae,
gilzuqmyel laoqhaol jyeqyaeqhael kaol byeldongl jyeqyaeqhael,
taq'ae hhael jyeq ngeelvae.
Nol oqma maellye hhae zhi ngeelvae,
qiqyil myel milcaeq e milxul hhae zaeq ngeelvae.
15 Ngael laoq nol kaol haeqmiyaeq tyutaeq yaol
qiqhhaeq qiqhhaeq'ae chouqrenq bi peqyil maoq,
noq e houldailhael kaol yoqhhaeq e houldailhael eiq,
qiqhhaeq qiqhhaeq'ae chouqrenq bi peqyil maoq.
Yoqhhaeq e houldail laoq noq e vuqduq mael'ae diq lael,
nol yoqhhaeq e aeqkeel zaqneq mael'ae koq biq."
16 Momil haeqmiyaeq'ae gee biq:
"Ngael noq yaol yaeqguqpi fu zhee bi kyuq maoq,
nol zhee nael gae'lael aeqmyel yaeqguq hhae bo ngeelvae;
nol noq e haqyo'ae haeqfu eiq nyuq biq,
ngeelfeiq, nol laoq haqyo haelmillye gee laol,
haelmillye hhae zongl ngeelvae."
17 Momil Yaldang'ae gee biq:
"Nol noq e haeqmiq e saeziq mael naelhaeq vae,
ngael maeq hhae zaeq'ae lye moqheilheil e
aelbol tyu qiq bol taq e aelsiq mael zaeq vae.
Tyulkaol, milcaeq mael noq gae'lye doqchiq hhae pi ngeelvae;
nol qiqyil myel duqhee'lye mulzaq kaolmaoqlaol,
aeqhael ae'lye zaeqzael maeq hhae heilzaeq laeq'ae.
18 Milcaeq laoq noq'ae aelgong aelbol,
kaol pongqdeiq bi dyeq du'lal,
kaol nol eiq haeldye e oqbye oqnyul zaeq.
19 Nol laoq milcaeq milxul ae'lye lael hhae,
kaol milcaeq milxul vae hha hoqyil ngeelvae.
Tyulkaol, nol milcaeq vae do hoqyil fu keellye,
keeqpul naeqbyel zu'lye mul kaolmaoqlaol,
zaelsiq maeq hhae zaeq'ae."
Yoqhhaeteel yaol Yidianl Kilsaq ae'lye lyeqdu biq
20 Haeqmiyaeq tyutaeq laoq haelzhol cholyaeqhael e aeqmae'ae. Tyulkaol, Yaldang lye aeqyoq e haeqmiq'ae Xalwaq lye cholmilmil hhei biq. 21 Momil Yeheqhuaq lye Yaldang kaol aeqyoq e haeqmiq'ae saeqgeel aelhongq zongl hhei biq, kaol yoqhhaeteel'ae bi dumda hhei.
22 Momil Yeheqhuaq gee: "Xitaeq aedeeteel onglci e qiq hhaeq laoqmyel meeq kaol dyul mael loq vae; aeqgael yoqhhaeq aqlaq tyuqdu hheikaol, aeqyil aelbol taq e aelsiq mael chezaq hheikaol haeqfu eiq dyeqdeel maeqhe." 23 Yilkaefu, Momil lye milcaeq milxul maellye cholyaeq zongldu hhei hhae, ngeelfeiq, yaeqmeel laoq Momil Yeheqhuaq lye yoqhhaeq yaol Yidianl Kilsaq ae'lye lyeqdu biq maoqlye hhae, kaol yoqhhaeq yaol aeqhael bi mulzaeq yil. 24 Tyulkaol, Momil lye Yaldang yaol lyeqdu biq, zihhe gae'lael aeqmyel aeqzaeq doq e niqboqmyel ta e maejyel baq hhei e ji'lulboq yaol, Yidianl Kilsaq e neeldu aelheiq boq'ae, aeqyil aelbol dyeq myel'ae yil e gaelmae vae fu'qye deelhhei lye moqheilheil du hhei.