Yoqguil zongl
37
Biqsa'lyel zaoljaq aelbol maellye bongqke qiq mal zongldu hhei, maolduboq qiqhael qiqqyel (110) gongfen, heeqduboq koqqyel koq gongfen, gaoboq koqqyel koq gongfen'ae, 2 Onglci nildu myel qiqgiq maq keq e pulsheel bao da hhei, myeqzaeq yuqboq'ae myel pulsheel huabian zonglda hhei. 3 Yoqhhaeq lye pulsheel nyeqnaeq yuq mael xyedu hhei, kaol bongqke aeqkeel yuq mael taq'ae zonglda hhei; xiboq'ae nyeqnaeq niq mal, yulboq'ae nyeqnaeq niq mal zonglda hhei. 4 Yoqhhaeq zaoljaq aelbol maellye haeqdul niq mal zongl hhei, kaol pulsheel bao da hhei. 5 Kaol haeqdul mael bongqke dongqpyeq e nyeqnaeq mael'ae shiq do hhei, xilnye laol, bongqke mael baq sael wae. 6 Yoqhhaeq qiqgiq maq keq e pulsheel maellye bongqke piqkaeq qiq mal zongldu hhei, maolduboq qiqhael qiqqyel (110) gongfen, heeqduboq koqqyel koq gongfen'ae. 7 Yoqhhaeq lye pulsheel maellye ji'lulboq niq mal zongldu hhei, kaol ji'lulboq mael bongqke piqkaeq e niqboq ae'lye diq du hhei. 8 Xiboq ae'lye ji'lulboq qiq mal diq du hhei, yulboq ae'lye ji'lulboq qiq mal diq du hhei; kaol bongqke piqkaeq e niqboq ae'lye ji'lulboq niq mal diq du hhei. 9 Ji'lulboq niq mal e aeldongl mael aqtaqboq'ae diqpye da hhei, kaol aeldongl maellye bongqke piqkaeq mael congqkaeq hhei, kaol xi qiq mal e maduq mael yul qiq mal maduq boq'ae polyil aeqmyel hhae; ji'lulboq e maduq mael laoq bongqke e piqkaeq vae polyil hhae.Zaelheel baqda e zaelzhee zongl
10 Yoqhhaeq zaoljaq aelbol maellye zaelheel baqda e zaelzhee qiq mal zongldu hhei, kaol maolduboq heiqqyel heiq gongfen, heeqduboq yuqqyel yuq gongfen, gaoboq koqqyel koq gongfen'ae. 11 Zaelheel baqda e zaelzhee mael'ae qiqgiq maq keq e pulsheel bao da hhei, myeqzaeq yuq boq'ae pulsheel huabian zonglda hhei. 12 Zaelheel baqda e zaelzhee myeqzaeq yuq boq'ae, laqho qiq ho heeheeq dyul myeqzaeq zonglda hhei, myeqzaeq dongqpyeq vae pulsheel huabian zonglda hhei. 13 Yoqhhaeq lye pulsheel nyeqnaeq yuq mael xyedu hhei, nyeqnaeq mael laoq zaelzhee aeqkeel yuqboq e geqlo'ae zonglda hhei. 14 Nyeqnaeq mael laoq myeqzaeq'ae niqyil aeqmyel hhae, haeqdul mael nyeqnaeq onglci'ae shiq do hhei'laol zaelheel baqda e zaelzhee mael baq sael wae. 15 Yoqhhaeq zaoljaq aelbol maellye haeqdul niq kongq zongldu hhei, kaol pulsheel bao da hhei, kaol zaelheel baqda e zaelzhee mael baq maoqlye hhae. 16 Yoqhhaeq qiqgiq maq keq e pulsheel maellye zaelheel baqda e zaelzhee taq e panqpan, panqpan panyaeq kaol Zilheel e beiziq kaol onglhhael zongldu hhei vae.
Denjal zongl
17 Yoqhhaeq qiqgiq maq keq e pulsheel maellye denjal qiq mal diq du hhei. Denjal e diqpanq, aelkongq, beiziq, yicuq alpaq, alyi yipaq, gilzuqmyel denjal nyegael qiqgael diqcaq hhei. 18 Denjal niqboq'ae laoq allaq koq mael du'lal: Xiboq'ae suq mael, yulboq'ae suq mael. 19 Xiboq e allaq mael'ae beiziq suq mael za, geilci alyi laoqmyel hhae, kaol yicuq alpaq, alyi yipaq za hhae; Yulboq e allaq mael'ae beiziq suq mael za, geilci alyi laoqmyel hhae, kaol yicuq alpaq, alyi yipaq za hhae. Denjal ae'lye du'lal e allaq koq mael laoq gilzuqmyel xilnye hhae. 20 Denjal mael'ae beiziq yuq mael za'ae, kaol geilci alyi laoqmyel hhae, kaol yicuq alpaq, alyi yipaq za hhae. 21 Denjal e dilyiq duil allaq holhhaq'ae laoq yicuq alpaq za hhae, denjal dil'el duil allaq holhhaq'ae laoq yicuq alpaq za hhae, denjal dilsan duil allaq holhhaq laoq yicuq alpaq za hhae; denjal ae'lye du'lal e allaq koq mael gilzuqmyel xilnye hhae. 22 Yicuq alpaq kaol allaq gilzuqmyel denjal mael nyegael qiqgael zonglmaoq hhei, xihael gilzuqmyel pulsheel qiq de maellye diq du hhei hhae. 23 Yoqhhaeq qiqgiq maq keq e pulsheel maellye denjal e aeqdael doqhoq siq mal, kaol denxin no e jyeqdael kaol denjal e panqpan zongldu hhei. 24 Yoqhhaeq yil ta'lianqdeq e qiqgiq maq keq e pulsheel maellye denjal kaol denjal'ae mul e moqgoqhael zongldu hhei.
Xiangtanq mael zongl
25 Yoqhhaeq zaoljaq aelbol maellye xiangtanq qiq mal zongldu hhei, maolduboq yuqqyel ngaeq gongfen, heeqduboq yuqqyel ngaeq gongfen, xiangtanq xilmael laoq yuqboq myel qiqsheel'ae, gaoboq heiqqyel heiq gongfen. Xiangtanq e yuqli yuqkyul yuq mael kaol xiangtanq mael qiqgael zonglmaoq deelhhei. 26 Yoqhhaeq lye xiangtanq e aqtaqboq, xiangtanq e dongqpyeq dongqjyel, kaol xiangtanq e yuqli yuqkyul yuq mael'ae qiqgiq maq keq e pulsheel maellye bao da hhei biq; xiangtanq e dongqpyeq dongqjyel e myeqzaeq vae pulsheel e huabian zonglda hhei. 27 Yoqhhaeq xiangtanq e xiboq yulboq e pulsheel e huabian holhhaq'ae, pulsheel nyeqnaeq niq mal zongl hhei, xilnye zongl mael laoq, haeqdul mael shiq do hheikaol xiangtanq mael baq maoqlye hhae. 28 Yoqhhaeq zaoljaq aelbol maellye haeqdul zongl hhei, kaol pulsheel bao da hhei.
Senljyeq gaoyouq kaol xiang mael zongl
29 Yoqhhaeq xiang'liaol heilkeq e loqho maellye, senljyeq gaoyouq, kaol zhee nulsael lael aeqmyel e qiqgiq maq keq xiang zongldu hhei.