Xiangtanq
30
"Nol zaoljaq aelbol maellye xiangtanq qiq mal zongldu hhei maoqhhae, 2 Maolduboq yuqqyel ngaeq gongfen, heeqduboq yuqqyel ngaeq gongfen, xiangtanq xilmael laoq, yuqboq myel qiqsheel maol hhae, gaoboq hhaoqqyel gongfen. Xiangtanq e yuqli yuqkyul yuq mael kaol xiangtanq mael qiqgael zonglmaoq deelhhei. 3 Xiangtanq e aqtaqboq, dongqpyeq dongqjyel, kaol xiangtanq e yuqli yuqkyul yuq mael'ae qiqgiq maq keq e pulsheel maellye bao da hhei biq maoqhhae; xiangtanq e dongqpyeq dongqjyel e myeqzaeq vae pulsheel e huabian zonglda hhei maoqhhae. 4 Xiangtanq e xiboq yulboq e pulsheel e huabian holhhaq'ae, pulsheel nyeqnaeq niq mal zongl hhei maoqhhae, xilnye zongl mael laoq haeqdul mael shiq do hhei, kaol xiangtanq mael baq maoqlye hhae. 5 Nol zaoljaq aelbol maellye haeqdul zongl hhei, kaol pulsheel bao da hhei maoqhhae. 6 Xiangtanq mael gailminl bongqke e geqchiq haeqpael nildu'ae, gailminl bongqke taq e piqkaeq boq'ae polyil aeqmyel vae baqdeel hhei, tyuqvae laoq, ngael kaol nol maduqmol myel vae ngeelvae. 7 Yallunq laoq xiangtanq taq'ae zhee nulsael lael aeqmyel e xiang pe maoqhhae, zongldu hhei e xiang pe maoqhhae, haeqfu qiq shoq aeqdael doqhoq mael pashoq fu, yoqhhaeq xiang xilmael pe maoqhhae. 8 Kiqsulkiqxeiq'ae aeqdael doqhoq keeqdoq fu, Yallunq eiq xiang xilmael pe maoqhhae. Xilmael laoq noteel hae qiqyil e houldailhael eiq Yeheqhuaq e yiqsi'ae duqlye pe maoq e xiang'ae. 9 Xiangtanq xilmael taq'ae, Momil maeq bi pe e xiang mael maq hha pe'ae, Pebyel Zaelheel, Zaelsiq Zaelheel kaol Zilheel maeq hhae heel'ae. 10 Yallunq laoq qiq hoq qiq pu xiangtanq e yuqli yuqkyul yuq mael'ae golsiq diqshiq e gui'liq zongl biq maoqhhae. Yoqhhaeq qiq hoq qiq pu Golsiq Zaelheel e siq maellye xiangtanq mael'ae golsiq diqshiq e gui'liq zongl biq maoqhhae, hae qiqyil e houldailhael eiq xilmael zongl maoqhhae. Xiangtanq xilmael laoq Yeheqhuaq e yiqsi'ae laoq hhael senljyeq jyeqli hhae."Aeqyil suq duhoq e liqvuq
11 Yeheqhuaq Moxi'ae moqheilheil biq, gee: 12 "Nol Yiqsellyel cholyaeqhael haeldyul zoq maeq lye cuda yil, suqda fu, suqda yo e cholyaeqhael haetaeq eiq, yoqhhaeq aeqyil suq duhoq e hhaeqpyuq mael Yeheqhuaq'ae heil biq maoqhhae, aeqgael suqda fu zai'nanl mael yoqhhaeteel'ae yo'li biq maeqhe. 13 Suqda yo e haetaeq eiq senlsoq e shelkellel maellye, qiq pa shelkellel heil da hhei, yiq shelkellel laoq niqqyel jilla'ae, xi qiq pa shelkellel laoq Yeheqhuaq'ae heel biq e liqvuq'ae. 14 Hael suqda yo e cholyaeq, niqqyel hoq ongqjyeq hael laoq, liqvuq xilmael Yeheqhuaq'ae heel biq maoqhhae. 15 Zacongl hael ongljyeq maeq heil kael'ae, saeqyaeqhael eiq maeq heil lo du hhei myel maeq hhae zongl'ae, haetaeq eiq Yeheqhuaq'ae qiq pa shelkellel heel biq, kaol noteel e aeqyil suq duhoq e hhaeqpyuq geiq maoqhhae. 16 Nol Yiqsellyel cholyaeqhael ae'lye golsiq diqshiq e pulziq xihael heil laeq maoqhhae, dyuqbaq xihael laoq Momil'ae molli e haeqpael haelcul'ae mulhhael mul fu mul maoqhhae. Xilmael laoq Yeheqhuaq e yiqsi ae'lye Yiqsellyel cholyaeqhael'ae nyuqdeel biq, kaol noteel e aeqyil suq duhoq e hhaeqpyuq geiq maoqhhae."
Geeqsheel e penq
17 Yeheqhuaq Moxi'ae moqheilheil biq, gee: 18 "Nol geeqsheel maellye aeqkeel aqlaq ciq fu mul e penq kaol penq e diqpanq zongldu hhei maoqhhae, xilnye laol, aeqkeel aqlaq ciq fu hha mul wae. Penq mael Momil'ae molli e haeqpael haelcul kaol jiltanq e kaeqlaeq vae baqdeel hhei maoqhhae, kaol penq mael'ae eelcuq kuq do hhei. 19 Yallunq kaol yoqhhaeq e yaqyohael laoq penq xilmael lye aeqkeel aqlaq ciq maoqhhae. 20 Yoqhhaeteel Momil'ae molli e haeqpael haelcul vae do'li, paelsilmyel jiltanq vae deel niqli kaol fuqsil li, kaol Aeqzaeq Pe Zaelheel mael Yeheqhuaq'ae heel biq fu, eelcuq maellye aeqkeel aqlaq ciq maoqhhae, xilnye maeq zongl laol, aeqgael hhae sil maeqhe; 21 Yoqhhaeteel aeqkeel aqlaq ciq maoqhhae, xilnye maeq zongl laol, aeqgael hhae sil maeqhe. Xilmael laoq Yallunq kaol yoqhhaeq e houldailhael haeqfu qiqyil'ae keellye haeqfu eiq zadeel e tiaoqlil mael'ae."
Senljyeq gaoyouq
22 Yeheqhuaq Moxi'ae moqheilheil biq: 23 "Nol hhaelmeeq meeqli e xiang'liaol heil hhei, ngaeqhael (500) shelkellel e yulni yilkiq e molyaol, niqhael ngaeqqyel (250) e nulsael e laqpiq, kaol niqhael ngaeqqyel (250) e nulsael e changpuq, 24 Kaol ngaeqhael (500) e guilpiq, gilzuqmyel senlsoq e shelkellel maellye sa hhei; kaol zhoqcae cil yuq gil heil hhei, 25 Kaol xiang zongl e loqho maellye senljyeq gaoyouq zongldu hhei'laol, xilmael laoq senljyeq gaoyouq peqlal vae. 26 Gaoyouq xilmael lye Momil'ae molli e haeqpael haelcul'ae, kaol gailminl bongqke mael'ae soda hhei maoqhhae, 27 Kaol zaelheel baqda e zaelzhee kaol zaelheel baqda e zaelzhee taq'ae halza e moqgoqhael, denjal kaol denjal e moqgoqhael, kaol xiangtanq, 28 Pebyel Zaelheel jiltanq kaol jiltanq'ae mul e halza moqgoqhael, aeqkeel aqlaq ciq fu mul e penq kaol penq e diqpanq mael'ae soda hhei biq maoqhhae. 29 Nol xihael zonglqyel du hheikaol senljyeq wae lye geiq maoqhhae, kaol hhael senljyeq jyeqli wae lye bi peqlal; kaol moqgoq xihael'ae hal so yo hael laoq gilzuqmyel senljyeq wae lye peqlal vae. 30 Yallunq kaol yoqhhaeq e yaqyohael'ae gaoyouq xyecheeq da hhei biq maoqhhae, kaol yoqhhaeteel yaol zonglqyel du hheikaol senljyeq wae lye bi geiq, kaol ngaeq'ae fuqsil laeq e jilsi bi geiq. 31 Nol Yiqsellyel cholyaeqhael'ae moqheilheil biq maoqhhae, gee: 'Noteel hae qiqyil e houldailhael eiq gaoyouq xilmael laoq, senljyeq gaoyouq'ae lye geiq maoqhhae. 32 Gaoyouq xilmael ochoq e aeqhhaol'ae maq hha xyecheeq da biq'ae, heilkeq e loqho maellye qiqsheel e gaoyouq maeq hhae zongldu zaq'ae. Gaoyouq xilmael laoq senljyeq hhae, kaol noteel xilmael laoq senljyeq wae lye geiq maoqhhae. 33 Xilmael laoqmyel e gaoyouq zongldu zaq, paelsilmyel gaoyouq xilmael ochoq e aeqhhaol'ae xyecheeq da hhei biq e cholyaeq yaol laoq, cholyaeqhael onglci ae'lye jyeqdael lye noga biq laoqmyel noga biq maoqhhae.'"
Xiang haelmillye zongl lye gee mael
34 Yeheqhuaq Moxi'ae moqheilheil biq: "Nol xiang'liaol heil laeq maoqhhae, xiang'liaol hael laoq, natafuq, shixiqlyel, xiqlilbiqnaq ngeelvae, kaol nulsael lael aeqmyelhael kaol qiqgiq maq keq e ruqxiang heil do hhei, hae qiqsheel mael eiq qiqsheel naeq maoqhhae. 35 Nol xihael'ae caqdeq heil do hhei, kaol xiang'liaol heilkeq e loqho maellye, qiqgiq maq keq myel e senljyeq e xiang mael zongldu hhei. 36 Nulsael e xilmael teel heil hhei, kaol nuxullye tongqnu hhei, kaol Momil'ae molli e haeqpael haelcul onglci e gailminl bongqke e yiqsi'ae heildeel hhei, tyuqvae laoq, ngael kaol nol maduqmol myel vae ngeelvae. Noteel laoq xiang xilmael hhael senljyeq jyeqli wae lye kei maoqhhae. 37 Noteel heilkeq e loqho xilmael lye aeqyoyoq'ae nulsael e xilmael maeq hhae zongldu zaq'ae; kaol nulsael e xilmael senljyeq wae lye geiq kaol Yeheqhuaq'ae heil biq maoqhhae. 38 Nulsael e xilmael'ae shi'nul maoqlyekaol, heilkeq e loqho maellye qiqsheel e nulsael mael zongldu zaq e cholyaeq xitaeq yaol cholyaeqhael onglci ae'lye jyeqdael lye noga biq laoqmyel noga biq maoqhhae."