Jilsi'ae senljyeq mulhhael mael bi mul maoqlye zongl biq mael
Lil 8:1-36
29
"Noq yoqhhaeteel yaol zonglqyel du hheikaol senljyeq wae lye bi geiq, kaol ngaeq'ae fuqsil laeq e jilsi bi geiq fu zongl maoq mael xilnye hhae: Lalbu buyaeq qiq keel, canqjiq maeqngeel e aeqyol yolpaeq niq yaeq cheellaeq, 2 Kaol paofenq maqzoq e aqba, cil nuqkeq hhei e paofenq maqzoq e aqba, kaol cil soda hhei e baeqhei'lye paofenq maqzoq e aqba heil laeq; aqba xihael laoq nuxullye meqziq hhaeqxul maellye zongldu hhei maoqhhae. 3 Aqba xihael laoq keelcuq qiq mal'ae heil do hhei, kaol keelcuq maellye baq laq maoqhhae, aeqnuq nuqpaeq kaol aeqyol yolpaeq niq yaeq mael cheellaeq. 4 Yallunq kaol yoqhhaeq e yaqyohael yaol Momil'ae molli e haeqpael haelcul e oheiq'ae sheeqlaeq, kaol eelcuq maellye yoqhhaeteel'ae bi ciq maoqhhae. 5 Fulchiq aelhongq heil laeq, kaol Yallunq'ae onglci'ae dum poljye, yiqfuqdeq e nildu'ae dum poljye kaol yiqfuqdeq mael dumda hhei biq, kaol leelpaq mael yol doqda hhei, kaol yiqfuqdeq e zhee meeq e oqlongl mael paqda hhei biq. 6 Vuqcongq mael yoqhhaeq e vuqduq taq'ae congq da hhei biq, kaol senljyeq paiqpai mael vuqcongq taq'ae kaltoq da hhei biq, 7 Gaoyouq mael yoqhhaeq e vuqduq'ae xyecheeq da hhei biq, kaol yoqhhaeq yaol jilsi bi geiq. 8 Yoqhhaeq e yaqyohael yaol sheeqlaeq, kaol yoqhhaeteel'ae onglci'ae dum e poljye mael dumda hhei biq maoqhhae. 9 Yallunq kaol yoqhhaeq e yaqyo'ae oqlongl paqda hhei biq, vuqto to da hhei biq, kaol yoqhhaeteel laoq haeqfu keellye zadeel e tiaoqlil laoqmyel jilsi e zaeqhhael mael zaeq maoqhhae. Senljyeq mulhhael mael Yallunq kaol yoqhhaeq e yaqyohael'ae biq hhei biq maoqhhae.10 "Nol aeqnuq nuqpaeq mael Momil'ae molli e haeqpael haelcul laefuqboq'ae cheellaeq, Yallunq kaol yoqhhaeq e yaqyohael aqlaq mael aeqnuq nuqpaeq e vuqduq mael'ae baqcheeq da hhei maoqhhae. 11 Nol Yeheqhuaq e yiqsi'ae, Momil'ae molli e haeqpael haelcul e oheiq ae'lye aeqnuq nuqpaeq xi qiq keel xyeq maoqhhae. 12 Kaol aeqnuq nuqpaeq e siq mael teel heil hhei maoqhhae, kaol laqnyul maellye jiltanq e yuqli yuqkyul yuq boq'ae soda hhei biq, baeqjyelboq e siq mael laoq gilzuqmyel jiltanq e dongqto'ae xyecheeq da hhei. 13 Kaol honglhongl longllongl mael'ae maoqtyeq deelhhei e cil mael, saeqchee mael'ae maoqtyeq deelhhei e cil mael, yaoziq niq mal kaol yaoziq mael'ae maoqtyeq deelhhei e cil mael, gilzuqmyel jiltanq taq'ae pe da hhei. 14 Ngeelfeiq, aeqnuq nuqpaeq e saeqzil, saeqgeel, aeqkiqhael gilzuqmyel haqhhael diqkaeq hhei e milcaeq nildu vae aeqzaeq maellye pe maoqhhae; aeqnuq xi qiq keel laoq Golsiq Zaelheel'ae.
15 "Nol aeqyol yolpaeq qiq yaeq cheellaeq, Yallunq kaol yoqhhaeq e yaqyohael aqlaq mael aqciq xi qiq yaeq e vuqduq taq'ae baqcheeq da hhei maoqhhae. 16 Nol aqciq xi qiq yaeq xyeq hhei, kaol siq mael jiltanq e dongqpyeq dongqjyel'ae beiqxeiq deelhhei maoqhhae. 17 Aqciq ciqsaeq mael qiq de qiq de lye yeq du hhei, honglhongl longllongl kaol aeqpaeq mael ciqshol hhei, kaol saeqzil saeqdehael kaol vuqduq mael nyegael qiqgael heildeel hhei. 18 Aqciq mael qiq yaeq myel jiltanq taq'ae pe da hhei maoqhhae. Xilmael laoq Yeheqhuaq'ae heel biq e Pebyel Zaelheel'ae, Yeheqhuaq'ae heel biq e nulsael e Aeqzaeq Pe Zaelheel'ae."
19 "Nol baeqjyelboq e aeqyol yolpaeq tyu qiq yaeq cheellaeq, kaol Yallunq kaol yoqhhaeq e yaqyohael e aqlaq mael aqciq xi qiq yaeq e vuqduq taq'ae baqcheeq da hhei biq maoqhhae. 20 Nol aqciq xi qiq yaeq xyeq hhei, kaol siq teel heil hheikaol Yallunq e laqsseqboq e naeqbol naeqcaeq'ae, kaol yoqhhaeq e yaqyohael e laqsseqboq e naeqbol naeqcaeq'ae soda hhei biq, kaol yoqhhaeteel e laqsseq e laqma kaol aeqkeel laqsseq e paeqmae mael'ae yol soda hhei biq, baeqjyelboq e siq mael laoq jiltanq e dongqpyeq dongqjyel vae beiqxeiq deelhhei biq. 21 Nol laoq gaoyouq kaol jiltanq taq e siq mael teel heil hhei, kaol Yallunq'ae kaol yoqhhaeq e aelhongq mael'ae, kaol yoqhhaeq e yaqyohael'ae kaol yoqhhaeteel e aelhongq mael'ae aqlaq maellye be xeiq da hhei biq maoqhhae; Yallunq kaol yoqhhaeq e aelhongq mael, kaol yoqhhaeq e yaqyohael kaol yoqhhaeteel e aelhongq mael senljyeq wae lye peqlal vae.
22 "Nol aqciq xi qiq yaeq e cil mael, culdyeqlye dongqmiq, kaol honglhongl longllongl mael'ae maoqtyeq deelhhei e cil, saeqchee mael'ae maoqtyeq deelhhei e cil, yaoziq niq mal, kaol yaoziq mael'ae maoqtyeq deelhhei e cil kaol laqsseqboq e aeqpaeq mael heil hhei, xilmael laoq yoqhhaeteel senljyeq mulhhael mael mul maoqlye fu, heelda hhei e aeqyol yolpaeq'ae; 23 Yeheqhuaq e yiqsi ae'lye paofenq maqzoq e aqba heil do e keelcuq tyulmael onglci ae'lye, aqba qiq ba, cil su e qiq ba kaol baeqhei'lye aqba qiq ba heildu hhei, 24 Kaol xihael gilzuqmyel Yallunq e aqlaq kaol yoqhhaeq e yaqyohael e aqlaq taq'ae heil da hhei biq, kaol Yeheqhuaq e yiqsi'ae ssu'ni, kaol Ssu'ni Zaelheel geiq. 25 Aeqnaol, nol yoqhhaeteel e aqlaq ae'lye heil pol hhei maoqhhae, kaol jiltanq taq e Pebyel Zaelheel taq'ae heil da hheikaol qiqgael pe hhei, kaol Yeheqhuaq e yiqsi'ae nulsael lael aeqmyel e Pebyel Zaelheel geiq; xilmael laoq Yeheqhuaq'ae heel biq e Aeqzaeq Pe Zaelheel'ae.
26 "Nol laoq Yallunq yaol senljyeq mulhhael mael bi mul maoqlye zongl fu, heelda hhei e aeqyol yolpaeq e neeto mael heil laeq maoqhhae, kaol Yeheqhuaq e yiqsi'ae ssu'ni, kaol Ssu'ni Zaelheel geiq; xilmael laoq noq e ngeelvae. 27 Ssu'ni Zaelheel e neeto tyulmael kaol Baqqei Zaelheel e aeqpaeq mael'ae, xihael laoq, senljyeq mulhhael mael bi mul maoqlye zongl fu, aeqyol yolpaeq mael heelda fu, ssu'ni hhei mael, kaol baqqei hhei mael ngeelvae, kaol nol saeqzil xihael zonglqyel du hheikaol senljyeq wae lye geiq maoqhhae, Yallunq kaol yoqhhaeq e yaqyohael'ae heil biq. 28 Xilmael laoq Yallunq kaol yoqhhaeq e houldailhael Yiqsellyel cholyaeqhael onglci ae'lye hhamul mael'ae, kaol haeqfu keellye zadeel e tiaoqlil geiq maoqhhae, xilmael laoq Baqqei Zaelheel'ae, Yiqsellyel cholyaeq e Neesaelhhae Zaelheel onglci ae'lye heildu hhei hhae, kaol Yeheqhuaq'ae heel biq e Baqqei Zaelheel geiq kaol'ae.
29 "Yallunq e senljyeq aelhongq mael yoqhhaeq e houldailhael'ae chuanq gaeyil biq maoqhhae, kaol gaoyouq mael yoqhhaeteel'ae xyecheeq hhei biq, kaol senljyeq mulhhael mul da'li fu bi dum da hhei. 30 Yoqhhaeq e houldailhael laoq yoqhhaeq e jilsi zaeqhhael mael'ae zaeqpael da'li e cholyaeqhael haeqfu qiqzael Momil'ae molli e haeqpael haelcul vae do'li, kaol senlsoq vae fuqsil li fu, senljyeq aelhongq xilmael siq nao dum maoqhhae.
31 "Nol senljyeq mulhhael mael bi mul maoqlye zongl fu, heelda hhei e aeqyol yolpaeq mael baq hhei, kaol senljyeq myel vae lye aeqyol yolpaeq e saeqzil mael caqzaq maoqhhae. 32 Yallunq kaol yoqhhaeq e yaqyohael laoq Momil'ae molli e haeqpael haelcul e oheiq ae'lye aqciq xilmael e saeqzil, kaol keelcuq onglci e aqba mael zaeq maoqhhae. 33 Yoqhhaeteel laoq golsiq diqshiq e zaeqzael mael zaeq maoqhhae, xilnye laol, senljyeq mulhhael mael hha mul wae, kaol yoqhhaeteel yaol zonglqyel du hheikaol senljyeq wae lye bi geiq. Baeqjyelboq e cholyaeq maeq hhae zaeq'ae, xilmael laoq senljyeq zaeqzael kaol'ae. 34 Senljyeq mulhhael mael bi mul maoqlye zongl fu, heelda hhei e saeqzil kaol aqbahael, zadeel siq kaol mqshoq'ae taeq keel kaollaoq, zadeel siq hael laoq aeqzaeq maellye pe maoqhhae, maeq hhae zaeq vae, xilmael laoq senljyeq zaeqzael kaol'ae.
35 "Nol ngael moqheil hael heil laoqmyel, Yallunq kaol yoqhhaeq e yaqyohael'ae senljyeq mulhhael mael bi mul maoqlye zongl mael siq nao zongl maoqhhae. 36 Nol golsiq diqshiq maoqlyekaol, haeqfu qiq nao eiq aeqnuq nuqpaeq paeqyaeq qiq keel heelda hheikaol Golsiq Zaelheel geiq maoqhhae. Nol jiltanq mael'ae golsiq diqshiq e gui'liq zongl biq maoqhhae, kaol jiltanq mael bi senljyeq lal maoqhhae, kaol gaoyouq mael jiltanq mael'ae soda hhei biq, kaol jiltanq mael senljyeq wae lye bi peqlal. 37 Jiltanq mael'ae golsiq diqshiq e gui'liq siq nao zongl maoqhhae, kaol jiltanq mael hhael senljyeq jyeqli wae lye bi peqlal, kaol jiltanq mael hhael senljyeq jyeqli peqlal vae. Jiltanq mael'ae hal pa yo hael laoq gilzuqmyel senljyeq wae lye peqlal vae."
Haeqfu qiq nao eiq heel maoq e zaelheel mael
Minq 28:1-8
38 "Xilmael laoq nol jiltanq taq'ae heelda hhei maoq hael'ae: Haeqfu qiq nao eiq maqqyemyel qiq hoq e aeqyol yolyaeq niq yaeq heelda hhei; 39 Mqshoq'ae aeqyol yolyaeq qiq yaeq heelda hhei, kiqsulkiqxeiq'ae baeqjyelboq e aeqyol yolyaeq qiq yaeq heelda hhei. 40 Laefuq fuqli aeqyol yolyaeq qiq yaeq heelda fu, nuxullye meqziq hhaeqxul qiq gil kaol yaqdu hhei e zhoqcae cil yil sen mael nyegael qiqgael nyelkeq hhei, kaol Zilheel mael qiqgael bael heelda hhei maoqhhae. 41 Kiqsulkiqxeiq fu, nol baeqjyelboq e aeqyol yolyaeq tyu qiq yaeq heelda hhei fu laoq, mqshoq e Zaelsiq Zaelheel kaol qiqgael heelda hhei e Zilheel laoqmyel heelda hhei, Yeheqhuaq'ae heel biq nulsael e Aeqzaeq Pe Zaelheel geiq. 42 Xilmael laoq Yeheqhuaq e yiqsi'ae, kaol Momil'ae molli e haeqpael haelcul oheiq'ae, noteel hae qiqyil e houldailhael maqqyemyel heel e Pebyel Zaelheel geiq maoqhhae. Ngael tyuqvae lye noteel nyegael mol yi, kaol noq nyegael saeziq gee'naeq maoq. 43 Ngael tyuqvae lye Yiqsellyel cholyaeqhael nyegael mol yi, kaol Momil'ae molli e haeqpael haelcul mael laoq ngaeq e rongqyaol gae'lye senljyeq wae lye peqlal vae. 44 Ngael laoq Momil'ae molli e haeqpael haelcul kaol jiltanq mael zonglqyel du hheikaol senljyeq wae lye bi geiq maoq, Yallunq kaol yoqhhaeq e yaqyohael yaol eiq zonglqyel du hheikaol senljyeq wae lye bi geiq, kaol ngaeq'ae fuqsil laeq e jilsi bi geiq. 45 Ngael Yiqsellyel cholyaeqhael onglci'ae zhol maoq, kaol yoqhhaeteel e Momil geiq maoq. 46 Yoqhhaeteel laoq ngael yoqhhaeteel e Momil Yeheqhuaq, kaol yoqhhaeteel yaol Aijiq milcaeq ae'lye sheeq duyi, kaol yoqhhaeteel onglci'ae zhol hhae lye loq'ae. Ngael laoq yoqhhaeteel e Momil Yeheqhuaq lil."