Jilsi e senljyeq fulchiq aelhongq
28
Nol Yiqsellyel cholyaeqhael onglci ae'lye, noq e algo Yallunq kaol yoqhhaeq e yaqyo Naqdaq, Yalbiqhul, Yiqlilyalsaq kaol Yiqtamaq yaol hhaellaelmyel noq e saeqvae bi lael, kaol ngaeq'ae fuqsil laeq e jilsi bi geiq. 2 Nol laoq noq e algo Yallunq'ae senljyeq aelhongq guq biq maoqhhae, xilnye zongl mael laoq yoqhhaeq'ae rongqyaol kaol zhigaqlye mael bi za maoqlye hhae. 3 Neemae onglci'ae geel e cholyaeqhael'ae moqheilheil biq, geel e cholyaeqhael laoq, ngaeq lye geel e yohael maellye bong'lye bi za e cholyaeqhael ngeelvae, Yallunq'ae aelhongq zongl biq, kaol yoqhhaeq yaol zonglqyel du hheikaol senljyeq wae lye geiq, kaol ngaeq'ae fuqsil laeq e jilsi geiq. 4 Yoqhhaeteel guq maoq e aelhongq mael laoq xilnye hhae: Leelpaq, Yiqfuqdeq, nildu'ae dum e poljye, kaol hhaq du hhei e onglci'ae dum e poljye, vuqcongq kaol oqlongl zongldu hhei maoqhhae. Yoqhhaeteel noq e algo Yallunq kaol yoqhhaeq e yaqyohael'ae senljyeq aelhongq guq hhei biq maoqhhae, kaol yoqhhaeteel yaol jilsi bi geiq kaol ngaeq'ae bi fuqsil. 5 Pulsheel laoqmyel byuqkeel, honglsael byuqkeel, ziqseq byuqkeel, nyelna'na byuqkeel, kaol keeldaelnil e ziq e keelpongq xihael lye guq maoqhhae.Yiqfuqdeq
6 Yoqhhaeteel pulsheel laoqmyel byuqkeel, honglsael byuqkeel, ziqseq byuqkeel, nyelna'na byuqkeel, kaol xu du hhei e keeldaelnil e ziq e keelpongq xihael lye, alyi guq e laqkiq e aqlaq mael lye Yiqfuqdeq zongldu hhei. 7 Yiqfuqdeq mael'ae baqtaq e yiqsi aeqnaol e haeqpael niq mal myel guqcaq hhei maoqhhae. 8 Yiqfuqdeq e zhee meeq e oqlongl mael laoq, yiqfuqdeq mael zongl laoqmyel qiqsheel zongl maoqhhae, kaol pulsheel laoqmyel byuqkeel, honglsael byuqkeel, ziqseq byuqkeel, nyelna'na byuqkeel, kaol xu du hhei e keeldaelnil e ziq e keelpongq xihael lye guq hhei maoqhhae, kaol yiqfuqdeq nyegael qiqgael guqmaoq hhei. 9 Nyelcullye maqnaoq niq siq heil hhei, kaol tyulmael taq'ae Yiqsellyel yaqyohael e cholmil mael keq da hhei maoqhhae: 10 Cholmil koq mael laoq baoqshiq qiq siq taq'ae za hhae, baeqjyelboq e cholmil koq mael laoq baeqjyelboq e baoqshiq qiq siq taq'ae za hhae, gilzuqmyel yoqhhaeteel e laefuq aeqnaol dyeqlal maellye hhae. 11 Zhang keq laoqmyel, baoqshiq keq e laqkiq e aqlaq mael lye, Yiqsellyel e yaqyohael e cholmil mael baoqshiq xi niq siq taq'ae keq da hhei, kaol baoqshiq mael pulsheel e duqhongq mael'ae deiqkoq do hhei. 12 Kaol baoqshiq xi niq siq yiqfuqdeq e baqtaq e baqtaq mael heeheeq e haeqpael niq mal'ae zonglda hhei maoqhhae, kaol Yiqsellyel cholyaeqhael'ae nyuqdeel biq e haqlo geiq. Yallunq laoq Yeheqhuaq e yiqsi'ae yoqhhaeteel e cholmil mael baqtaq niqboq'ae doqda hhei, kaol yoqhhaeteel'ae nyuqdeel biq mael geiq. 13 Pulsheel maellye duqhongq niq mal zongldu hhei maoqhhae, 14 Kaol qiqgiq maq keq e pulsheel maellye pulca niq ca diq du hhei, capyeqpyeq du hhei e alca laoqmyel dul hhae, kaol capyeqpyeq du hhei e pulsheel pulca mael duqhongq'ae niqkaq da hhei."
Leelpaq
15 "Nol yiqfuqdeq mael zongl laoqmyel, alyi guq e laqkiq e aqlaq mael lye panlduanl e leelpaq qiq mal zongl hhei maoqhhae, pulsheel laoqmyel byuqkeel, honglsael byuqkeel, ziqseq byuqkeel, nyelna'na byuqkeel, kaol xu du hhei e keeldaelnil e ziq e keelpongq xihael lye guq du hhei maoqhhae. 16 Leelpaq mael laoq yuqboq myel qiqsheel maolzae'lye ngeel maoqhhae, kaol palbye laoqmyel niq lo zongl hhei, maolduboq qiq tol'ae, heeqduboq eiq qiq tol'ae. 17 Leelpaq taq'ae baoqshiq sil paiq zonglda hhei: Dilyiq paiq'ae laoq nyelcullye baoqshiq, sheel'yeqlye e yil, nyelcullye yil'ae; 18 Dil'el paiq'ae laoq nyuljyeqlye baoqshiq, honglsael baoqshiq, jin'gangshiq; 19 Dilsan paiq'ae laoq ziqseq maqnaoq, bachi'lye maqnaoq, kaol ziqseq e shuiqjin; 20 Dilsil paiq'ae laoq shuiqcangyil, nyelcullye maqnaoq, nyuljyeqlye yil. Xihael laoq gilzuqmyel pulsheel e duqhongq'ae deiqkoq do hhei maoqhhae. 21 Baoqshiq xihael taq'ae zhang keq laoqmyel Yiqsellyel yaqyo e qyelniq hhaeq e cholmil mael za maoqhhae, hae qiq siq vae eiq aeqyoyoq e cholmil za'ae, xilmael laoq, qyelniq zhipail'ae dailbiaoq hhae. 22 Kaol leelpaq mael'ae qiqgiq maq keq e pulsheel maellye pulca diq du hhei biq maoqhhae, capyeqpyeq du hhei e alca laoqmyel bi dul maoqhhae. 23 Leelpaq mael'ae pulsheel e nyeqnaeq niq mal zongldu hhei biq maoqhhae, kaol nyeqnaeq xi niq mal laoq leelpaq e aqtaqboq e niqboq myeqzaeq'ae zonglda hhei. 24 Capyeqpyeq hhei e pulsheel e pulca tyu niq mal leelpaq niqboq myeqzaeq e nyeqnaeq mael'ae kaltoq hhei maoqhhae. 25 Pulca e baeqjyelboq niqboq laoq duqhongq niq mal'ae kaqdo hhei maoqhhae, kaol yiqfuqdeq yiqsi e baqtaq e baqtaq mael heeheeq e haeqpael mael'ae zonglda hhei. 26 Pulsheel e nyeqnaeq niq mal zongl hhei maoqhhae, kaol leelpaq e niqboq'ae, yiqfuqdeq e aq'oqboq e niqboq e myeqzaeq'ae zonglda hhei. 27 Kaol pulsheel e nyeqnaeq niq mal yol zongl hhei, kaol yiqfuqdeq yiqsi e baqtaq e baqtaq heeheeq e haeqpael niqboq e aq'oqboq'ae, guqcaq hhei e tyuqvae niqli aeqmyel vae, yiqfuqdeq e zhee meeq e oqlongl aqtaqboq'ae zonglda hhei. 28 Honglsael e alca maellye leelpaq e nyeqnaeq kaol yiqfuqdeq e nyeqnaeq mael kaltoq hhei, kaol leelpaq mael yiqfuqdeq e zhee meeq e oqlongl mael'ae kaltoq hhei maoqhhae, xilnye laol, maeq gaepyel yilkiq wae. 29 Yallunq senlsoq vae do'li fu, Yiqsellyel e yaqyohael e cholmil keq da hhei e panlduanl e leelpaq mael neeto oheiq'ae doqda hhei, kaol Yeheqhuaq e yiqsi'ae duqlye nyuqdeel biq mael geiq. 30 Wu'linq kaol tuqminq mael panlduanl e leelpaq onglci'ae heil do hhei maoqhhae; Yallunq Yeheqhuaq e yiqsi'ae do'li fu, neeto oheiq'ae doqda hhei maoqhhae. Xilnye laol, Yallunq Yeheqhuaq e yiqsi'ae Yiqsellyel cholyaeq e panlduanl e leelpaq mael duqlye neeto oheiq'ae doqda hhei maoqhhae."
Jilsi e baeqjyelboq e senljyeq fulchiq aelhongq
31 "Nol yiqfuqdeq e nildu'ae dum poljye zongl hhei, yanqseq mael laoq qiq ko myel honglsael mul maoqhhae. 32 Poljye e aqtaqboq onglci'ae laoq longl'ee qiq mal taeq du hhei maoqhhae, longl'ee e myeqzaeq laoq daqzhangldiq fu dum e aelhongq e myeqzaeq laoqmyel hhaq du hhei maoqhhae, aeqgael gazi hhei maeqhe. 33 Poljye e hongqdongq hongqjyel'ae laoq honglsael byuqkeel, ziqseq byuqkeel, nyelna'na byuqkeel xihael lye maelzong aelsiq zongldu hhei, kaol hongqdongq hongqjyel e maelzong aelsiq kaeqlaeq'ae laoq pulsheel shillyul zonglda hhei maoqhhae: 34 Pulsheel shillyul qiq mal, maelzong aelsiq qiq siq, pulsheel shillyul qiq mal, maelzong aelsiq qiq siq lye, poljye hongqdongq hongqjyel qiq mal myel zonglda hhei. 35 Yallunq heel li fu poljye xilmael dum maoqhhae. Yoqhhaeq senlsoq vae do'li kaol Yeheqhuaq e yiqsi'ae keelli, kaol duyi fu, poljye taq e shillyul e yotyel mael bi gaeq hhei'laol, yoqhhaeq maeq hhae sil wae.
36 "Nol qiqgiq maq keq e pulsheel maellye paiqpai qiq mal zongl hhei, zhang keq laoqmyel, tyulmael taq'ae 'senljyeq wae lye Yeheqhuaq'ae biq biq" lye keq da hhei'. 37 Honglsael e haeqpael paelca maellye paiqpai mael vuqcongq e yiqsi boq'ae kaltoq da hhei maoqhhae. 38 Paiqpai xilmael Yallunq e naeqdeel'ae doqda hhei maoqhhae, Yallunq laoq Yiqsellyel cholyaeqhael Momil'ae zaelheel heel biq fu zonglzhil e hhae bi chenqfaq e golsiq mael hhae pi hhae; Momil'ae heel biq e zaelheel xilmael laoq, Yiqsellyel cholyaeqhael e gilzuqmyel senljyeq liqvuqhael onglci'ae lye zonglqyel du hheikaol senljyeq wae lye geiq mael ngeelvae. Paiqpai xilmael laoq duqlye yoqhhaeq e naeqdeel taq'ae doqda deelhhei maoqhhae, xilnye laol, Yeheqhuaq yoqhhaeteel'ae hhaol gae'lael aeqmyel mul biq'ae. 39 Kaol keeldaelnil e ziq e keelpongq maellye onglci'ae dum e poljye hhaq du hhei maoqhhae, kaol keeldaelnil e ziq e keelpongq maellye vuqcongq zongl hhei, kaol alyi guq e laqkiq e aqlaq mael lye oqlongl zongldu hhei.
40 "Nol Yallunq e yaqyohael'ae onglci'ae dum e poljye, oqlongl, vuqto zongl biq maoqhhae, xilnye zongl mael laoq yoqhhaeteel'ae rongqyaol kaol zhigaqlye mael bi za maoqlye hhae. 41 Xihael laoq noq e algo Yallunq kaol yoqhhaeq e yaqyohael'ae bi dum, bi congq, kaol yoqhhaeteel'ae gaoyouq xyecheeq hhei biq, kaol senljyeq mulhhael bi mul, kaol yoqhhaeteel yaol zonglqyel du hheikaol senljyeq wae lye bi geiq, kaol ngaeq'ae fuqsil laeq e jilsi bi geiq maoqhhae. 42 Keeldaelnil e ziq e haeqpael maellye yoqhhaeteel'ae haeqchiq guq hhei biq, kaol aq'oqboq'ae bi dumkaeqzaeq, haeqchiq mael laoq haeqpipaqhhael ae'lye mael aeqpaeq'ae gae keel maoqhhae. 43 Yallunq kaol yoqhhaeq e yaqyohael Momil'ae molli e haeqpael haelcul vae do'li, paelsilmyel jiltanq'ae niqli, kaol senlsoq vae fuqsil fu laoq haeqchiq dumda hhei maoqhhae, aeqgael hhae bi chenqfaq e golsiq mael pi kaol hhae sil maeqhe. Xilmael laoq, Yallunq kaol yoqhhaeq e houldailhael e haeqfu keellye zadeel e tiaoqlil geiq maoqhhae."