Momil'ae molli e haeqpael haelcul onglci e moqgoqhael zongldu e laqkiq
31
Yeheqhuaq Moxi'ae moqheilheil biq: 2 "Naelhaeq, Yoqdal zhipail onglci e Hul'eq e yuqpaeq Wu'lil e yaqyo Biqsa'lyel, ngael yoqhhaeq e cholmil mael geedu hheikaol saelpodu hhei wae. 3 Ngael Momil e yohael mael yoqhhaeq'ae bong'lye bi za, kaol yoqhhaeq'ae bi geel, bi kyul, zhishiq bi za, kaol maeq qiqsheel e mulhhael eiq bi mul kiq. 4 Yoqhhaeq aeqchee'lael'ee yanglziq nyuq du kiq, kaol pulsheel, pulziq, geeqsheel maellye maeq qiqsheel e moqgoq zongldu hhei ongl'ae. 5 Yoqhhaeq aeqchee'lael'ee onglci'ae deiqkoq do e baoqshiq keq du hhei kiq, aelbol maellye keq du kiq, kaol maeq qiqsheel e mulhhael yol mul kiq. 6 Fu hhei, ngael Danl zhipail onglci e Yalxisaqmoq e yaqyo Yalheqlilyalboq yaol, yoqhhaeq nyegael mulhhael qiqgael bi bael mul maoqlye moqheilheil du hhei wae. Aeqsul e neemae onglci'ae geel laol, ngael yoqhhaeteel'ae ongljyeqmyel geel e neemae biq hhei biq maoq, kaol ngael noq'ae moqheil hael heil biq e silqinqhael zonglkeel ongl'ae. 7 Ngael noq'ae moqheilheil e silqinqhael laoq sa'oqboqhael'ae: Momil'ae molli e haeqpael haelcul, gailminl bongqke kaol bongqke taq e piqkaeq mael, kaol Momil'ae molli e haeqpael haelcul onglci'ae halza moqgoqhael, 8 Zaelheel baqda e zaelzhee kaol Zaelheel baqda e zaelzhee taq e moqgoq, qiqgiq maq keq e pulsheel e denjal kaol denjal mael'ae mul e halza moqgoq, xiangtanq, 9 Pebyel Zaelheel jiltanq kaol jiltanq mael'ae mul e halza moqgoq, aeqkeel aqlaq ciq fu mul e penq kaol penq e diqpanq, 10 Kaol jilsihael zaeqhhael zaeq fu dum e zhigaqlye aelhongq, jilsi Yallunq e jilsi e senljyeq aelhongq kaol yoqhhaeq e yaqyohael e aelhongq, 11 Kaol gaoyouq kaol senlsoq vae mulyo e zhee nulsael lael aeqmyel e xiang mael. Yoqhhaeteel gilzuqmyel ngael noq'ae moqheil hael heil biq laoqmyel zongl yil maoqhhae."Anxiqriq gol maoqhhae
12 Yeheqhuaq Moxi'ae gee biq: 13 "Nol Yiqsellyel cholyaeqhael'ae moqheilheil biq maoqhhae: 'Noteel aeqdilmyel ngaeq e anxiqriq mael gol maoqhhae, xilmael laoq ngael kaol noq e hae qiq cheq e cholyaeqhael onglci e jilhaol'ae, kaol noteel'ae ngael laoq Yeheqhuaq noteel yaol zonglqyel du hheikaol senljyeq wae lye bi geiq e qiq hhaeq'ae lye bi loq maoqlye kaollil. 14 Noteel anxiqriq mael gol maoqhhae, kaol xilmael laoq senljyeq naohaeq'ae lye geiq maoqhhae. Aeqsul xi qiq nao gee deelhhei mael laoqmyel maeq zongl laol, aeqdilmyel bi zonglsil hhei; aeqsul xi qiq nao'ae mulhhael mul laol, tyutaeq yaol cholyaeqhael onglci ae'lye jyeqdael lye noga biq laoqmyel noga biq maoqhhae. 15 Koq nao laoq mulhhael mul maoqhhae, ngeelfeiq, dilqiq tian laoq Yeheqhuaq gae'lye qiqgiq eiq maeq zongl myel hhaeqnaeqnaeq gae hhei e senljyeq e anxiqriq lye bi za maoqhhae. Aeqsul anxiqriq'ae mulhhael mul laol, aeqdilmyel hhae bi zonglsil hhei hhae.' 16 Yiqsellyel cholyaeqhael laoq anxiqriq gol maoqhhae, hae qiqyil e houldailhael eiq anxiqriq gol e naohaeq mael haeqfu keellye geemeeq deelhhei mael'ae lye geiq maoqhhae. 17 Xilmael laoq ngael kaol Yiqsellyel cholyaeqhael onglci'ae haeqfu eiq zadeel e jilhaol'ae, koq nao lye Yeheqhuaq mqmae milcaeq zonglbeibei du hhei, dilqiq tian laoq hhaeqnaeqnaeq gae hheikaol zholsael vae."
18 Yeheqhuaq Xi'nail Geeqzhoq ae'lye Moxi nyegael saeziq gee byel hhei'laol, gailminl cuda hhei e haqlo hoba niq siq mael yoqhhaeq'ae baqmoq hhei biq, haqlo hoba tyulmael laoq, Momil e laqnyul maellye cuda hhei e haqlo hoba ngeelvae.