Pulsheel e lalbu buyaeq
Shen 9:6-29
32
Cholyaeqhael laoq Moxi geeqzhoq vae lye haeldyul feiq maeq gaeyi she lye mol hhei biq, kaol Yallunq e tyuqvae deel'eeq gil li, kaol yoqhhaeq'ae gee biq: "Ngaeteel yaol Aijiq milcaeq ae'lye sheeq duyi laq e Moxi tyutaeq laoq, ngaeteel yoqhhaeq'ae aeqchee puqli biq hhae lye maeq loq yae, tyulkaol, wae kei, ngaeteel'ae momilhael zongldu hhei gil laq, kaol ngaeteel e laefuqboq'ae gaelmae bi sheeqmyeq maoq." 2 Yallunq yoqhhaeteel'ae gee biq: "Noteel yil kaol noteel e haeqmiq, yaeqmiq yaqyo e naeqbol'ae doq hhei e pulsheel naeq'ongq mael heilgae hhei, kaol ngaeq'ae heil laeq laeq." 3 Kaol cholyaeqhael laoq yoqhhaeteel e naeqbol'ae doq hhei e pulsheel naeq'ongq mael heilgae hhei, kaol Yallunq'ae heil laeq biq. 4 Kaol Yallunq yoqhhaeteel e aqlaq ae'lye heil pol hhei, kaol moqziq maellye pulsheel mael xye hhae, kaol pulsheel maellye lalbu buyaeq qiq keel xyedu hhei. Kaol yoqhhaeteel gee: "Yiqsellyel o, xilmael laoq noq yaol Aijiq milcaeq ae'lye sheeq duyi e momil'ae!" 5 Yallunq mol hhei'laol, lalbu buyaeq yiqsi'ae jiltanq zongl hhei. Yallunq yotyel ha'lye geedu hhei, gee: "Naeshoq Yeheqhuaq'ae zaeqnao zaeq biq maoqhhae." 6 Aeqnaol qiq nao mqshoq, cholyaeqhael tullael kaol Pebyel Zaelheel kaol Neesaelhhae Zaelheel heel lael gil laol, zholgae hheikaol zaeq dol gil, tullael kaol nyelhhae gil'ae.7 Yeheqhuaq Moxi'ae moqheilheil biq: "Gaeyil o, noq lye Aijiq ae'lye sheeq da laq e cholyaeqhael neemae ba byel yil vae kaol'ae. 8 Yoqhhaeteel nae'naemyel ngael moqheilheil e gaelmae ae'lye deelsae hhei vae, kaol aeqyoyoq gae'lye lalbu buyaeq qiq keel zongldu zaq hhei, kaol lalbu buyaeq mael'ae tongqheel biq, lalbu buyaeq mael'ae zaelheel heel biq, gee: 'Yiqsellyel o, xilmael laoq noq yaol Aijiq milcaeq ae'lye sheeq duyi e momil'ae.'" 9 Yeheqhuaq Moxi'ae gee biq: "Ngael cholyaeq xihael'ae fu hhei'laol, fu hhei, yoqhhaeteel laoq aeqdilmyel guaeq'ei guqhenq e cholyaeq'ae. 10 Yaeqmeel, nol ngaeq'ae haeq diqqye laq, ngael yoqhhaeteel'ae faqhoq guaeq'ei kei biq maoq, kaol yoqhhaeteel yaol zonglmye biq maoq, ngeelfeiq, ngael noq yaol haeqheemyel e goqja bi peqlal maoq."
11 Moxi yoqhhaeq e Momil Yeheqhuaq'ae geezaeq biq, gee: "Yeheqhuaq o, nol aeqcheekaol noq e cholyaeqhael'ae faqhoq guaeq'ei kei biq lilmaeq? Cholyaeq xihael laoq noq lye zhee onglzaeq aqha zhee bo e aqlaq maellye Aijiq milcaeq ae'lye sheeq duyi hhae! 12 Aeqcheekaol Aijiq cholyaeq'ae xilnye bi gee: 'Yoqhhaeq yoqhhaeteel yaol sheeq duyi biq mael laoq, zaihuol mael yoqhhaeteel'ae bi loq dayi, kaol geeqzhoq ae'lye yoqhhaeteel yaol xyeq hheikaol yoqhhaeteel yaol milcaeq taq ae'lye zonglmye biq maoqlye hhae' lye bi gee laeq? Nol nyuqpael hhei, noq e faqhoq guaeq'ei kei mael haeq kei du hhei, kaol zaihuol mael noq e cholyaeqhael'ae haeq bi loq dayi lye geezaeq lil. 13 Nol noq e yaqhacheqzaq e cholyaeq Yalboqlahanl, Yiqsaq, Yiqsellyel yaol nyuqdeel biq lye geezaeq lil. Nol aeqyoyoq'ae tyuq deelhhei kaol yoqhhaeteel'ae faqsilkei gol biq: 'Ngael aeqdilmyel noteel e houldailhael mqmae taq e aeqgeel laoqmyel tyulnye bi naeq, kaol ngael biq laqngeel lye haelgee gol e milcaeq xilmael gilzuqmyel noteel e houldailhael'ae biq biq maoq, kaol milcaeq xilmael yoqhhaeteel haeqfu keellye bi mul gayil maoqlye lil.'" 14 Tyulkaol, Yeheqhuaq nyuqpael hhei'laol, haelgee e zaihuol mael yoqhhaeq e cholyaeqhael'ae maeq bi loq dayi'ae.
15 Moxi zipol hoqlael kaol geeqzhoq vae gaeyil vae, aqlaq mael'ae gailminl cuda hhei e haqlo hoba niq siq heil hhei. Haqlo hoba xilmael'ae niqboq myel zil cuda deelhhei hhae, yiqsi aeqnaol myel zil za hhae. 16 Haqlo hoba mael laoq Momil e mulhhael'ae, zil mael laoq Momil lye cu hhei e zil'ae, haqlo hoba mael'ae keq da deelhhei hhae. 17 Yoshuyal cholyaeqhael gul e yotyel mael zhoq gaeq hhei'laol, Moxi'ae gee biq: "Haqhhael diqkaeq hhei e milcaeq vae daqzhangldiq e yotyel gaeqlael yae." 18 Moxi gee: "Xilmael laoq diq yinq e yotyel maeqngeel'ae, diqsu e yotyel eiq maeqngeel'ae, ngael gaeq mael laoq changlgo changl e yotyel'ae." 19 Moxi haqhhael diqkaeq hhei e milcaeq vae deel niqli laol, lalbu buyaeq mol hhei biq, cholyaeqhael yinqjildil yol mol hhei biq, kaol faqhoq guaeq'ei kei tullaeq, kaol aqlaq'ae baq hhei e haqlo hoba niq siq mael geeqzhoq holhhaq'ae beiqgae hheikaol jyexul vae. 20 Yoqhhaeq yoqhhaeteel lye xyedu hhei e lalbu buyaeq mael aeqzaeq mael'ae baq pe biq, nuxullye gi'nu hhei, kaol eelcuq taq'ae xeiq da hhei, kaol Yiqsellyel cholyaeqhael'ae bi dol.
21 Moxi Yallunq'ae gee biq: "Cholyaeq xihael lye noq'ae aeqchee zongl hhei laeq hhaemaeq? Noq lye yoqhhaeteel yaol golsiq siqmae onglci vae bi leeqdo hhei!" 22 Yallunq gee: "Ngaeq e hhaoqsongl faqhoq guaeq'ei haeq kei lye geezaeq lil. Nol cholyaeq xihael laoq haeqfu eiq duqlaq myel e silqinq zongl mael hhaol biq e cholyaeq'ae lye loq'ae. 23 Yoqhhaeteel ngaeq'ae gee laeq: 'Ngaeteel yaol Aijiq milcaeq ae'lye sheeq duyi laq e Moxi tyutaeq laoq, ngaeteel yoqhhaeq'ae aeqchee puqli biq hhae lye maeq loq yae, tyulkaol, nol ngaeteel'ae momilhael zongldu hhei gil laq, kaol ngaeteel e laefuqboq'ae gaelmae bi sheeqmyeq maoq.' 24 Ngael yoqhhaeteel'ae gee biq: 'Aeqsul'ae pulsheel naeq'ongq za laol heilgae hhei', kaol yoqhhaeteel ngaeq'ae heil hhei laeq vae. Ngaeq lye pulsheel naeq'ongq mael aeqzaeq doq onglci'ae beiq pe do hhei'laol, lalbu buyaeq xilmael du'lal vae."
25 Moxi cholyaeqhael yiqzenlmyel zongl mol hhei biq, Yallunq yoqhhaeteel'ae haelzongl maoqmyel bi zongl, kaol silqinq xilmael gae'lye diqrenqhael lye bi eel gil'ae, 26 Kaol Moxi haqhhael diqkaeq hhei e oheiq'ae haoqtul deelhhei, gee: "Yeheqhuaq boq e cholyaeqhael laoq, gilzuqmyel ngaeq e saeqvae lael!" Tyulkaol, Lilveil cholyaeqhael gilzuqmyel yoqhhaeq tyuqvae deel'eeq laeq. 27 Yoqhhaeq yoqhhaeteel'ae gee biq: "Yiqsellyel e Momil Yeheqhuaq xilnye gee: 'Noteel haetaeq eiq maejyel mael haeqpipaqhhael'ae pi hhei, oheiq xilmael ae'lye mael oheiq yulmael keellye, haqhhael diqkaeq hhei e gilzuqmyel milcaeq vae deeldyu byel hhei, haetaeq eiq aeqyoyoq e aqsseq aeqnilhael, yelchoqhael kaol dongqpyeq'ae zhol e cholyaeqhael yaol xyeq maoqhhae.'" 28 Lilveil cholyaeq Moxi gee laoqmyel zongl vae. Tyuqfu qiq nao cholyaeqhael onglci'ae suqca (3000) hhaeq laellye sil aeqwae. 29 Moxi gee: "Yaeqnao noteel aeqyoyoq yaol Momil hhae lye zonglqyel du hheikaol Yeheqhuaq'ae fuqsil lael biq maoqhhae, haetaeq eiq aeqyoyoq e yaqyo kaol aqsseq aeqnilhael yaol bi sil hhei gae'lye, Yeheqhuaq yaeqnao noteel'ae geeqlongq bi biq hhei."
30 Aeqnaol qiq nao, Moxi cholyaeqhael'ae gee biq: "Noteel golsiq siqmae zonglpizaeq hhei vae. Kaol ngael yaeqnao Yeheqhuaq tyuqvae da'li maoq, tyulnye laol, noteel yaol golsiq onglci ae'lye suq duhoq hhei ongl maeqhe." 31 Tyulkaol, Moxi Yeheqhuaq tyuqvae hoq keelli, gee: "Aiq, cholyaeq xihael golsiq siqmae zonglpizaeq hhei vae, kaol aeqyoyoq'ae pulsheel e momil zongldu zaq hhei gil hhae. 32 Yaeqmeel, nol yoqhhaeteel e golsiq mael haeq bi pi lye geezaeq lil; xilnye maeqngeel kaollaoq, ngaeq e cholmil mael noq lye hal cuda hhei e suqhhaq taq ae'lye hega hhei." 33 Yeheqhuaq Moxi'ae gee biq: "Aeqsul ngaeq'ae zonglzhil laeq laol, ngael yoqhhaeq yaol ngaeq e suqhhaq taq ae'lye hega maoq. 34 Yaeqmeel nol yil, cholyaeq xihael yaol ngael noq'ae geegaeq biq e milcaeq vae sheeqyil. Naelhaeq, ngaeq e mqmae yosongl noq e yiqsi'ae gaelmae sheeqmyeq laeq'ae; ngeelfeiq, chenqfaq e naohaeq keellael laol, ngael yoqhhaeteel e golsiq mael chenqfaq maoqlye lil." 35 Yeheqhuaq laoq cholyaeqhael'ae zai'nanl bi yo'li, yoqhhaeteel kaol Yallunq hhaellaelmyel lalbu buyaeq zongldu hhei kaol'ae.