Momil Yiqsellyel cholyaeqhael'ae deelsae hheikaol deel gil lye moqheilheil biq
33
Yeheqhuaq Moxi'ae moqheilheil biq, gee: "Yil, saeqvae lye deelsae hhei, nol kaol noq lye Aijiq milcaeq ae'lye sheeq duyi e cholyaeqhael, ngael Yalboqlahanl, Yiqsaq, kaol Yaqgel vae biq laqngeel lye faqsilkei gol biq e milcaeq vae da'li; ngael yoqhhaeteel'ae gee gol biq: 'Ngael milcaeq xilmael noq e houldailhael'ae biq hhei biq maoq.' 2 Ngael mqmae yosongl yaol noq e laefuq'ae moqheilheil du hhei maoq, kaol Ja'nanq cholyaeq, Yalmoqlil cholyaeq, Hel cholyaeq, Biqlilxiq cholyaeq, Xiveil cholyaeq kaol Yebulsi cholyaeq yaol lyeqdu maoq, 3 Kaol noteel yaol aeqchil kaol baq'eel du e milcaeq vae sheeq keelli; ngeelfeiq, ngael laoq noteel nyegael qiqgael maeq bal da'li yil, noteel laoq guaeq'ei guqhenq e cholyaeq'ae, aeqgael ngaeq lye noteel yaol gaelmae ae'lye zonglmye hhei maeqhe lye kaollil."4 Cholyaeqhael maeqmeeq e xiaoxiq xihael zhoq gaeq hhei biq laol, yoqhhaeteel zhee nyuqsaeq li gil biq'ae, kaol cholyaeqhael qiq hhaeq eiq doqzheel maq doq'ae. 5 Yeheqhuaq Moxi'ae gee biq: "Nol Yiqsellyel cholyaeqhael'ae gee biq: 'Noteel laoq guaeq'ei guqhenq e cholyaeq'ae; ngael noteel onglci'ae zhol kaol qiqgael da'li kaollaoq, ngael noteel yaol qiqlaqmyel zonglmye kiq lil; yaeqmeel noteel laoq noteel e aeqhhaol'ae doq hhei e doqzheel mael heilgae hhei, tyulnye laol, ngael noteel'ae haelmillye zongl biq maoqlye loq wae.'" 6 Yiqsellyel cholyaeqhael Heqlyel Geeqzhoq vae lye deelsae hhei aeqnaol'ae, aeqhhaol'ae doq hhei e doqzheelhael heilgae hhei vae.
Moxi Momil'ae molli e haeqpael haelcul'ae do'li
7 Moxi lye haeqpael haelcul mael haqhhael diqkaeq hhei e milcaeq e nildu'ae diqkaeq hhei yil, haqhhael diqkaeq hhei e milcaeq ae'lye teel kaeq hhae, yoqhhaeq laoq haeqpael haelcul xilmael'ae Momil'ae molli e haeqpael haelcul lye gul biq hhae. Yeheqhuaq'ae naelhaeqzaeq lael cholyaeqhael laoq, haqhhael diqkaeq hhei e milcaeq e nildu e Momil'ae molli e haeqpael haelcul e tyuqvae keelyil. 8 Moxi laoq haqhhael diqkaeq hhei e milcaeq ae'lye duyi, kaol Momil'ae molli e haeqpael haelcul vae yil fu, cholyaeqhael gilzuqmyel haoqtul lael vae, kaol haetaeq eiq aeqyoyoq e haeqpael haelcul e oheiq vae haoqtul deelhhei, kaol Moxi Momil'ae molli e haeqpael haelcul vae do'li fu keellye, yoqhhaeq'ae chifu deelhhei hhae. 9 Moxi Momil'ae molli e haeqpael haelcul vae do'li fu, mqdul sseeldongq mael loq gayi, kaol Momil'ae molli e haeqpael haelcul oheiq vae haoqtul deelhhei vae, kaol Yeheqhuaq Moxi nyegael saeziq geechoq. 10 Cholyaeqhael mqdul sseeldongq mael Momil'ae molli e haeqpael haelcul oheiq'ae za deelhhei mol hhei biq laol, gilzuqmyel tullael, kaol aeqsul eiq aeqyoyoq e haeqpael haelcul oheiq vae vuqduqtongq gae hheikaol heel gil'ae. 11 Yeheqhuaq kaol Moxi qiqhhaeq qiqhhaeq'ae mol gae'lael aeqmyel saeziq geechoq, cholyaeq qiq hhaeq yelchoq nyegael saeziq geechoq laoqmyel hhae. Moxi laoq haqhhael diqkaeq hhei e milcaeq vae do hoqli, ngeelfeiq, yaqyoyaeq qiq hhaeq, yoqhhaeq'ae aeqchee'lael'ee balmul biq e Nenl e yaqyo Yoshuyal laoq Momil'ae molli e haeqpael haelcul ae'lye maeq deelsae'ae.
Yeheqhuaq cholyaeqhael nyegael qiqgael yil hhaeq lye gee
12 Moxi Yeheqhuaq'ae gee biq: "Naelhaeq, nol ngaeq'ae gee gol laq: 'Cholyaeq xihael sheeq da'li maoqhhae'; ngeelfeiq, nol aeqsul yaol moqheilheil du hheikaol ngaeq nyegael bi bal yi maoqlye maeq bi loq laeq. Nol gee wae siq: 'Ngael noq e cholmil maellye noq yaol siqcongl, nol ngaeq e ma'ne yiqsi'ae endianq hhamul'ae.' 13 Ngael yaeqnao noq e ma'ne yiqsi ae'lye endianq hhamul kaollaoq, noq e gaelmae mael ngaeq'ae tyuqmyeq laeq, kaol ngaeq yaol noq'ae bi siqcongl laeq, kaol noq e ma'ne yiqsi ae'lye endianq hhamul mael biq laq lye noq'ae geezaeq lil. Xi yiq gol goqja laoq noq e cholyaeqhael'ae lye nyuqdeel biq lye noq'ae geezaeq lil." 14 Yeheqhuaq gee: "Ngael aeqdilmyel yil lil, kaol noq e neemae mael neesaelhhae lye bi ngeel laeqngeel." 15 Moxi yoqhhaeq'ae gee biq: "Nol aeqyoyoq maq yil kaollaoq, ngaeteel yaol saeqvae lye haeq sheeq da'li laq. 16 Yaeqmeel, cholyaeqhael laoq haelmillyekaol ngael kaol noq e cholyaeqhael noq e ma'ne yiqsi ae'lye endianq hhamul'ae lye loq laeq? Nol ngaeteel nyegael qiqgael bal yil gae'lye ngael kaol noq e cholyaeqhael laoq milcaeq taq e minqcuqhael nyegael maeq qiqsheel myel bi ngeel laeq maeqngeel maeq?" 17 Yeheqhuaq Moxi'ae gee biq: "Nol gee e xihael laoq, ngael eiq zongl yil hhaeq, nol ngaeq e ma'ne yiqsi ae'lye endianq hhamul vae, kaol ngael noq e cholmil maellye noq yaol siqcongl kaol'ae." 18 Moxi gee: "Noq e rongqyaol mael bi mol du'lal kaol ngaeq'ae bi fu laeq lye noq'ae geezaeq lil." 19 Yeheqhuaq gee: "Ngael laoq ngaeq e gilzuqmyel meeq mael bi mol du'lal, kaol noq e yiqsi ae'lye deelpol duyil, kaol ngaeq e cholmil Yeheqhuaq mael noq e yiqsi'ae yotyel ha'lye geedu hhei maoq. Ngael aeqsul'ae meeq goq laol aeqsul'ae meeq biq, aeqsul'ae hhaoqsaeqsaeq goq laol aeqsul'ae hhaoqsaeqsaeq biq maoq." 20 Ngeelfeiq, yoqhhaeq yol gee: "Nol ngaeq e maduq mael maeq hhae mol'ae, ngaeq yaol mol hheikaol dyeq gayil ongl e cholyaeq qiq hhaeq eiq maeq zhol kaol'ae." 21 Yeheqhuaq gee: "Fu hhei, ngaeq e saeqvae niqlael aeqmyel milcaeq qiqgael za'ae, kaol nol haqlo loongl xilmael taq'ae haoqtul deelhhei aeqmeel. 22 Ngaeq e rongqyaol mael gol yil fu, ngael aeqdilmyel noq yaol haqlo loongl kaeqlaeq'ae bi doyil maoq, kaol ngaeq e laqho maellye noq yaol hokaeq maoq, kaol ngael gol yil hhei aeqnaol'ae, 23 Ngael laoq ngaeq e laqho mael baqtael hhei'laol, nol ngaeq e dolcheq mael hhae mol wae, ngeelfeiq, ngaeq e maduq mael laoq maeq hhae mol'ae."