Peiqhoq biq maoq e tiaoqlil mael
22
"Cholyaeq aeqnuq paelsilmyel aqciq haoqzaeq hhei kaollaoq, xyeq zaq vae haoq, paelsilmyel ongqzaeq vae haoq, yoqhhaeq laoq aeqnuq ngaeq keel maellye tyu qiq keel vuqtu mael peiqhoq biq maoqhhae, aqciq yuq yaeq maellye tyu qiq yaeq vuqtu mael peiqhoq biq maoqhhae. 2 Lolbiq gonglbyu duq, cholyaeq lye bi molzaeq kaol diq sil biq kaollaoq, diq e cholyaeq laoq siq bi yul e golsiq maqza'ae. 3 Neelmae du'lal vae kaollaoq, diq e cholyaeq laoq siq bi yul e golsiq za wae. Lolbiq laoq aeqdilmyel peiqhoq maoqhhae, yoqhhaeq'ae qiqgiq maqza kaollaoq, yoqhhaeq yaol bi ongqzaeq hheikaol, yoqhhaeq lye hael haoqzaeq laeq e moqgoq e vuqtu mael peiqhoq biq maoqhhae. 4 Yoqhhaeq lye hael haoq laeq mael molzaeq biq, aeqnuq haoq, mao'lyu haoq, paelsilmyel aqciq haoq, yoqhhaeq e aqlaq onglci'ae dyeq siq kaollaoq, yoqhhaeq laoq ongljyeq qiq yaeq peiqhoq biq maoqhhae.5 "Cholyaeq haeldye paelsilmyel siqbaq aeqhael onglci vae jyeqyaeq hoqzaq, kaol jyeqyaeq mael ochoq e haeldye vae hael zaeq maoq myel bi zaeq kaollaoq, yoqhhaeq laoq aeqyoyoq e haeldye, kaol siqbaq aeqhael onglci'ae lye hhael meeq mael heil hheikaol peiqhoq biq maoqhhae.
6 "Aeqzaeq doq duyil, kaol aelgong mael'ae doq da'li, kaol meqto mael'ae, maeq yeq aeqmyel e meqziq mael'ae, paelsilmyel haeldye hael, gilzuqmyel pezaq byel hhei kaollaoq, aeqzaeq loqpe tyutaeq laoq aeqdilmyel peiqhoq maoqhhae.
7 "Cholyaeq lye pulziq dyuqbaq paelsilmyel pyuqjyeqjyeq e moqgoq mael dongqpyeq'ae zhol e cholyaeq'ae bi bael heildeel kaollaoq, moqgoq mael cholyaeq xitoq ae'lye bi haoqzaeq yil, lolbiq yaol saelpopuq hhei kaollaoq, lolbiq laoq ongljyeq qiq mal peiqhoq maoqhhae; 8 Lolbiq yaol maeq saelpopuq hhei kaollaoq, xitoq e hhaoqsongl laoq shenqpanl e zhiqmoq tyuqvae li, kaol aeqyoyoq aqlaq tyuqdu hheikaol dongqpyeq'ae zhol e cholyaeq e moqgoq mael maeq heil yil lye gee'loq li biq maoqhhae.
9 "Zaeqdye halngeiq gae'lye zhiqmoqkae maoq e silqinq za, aeqnuq haoq, mao'lyu haoq, aqciq haoq, nildu'ae dum e poljye haoq, paelsilmyel aeqchee gabu e moqgoq gae'lye haoq, qiqhhaeq laelhhaeq 'xilmael laoq ngaeq e ngeelvae' lye gee kaollaoq, niqboq e cholyaeq zhiqmoqkae maoq e xilmael shenqpanl e zhiqmoq e yiqsi'ae gee keelli maoqhhae, kaol shenqpanl e zhiqmoq aeqsul golsiq za'ae lye gee laol, aeqsul laoq yoqhhaeq e dongqpyeq e cholyaeq'ae ongljyeq qiq mal peiqhoq biq maoqhhae.
10 "Cholyaeq lye mao'lyu, aeqnuq, aqciq, paelsilmyel aeqchee jyeqyaeq mael, dongqpyeq e cholyaeq'ae bi bael fu'qye, jyeqyaeq sil hhei, zonglnael biq, paelsilmyel bi diqkoqzaeq yil, cholyaeq qiq hhaeq eiq maeq mol kaollaoq, 11 Niqboq cholyaeq Yeheqhuaq e yiqsi'ae faqsilkei maoqhhae, bael fu'qye biq cholyaeq laoq aeqyoyoq e dongqpyeq'ae zhol e cholyaeq e moqgoq mael aqlaq tyuqdu hheikaol maeq heilzaeq yil lye gee'loq maoqhhae, moqgoq e hhaoqsongl laoq yultaeq faqsilkei mael ngeel'ae lye nyuq maoqhhae, bael fu'qye biq e cholyaeq laoq maeq peiqhoq biq kael vae. 12 Jyeqyaeq mael bael fu'qye biq e cholyaeq e tyuqvae lye bi haoqzaeq yil kaollaoq, yoqhhaeq laoq jyeqyaeq e hhaoqsongl'ae peiqhoq biq maoqhhae; 13 Byeljyeq lye ee'nu biq kaollaoq, bael fu'qye biq e cholyaeq laoq heilhoqlaeq kaol zenljul geiq maoqhhae, kaol ee'nu biq mael maeq peiqhoq biq kael vae.
14 Cholyaeq laoq dongqpyeq e cholyaeq e jyeqyaeq mael jilzaeq, kaol hael jil laeq e jyeqyaeq mael zonglnael hhei, paelsilmyel sil hhei, jyeqyaeq e hhaoqsongl tyuqvae maeq baelzhol kaollaoq, jilzaeq qiq hhaeq laoq haelmillyekaol eiq peiqhoq biq maoqhhae. 15 Jyeqyaeq e hhaoqsongl baelzhol kaollaoq, jil e qiq hhaeq laoq maeq peiqhoq biq kael'ae; zu hhei kaollaoq, zu e hhaeqpyuq heil biq laol hhaeq vae."
Daoldeq kaol zongjiaol tiaoqlil
16 "Cholyaeq lye zilcae maeq cae gol e shol siq e yaeqmiq'ae cheeqmu biq, kaol yoqhhaeq nyegael ssuqza kaollaoq, yoqhhaeq laoq aeqdilmyel miqjyeq heildu hhei, kaol yoqhhaeq yaol sheeqtoq hheikaol haeqmiq mul maoqhhae. 17 Yaeqmiq e aeqdae yaeqmiq yaol yoqhhaeq'ae aeqdilmyel maq biq nae kaollaoq, yoqhhaeq laoq shol siq e yaeqmiq'ae heil biq miqjyeq dyul heildu hhei maoqhhae.
18 "Moqpilpilzaeq e haeqmiyaeq yaol maeq hhae bi dyeqdeel'ae.
19 "Aeqsul jyeqyaeq nyegael zonglzaeq laol, aeqdilmyel zonglsil biq maoqhhae.
20 "Yeheqhuaq'ae oqlye heel biq maeqngeel myel baeqjyelboq momilhael'ae heel biq laol, tyutaeq yaol aeqdilmyel zonglmye maoqhhae. 21 "Baelzhol lael e cholyaeq'ae maeqmeeqmyel maeq hhae zongl biq'ae, yoqhhaeq'ae maeq hhae zonglkyuq biq'ae, noteel eiq Aijiq milcaeq vae baelzhol yil e cholyaeq geiq gol kaol'ae. 22 Miqchiq kaol molchiq chiqyaeq'ae maeq hhae zonglkyuq biq'ae; 23 Nol yoqhhaeq'ae aeqdilmyel zonglkyuq biq kaollaoq, yoqhhaeq ngaeq'ae guaeq'ei nyuqsaeq lael aeqmyel geezaeq laeq laol, ngael aeqdilmyel yoqhhaeq nyuqsaeq lael aeqmyel geezaeq laeq mael'ae naelhaeq biq maoq, 24 Kaol ngael faqhoq guaeq'ei kei maoq, kaol maejyel maellye noteel yaol xyeq maoq, kaol noteel e haeqmiq laoq miqchiq bi peqyil maoq, yaeqguq yaol molchiq chiqyaeq bi peqyil maoq.
25 "Ngaeq e cholyaeqhael onglci'ae noq e tyuqvae saeq biq e cholyaeq zhol'ae, nol yoqhhaeq'ae dyuqbaq jil biq kaollaoq, dyuqbaq jil gil biq kaol aelyaeq heilzaeq e cholyaeq laoqmyel haeq zongl. 26 Nol aeqdilmyel yelchoq e nildu'ae dum e poljye mael heil hheikaol diqyaq deelyil kaollaoq, neelmae leeqdo laefuq'ae yoqhhaeq'ae heilhoq biq maoqhhae; 27 Yoqhhaeq'ae laoq aelbee geiqzaq e xi qiq ko maoq maqza'ae, xilmael laoq yoqhhaeq e aeqhhaol'ae cheelkaeq e poljye kaol'ae. Yoqhhaeq aeqchee maellye ssuqza siq laeq? Yoqhhaeq ngaeq'ae nyuqsaeq lael aeqmyel geezaeq laeq fu, ngael yoqhhaeq'ae toq biq, ngaeq'ae laoq enhuil za kaollil.
28 Momil'ae maeq hhae geekyuq'ae; noq e cholyaeqhael e yoheeqhael vae doqchiq eiq maeq hhae gee biq'ae.
29 "Nol maeq dan'goq myel noq e zaelsiq, zilbaeq kaol cil mael heelda hhei maoqhhae. "Noq e fuqbo yaqyo yaol ngaeq'ae heel laeq maoqhhae. 30 Noq e aeqnuq aqciqhael vae eiq xilnye zongl biq maoqhhae: Siq nao laoq yoqhhaeq e aeqmae vae bi cho'lyeq, dilbaq tian laoq aelyaeq mael ngaeq'ae heel laeq maoqhhae.
31 "Noteel laoq aeqyoyoq yaol zonglqyel du hheikaol senljyeq wae lye geiq maoqhhae. Tyulkaol, haeldye vae jyeqyaeq lye ee'nu e saeqzil mael, noteel maeq hhae zaeq'ae, saeqzil mael aeqkeeq mael'ae beiqmoq hhei biq maoqhhae."