Yaqhacheqzaq e cholyaeq'ae gee deelhhei biq e tiaoqlil
Shen 15:12-18
21
"Nol cholyaeqhael e yiqsi ae'lye cuga deelhhei maoq e faqdianq mael laoq xilnye hhae: 2 "Nol Xiboqlaiq cholyaeq yaol vul hheikaol yaqhacheqzaq e cholyaeq bi geiq kaollaoq, yoqhhaeq noq'ae koq hoq fuqsil maoqhhae, siq hoq e tyu qiq hoq zhoq keellael laol yoqhhaeq hhae zilyoq'ae, dyuqbaq maq du kael myel hhae deelsae wae." 3 Yoqhhaeq lael fu haeqmiq maeq zhol kaollaoq, qiq hhaeq myel hha yil'ae; yoqhhaeq'ae haeqmiq zhol kaollaoq, yoqhhaeq e haeqmiq eiq yoqhhaeq nyegael qiqgael bael deelsae kael'ae. 4 Yoqhhaeq e hhaoqsongl lye yoqhhaeq'ae haeqmiq bael sheeq da hhei biq, haeqmiq lye yoqhhaeq'ae yaqyo paelsilmyel yaeqmiq bo hhei biq kaollaoq, haeqmiq kaol yaeqguq laoq hhaoqsongl hhae lye ngeel maoqhhae, kaol yoqhhaeq qiq hhaeq lye hhae deelsae hhae. 5 Yaqhacheqzaq e cholyaeq xilnye gee kaollaoq: 'Ngael ngaeq e hhaoqsongl, ngaeq e haeqmiq kaol yaeqguq'ae gaeq yae, kaol zilyoq myel maeq deelsae goq yae.' 6 Yoqhhaeq e hhaoqsongl lye yoqhhaeq yaol shenqpanl e zhiqmoqa tyuqvae sheeqli biq maoqhhae, yoqhhaeq yaol oheiq, paelsilmyel ohongl niqboq e tyuqvae sheeq keelli biq, kaol aqhhoq maellye yoqhhaeq e naeqbol mael loqtongl biq, xilnye laol yoqhhaeq laoq haeqfu eiq hhaoqsongl'ae fuqsil biq maoqhhae.7 "Cholyaeq lye yaeqmiq yaol ongqzaeq hheikaol yaqhacheqzaq e haeqmiyaeq bi geiq kaollaoq, yaqhacheqzaq e haeqmiyaeq laoq yaqhacheqzaq haqyoyaeq laoqmyel tyulnye maeq hhae deelsae hhei'ae. 8 Hhaoqsongl yoqhhaeq yaol saelpodu hheikaol aeqyoq e cholyaeq geiqzaq, aeqnaol yoqhhaeq'ae maeq hhaol biq kaollaoq, yoqhhaeq yaol hhae bi suq duhoq'ae; hhaoqsongl yoqhhaeq'ae gee biq laoqmyel maq za biq laol, yoqhhaeq yaol baeqjyelboq minqcuq e cholyaeq'ae ongq biq e laqtaq maqza vae. 9 Hhaoqsongl yoqhhaeq yaol saelpodu hheikaol aeqyoyoq e yaqyo'ae biq biq kaollaoq, yaeqmiq'ae za biq e gui'liq laoqmyel yoqhhaeq'ae za biq maoqhhae. 10 Hhaoqsongl e yaqyo baeqjyelboq e qiq hhaeq sheeqtoqhoq kaollaoq, yoqhhaeq e zaeq dol, aelhongq kaol qiqgael ssuqza mael'ae maq lo myel maeq hhae zongl biq'ae. 11 Yoqhhaeq'ae xi suq mael maeq zongl biq kaollaoq, yoqhhaeq laoq qiqgiq maq du kael myel hhae deelsae'ae, kaol suq duhoq e dyuqbaq eiq maeq heildu kael vae."
Zonglgae gil hael'ae chenqfaq biq e tiaoqlil
12 "Ochoq'ae diq biq kaol diqsil biq laol, yoqhhaeq yaol eiq aeqdilmyel hhae bi zonglsil hhei ngeelvae." 13 Yoqhhaeq baelyaelmyel xyeq biq maeqngeel myel, Momil lye yoqhhaeq e aqlaq'ae eemoq biq kaollaoq, ngael milcaeq qiqgael zongl meeq deelhhei biq maoq, kaol yoqhhaeq yaol tyuqvae bi kihhaq yil. 14 Cholyaeq baelyaelmyel zaqgiqgiq e loqho maellye yoqhhaeq e dongqpyeq e cholyaeq yaol xyeq biq kaollaoq, yoqhhaeq ngaeq e jiltanq tyuqvae kihhaq li feiq, yoqhhaeq yaol ee duyil kaol zonglsil biq maoqhhae.
15 "Aeqdae aeqmae'ae diq hael laoq, aeqdilmyel hhae bi zonglsil hhei ngeelvae."
16 "Cholyaeq haoq ongqzaeq hael laoq, cholyaeq yaol ongqzaeq hhei haoq, paelsilmyel yoqhhaeq e aqlaq'ae zhol siq haoq, aeqdilmyel hhae bi zonglsil hhei ngeelvae."
17 "Aeqdae aeqmae vae doqchiq gee biq e cholyaeq laoq, aeqdilmyel hhae bi zonglsil hhei ngeelvae."
18 "Cholyaeq qiqhhaeq qiqhhaeq'ae deiqgae kaollaoq, qiq hhaeq laoq haqlo paelsilmyel laqtu maellye baeqjyelboq e qiq hhaeq'ae tyel biq, tyel nael biq e qiq hhaeq laoq maeq sil wae siq, ngeelfeiq, ssuqhhal'ae maq ssuqza maeq hhaeq vae, 19 Yoqhhaeq tullael, kaol zaeqngeeq mael'ae zoqtyeq deelhhei myel nilduboq'ae deel duyil ongl kaollaoq, cholyaeq'ae tyel biq e tyutaeq laoq tyel nael biq e qiq hhaeq'ae mulhhael maq mul yil ongl e dyuqbaq heil biq, kaol yoqhhaeq yaol zonglmeeq biq maoqhhae, xilnye laol, baeqjyelboq e zeqrenl maqza vae.
20 "Cholyaeq haeqdul maellye yaqhacheqzaq e cholyaeq kaol yaqhacheqzaq e haeqmiyaeq'ae tyel biq, tyu qiqlaqlye yoqhhaeq e aqlaq holhhaq'ae sil hhei kaollaoq, yoqhhaeq'ae aeqdilmyel hhae bi chenqfaq hhae; 21 Ngeelfeiq, yoqhhaeq qiqniq nao lye kaol caiq sil hhei'laol, hhaoqsongl vae aeqdilmyel maeq chenqfaq biq kael vae, tyutaeq yaol dyuqbaq maellye vul laq kaol'ae.
22 "Cholyaeq qiqhhaeq qiqhhaeq'ae diq, kaol yaeqguqpi hhei e cholhae aeqmae'ae diq yo biq kaol yaeqguq gaeyil biq, ngeelfeiq, baeqjyelboq'ae laoq maeq zonglnael biq, yoqhhaeq'ae zonglnael biq e tyutaeq laoq, cholhae aeqmae e haqyo hael geezaeq laoqmyel, shenqpanl e zhiqmoq'ae gee biq laol, shenqpanl e zhiqmoq gee dyul heil biq maoqhhae." 23 Baeqjyelboq'ae zonglnael biq kaollaoq, aeqyil mael zonglsil laeq laol, aeqyil mael zonglsil hoq biq; 24 'Ma'ne mael zonglbyeq laq laol, ma'ne mael zonglbyeq hoq biq; myeqsheq mael tyelcu laq laol, myeqsheq mael tyelcu hoq biq; aqlaq mael zonglnael laeq laol, aqlaq mael zonglnael hoq biq; aeqkeel mael zonglnael laeq laol, aeqkeel mael zonglnael hoq biq; 25 Pe'nael laeq laol, pe'nael hoq biq; zonglnael laeq laol zonglnael hoq biq; alca maellye zheq laq laol, alca maellye zheq hoq biq.
26 "Cholyaeq lye yoqhhaeq e yaqhacheqzaq e cholyaeq'ae paelsilmyel yaqhacheqzaq e haeqmiyaeq e ma'ne mael'ae tyel biq, kaol qiqboq tyelbyeq biq kaollaoq, hhaoqsongl laoq yoqhhaeq e ma'ne gae'lye yoqhhaeq yaol zilyoq myel bi deelsae maoqhhae. 27 Yaqhacheqzaq e cholyaeq'ae paelsilmyel yaqhacheqzaq e haeqmiyaeq e myeqsheq qiq sheq tyelgae biq kaollaoq, yoqhhaeq e myeqsheq gae'lye yoqhhaeq yaol zilyoq myel bi deelsae maoqhhae."
Jyeqyaeq e hhaoqsongl'ae gee deelhhei biq mael
28 "Aeqnuq lye haqyoyaeq paelsilmyel haeqmiyaeq yaol tongqsil biq laol, aeqdilmyel haqlo maellye aeqnuq mael beiqsil maoqhhae, ngeelfeiq, aeqnuq tyu qiq keel e saeqzil mael maeq hhae zaeq'ae; aeqnuq e hhaoqsongl'ae laoq maeq bi chenqfaq kael'ae. 29 Aeqnuq tyu qiq keel haeqfu eiq cholyaeq'ae tongq hhae, cholyaeq aeqnuq e hhaoqsongl'ae jinqgaol gol biq feiq, yoqhhaeq aeqnuq mael maq kaltoq meeq hhei, kaol aeqnuq lye haqyoyaeq paelsilmyel haeqmiyaeq yaol tongqsil biq kaollaoq, aeqnuq mael haqlo maellye beiqsil biq maoqhhae, kaol hhaoqsongl yaol eiq zonglsil biq maoqhhae. 30 Yoqhhaeq'ae aeqyil suq duhoq e hhaeqpyuq bi peiqhoq kaollaoq, yoqhhaeq laoq bi heilduhoq e dyuqbaq maellye yoqhhaeq e aeqyil mael suq duhoq maoqhhae. 31 Aeqnuq lye haqyoyaeq'ae paelsilmyel haeqmiyaeq'ae tongq biq kaollaoq, tiaoqlil xilmael laoqmyel zongl maoqhhae. 32 Aeqnuq lye yaqhacheqzaq e cholyaeq paelsilmyel yaqhacheqzaq e haeqmiyaeq'ae tongq biq kaollaoq, aeqnuq e hhaoqsongl laoq suqqyel shelkellel mael tyutaeq e hhaoqsongl'ae heil biq maoqhhae, aeqnuq mael laoq haqlo maellye beiqsil biq maoqhhae.
33 "Cholyaeq lye eelduq e piqkaeq mael baqpong hhei, paelsilmyel eelduq duq du hhei'laol maq baqkaeq, kaol aeqnuq paelsilmyel mao'lyu eelduq vae jyedo hhei kaollaoq, 34 Eelduq e hhaoqsongl laoq dyuqbaq maellye jyeqyaeq e hhaoqsongl'ae peiqhoq biq maoqhhae, sil e jyeqyaeq laoq aeqyoyoq wae.
35 "Cholyaeq e aeqnuq lye dongqpyeq e cholyaeq e aeqnuq mael tongqsil hhei kaollaoq, yoqhhaeteel dyeqdeel e aeqnuq tyu qiq keel ongqzaeq hhei, kaol dyuqbaq mael qiq hhaeq qiq pa byelpazaq maoqhhae; sil e aeqnuq mael eiq byelpazaq maoqhhae. 36 Aeqnuq xi qiq keel haeqfu eiq cholyaeq'ae tongq ae'lye aeqsul eiq loq feiq, hhaoqsongl maeq kaltoq meeq hhei, kaol yoqhhaeq laoq aeqdilmyel aeqnuq maellye aeqnuq peiqhoq biq maoqhhae, ngeelfeiq, sil e aeqnuq mael laoq aeqyoyoq hha mul hhae."