Yeheqhuaq doqlal kiq e naelgol maellye Aijiq cholyaeqhael'ae chenqfaq biq
9
Yeheqhuaq Moxi'ae gee biq: "Nol Faqlaoq e tyuqvae keelli kaol yoqhhaeq'ae gee biq: 'Xiboqlaiq cholyaeq e Momil Yeheqhuaq xilnye gee: Ngaeq e cholyaeqhael yaol bi deel mael laoq ngaeq'ae zaelheel bi heel maoqlye lil. 2 Nol yoqhhaeteel yaol maeq bi deel nae, kaol yoqhhaeteel yaol eiq maeqnaelhaeq maeqzaeqmyel bi zholdeelsaeq siq kaollaoq, 3 Fu hhei, Yeheqhuaq e aqlaq lye doqlal kiq e zhee heeq e naelgol golmae mael noq e haeldye e jyeqyaeqhael'ae bi doqli, naelgol golmae doqli biq hael laoq, aeqmaoqhael, mao'lyuhael, loltoqhael, aeqnuqhael kaol aqciqhael e aeqhhaol taq'ae ngeelvae. 4 Ngeelfeiq, Yeheqhuaq laoq Yiqsellyel e jyeqyaeqhael kaol Aijiq e jyeqyaeqhael zonglqyel du hhei maoqlye hhae, kaol Yiqsellyel cholyaeq hhae lye e jyeqyaeqhael laoq qiq yaeq eiq maeq sil yil kiq'ae.'" 5 Yeheqhuaq lye shiqshen gee deelhhei vae, gee: "Naeshoq Yeheqhuaq aeqdilmyel saeqvae milcaeq vae silqinq xilmael zongl maoqlye hhae." 6 Aeqnao qiq nao, Yeheqhuaq xilnye zongl vae. Aijiq e jyeqyaeqhael gilzuqmyel sil byel vae, ngeelfeiq, Yiqsellyel cholyaeq e jyeqyaeqhael laoq qiq yaeq eiq maeq sil'ae. 7 Faqlaoq cholyaeq yaol moqheilheil du hheikaol bi fu yil, kaol Yiqsellyel cholyaeq e jyeqyaeqhael qiq yaeq dyel'eiq maeq sil'ae lye mol hhei biq. Ngeelfeiq, Faqlaoq neeha yol ha, kaol Yiqsellyel cholyaeqhael yaol maeq bi deel nae'ae.Yeheqhuaq aelnael maellye Aijiq cholyaeqhael'ae chenqfaq biq
8 Yeheqhuaq laoq Moxi kaol Yallunq'ae gee biq: "Noteel yuqduq vae lye laqho bong'lye haeqlyel hodu yi, Moxi Faqlaoq yiqsi ae'lye haeqlyel mael mqmae'ae beiqxeiq da hhei maoqlye hhae. 9 Haeqlye xilmael Aijiq halza milcaeq vae milxul peqlal maoqlye hhae, kaol Aijiq vae halza milcaeq e cholyaeqhael kaol jyeqyaeqhael e aeqhhaol taq'ae beel deeq e aelnael bi nael du'lal." 10 Moxi kaol Yallunq yuqduq e haeqlyel mael heil hhei, kaol Faqlaoq yiqsi'ae haoqtul deelhhei. Moxi lye haeqlyel mael mqmae'ae beiqxeiq da hhei'laol, cholyaeqhael kaol jyeqyaeqhael e aeqhhaol taq'ae beel deeq e aelnaelnael du'lal vae. 11 Aelnael xilmael gae'lye moqpil laoq Moxi yiqsi'ae maeq haoqtul ongl biq'ae, moqpilhael kaol haelzhol e Aijiq cholyaeq e aeqhhaol taq'ae gilzuqmyel aelnaelnael da byel biq kaol'ae. 12 Ngeelfeiq, Yeheqhuaq lye Faqlaoq e neemae mael haelmillye ha goq laol haelmillye bi ha hhae, kaol Moxi kaol Yallunq'ae maeq naelhaeq nae'ae, Yeheqhuaq Moxi'ae haelgee biq laoqmyel hhae.
Yeheqhuaq heelsiq maellye Aijiq cholyaeqhael'ae chenqfaq biq
13 Yeheqhuaq Moxi'ae gee biq: "Nol mqshoq tullael maoqhhae, kaol Faqlaoq e yiqsi'ae haoqtul deelhhei, kaol yoqhhaeq'ae gee biq: 'Xiboqlaiq cholyaeq e Momil Yeheqhuaq xilnye gee: Ngaeq e cholyaeqhael bi deel, kaol ngaeq'ae bi fuqsil lael maoqhhae. 14 Ngael xi qiq pu laoq gilzuqmyel zaihuol mael noq'ae, noq e yaqhacheqzaq e cholyaeqhael'ae kaol noq e cholyaeqhael e aeqhhaol taq'ae bi yo'lael maoq, kaol noq'ae halza milcaeq vae ngael laoqmyel maeq zhol'ae lye bi loq maoqlye kaollil. 15 Yaeqmeel, ngael aqlaq tyuqdu hheikaol doqlal kiq e naelgol maellye, nol kaol noq e cholyaeqhael'ae diq biq kaollaoq, noq yaol milcaeq taq ae'lye bi zonglmye hhei wae. 16 Ngeelfeiq, ngael noq yaol bi dyeqdeel mael laoq, noq vae ngaeq e onglzaeq mael bi mol maoqlye kaollil, kaol ngaeq e cholmil mael halza milcaeq'ae bi geegaeq keelyil maoqlye lil. 17 Ngeelfeiq, nol ngaeq e cholyaeqhael e yiqsi ae'lye heeqdazaq lil lye zongl, kaol yoqhhaeteel yaol maeq bi deel nae'ae. 18 Naelhaeq, naeshoq yaeqmeel laellye fu, ngael laoq gu lal aeqmyel haelnaeq naeqmaemyel e heelsiq mael bi diq gaeyi maoq, xilmael laoq, Aijiq goqja zongltul hhei fu ae'lye mael yaeqnao keellye maeq peqlal gol'ae. 19 Yaeqmeel, nol cholyaeq'ae noq e jyeqyaeqhael cheel hhei, kaol noq e haeldye'ae halzahael gilzuqmyel heil hheikaol hoqhhaq yil lye moqheilheil biq; haeldye vae zhol e laoqhaol vae maq do hoqli e haelzhol cholyaeq haoq, jyeqyaeq haoq, heelsiq mael aeqyoteel e aeqhhaol'ae aeqdilmyel diq dayi laol yoqhhaeteel sil hhei ngeelvae.'" 20 Faqlaoq e yaqhacheqzaq e cholyaeqhael onglci'ae, Yeheqhuaq e saeziq xilmael'ae gu biq hael laoq, aeqyoyoq e yaqhacheqzaq e cholyaeqhael kaol jyeqyaeqhael yaol laoqhaol'ae bi kihhaq do'li. 21 Ngeelfeiq, Yeheqhuaq e saeziq xilmael neemae onglci'ae maeq nyuqtongq deelhhei e cholyaeq tyuhael laoq, aeqyoyoq e yaqhacheqzaq e cholyaeqhael kaol jyeqyaeqhael yaol haeldye vae bi zholdeelsaeq.
22 Yeheqhuaq Moxi'ae gee biq: "Nol noq e aqlaq mael mqmae boq'ae tyuqdu hhei, kaol heelsiq mael Aijiq halza milcaeq'ae bi diq gaeyi, kaol Aijiq milcaeq e cholyaeqhael, jyeqyaeqhael e aeqhhaol taq'ae kaol haeldye e oqbye oqnyulhael taq'ae bi diq da yil." 23 Moxi zaeqngeeq mael mqmae boq'ae tyuqdu hhei, kaol Yeheqhuaq lye mqziq bi ziq kaol heelsiq bi diq gaeyi, aeqzaeq doq mael milcaeq vae leeqgae yi; Yeheqhuaq lye heelsiq mael Aijiq milcaeq taq'ae bi diq gaeyi. 24 Tyuqfu, heelsiq diq gae, heelsiq onglci'ae aeqzaeq dil doq mael, gu lal aeqmyel heeq hhae; Aijiq goqja zongltul hhei aeqnaol, halza milcaeq'ae xilnye laoqmyel maq peqlal gol'ae. 25 Aijiq halza milcaeq vae, heelsiq mael haeldye vae haelzhol cholyaeqhael'ae, kaol jyeqyaeqhael'ae diqcheeq dayil biq, haeldye e oqbye oqnyulhael vae eiq diq biq, kaol haeldye e aelbolhael eiq tyelco byel vae. 26 Yiqsellyel cholyaeqhael zhol e Geshan milcaeq vae heelsiq maqza dyul wae.
27 Faqlaoq cholyaeq yaol Moxi kaol Yallunq yaol gul laeq lye moqheilheil du hhei, kaol yoqhhaeteel'ae gee biq: "Ngael yaeqmeel qiq pu golsiq zonglpizaeq hhei yaevae. Yeheqhuaq laoq gongyil hhae; ngael kaol ngaeq e cholyaeqhael laoq duqlaq hhae. 28 Noteel Yeheqhuaq'ae geezaeq biq, Momil e mqziqziq mael kaol heelsiq mael zhee naeq vae kaol'ae. Ngael noteel yaol bi deel laeqngeel oq, noteel maeq zholdeelsaeq kael vae." 29 Moxi yoqhhaeq'ae gee biq: "Ngael milmae heeqmyel'ae zhoq duyil laol, ngaeq e aqlaq niqboq myel Yeheqhuaq'ae baqqei hhei biq maoq; kaol mqziq mael aeqdilmyel maeq ziq vae, heelsiq mael eiq maqza vae, kaol noq'ae milcaeq mael laoq Yeheqhuaq hhae lye bi loq. 30 Ngeelfeiq, nol kaol noq e yaqhacheqzaq e cholyaeqhael, ngael laoq noteel Momil Yeheqhuaq'ae zun eiq maeq zunjinl gu eiq maq gu myel wae siq lye loq lil." 31 Tyuqfu, ziq aelbol kaol dalmeq mael diqnu byel vae, dalmeq mael aldudu lal, ziq aelbol eiq alyiyi lal vae kaol'ae. 32 Ngeelfeiq, baeqjyelboq e meqziq niq sheel mael'ae laoq maeq diq biq'ae, tyuhael laoq maq dyeq du'lal siq kaol'ae. 33 Moxi Faqlaoq ae'lye deelsae hheikaol milmae heeqmyel vae duyil vae, kaol aqlaq niqboq myel Yeheqhuaq'ae baqqei hhei biq, kaol mqziq kaol heelsiq mael qye'li vae, vuq'yel mael eiq milcaeq taq'ae maeq xyega vae. 34 Faqlaoq laoq vuq'yel, heelsiq kaol mqziq mael qye'li vae lye mol hhei biq, kaol golsiq yol zonglpizaeq; yoqhhaeq kaol yoqhhaeq e yaqhacheqzaq e cholyaeqhael gilzuqmyel neehaha hhae. 35 Faqlaoq neehaha kaol Yiqsellyel cholyaeqhael yaol maeq bi deel nae, xilmael laoq, Yeheqhuaq Moxi e myeqbongq ae'lye haelgee e saeziq mael laoqmyel hhae.