Yeheqhuaq haeqpaeq maellye Aijiq cholyaeqhael'ae chenqfaq biq
8
Yeheqhuaq Moxi'ae gee biq: "Nol Faqlaoq e tyuqvae yil maoqhhae, kaol yoqhhaeq'ae gee biq: 'Yeheqhuaq xilnye gee: Ngaeq e cholyaeqhael yaol bi deel, kaol yoqhhaeteel yaol ngaeq'ae bi fuqsil lael. 2 Nol yoqhhaeteel yaol maeq bi deel kaollaoq, ngael aeqdilmyel haeqpaeq maellye noq e goqja e gilzuqmyel milcaeq mael'ae chenqfaq maoq. 3 Niqloq Lolbaeq e onglci'ae haeqpaeq bi zheeqbeqlal maoq; kaol haeqpaeq xihael da'lal laol noq e laoqhaol kaol nulyaeq vae do'li, kaol noq e ssuqhhal vae da'li, noq e yaqhacheqzaq e cholyaeqhael e laoqhaol vae do'li, kaol noq e cholyaeqhael e aeqhhaol taq'ae da'li, kaol noq e yuqduq kaol hhaeqxul nyel e ciqpenq vae do'li. 4 Haeqpaeq xihael laoq noq'ae, noq e cholyaeqhael'ae kaol noq e yaqhacheqzaq e cholyaeqhael e aeqhhaol taq'ae dilcheeq da'lal maoqlye hhae.'"5 Yeheqhuaq Moxi'ae gee biq: "Nol Yallunq'ae gee biq: 'Noq e aqlaq vae baq hhei e zaeqngeeq mael lolbaeq, lolgo, hongdeel holtaq'ae tyuqdu hhei, kaol haeqpaeqhael Aijiq milcaeq vae bi da beq lal maoqhhae.'" 6 Kaol Yallunq lye aqlaq mael Aijiq vae halza e eelcuqhael taq'ae tyuqdu hhei, kaol haeqpaeqhael da'lal vae, kaol Aijiq milcaeq vae zhol bongbyel vae. 7 Moqpil eiq yoqhhaeteel e moqpilpil maellye qiqsheel zongl yil vae, kaol haeqpaeqhael Aijiq milcaeq vae bi da beq lal vae. 8 Faqlaoq lye Moxi kaol Yallunq yaol gul laeq, gee: "Noteel Yeheqhuaq'ae haeqpaeq xihael yaol ngael kaol ngaeq e cholyaeqhael ae'lye bi deelsae hhei lye geezaeq biq, ngael laoq Yiqsellyel cholyaeqhael yaol Yeheqhuaq'ae zaelheel bi heel yil hhaeq." 9 Moxi Faqlaoq'ae gee biq: "Nol haelmillye gee kaol'eiq hhaeq'ae, ngael haeqfu shiqshen'ae nol kaol noq e yaqhacheqzaq e cholyaeqhael, kaol noq e cholyaeqhael gae'lye heeldoq bael gee, kaol haeqpaeqhael yaol zonglmye hhei, nol kaol noq e laoqhaol vae lye bi deelsae hhei, kaol Niqloq Lolbaeq vae maoq maeq bi zholdeelsaeq myel zongl mael ngaeq'ae geegaeq hhei laeq." 10 Yoqhhaeq gee: "Naeshoq." Moxi gee: "Noq e saeziq laoqmyel zongl, noq'ae ngaeteel e Momil Yeheqhuaq laoqmyel qiq hhaeq eiq maeq zhol'ae lye bi loq maoq, 11 Haeqpaeqhael laoq noq'ae, kaol noq e laoqhaol, noq e yaqhacheqzaq e cholyaeqhael kaol noq e cholyaeqhael ae'lye dilsae hhei, Niqloq Lolbaeq vae maoq maeq bi zholdeelsaeq'ae." 12 Tyulkaol, Moxi kaol Yallunq Faqlaoq ae'lye deelsae hheikaol duyil vae. Moxi laoq haeqpaeq silqinq mael gae'lye Yeheqhuaq'ae gul gae'lael aeqmyel geezaeq biq. Yeheqhuaq lye haeqpaeqhael bi da lal kaol Faqlaoq'ae zai'nanl bi yo'li kaol'ae. 13 Yeheqhuaq Moxi geezaeq laoqmyel zongl vae; kaol laoqhaol onglci vae, dyekaeq vae kaol haeldye vae zhol e haeqpaeqhael gilzuqmyel sil byel vae. 14 Kaol cholyaeqhael lye haeqpaeq mael qiqcu qiqcu'lye baqcu deelhhei vae, kaol milcaeq mael nulheiqlye wae. 15 Ngeelfeiq, Faqlaoq zaihuol mael hhal loq yil shevae lye mol hhei biq laol, neehaha ga'lal aeqmyel yoqhhaeteel gee mael'ae maeq naelhaeq nae, xilmael laoq, Yeheqhuaq haelgee laoqmyel hhae.
Yeheqhuaq keeqdil maellye Aijiq cholyaeqhael'ae chenqfaq biq
16 Yeheqhuaq Moxi'ae gee biq: "Nol Yallunq'ae gee biq: 'Noq e zaeqngeeq mael tyuqdu hhei, kaol milcaeq taq e haeqlyel mael'ae diq biq, kaol haeqlyel mael Aijiq halza milcaeq taq'ae keeqdil bi peqyil.'" 17 Kaol yoqhhaeteel xilnye zongl vae. Yallunq yoqhhaeq e aqlaq onglci e zaeqngeeq mael tyuqdu hhei, kaol milcaeq taq e haeqlyel mael'ae diq biq, kaol cholyaeq e aeqhhaol, jyeqyaeq e aeqhhaol taq'ae keeqdil zhol vae; kaol Aijiq halza milcaeq taq e haeqlyel mael keeqdil peq byel yil vae. 18 Molpilhael eiq yoqhhaeteel e moqpilpil maellye keeqdil zongldu hhei maoqlye zongl hhae, ngeelfeiq, maeq zongldu hhei ongl biq'ae; tyulkaol, cholyaeq e aeqhhaol kaol jyeqyaeq e aeqhhaol taq'ae gilzuqmyel keeqdil zhol vae. 19 Moqpilhael Faqlaoq'ae gee biq: "Xilmael laoq Momil e laqnyul'ae." Faqlaoq neehaha, Moxi kaol Yallunq gee mael maeq naelhaeq nae'ae, xilmael laoq, Yeheqhuaq haelgee laoqmyel hhae.
Yeheqhuaq halsa maellye Aijiq cholyaeqhael'ae chenqfaq biq
20 Yeheqhuaq Moxi'ae gee biq: "Nol mqshoq naqlye tullael, kaol Faqlaoq yiqsi'ae haoqtul deelhhei maoqhhae. Naelhaeq, Faqlaoq duyi kaol eeljyel vae keellael fu, nol yoqhhaeq'ae gee biq: 'Yeheqhuaq xilnye gee: Ngaeq e cholyaeqhael yaol bi deel, kaol yoqhhaeteel ngaeq'ae bi fuqsil lael. 21 Nol ngaeq e cholyaeqhael yaol maeq bi deel kaollaoq, naelhaeq, ngael laoq haelnaeq naeqmaemyel e halsa mael noq'ae, noq e yaqhacheqzaq e cholyaeqhael'ae kaol cholyaeqhael e aeqhhaol taq'ae bi loq dayi maoq, kaol noq e laoqhaol vae do'lal; kaol Aijiq cholyaeq e laoqhaol, kaol yoqhhaeteel e halza milcaeq vae gilzuqmyel haelnaeq naeqmaemyel halsa lye zhol bongbyel hhei. 22 Tyuqfu qiq nao, ngael laoq aeqdilmyel ngaeq e cholyaeqhael zhol e Geshan milcaeq mael zonglqyel du hhei, kaol tyuqvae haelnaeq naeqmaemyel halsa maeq bi zhol, xilnye laol, noq'ae halza milcaeq e onglci'ae ngael laoq Yeheqhuaq'ae lye bi loq maoq. 23 Kaol ngael jiul gil biq maoq, ngael ngaeq e Yiqsellyel cholyaeqhael kaol noq e cholyaeqhael zonglqyel du hhei maoq. Naeshoq laoq aeqdilmyel shenqjiq xilmael za'ae.'" 24 Kaol Yeheqhuaq laoq xilnye zongl vae. Haelnaeq naeqmaemyel e halsa Faqlaoq e laoqhaol, kaol aeqyoq e yaqhacheqzaq e cholyaeqhael e laoqhaol vae do'li; kaol Aijiq halza milcaeq vae zhol bong aeqwae; haelnaeq naeqmaemyel e halsa xihael lye Aijiq milcaeq mael milchiq milga zonglpeq vae.
25 Faqlaoq laoq Moxi kaol Yallunq yaol gul laeq, gee: "Yil gil, noteel saeqvae milcaeq vae noteel e Momil'ae zaelheel heel biq." 26 Moxi gee: "Xilnye zongl maq hoq'ae, ngaeteel laoq ngaeteel e Momil Yeheqhuaq'ae heel biq maoqlye e zaelheel mael laoq Aijiq cholyaeq'ae lye fu'li'laol hol biq kaol'ae; naelhaeq, ngaeteel Aijiq cholyaeq yiqsi ae'lye yoqhhaeteel hol e zaelheel mael heelda hhei'laol, yoqhhaeteel haqlo baq hheikaol ngaeteel'ae beiqsil laelkiq maeqngeel maeq? 27 Ngaeteel suq nao gaelmae deel kaol diqsheelleeldye vae yil, kaol yoqhhaeq ngaeteel'ae moqheil hael heil gil laeq laoqmyel, ngaeteel e Momil Yeheqhuaq'ae zaelheel heel biq maoq." 28 Faqlaoq gee: "Ngael noteel yaol bi deel laeqngeel, kaol diqsheelleeldye vae lye noteel e Momil Yeheqhuaq'ae zaelheel heel biq aeqmeel, ngeelfeiq, gaelmaolsae'lye maeq hhae deelmaol yil'ae. Noteel ngaeq'ae heeldoq bael gee laeq maoqhhae." 29 Moxi gee: "Naelhaeq, ngael noq e saeqvae lye duyil kaol Yeheqhuaq'ae geezaeq biq maoq, kaol naeshoq haelnaeq naeqmaemyel e halsahael Faqlaoq'ae, Faqlaoq e yaqhacheqzaq e cholyaeqhael'ae kaol Faqlaoq e cholyaeqhael ae'lye bi taelyil hhei; ngeelfeiq, Faqlaoq laoq Yiqsellyel cholyaeqhael yaol Yeheqhuaq'ae zaelheel maeq bi heel yil lye zaqgiq maq hha giq'ae." 30 Tyulkaol, Moxi Faqlaoq ae'lye deelsae hhei, kaol Yeheqhuaq'ae geezaeq yil biq. 31 Yeheqhuaq laoq Moxi geezaeq laoqmyel zongl vae, kaol haelnaeq naeqmaemyel halsahael Faqlaoq'ae, yoqhhaeq e yaqhacheqzaq e cholyaeqhael'ae kaol yoqhhaeq e cholyaeqhael ae'lye bi taelyil vae, qiq yaeq eiq maeq bi zholdeelsaeq'ae. 32 Ngeelfeiq, xi qiq pu Faqlaoq neeha yol ha wae siq, kaol Yiqsellyel cholyaeqhael yaol maeq bi deel nae'ae.