Yeheqhuaq aeldyel maellye Aijiq cholyaeqhael'ae chenqfaq biq
10
Yeheqhuaq Moxi'ae gee biq: "Nol Faqlaoq tyuqvae yil, ngael yoqhhaeq e neemae mael kaol yoqhhaeq e yaqhacheqzaq e cholyaeqhael e neemae mael neeha bi ha mael laoq, yoqhhaeteel onglci'ae ngaeq e shenqjiq mael zongldu hhei maoqlye kaollil, 2 Kaol noq yaol ngael Aijiq cholyaeqhael'ae guaeq'ei zongl gil biq mael, kaol yoqhhaeteel onglci'ae haelzongl e shenqjiqhael, noq e yaqyo kaol noq e yuqpaeqhael e naeqbol'ae bi geegaeq yil, kaol noteel'ae ngael laoq Yeheqhuaq'ae lye bi loq maoqlye lil." 3 Moxi kaol Yallunq laoq Faqlaoq tyuqvae keelyil, kaol yoqhhaeq'ae gee biq: "Xiboqlaiq cholyaeq e Momil Yeheqhuaq xilnye gee: 'Nol ngaeq e yiqsi'ae vuqduq maq baq'oq ga nae myel mael haeqfu'ae keel maoqlye laeq? Ngaeq e cholyaeqhael yaol bi deel, xilnye laol, ngaeq'ae hhae fuqsil laeq wae. 4 Nol ngaeq e cholyaeqhael yaol maeq bi deel nae kaollaoq, naelhaeq, naeshoq ngael aeldyelhael noq e mildongq miljyel vae keellye bi do'lal maoq, 5 Kaol milcaeq mael bi zholchiqzaeq byel hhei, kaol milcaeq dyel'eiq maeq mol laelkiq vae. Aeldyelhael lye heelsiq e aeqnaol'ae zadeel siq hael zaeq maoqlye hhae, zadeel siq e tyuhael laoq, noteel'ae taeq deelhhei biq mael ngeelvae; kaol haeldye vae hal dyeq e gilzuqmyel aelbol tyuhael zaeq maoqlye hhae. 6 Noq e laoqhaol, noq e gilzuqmyel yaqhacheqzaq e cholyaeqhael e laoqhaol kaol gilzuqmyel Aijiq cholyaeqhael e laoqhaol mael, gilzuqmyel aeldyel lye zhol bong maoqlye hhae; noq e aeqpyuq aeqdae kaol noq e aeqpyuq aeqdae e aeqpyuq aeqdaehael milcaeq taq'ae zhol fu ae'lye mael, yaeqnao keellye qiqzael eiq maeq mol gol'ae.'" Moxi zipol yil laol Faqlaoq ae'lye deelsae hheikaol duyil vae.7 Faqlaoq e yaqhacheqzaq e cholyaeq Faqlaoq'ae gee biq: "Cholyaeq xitaeq aedeeteel'ae zonglkyuq maoqlye zongl mael haeqfu keellye ngeel maoqlye hhaemaeq? Cholyaeq xihael yaol yoqhhaeteel e Momil Yeheqhuaq'ae bi fuqsil yil! Aijiq laoq myeyil goqbiq vae, nol maeq loq laeq wae siq maeq?" 8 Tyulkaol, Moxi kaol Yallunq yaol Faqlaoq'ae mol hoq lael lye bi gulhoq laeq. Faqlaoq yoqhhaeteel'ae gee biq: "Yil gil, noteel e Momil Yeheqhuaq'ae fuqsil yil gil! Ngeelfeiq, yil maoqlye hael laoq aeqsulsul maeq?" 9 Moxi gee: "Ngaeteel laoq cholmoqhael kaol yaqyoyaeqhael yaol sheeq hheikaol qiqgael yil gil maoq, kaol ngaeteel e yaqyohael, yaeqmiqhael kaol ngaeteel e aqciqhael aeqnuqhael yaol qiqgael sheeqyil maoq, xilnye zongl mael laoq ngaeteel Yeheqhuaq e zaeqnao zaeq yil maoqlye kaollil." 10 Faqlaoq yoqhhaeteel'ae gee biq: "Yeheqhuaq laoq noteel nyegael qiqgael baelzhol biq lye nyuqlil! Ngael noteel kaol noteel e yaeqguqhael yaol qiqgael bi yil kaollaoq, zaihuol mael laoq noteel yiqsi'ae za wae! 11 Gilzuqmyel maeq hhae yil'ae! Noteel heeqlo'lal e yaqyoyaeqhael Yeheqhuaq'ae fuqsil biq, xilmael laoq noteel geezaeqhael kaol'ae." Tyulkaol, Faqlaoq lye yoqhhaeteel yaol aeqyoyoq e yiqsi ae'lye lyeqdu biq vae.
12 Yeheqhuaq Moxi'ae gee biq: "Nol Aijiq milcaeq'ae noq e aqlaq mael tyuqdu hhei, kaol aeldyelhael Aijiq milcaeq vae bi da'lal, kaol milcaeq taq'ae heelsiq aeqnaol'ae zadeel siq e halza e zaelsiqhael bi zaeq." 13 Kaol Moxi Aijiq milcaeq vae yoqhhaeq e zaeqngeeq mael tyuqdu hhei; kaol Yeheqhuaq lye neeldu aelheiq e zaeqxil mael Aijiq milcaeq vae qiq nao qiq mil bi bo, mqshoq keellael laol, neeldu aelheiq e zaeqxil maellye aeldyelhael bo laeq vae. 14 Aeldyelhael Aijiq halza milcaeq vae da'lal, kaol Aijiq halza mildongq miljyel vae keellye loq ga deelhhei yi, zhee gu lal aeqmyel hhae; xuldyulmyel e aeldyel laoq saeq laefuq'ae maq du'lal gol, aeqgael eiq maq du'lal kiq'ae. 15 Aeldyelhael lye milcaeq mael zhol bong hhei, kaol milcaeq taq'ae naheiqlye wae. Aeldyelhael lye milcaeq taq e gilzuqmyel zaelsiqhael, kaol heelsiq aeqnaol'ae zadeel siq e aelbol taq e aelsiqhael gilzuqmyel zaeq byel vae. Aijiq halza milcaeq vae, aelbol haoq, haeldye e zaelsiqhael haoq, nyuljyeqlye teel dyel'eiq maq zadeelsaeq vae. 16 Tyulkaol, Faqlaoq nae'naemyel Moxi kaol Yallunq yaol gul laeq, gee: "Ngaeq lye noteel e Momil Yeheqhuaq'ae zonglzhil biq, kaol noteel vae eiq zonglzhil biq yaevae. 17 Yaeqmeel noq'ae geezaeq lil, xi qiq pu, ngaeq e golsiq mael yuanqliangl laeq, kaol noteel e Momil Yeheqhuaq'ae ngaeq yaol yaeqmeel qiq pu hhae sil myel ae'lye jiul du'laq lye bael geezaeq biq." 18 Kaol Moxi Faqlaoq ae'lye deelsae hhei vae, kaol Yeheqhuaq'ae geezaeq yi biq. 19 Yeheqhuaq lye neeldu aelheiq e zaeqxil mael neelgae aelheiq e zaeqxil xilmae bi peqlal, kaol aeldyelhael bosae hhei vae, kaol Hongqhaiqa vae bo do biq; kaol Aijiq halza mildongq miljyel vae keellye qiq yaeq dyel'eiq maeq zholdeelsaeq vae. 20 Ngeelfeiq, Yeheqhuaq lye Faqlaoq e neemae mael haelmillye ha goq laol haelmillye bi ha hhae, kaol Yiqsellyel cholyaeqhael yaol maeq bi deel nae'ae.
Yeheqhuaq nahongq maellye Aijiq cholyaeqhael'ae chenqfaq biq
21 Yeheqhuaq Moxi'ae gee biq: "Nol noq e aqlaq mael mqmae boq'ae tyuqdu hhei, kaol nahongq mael Aijiq milcaeq vae bi congqvuq deelhhei; nahongq xilmael laoq pa dyel'eiq papuq hhei ongl'ae." 22 Moxi yoqhhaeq e aqlaq mael mqmae boq'ae tyuq du hhei, naheiqlye e nahongq mael Aijiq halza milcaeq vae suq nao congqvuq aeqwae. 23 Suqnao onglci'ae, cholyaeq qiqhhaeq qiqhhaeq'ae maeq mol congl'ae, kaol qiq hhaeq eiq aeqyoyoq zhol myel ae'lye maeq tullael peq biq, kaol maeq deelsae peq biq'ae; ngeelfeiq, haelzhol e Yiqsellyel cholyaeqhael zhol myel vae laoq aeqcael za hhae. 24 Kaol Faqlaoq Moxi yaol gul laeq, gee: "Yil, Yeheqhuaq'ae fuqsil yil oq! Ngeelfeiq, noteel e aqciqhael kaol aeqnuqhael bi zholdeelsaeq maoqhhae. Noteel e yaeqguqhael laoq noteel nyegael qiqgael yil kael'ae." 25 Moxi gee: "Nol laoq aeqdilmyel zaelheel kaol Pebyel Zaelheel geiq e jyeqyaeq mael ngaeteel e aqlaq'ae cheelmoq hhei laeq maoqhhae, xilnye laol, ngaeteel laoq ngaeteel e Momil Yeheqhuaq'ae zaelheel hhae heel biq wae. 26 Ngaeteel e jyeqyaeqhael eiq ngaeteel nyegael qiqgael yil maoqlye hhae, kaol paeqxyeq qiq mal dyel'eiq maeq bi za deelsaeq yil, ngaeteel jyeqyaeqhael onglci ae'lye saelpodu hheikaol ngaeteel e Momil Yeheqhuaq'ae fuqsil biq maoqlye kaollil. Tyuqvae maeq keelyil laefuq'ae, ngaeteel aeqchee maellye Yeheqhuaq'ae fuqsil biq maoqlye maeq loq yae siq." 27 Ngeelfeiq, Yeheqhuaq lye Faqlaoq e neemae mael haelmillye ha goq laol haelmillye bi ha hhae, kaol Faqlaoq yoqhhaeteel yaol maeq bi deel nae'ae." 28 Faqlaoq Moxi'ae gee biq: "Ngaeq ae'lye deelsae laeq oq! Nol aeqyae'lye kei, ngaeq e maduq'ae haeq mol lael o, ngaeq e maduq mael mol e tyu qiq nao, nol hhae sil kaol'ae!" 29 Moxi gee: "Nol gee laoqmyel, ngael noq e maduq mael qiqzael eiq maeq mol vae!"