Aeqnaol naolli e zai'nanl
11
Yeheqhuaq Moxi'ae gee biq: "Ngael zaihuol mael Faqlaoq kaol Aijiq'ae zail qiq mal bi yo'li maoq siq, tyulnye laol, yoqhhaeq noteel yaol aeqdilmyel saeqvae lye bi deelsae laeq wae. Yoqhhaeq noteel yaol bi deel laeq fu, noteel yaol gilzuqmyel saeqvae lye deelsae hhei lye aeqdilmyel lyeq lael maoqlye hhae. 2 Nol Yiqsellyel cholyaeqhael e naeqbol'ae geegaeq hhei biq, kaol yoqhhaeteel haqyoyaeq haoq, haeqmiyaeq haoq, aeqsul eiq dongqpyeq'ae zhol e cholyaeq'ae pulsheel moqgoq, kaol pulziq moqgoq saelzaeq yil lye gee biq." 3 Yeheqhuaq lye Aijiq cholyaeqhael yaol aeqyoq e cholyaeqhael'ae bi fu'qiq'ongl'ae, kaol Moxi laoq Aijiq milcaeq vae, Faqlaoq e yaqhacheqzaq e cholyaeqhael kaol cholyaeqhael e ma'ne onglci'ae weiqdal she lye bi kei lil.4 Moxi gee: "Yeheqhuaq xilnye gee: 'Sul'ongl keellael maoq fu, ngael aeqdilmyel duyil kaol Aijiq vae deeldyu byel maoq. 5 Aijiq milcaeq vae haelzholhael, zongmae e duqtyel'ae zhol e Faqlaoq ae'lye mael giho gi e yaqhacheqzaq e haeqmiyaeq lye bo hhei e fuqbo yaqyo, kaol haelzhol e fuqbo jyeqyaeqhael gilzuqmyel hhae sil hhae. 6 Aijiq halza milcaeq vae aeqdilmyel nyul ho bonggaebyel hhae, xilnye mael laoq, yilkaefu maqza gol, aeqgael eiq maqza lalkiq'ae. 7 Ngeelfeiq, Yiqsellyel cholyaeqhael onglci'ae, cholyaeq haoq, jyeqyaeq haoq, aeqkeeq dyel'eiq yoqhhaeteel'ae maeq qyeq peq'ae, kaol noteel'ae Yeheqhuaq lye Aijiq cholyaeq kaol Yiqsellyel cholyaeq yaol zonglqyel du hhei hhae lye bi loq'ae.' 8 Noq'ae haelzhol e yaqhacheqzaq e cholyaeqhael gilzuqmyel ngaeq e saeqvae gaeyi maoqlye hhae, kaol ngaeq'ae vuqduqtongq yi, gee: 'Nol kaol gilzuqmyel noq'ae cho'lyeq e Yiqsellyel cholyaeqhael deelsae o!' Xilnye gee kaolmaoqlaol ngael maeq deelsae yil." Tyulkaol, Moxi zhee hol gae'lael aeqmyel Faqlaoq ae'lye deelsae hheikaol duyil vae.
9 Yeheqhuaq Moxi'ae gee biq: "Faqlaoq noteel e saeziq mael'ae aeqdilmyel maeq naelhaeq mael laoq, ngaeq yaol Aijiq milcaeq'ae maeqdaeqhhaeq e silqinq xihael haelnaeqmyel bi zongldu hhei maoqlye kaol'ae." 10 Moxi kaol Yallunq Faqlaoq yiqsi'ae haelzongl gol e maeqdaeqhhaeq e silqinq xihael zongldu hhei, ngeelfeiq, Yeheqhuaq lye Faqlaoq e neemae mael haelmillye ha goq laol haelmillye bi ha hhae, kaol Yiqsellyel cholyaeqhael yaol yoqhhaeq e milcaeq ae'lye maeq bi deelsae nae'ae.