Yeheqhuaq ngaeqhong duyil
12
Yeheqhuaq Aijiq milcaeq ae'lye Moxi kaol Yallunq'ae gee biq: 2 "Noteel baehae xi qiq siq laoq zen'yu geiq, kaol qiq hoq e laefuq fuqli baehae qiq siq geiq maoqhhae. 3 Noteel Yiqsellyel huilzhongl cholyaeqhael'ae moqheilheil biq, gee: Baehae xi qiq siq e cushiq'ae, aeqsul eiq aeqdae toq ae'lye aeqyol yolyaeq qiq haoq qiq yaeq xyeqzaq maoqhhae. 4 Qiq haoq lal haoq toq'ae cholyaeq maeq naeq, aqciq ciqyaeq qiq yaeq maeq zaeq byel ongl kaollaoq, dongqpyeq'ae zhol e cholyaeq nyegael hhaellaelmyel qiq yaeq xyeqzaq maoqhhae; noteel cholyaeq qiq hhaeq aeqyol yolyaeq haeldyul zaeq ongl maeq lye suqda fufu maoqhhae. 5 Noteel aeqyolhael paelsilmyel aqciqhael onglci ae'lye, canqjiq maeqngeel e qiq hoq e aeqyol yolpaeq qiq yaeq xyeqzaq maoqhhae, 6 Aqciq mael baehae xi qiq siq e shiqsil'ae taeq keel maoqhhae; tyuqfu qiq nao kiqsulkiqxeiq fu, Yiqsellyel huilzhongl cholyaeqhael laoq aeqyol yolyaeq mael xyeq maoqhhae. 7 Yoqhhaeteel siq teel baq hhei, kaol yoqhhaeteel aeqyol yolyaeq mael zaeq e laoqhaol oheiq e niqboq'ae, kaol oqtaq'ae deiqsu hhei maoqhhae. 8 Tyuqfu qiq mil, aeqyol yolyaeq saeqzil zaeq maoqhhae; aeqzaeq maellye pe hheikaol paofenq maqzoq e aqba kaol haeqjyeqlye oqbye nyegael qiqgael zaeq maoqhhae. 9 Maeq mao myel, paelsilmyel eelcuq maellye caq hhei myel maeq zaeq hhaeq'ae, aeqyol yolyaeq mael vuqduq ae'lye mael aeqkeel, kaol honglhongl longllongl laoqlye aeqzaeq maellye pe hheikaol zaeq maoqhhae. 10 Mqshoq'ae keellye teel eiq maeq hhae bi zadeel'ae; mqshoq'ae keellye zadeel siq kaollaoq, aeqzaeq maellye pe maoqhhae. 11 Noteel aeqyol yolyaeq mael xilnye zaeq maoqhhae: Haeqpipaqhhael'ae haeqpi paqda hhei, aeqkeel'ae paqno nuq da hhei, aqlaq'ae zaeqngeeq baq hhei, nae'naemyel zaeq. Xilmael laoq Yeheqhuaq e Yuq'yeqjyeq e zaelheel'ae. 12 Tyuqfu qiq mil ngael laoq Aijiq milcaeq vae deeldyu byel maoq, kaol Aijiq milcaeq vae gilzuqmyel fuqbohael, cholyaeq haoq, jyeqyaeq haoq gilzuqmyel xyeq maoqlye kaollil; ngael Aijiq milcaeq vae haelzhol e momilhael'ae shenqpanl mael zongl gil biq maoqlye lil. Ngael laoq Yeheqhuaq lil. 13 Siq xilmael laoq noteel zhol e laoqhaol holtaq'ae jilhaol diq da hhei maoqhhae; ngael siq xilmael zhoq mol hhei'laol, noteel ae'lye ngaeqhong duyil maoq. Ngael Aijiq milcaeq vae diq biq fu, zai'nanl mael noteel yaol zonglmye maoqlye noteel e aeqhhaol taq'ae maeq yo lael'ae."Paofenq Maqzoq Zaeqnao
14 Noteel xi qiq nao nyuqdeel maoqhhae, kaol hae qiqyil e cholyaeqhael eiq xi qiq nao laoq Yeheqhuaq e zaeqnao'ae lye geiq, kaol zaeqnao zaeq maoqhhae, kaol noteel e haeqfu keellye zadeel e tiaoqlil geiq maoqhhae. 15 Noteel paofenq maqzoq e aqba siq nao zaeq maoqhhae. Laefuq fuqli qiq nao laoq paofenq mael noteel e laoqhaol onglci ae'lye beiq duyil maoqhhae, kaol laefuq fuqli xi qiq nao ae'lye mael dilqiq tian keellye, aeqsul paofenq zoq e zaeqzael zaeq laol, yoqhhaeq yaol aeqdilmyel Yiqsellyel onglci ae'lye jyeqdael lye noga biq laoqmyel noga biq maoqhhae. 16 Laefuq fuqli qiq nao laoq senljyeq hhae lye zhol'eeq qiq nao'ae, dilqiq tian eiq senljyeq hhae lye zhol'eeq qiq nao lye za maoqhhae. Xi niq nao laoq qiqgiq mulhhael eiq maq hhae mul'ae, aeqsul eiq aeqyoyoq e zaeqzael mael paeqgaelsael meeq dyul wae, xilmael zongl maoqlaol baeqjyelboq e qiqgiq maeq hhae zongl. 17 Noteel Paofenq Maqzoq Zaeqnao zaeq maoqhhae, kaol ngael xi qiq nao laoq noteel e junduilhael yaol Aijiq milcaeq ae'lye sheeq duyil kaollil. Tyulkaol, noteel hae qiqyil e cholyaeqhael eiq zaeqnao xilmael zaeq maoqhhae, kaol haeqfu keellye zadeel e tiaoqlil geiq maoqhhae. 18 Zen'yu shiqsil e kiqsulkiqxeiq ae'lye mael, elshiq yiq e kiqsulkiqxeiq fu keellye, noteel paofenq maqzoq e aqba zaeq maoqhhae. 19 Noteel aeqsul toq vae eiq, siq nao onglci'ae laoq paofenq maq hha za'ae, aeqsul paofenq zoq e zaeqzael zaeq laol, baelzhol lael hael haoq, yoqmilyoq cholyaeqhael haoq, aeqdilmyel Yiqsellyel e zhol'eeq deelhhei e cholyaeqhael onglci ae'lye yoqhhaeq yaol jyeqdael lye noga biq laoqmyel noga biq maoqhhae lye kaol'ae." 20 Paofenq hal zoq e zaeqzael, noteel qiq mal eiq maeq hhae zaeq'ae; noteel haelzhol myel vae paofenq maqzoq e aqba zaeq maoqhhae."
Yuq'yeqjyeq zongltul hhei
21 Tyulkaol, Moxi lye Yiqsellyel e zhangqlaoqhael yaol gul'eeq laeq, kaol yoqhhaeteel'ae gee biq: "Noteel aeqyoq toq e cholyaeq gae'lye aeqyol yolyaeq lyeqdu hhei maoqhhae, kaol Yuq'yeqjyeq e aeqyol yolyaeq mael xyeq hhei. 22 Niuqxi haelsaeq qiq tu heil hhei, kaol ciqpenq onglci e siq mael zanl hhei, kaol ciqpenq onglci e siq mael oqtaq'ae kaol oheiq niqboq'ae zonglsu hhei. Noteel mqshoq'ae keellye qiq hhaeq eiq aeqyoyoq toq e oheiq ae'lye maq hha duyil'ae. 23 Yeheqhuaq laoq haeqvae lael'ee myel deeldyu byel hhei, kaol Aijiq cholyaeq yaol xyeq maoqlye hhae, yoqhhaeq siq mael oqtaq'ae kaol oheiq niqboq'ae za she'lye mol hhei biq kaollaoq, Yeheqhuaq laoq oheiq tyulmael ae'lye ngaeqhong duyil, kaol zonglmye qiq hhaeq yaol noteel e laoqhaol'ae maeq bi do'lal kaol maeq bi xyeq lal'ae. 24 Noteel minllinl xilmael zongl gaeyil maoqhhae, kaol noteel kaol noteel e houldailhael e haeqfu keellye zadeel e tiaoqlil geiq maoqhhae. 25 Aeqgael, noteel laoq Yeheqhuaq noteel'ae biq laqngeel lye gee e milcaeq tyuqvae do'li, noteel gui'liq xilmael laoqmyel zongl maoqhhae. 26 Noteel e yuqpaeq yuqnyulhael noteel'ae naelhaeq laeq: "Gui'liq xilmael aeqchee yilsi maeq?' 27 Noteel xilnye gee biq: 'Xilmael laoq Yeheqhuaq'ae Yuq'yeqjyeq vae heel biq e zaelheel'ae. Yeheqhuaq Aijiq cholyaeqhael'ae xyeq fu, yoqhhaeq Aijiq vae zhol e Yiqsellyel cholyaeq e laoqhaol ae'lye ngaeqhong duyil hhae, kaol ngaeteel aeqsul toq yaol eiq jiul laeq.'" Tyulkaol, cholyaeqhael vuqduq baq'oq ga hheikaol Yeheqhuaq'ae heel gil biq hhae. 28 Kaol Yiqsellyel cholyaeqhael zongl yil vae; yoqhhaeteel Yeheqhuaq lye Moxi kaol Yallunq'ae moqheilheil gil biq laoqmyel zongl vae.
Fuqbohael yaol xyeq biq vae
29 Sul'ongl keellael laol, Yeheqhuaq lye Aijiq milcaeq'ae gilzuqmyel fuqbohael, zongmae duqtyel vae zhol e Faqlaoq e fuqbo yaqyo ae'lye mael, cholyaeq koqlongl myel'ae koqlongl deelhhei e cholyaeq e fuqbo yaqyohael, kaol gilzuqmyel fuqbo e jyeqyaeqhael, gilzuqmyel xyeq byel hhei vae. 30 Faqlaoq, yoqhhaeq e yaqhacheqzaq e cholyaeqhael, kaol gilzuqmyel Aijiq cholyaeqhael, gilzuqmyel sul'ongl vae tullael vae. Aijiq vae nyulho bonggaebyel hhae, cholyaeq maeq sil myel qiq haoq eiq maeq zhol kaol'ae. 31 Tyu qiq mil, Faqlaoq lye Moxi kaol Yallunq yaol gul laeq, gee: "Tullael! Noteel kaol Yiqsellyel cholyaeqhael, gilzuqmyel ngaeq e cholyaeqhael ae'lye deelsae hheikaol duyil, kaol noteel gee laoqmyel, Yeheqhuaq'ae fuqsil yil gil biq oq! 32 Noteel haelgee laoqmyel, aqciqhael aeqnuqhael laoqlye sheeqyil, kaol ngaeq vae eiq geeqlongq bal biq laq!"
33 Aijiq cholyaeqhael laoq Yiqsellyel cholyaeqhael'ae tyuqvae milcaeq ae'lye wae deelsae gil oqlye lyeq biq, Aijiq cholyaeqhael "ngaeteel gilzuqmyel sil lael goqbiq yaevae" lye gee kaol'ae. 34 Yiqsellyel cholyaeqhael paofenq maqzoq e meqziq hhaeqxul heil hhei, kaol meqziq hhaeqxul nyel e ciqpenq mael aelhongq onglci'ae tocu hhei, kaol baqtaq'ae baqda hhei. 35 Yiqsellyel cholyaeqhael laoq Moxi e saeziq laoqmyel zongl yil vae, kaol Aijiq cholyaeqhael'ae geeqsheel moqgoq, pulsheel moqgoq kaol aelhongq saelzaeq gil biq hhae. 36 Kaol Yeheqhuaq lye Aijiq cholyaeqhael yaol aeqyoq e cholyaeqhael'ae bi fu'qiq'ongl'ae, kaol Aijiq cholyaeqhael laoq yoqhhaeteel hael saelzaeq laoqmyel heil gil biq vae. Kaol yoqhhaeteel lye Aijiq cholyaeqhael e moqgoq mael diqkoqzaeq biq vae.
Aijiq milcaeq vae lye duyi
37 Yiqsellyel cholyaeqhael Lanqsail ae'lye deelsae hheikaol deel, kaol Shuge vae yil gil'ae. Yaeqguqhael maeq bael gee do myel, keelyoqyoq e haqyoyaeq koqqyel tongl (600000) lael lye hhae. 38 Baeqjyelboq minqcuq e cholyaeq eiq haelnaeqmyel bal zoq'ae, kaol haelnaeqmyel jyeqyaeq, aqciqhael kaol aeqnuqhael yoqhhaeteel nyegael qiqgael da'li gil hhae. 39 Yoqhhaeteel Aijiq ae'lye heil duyi e meqziq hhaeqxul mael paofenq maqzoq e aqba pe du hhei. Meqmil xilmael laoq maeq zheeqlael yo'ae; yoqhhaeteel yaol Aijiq ae'lye nae'naemyel deelsae hhei lye lyeq biq, kaol maeq hhae dan'goq biq kaol aeqyoyoq'ae zaeq e paeqgael maeq hhae sael biq kaol'ae.
40 Yiqsellyel cholyaeqhael Aijiq vae yuqhael suqqyel (430) hoq zhol aeqwae. 41 Yuqhael suqqyel (430) hoq zhol bong e tyuqfu qiq nao, Yeheqhuaq e haelzhol e junduil Aijiq milcaeq ae'lye duyi vae. 42 Tyu qiq mil laoq Yeheqhuaq gae'lye milsonglsongl e mqkiq'ae, yoqhhaeq lye yoqhhaeteel yaol Aijiq milcaeq ae'lye sheeq duyi biq; Xilmael laoq Yiqsellyel cholyaeqhael hae qiqyil eiq Yeheqhuaq gae'lye milsonglsongl maoq e mqkiq'ae.
Yuq'yeqjyeq e tiaoqlil mael
43 Yeheqhuaq Moxi kaol Yallunq'ae gee biq: "Yuq'yeqjyeq e tiaoqlil mael laoq xilnye hhae: Baeqjyelboq minqcuq laoq aeqyol yolyaeq saeqzil xilmael maeq hhae zaeq'ae. 44 Ngeelfeiq, noteel lye pulziq maellye vul laq e, yeqgae gui'liq zongl gol e yaqhacheqzaq e cholyaeqhael laoq hhae zaeq'ae. 45 Baelzhol lael e cholyaeq kaol hhaeqpyuq heil biq e aeqhael mulyaeq laoq maeq hhae zaeq'ae. 46 Laoqhaol qiq ssul onglci'ae zaeq maoqhhae, saeqzil mael laoqhaol nildu'ae teel eiq maeq hhae heil duyil'ae, saeq'yuq mael qiq kongq eiq maeq hhae zonglco hhei'ae. 47 Yiqsellyel huilzhongl cholyaeqhael laoq gilzuqmyel gui'liq xilmael zongl maoqhhae. 48 Nilpu cholyaeq noq tyuqvae baelzhol, kaol Yeheqhuaq'ae Yuq'yeqjyeq gol biq maoqlye kaollaoq, yoqhhaetoq e haelzhol e haqyoyaeqhael laoq laefuqmyel yeqgae gui'liq zongl maoqhhae, kaol yoqhhaeq yaol yoqmilyoq e cholyaeq'ae lye bi geiqzaq, kaol yoqhhaeq yaol gui'liq xilmael hhae bi bael zongl. Ngeelfeiq, yeqgae gui'liq maeq zongl gol hael laoq qiq hhaeq eiq aeqyol yolyaeq saeqzil xilmael maeq hhae zaeq'ae. 49 Yoqmilyoq e cholyaeq kaol noteel onglci'ae baelzhol lael e nilpu cholyaeqhael hhaellaelmyel tiaoqlil xi qiq mal zongl maoqhhae." 50 Tyulkaol, Yiqsellyel cholyaeqhael laoq Yeheqhuaq lye Moxi kaol Yallunq'ae moqheilheil gil biq laoqmyel zongl yil gil vae. 51 Tyuqfu qiq nao, Yeheqhuaq lye Yiqsellyel cholyaeqhael yaol yoqhhaeteel e junduil laoqmyel Aijiq ae'lye sheeq duyi vae.