Luldeq Jil
Yiqlilmiqlel qiq haoq myel Moqya'ae yil vae
1
Shenqpanl e zhiqmoq goqja'ae guanqliq fu, Yoqdal milcaeq vae hoqlaq maeqmeeq qiqgiq zaeq eiq maqza. Cholyaeq qiq hhaeq qiq haoq myel sheeq hheikaol, Yoqdal milcaeq e Boqlilhenq ae'lye Moqya milcaeq vae yil, kaol tyuqvae bael zholgae hhei gil vae. 2 Xitaeq e cholmil mael Yiqlilmiqlel lye gul biq hhae, haeqmiq e cholmil mael Naq'oqmiqa lye gul biq hhae, yaqyo niq nulhhaeq e cholmil mael Maqlunq kaol Ji'lianq lye gul biq hhae. Gilzuqmyel Yoqdal milcaeq e Boqlilhenq e Yiqfaqta cholyaeq'ae. Yoqhhaeteel Moqya milcaeq vae keelyil laol, tyuqvae zholgae hhei gil vae. 3 Aeqnaol, Naq'oqmiq e haqyo Yiqlilmiqlel sil hhei'laol, yoqhhaeq kaol yaqyo niq nulhhaeq myel beiqdeelsaeq biq. 4 Yoqhhaeteel Moqya milcaeq e yaeqmiyaeq yaol sheeqtoq hheikaol haeqmiq mul hhae, qiq hhaeq e cholmil mael Oq'eqba lye gul biq hhae, qiq hhaeq laoq Luldeq lye gul biq hhae. Yoqhhaeteel tyuqvae qyel hoq laellye zhol vae. 5 Aeqnaol, Maqlunq kaol Ji'lianq niq nulhhaeq eiq sil vae, Naq'oqmiq'ae yaqyo niq nulhhaeq myel maeq zhol biq vae, haqyo eiq maeq zhol myel zholdeelsaeq hhae.Naq'oqmiq kaol Luldeq Boqlilhenq'ae qiqgael hoqli
6 Naq'oqmiq Moqya milcaeq vae zhol fu, Yeheqhuaq yoqhhaeq e cholyaeqhael'ae fupol biq, zaelsiq heilmoq biq'ae lye gaeq li biq, yoqhhaeq aeqyoq e keeqmae niq nulhhaeq yaol sheeq hheikaol, Moqya milcaeq ae'lye hoqli. 7 Yoqhhaeq zhol myel milcaeq ae'lye deelsae hheikaol deel vae, keeqmae niq nulhhaeq yoqhhaeq nyegael Yoqdal milcaeq vae hoq keelli maoqlye hhae. 8 Naq'oqmiq yoqhhaeq e keeqmae niq nulhhaeq'ae gee biq: "Yil gil, noteel nomae toq'ae hoqyil gil. Yeheqhuaq noteel'ae neemae maeqpaelmyel gaeq biq lye nyuqlil, noteel ngael kaol ngatoq e sil e cholyaeqhael'ae zhee meeq laeq laoqmyel bi ngeel. 9 Yeheqhuaq noteel'ae haqyo haelmeeqlye bael saelpo hhei biq lye nyuqlil." Tyulnye laol, Naq'oqmiq yoqhhaeteel'ae myeqchilnuq biq, kaol yoqhhaeteel yotyel haeqheemyel nyul gil'ae. 10 Keeqmaehael gee: "Maeq hhaeq'ae, ngaeteel haelmillyekaol eiq, noq nyegael noq e minqcuq e cholyaeqhael zael'ae bal yi maoq." 11 Naq'oqmiq gee: "Ngaeq e yaeqmiqhael! Noteel hoqyil gil. Aeqcheekaol ngaeq nyegael bal hoqli laeq? Ngaeq e oqma onglci'ae yaqyo zoq, kaol noteel e haqyo hha geiq siq maeq? 12 Yil gil! Ngaeq e yaeqmiqhael! Noteel hoqyil gil. Ngael yaeqmoqmoq yaevae, haqyo maeq saelpo hhei ongl yaevae. Aeqdilmyel ngael panlwangl za siq kaol yaeqmil haqyo qiq hhaeq saelpopuq hheikaol yaqyo bogae hheikaol eiq, 13 Noteel yoqhhaeteel heeqda lal doqzaeq ongl lilmaeq? Noteel yoqhhaeteel'ae doq deelhhei kaol maeq mulzaeq vae maeq? Maeq hhaeq'ae! Ngaeq e yaeqmiqhael o, Yeheqhuaq aqlaq baqqei hheikaol ngaeq'ae tyel laeq, ngael noteel taq'ae hhael nyuqsaeq yae.
14 Yoqhhaeteel yotyel haeqheemyel yol nyul gil'ae. Oq'eqba ssuqmae vae myeqchilnuq biq kaol hoqli vae. Ngeelfeiq, Luldeq laoq Naq'oqmiq nyegael qiqgael kaeqmaoq deelhhei laoqmyel hhae, kaol Luldeq yoqhhaeq ae'lye maeq deelsae nae. 15 Naq'oqmiq gee: "Nol fu, nocu yoqhhaeq e minqcuq e cholyaeqhael zael'ae kaol momil zael'ae hoqli vae. Nol eiq nocu nyegael bal hoqyil." 16 Luldeq gee:
"Nol ngaeq'ae hoqyil lye,
deelsae hhei lye haeq gee laeq.
Nol haeqvae keelyil laol,
ngael eiq haeqvae bael keelyil maoq;
nol haeqvae haq laol,
ngael eiq haeqvae bal haq maoq;
noq e minqcuq eiq,
ngaeq e minqcuq ngeelvae;
noq e Momil laoq,
ngaeq e Momil ngeelvae;
17 Nol haeqvae sildeel laol,
ngael eiq haeqvae bael sil maoq,
kaol tyuqvae bal baqduqm maoq.
Aedee niq nulhhaeq sil kaolmaoqlaol,
maeq eetael ongl'ae;
ngael deelsae hhei kaollaoq,
Yeheqhuaq ngaeq'ae ongljyeqmyel chenqfaq lal biq lye nyuqlil."
18 Naq'oqmiq Luldeq haelmillyekaol eiq, yoqhhaeq nyegael bal hoqyil maoqlye zongl hhae lye fu do'li biq laol, qiqgiq lye maeq gee vae.
19 Yoqhhaeteel hhaellaelmyel hoqli vae, Boqlilhenq vae keellael. Yoqhhaeteel keelli fu, tyuqvae milmae heeqmyel gilzuqmyel cholyaeqhael, yoqhhaeteel yaol mol hhei biq, kaol gee bonggaebyel'ae. Cholhae aeqmaehael gee: "Xitaeq aeqdilmyel Naq'oqmiq maeq?" 20 Naq'oqmiq yoqhhaeteel'ae gee biq:
"Ngaeq'ae Naq'oqmiq lye haeq gul laeq,
Maqlab lye gul laeq,
Hhael'onglzaeq zaeqli qiq hhaeq,
ngaeq'ae teel eiq maeqmeeq laeq'ae.
21 Ngael bong'lye duyil aeqlil,
Yeheqhuaq ngaeq'ae qiqgiq maqza myel bi hoqlal laq.
Yeheqhuaq ngaeq'ae teel eiq maeqmeeq laeq'ae,
Hhael'onglzaeq zaeqli qiq hhaeq,
ngaeq'ae teel eiq maeqmeeq laeq.
Noteel aeqcheekaol ngaeq'ae Naq'oqmiq lye gul gil laeq oqyilsiq maeq?"
22 Naq'oqmiq xilnye hoqlal hhae. Yoqhhaeq e keeqmae Moqya milcaeq e yaeqmiyaeq Luldeq, yoqhhaeq nyegael Moqya milcaeq ae'lye bal hoqlal. Tyuqfu dalmeq yeqzaeq beibei fu, yoqhhaeteel Boqlilhenq vae hoq keellal vae.