Yoshuyal Shiljianl vae aeqnaol naolli e qiq pu saeziq gee mael
24
Yoshuyal lye Yiqsellyel e zhipailhael e cholyaeqhael gul'eeq hheikaol Shiljianl vae yil, yoqhhaeq lye Yiqsellyel e zhangqlaoq, yoheeq, shenqpanl e zhiqmoq kaol zhiqmoq yoheeqhael yaol gul laeq; kaol yoqhhaeteel gilzuqmyel Momil e yiqsi'ae haoqtul deelhhei. 2 Yoshuyal cholyaeqhael'ae gee biq: "Yiqsellyel e Momil Yeheqhuaq xilnye gee: 'Yilkaeaeqnao noteel e aeqpyuq aeqdae, Yalboqlahanl kaol Naqhel e aeqdae Ta'la, Yolfa'ladiq Lolbaeq yulboq vae zhol, kaol baeqjyelboq e momilhael'ae fuqsil hhae. 3 Ngaeq lye noteel e aeqpyuq aeqdae Yalboqlahanl yaol Yolfa'ladiq Lolbaeq yulboq ae'lye sheeq du'laq biq, kaol yoqhhaeq yaol sheeq hheikaol Ja'nanq halza milcaeq vae bi deeldyu hhei, kaol yoqhhaeq'ae houldail haelnaeqmyel bi zhol. Ngaeq lye Yiqsaq yaol yoqhhaeq'ae biq hhei biq, 4 Ngaeq lye Yaqgel kaol Yiqsaoq yaol Yiqsaq'ae biq hhei biq, kaol Xi'eq Geeqzhoq mael Yiqsaoq'ae biq hhei biq kaol zaeqdye halngeiq bi geiq. Ngeelfeiq, Yaqgel kaol yoqhhaeq e houldailhael laoq Aijiq vae gaeyil hhei. 5 Ngaeq lye Moxi kaol Yallunq yaol moqheilheil du hhei, kaol ngael Aijiq milcaeq vae haelzongl laoqmyel, zai'nanl maellye Aijiq'ae diq biq, aeqnaol, noteel yaol sheeq duyi. 6 Ngaeq lye noteel e aeqpyuq aeqdae yaol Aijiq ae'lye sheeq duyi, kaol noteel Hongqhaiq vae keellael vae. Aijiq cholyaeqhael daqzhangldiq e cheziq kaol aeqmaoq ziq e dangbinkei e cholyaeq sheeq hheikaol, noteel e aeqpyuq aeqdae'ae Hongqhaiq vae lyeqkeel biq. 7 Noteel e aeqpyuq aeqdae laoq Yeheqhuaq'ae nyuqsaeq lael aeqmyel geezaeq biq laol, yoqhhaeq nahongq maellye noteel kaol Aijiq cholyaeq yaol geqtael hhei vae, kaol eeldeel deelmae eelcuq mael Aijiq cholyaeq boq'ae bi yul yil, kaol yoqhhaeteel yaol naqvuq biq vae. Ngael Aijiq vae haelzonglhael, noteel aeqyoyoq e ma'ne mael mol gol vae. Noteel diqsheelleeldye vae haeldyul dyulmae naohaeq zhol aeqwae. 8 Ngaeq lye noteel yaol Yoqdanl Lolbaeq e neeldu aelheiq Yalmoqlil cholyaeq haelzhol e milcaeq vae sheeq keelli. Yoqhhaeteel noteel nyegael daqzhangldiq, ngaeq lye yoqhhaeteel yaol noteel e aqlaq'ae eemoq biq, kaol noteel yoqhhaeteel e milcaeq mael hhamul kaol zaeqdye halngeiq geiq vae. Ngael eiq noteel yiqsi ae'lye yoqhhaeteel yaol zonglmye biq aeqwae. 9 Tyuqfu, Moqya zongmae Xiboq e yaqyo Ba'lel tullael, kaol Yiqsellyel cholyaeq'ae diq lael, kaol cholyaeq yaol moqheilheil du hheikaol Biq'eq e yaqyo Ba'lanq yaol bi gul laeq, kaol noteel'ae doqchiq bi gee lael. 10 Ngeelfeiq, ngael Ba'lanq e saeziq mael maeq naelhaeq goq yae, tyulkaol, yoqhhaeq daoldaolmyel noteel'ae maqqyemyel geeqlongq biq biq. Xilnye laol, ngaeq lye noteel yaol yoqhhaeq e aqlaq ae'lye jiul du hhei. 11 Noteel Yoqdanl Lolbaeq'ae guq li vae, kaol Ye'lilge vae keellael. Ye'lilge cholyaeq, Yalmoqlil cholyaeq, Biqlilxiq cholyaeq, Ja'nanq cholyaeq, Hel cholyaeq, Geqjasa cholyaeq, Xiveil cholyaeq kaol Yebulsi cholyaeqhael gilzuqmyel noteel nyegael daqzhangldiq, ngeelfeiq, ngaeq lye yoqhhaeteel yaol noteel e aqlaq'ae eemoq biq aeqwae. 12 Ngaeq lye doqlal kiq e naelgola mael noteel e laefuq'ae moqheilheil du hhei, kaol Yalmoqlil cholyaeq e zongmae niq nulhhaeq yaol noteel yiqsi ae'lye lyeqdu hhei, noq e maejyel maellye maeqngeel, noq e kamaq maellye eiq maeqngeel'ae. 13 Ngaeq lye noteel'ae biq hhei biq e milcaeq mael, noteel lye dedeiq hhei e maeqngeel'ae; ngaeq lye noteel'ae biq hhei biq e milmae heeqmyel mael, noteel lye cutul hhei maeqngeel'ae. Ngeelfeiq, noteel tyu onglci vae hhae zhol, kaol noteel lye kae hhei maeqngeel e siqbaq aeqhael e aelsiq, kaol zhoqcae aeqhael e aelsiq mael hhae zaeq.'14 "Yaeqmeel noteel Yeheqhuaq'ae zun eiq zunjinl gu eiq gu, neemae qiqsiqmyel zaqgiq maqgiq e neemae lye yoqhhaeq'ae fuqsil, kaol noteel e aeqpyuq aeqdaehael Yolfa'ladiq Lolbaeq yulboq kaol Aijiq vae fuqsil e momilhael yaol beiqgae hhei, kaol Yeheqhuaq'ae fuqsil maoqhhae. 15 Noteel Yeheqhuaq'ae fuqsil mael maeqmeeq ae'lye kei kaollaoq, yaeqnao ae'lye fuqsil maoqlye e momil yaol nyuqmeeq hhei: Noteel e aeqpyuq aeqdae Yolfa'ladiq Lolbaeq yulboq vae fuqsil e momilhael laeq? Paelsilmyel noteel haelzhol e milcaeq e Yalmoqlil cholyaeq e momilhael laeq? Ngael kaol ngatoq laoq, ngaeteel aeqdilmyel Yeheqhuaq'ae fuqsil maoq."
16 Cholyaeqhael geehoq biq: "Ngaeteel aeqdilmyel Yeheqhuaq ae'lye maeq deelsae yil, kaol baeqjyelboq e momilhael'ae maeq fuqsil yil. 17 Ngaeteel e Momil Yeheqhuaq yilkaefu ngaeteel kaol ngaeteel e aeqpyuq aeqdae yaol hhaeq'ongq ongqzaeq e cholyaeq geiq e Aijiq milcaeq ae'lye sheeq duyi laq, kaol ngaeteel e ma'ne yiqsi'ae maeqdaeqhhaeq e shenqjiq tyuhael zongldu hhei, kaol ngaeteel hael deel e gilzuqmyel gaelmae taq'ae, kaol hael deelpol duyil e minqcuqhael onglci vae ngaeteel'ae ocongq laeq kaol'ae. 18 Yeheqhuaq lye minqcuqhael kaol saeqvae milcaeq vae zhol e Yalmoqlil cholyaeqhael yaol gilzuqmyel ngaeteel yiqsi ae'lye lyeqdu hhei. Tyulkaol, ngaeteel eiq Yeheqhuaq'ae fuqsil maoq, yoqhhaeq laoq ngaeteel e Momil kaol'ae."
19 Yoshuyal cholyaeqhael'ae gee biq: "Noteel Yeheqhuaq'ae fuqsil maoqlye maeq ongl'ae, yoqhhaeq laoq senljyeq e Momil kaol'ae. Yoqhhaeq laoq heiqcilnael e Momil'ae, kaol noteel e zonglzhil mael kaol golsiq mael aeqdilmyel maq shelmianq laeq'ae. 20 Noteel Yeheqhuaq yaol beiqdeelsaeq, kaol baeqjyelboq minqcuq e momilhael'ae fuqsil yil kaollaoq, Yeheqhuaq geeqlongq mael noteel'ae bi yo'lael aeqnaol'ae, polhoqlael kaol zai'nanl mael noteel'ae bi yo'lael, kaol noteel yaol zonglmye hhei." 21 Cholyaeqhael Yoshuyal'ae gee biq: "Maeqngeel, ngaeteel Yeheqhuaq'ae fuqsil maoq." 22 Yoshuyal cholyaeqhael'ae gee biq: "Noteel Yeheqhuaq'ae fuqsil maoqlye nyuqmeeq vae laol, yoqhhaeq'ae fuqsil maoqhhae, kaol noteel aeqyoyoq'ae zoqzenlzaeq gil!" Yoqhhaeteel gee: "Ngaeteel zoqzenl hhaeq." 23 "Yaeqmeel, noteel laoq noteel onglci e baeqjyelboq minqcuq e momilhael beiqgae hhei, kaol neemae qiqsiqmyel Yiqsellyel e Momil Yeheqhuaq boq'ae pollael maoqhhae." 24 Cholyaeqhael Yoshuyal'ae gee biq: "Ngaeteel laoq ngaeteel e Momil Yeheqhuaq'ae fuqsil maoq, kaol yoqhhaeq e saeziq mael naelhaeq maoq." 25 Tyuqfu qiq nao, Yoshuyal cholyaeqhael nyegael geemeeq deelhhei, kaol Shiljianl vae yoqhhaeteel'ae tiaoqlil kaol faqdianq gee deelhhei biq. 26 Yoshuyal lye saeziq xihael Momil e lilfaq suqhhaq taq'ae cuda hhei, kaol haqlo lomae qiq siq baq hhei, kaol Yeheqhuaq e senlsoq e dongqpyeq e aeqpoq aelbol holhhaq vae baqtul deelhhei. 27 Yoshuyal cholyaeqhael'ae gee biq: "Fu hhei, haqlo xilmael ngaeteel'ae zoqzenl bael kei kael'ae, yoqhhaeq Yeheqhuaq ngaeteel'ae moqheil hael heil laeq e gilzuqmyel saeziq mael gaeq vae kaol'ae; haqlo xilmael noteel'ae zoqzenlkei maoqlye hhae, aeqgael noteel laoq noteel e Momil'ae neemae xyelpupu maeqhe." 28 Tyulkaol, Yoshuyal cholyaeqhael'ae deel hoq gil oq lye gee biq, kaol haetaeq eiq aeqyoyoq e zaeqdye halngeiq za e milcaeq vae hoqyil vae.
Yoshuyal kaol Yiqlilyalsaq sil vae
29 Silqinq xilmael aeqnaol, Yeheqhuaq e yaqhacheqzaq e cholyaeq, Nenl e yaqyo Yoshuyal sil vae, tyuqfu, yoqhhaeq qiqhael qiqqyel hoq zoq vae. 30 Yiqsellyel cholyaeq lye yoqhhaeq yaol aeqyoyoq e zaeqdye halngeiq onglci vae, Yiqfaqlianq geeqzhoq naeq e milcaeq e Tinqnaq Xi'la, Jashiq Geeqzhoq e beqbian vae baqduqm deelhhei biq. 31 Yoshuyal milcaeq taq'ae zhol siq e naohaeq'ae kaol yoqhhaeq sil hhei aeqnaol, Yeheqhuaq Yiqsellyel cholyaeq gae'lye haelzongl e gilzuqmyel silqinq mael loq e zhangqlaoq tyuhael milcaeq taq'ae zhol siq fu, Yiqsellyel cholyaeqhael Yeheqhuaq'ae fuqsil'ae.
32 Yiqsellyel cholyaeq lye Aijiq ae'lye heil laeq e Yoqsel e saeq'yuq mael Shiljianl vae, yilkaefu Yaqgel lye pulziq qiqhael lye, Shiljianl e aeqdae Hamoq e yaqyohael ae'lye vul pol hhei e aeqhael vae baqduqm biq; aeqhael xilmael Yoqsel e houldailhael e zaeqdye halngeiq peqlal vae.
33 Yallunq e yaqyo Yiqlilyalsaq eiq sil vae, kaol yoqhhaeteel lye yoqhhaeq yaol yoqhhaeq e yaqyo Fei'niqha hhamul hhei biq e Yiqfaqlianq geeqzhoq naeq e milcaeq e geeqzhoq zhoqyaeqb vae baqduqm deelhhei biq.