Luldeq Boasi e haeldye vae meqziq zaelhhael yaezaeq
2
Naq'oqmiq e haqyo Yiqlilmiqlel toq e qiqzonglyaeq e paeqyaeq qiq hhaeq zhol'ae, cholmil mael Boasi lye gul biq hhae, aeqsul eiq yoqhhaeq yaol loq'ae, yoqhhaeq eiq yoha hamae qiq hhaeq'ae. 2 Moqya milcaeq e yaeqmiyaeq Luldeq Naq'oqmiq'ae gee biq: "Nol ngaeq'ae haeldye vae bi yil laq. Ngael aeqsul e ma'ne yiqsi ae'lye endianq hhamul hhei laq laol, ngael tyutaeq e aeqnaolboq'ae meqziq zaelhhael yaezaeq maoq." Naq'oqmiq gee: "Yaeqmiq o, nol yil maoq yil aeqmeel." 3 Tyulkaol, Luldeq yil vae, haeldye vae keelyil laol, meqziq yeq hael e aeqnaolboq'ae meqziq zaelhhael yaezaeq. Tyuqfu, yoqhhaeq Yiqlilmiqlel qiqzonglyaeq e Boasi toq e haeldye vae keelli. 4 Tyuqfu, Boasi laoq Boqlilhenq ae'lye hoqlal, meqziq yeq hael vae gee biq: "Yeheqhuaq noteel nyegael qiqgael baelzhol biq lye nyuqlil." Yoqhhaeteel geehoq biq: "Yeheqhuaq noq'ae geeqlongq biq biq lye nyuqlil." 5 Boasi meqziq yeq hael'ae fu'qyezaq qiq hhaeq'ae naelhaeq biq: "Yultaeq aeqsul toq e yaeqmiq maeq?" 6 Meqziq yeq hael'ae fu'qyezaq e qiq hhaeq yoqhhaeq'ae geehoq biq: "Yoqhhaeq laoq Naq'oqmiq nyegael Moqya milcaeq ae'lye bal hoqlal e Moqya milcaeq e yaeqmiyaeq'ae. 7 Yoqhhaeq ngaeq'ae gee gol laq vae: 'Ngaeq'ae meqziq yeq hael e aeqnaolboq'ae bi cho'lyeq laeq, kaol meqto kaeqlaeq vae leeqgae deelhhei e meqziq zaelhhael teel bi bael yaezaeq laeq.' Yoqhhaeq mqshoq ae'lye mael yaeqmeel keellye saeqvae zhol hhae, haelcul'ae hhaeqnaeq qiqlaq maoq maeq naeq yo'ae."Boasi Luldeq'ae zhee meeq biq
8 Boasi Luldeq'ae gee biq: "Yaeqmiq o, nol ngael gee mael naelhaeq. Ochoq e haeldye'ae meqziq zaelhhael haeq yaezaeq yil oq, saeqvae lye qiqgael haq yil oq, nol duqlye ngaeq e yaqhacheqzaq e haeqmiyaeqhael nyegael qiqgael baelzhol. 9 Nol yoqhhaeteel haeldye hae qiq koq'ae meqziq yeq hhaemaeq lye fu deelhhei, kaol yaqhacheqzaq e haeqmiyaeqhael nyegael bal yil. Ngael yaqhacheqzaq e cholyaeqhael'ae noq'ae haeq zonglkyuq biq lye moqheilheil yo biq aeqwae. Nol eelcuq suq fu, eelbongq za myel vae yil, meqziq yeq e cholyaeq lye baq laq e eelcuq mael dol yil." 10 Luldeq laoq naeqdeel mael milcaeq'ae tongqmaoq yil aeqmyel yoqhhaeq'ae gee biq: "Ngael baeqjyelboq milcaeq e cholyaeq lil, haelmillyekaol noq e ma'ne yiqsi ae'lye endianq hhamul, kaol fuchoq laeq lilmaeq?" 11 Boasi geehoq biq: "Noq e haqyo sil myel ae'lye aeqnaol laoq, nol noq e ssuqmae gae'lye haelzonglhael, kaol noq e aeqdae aeqmae kaol nol dyeqlal e milcaeq ae'lye deelsae laeq, kaol qiq hhaeq yaol eiq maeq loq myel cholyaeqhael onglci'ae lael, silqinq xihael cholyaeq lye ngaeq'ae gilzuqmyel geegaeq hhei laeq wae. 12 Nol haelzonglhael haelmillye laol, Yeheqhuaq eiq noq'ae haelmillye meeq biq lye nyuqlil; nol Yeheqhuaq Yiqsellyel e Momil e aeldongl holhhaqboq'ae lael laol, yoqhhaeq noq'ae aeqchee eiq maqmul'ongl myel biq biq lye nyuqlil." 13 Luldeq gee: "Hhaoqsongl o, ngael noq e ma'ne yiqsi ae'lye endianq hhamul hhei laq lye nyuqlil. Ngael noq e yaqhacheqzaq e haeqmiyaeq dyel'eiq maeqngeel yil, nol saeziq haelmeeqlye gee laeq mael ngaeq e neemae mael'ae gee do hhei yae."
14 Aelhoq zaeq fu, Boasi Luldeq'ae gee biq: "Nol saeqvae lael, meqziq e aqba teel bael zaeq hhei, kaol aqba mael yo'qyel mael'ae zanl do hhei." Kaol Luldeq meqziq yeq hael dongqpyeq'ae zholgae hhei. Boasi lye pe meeq e meqziq mael teel heilmoq hhei biq. Yoqhhaeq zaeqdye kaol maeq zaeq byel myel za siq. 15 Yoqhhaeq tullael kaol meqziq zaelhhael yol yae yil fu, Boasi yaqhacheqzaq e cholyaeqhael'ae aeqdilmyel gee biq: "Yoqhhaeq meqto kaeqlaeq vae meqziq zaelhhael yaezaeq fu, maeq hhae gaezaeq biq'ae, 16 Baelyaelmyel meqto mael ae'lye aelheel eedu hheikaol beiqgae deelhhei biq, kaol yoqhhaeq'ae bi yaezaeq yil, xilnye haeq zongl lye maeq hhae gaezaeq biq'ae."
Luldeq laoq aeqyo'ae hael puqli biq e silqinqhael Naq'oqmiq'ae geedu biq
17 Luldeq mqkiq'ae keellye haeldye vae meqziq zaelhhael xilnye yaezaeq hhae. Yoqhhaeq yae laeq e meqziq zaelhhael mael diq gae hhei, dalmeq niqqyel niq sen zoqlal maoqmyel wae. 18 Aeqnaol milmae heeqmyel vae heil hoqli. Luldeq yae laeq hael ssuqmae vae heil fu hhei biq, maeq zaeq byel hael ssuqmae vae heilmoq hhei biq. 19 Ssuqmae naelhaeq biq: "Yaeqnao nol haeqvae meqziq zaelhhael yaezaeq lilmaeq? Aeqhael haeqvae mul lilmaeq? Noq'ae fuyo biq e qiq hhaeq'ae geeqlongq meeq li biq lye nyuqlil." Luldeq yoqhhaeq e ssuqmae'ae yoqhhaeq aeqsul zael'ae aeqhaelmul lil lye geegaeq biq, gee: "Ngael yaeqnao Boasi lye gul biq e qiq hhaeq zael'ae aeqhaelmul lil." 20 Naq'oqmiq keeqmae'ae gee biq: "Dyeqdeel e cholyaeqhael kaol sil e cholyaeqhael'ae neemae maeqpaelmyel gaeq biq e Yeheqhuaq, yultaeq vae eiq geeqlongq biq biq lye nyuqlil." Naq'oqmiq yoqhhaeq'ae yol gee biq: "Tyutaeq laoq aedeeteel e paeqyaeq'ae, zaeqdye halngeiq suq duhoq e laqtaq za e paeqyaeq'ae." 21 Moqya milcaeq e yaeqmiyaeq Luldeq gee: "Yoqhhaeq ngaeq'ae gee gol laq siq: 'Ngaeq e yaqhacheqzaq e haeqmiyaeqhael nyegael cho'lyeq deelhhei kaol gilzuqmyel yeqzaeq byel fu keellye, meqziq zaelhhael yaezaeq.'" 22 Naq'oqmiq yoqhhaeq e keeqmae Luldeq'ae gee biq: "Ngaeq e yaeqmiq o, xilnye meeq ngeelvae, yoqhhaeq'ae yaqhacheqzaq e haeqmiyaeqhael nyegael bal yil, ochoq e haeldye vae zhol laol mamoqmoq lalkiq'ae." 23 Luldeq Boasi e yaqhacheqzaq e haeqmiyaeqhael nyegael cho'lyeq deelhhei, dalmeq kaol meqziqhael yeqzaeq byel fu keellye meqziq zaelhhael yaezaeq hhae. Luldeq haeqfu eiq ssuqmae nyegael qiqgael baelzhol hhae.